“අවදානමට වඩා සූදානම යහපත්ය” යන්න කියමනක් පමණක් නොව ජීවමාන යථාර්ථයකි. කොවිඩ් මාරාන්තික වයිරසය මුළු ලෝකයම ආක්‍රමණය කිරීමත් සමඟ එම වැකියේ ජීවමාන යථාර්ථය ප්‍රබලවම ඔප්පු විය. එහෙත් බොහෝ දෙනකුට බොහෝ දේ ඉක්මනින්ම අමතකව යයි. රට තුළ යම් සන්සුන් බවක් ප්‍රදර්ශනය වෙමින් තිබෙන මේ මොහොතේ බොහෝ දෙනකුට වසර දෙකක් පුරා ගෙවා ආ බියකරු දවස් අමතකව ගොස් තිබේ.

ශ්‍රී ලංකා වෛද්‍ය සංගමය ජනාධිපති ගෝඨාභය රාජපක්ෂ මහතාට ලිපියක් යොමු කරමින් සංචරණ සීමා ඉවත් කිරීම සමඟ තවත් කොරෝනා රැල්ලක් ඇති වීමේ දැඩි අවදානමක් ඇති වී ඇති බව දැනුම් දුන්නේය. ශ්‍රී ලංකා වෛද්‍ය සංගමය මෙම දැනුම්දීම සිදු කරනු ලබන්නේ වෛද්‍ය විද්‍යාත්මක සාධක මත පදනම්ව හා ජනයාගේ හැසිරීම් නිරීක්ෂණය කිරීමෙනි. එහෙයින් මෙම අනතුරු ඇඟවීම් සුළුවට ගෙන පහසුවෙන් බැහැර නොකළ යුතුය. අනතුරු ඇඟවීම එයට හිමි පරිමාවෙන්ම හඳුනාගත යුතුය.

කොවිඩ් වසංගතය සාර්ථකව මැඬලූ ඇතැම් රටවල්වලින් අලුතෙන් කොවිඩ් ආසාදිතයන් හඳුනා ගැනෙමින් තිබේ. නවසීලන්තය එක් උදාහරණයකි. සිංගප්පූරුවේ තත්ත්වය ඉතා භයානකය. එරට තුළ අසාමාන්‍ය ආකාරයෙන් කොවිඩ් ආසාදිතයන් වාර්තා වෙමින් පවතින බව මාධ්‍ය වාර්තාවල සඳහන්ය. ඉකුත් 27 වැනිදා දිනයේදී පමණක් එරටින් වාර්තා වී ඇති ආසාදිතයන්ගේ සංඛ්‍යාව 5,324 දෙනෙකි. මෙම සංඛ්‍යාව වසංගතය එරට ආරම්භ වූ අවස්ථාවේ සිට වාර්තා වූ වැඩිම දෛනික ආසාදිතයන් සංඛ්‍යාව බව ද වාර්තා වේ.

කොවිඩ් මාරක වසංගතයේ තත්ත්වය එපරිදිය. රටේ මේ මොහොතේ තත්ත්වය මතුපිටින් යහපත් වුව ද යහපත් යැයි සැලකිය හැකි තත්ත්වයක් නොමැති බව ද අවධාරණය විය යුතුය. අංගොඩ බෝවන රෝග විද්‍යායතනයේ අධ්‍යක්ෂ, වෛද්‍ය හසිත අත්තනායක මහතා අප පුවත්පතට ප්‍රකාශ කර තිබුණේ, එම රෝහලේ කොවිඩ් ආසාදිතයන්ගේ සංඛ්‍යාව හරි අඩකින් පමණ අඩු වී ඇති බවය. දැනට ප්‍රතිකාර ලබන්නේ ආසාදිතයන් සියයකට ආසන්න පිරිසක් පමණක් හෙයින් රෝහලේ පෙර තිබූ තදබදය නැති බව ද ඒ මහතා ප්‍රකාශ කර තිබිණි. කොවිඩ් තෙවැනි රැල්ලේ උච්චතම අවස්ථාවේ රෝහලේ කොවිඩ් ආසාදිතයන් සංඛ්‍යාව 224ක් දක්වා ඉහළ ගිය බව පැවැසූ ඒ මහතා, කොවිඩ් ආසාදිතයන්ගේ සංඛ්‍යාව පහළ බැස ඇතත්, කොවිඩ් අවදානම මුළුමනින්ම පහව ගොස් නැති බව ද අවධාරණය කර තිබිණි.

සෞඛ්‍ය සේවා අධ්‍යක්ෂ ජනරාල්වරයා අප පුවත්පතට ප්‍රකාශ කර තිබුණේ, ඉකුත් 1 වැනිදා පමණක් කොවිඩ් ආසාදිතයන් 566 දෙනකු අලුතෙන් හඳුනාගත් බවය. එදින වාර්තා වූ කොවිඩ් ආසාදිත මරණ සංඛ්‍යාව 10කි. මෙම සංඛ්‍යා ලේඛන ඉතා සැලකිල්ලෙන් අධ්‍යයනය කළ යුතුය.

නියෝජ්‍ය සෞඛ්‍ය සේවා අධ්‍යක්ෂ ජනරාල් හේමන්ත හේරත් මහතා මාධ්‍යයට ප්‍රකාශ කර තිබුණේ, ඕනෑම රෝගයක රෝගීන් වාර්තා වීම් ගැන කියන විට ස්වාභාවිකවම ඉලක්කම් ඉහළ පහළ යන බවය. එහෙයින්, මේ මොහොතේ නිශ්චිතව යමක් ප්‍රකාශ කළ නොහැකි බව ද ඒ මහතා ප්‍රකාශ කර තිබිණි. උදාහරණයක් ලෙස ඒ මහතා පෙන්වා දෙන්නේ, මරණ සංඛ්‍යාව 18ට, 19ට අඩු වී ඊළඟ දිනයේදී 29ට ඉහළ ගිය බවය. යළිත් එය 14ට අඩු වී ඇති බව ද ඒ මහතා පෙන්වා දුන්නේය. කෙසේ වුව ද නොවැම්බර් 1 වැනිදා මරණ සංඛ්‍යාව 18 දක්වා ඉහළ ගොස් තිබූ අතර, රෝගීන්ගේ ගණන 542 මට්ටමේ පැවැතිණි.

රටේ ජනගහනයෙන් ඉහළ ප්‍රතිශතයකට එන්නත් මාත්‍රා දෙකම ලබා දී අවසන්ය. එන්නත සම්බන්ධයෙන් ඇතැම්හු ඉතා වැරැදි මතයක සිටිති. එනම්, “දැන් සියල්ල යහපත්” බවය. තමන්ට කොවිඩ් නොවැළඳෙන බවට සහතික කරගත් විශ්වාසයකින් ඔවුහු පසු වෙති. එහෙත්, කායික රෝග විශේෂඥ වෛද්‍ය ආනන්ද විජේවික්‍රම මහතා මාධ්‍යට ප්‍රකාශ කර තිබුණේ, එන්නත්කරණයෙන් හොඳ ආරක්ෂාවක් ලැබෙන බවය. එහෙත් එයින් සියයට සියයක් ආරක්ෂාව නොලැබෙන බව ද පෙන්වා දෙන ඒ මහතා, එන්නත නිසා කොවිඩ් ආසාදිත වීම හා එය පැතිරීම වැළැක්විය නොහැකි බවය. යුරෝපය එයට උදාහරණයක් බව ද ඒ මහතා පෙන්වා දෙයි.

කරුණු කාරණා ඉතා පැහැදිලිය. ඉතා සිහින් දිය දහරාවක්ව දැනට ගලාගෙන යන කොවිඩ් වයිරසය ඊළඟ මොහොතේ චණ්ඩ ප්‍රචණ්ඩ මහා ප්‍රවාහයක් ලෙස ගලා යාමට ඉඩ ඇත. එම තත්ත්වය අපට බැහැර කළ නොහැකිය. එමෙන්ම දැනට පැතිරෙන කොවිඩ් ප්‍රභේද ඉතා පහසුවෙන් කුඩා දරුවන් ගොදුරු කරගන්නා බව ද වෛද්‍ය විශේෂඥයෝ පෙන්වා දෙති.

අප රට කොවිඩ් රතු කලාපයේ සිට කොළ කලාපයට සීරු මාරු වී ඇති බව සැබෑවකි. එහෙත් කොයි මොහොතේ රතු එළිය දැල්වේ දැයි කිව නොහැකිය. සියලුම දෙනා වගකීමෙන් කටයුතු කළ යුත්තේ එහෙයිනි. විශේෂයෙන්ම සෞඛ්‍යාරක්ෂිත පිළිවෙත් අනුගමනය කිරීම, මුඛ ආවරණ පැළඳීම හා සංචරණ සීමා පනවා ගැනීම අඛණ්ඩව පවත්වාගෙන යා යුතුය. යම් අතපසු වීමකින් වුව ද තමන්ට මෙන්ම තමන්ගේ සමීපතමයන්ට වන්දි ගෙවීමට සිදුවන්නේ මරණයෙන් බව තේරුම්ගත යුතුය. කොවිඩ් ආසාදිතයන් දහතුන් දහසකට අධික සංඛ්‍යාවක් දෙවසරක් තුළ වාර්තා වූ රටක ජීවත්වන පුරවැසියන්ට අනතුරේ බරපතළකම වටහා ගැනීමට අසීරු නොවනු ඇතැයි අපි විශ්වාස කරමු.

(***)