නිරෝධායන නීති උල්ලංඝනය කරමින් රාජගිරියේ නවාතැන්පොළක මත්පැන් සාදයක නිරත වෙමින් සිටි කාන්තාවන් දෙදෙනකු ඇතුළු හත්දෙනකු කොළඹ දකුණ අපරාධ කොට්ඨාසය මගින් අත්අඩංගුවට ගත් බව සඳහන් පුවතක් අප පුවත්පත ඉකුත් දා වාර්තා කළේය. මුළු රටම හුදෙකලා කර තිබියදී ඒ සම්බන්ධයෙන් වගේ වගක් නැතිව මෙම මත්පැන් සාදය පැවැත්වූ පුද්ගලයන් අතර කිරිවත්තුඩුව අසංක නමැති පුද්ගලයා ද සිටින බවත් ඔහු අපරාධ සම්බන්ධයෙන් වරෙන්තු තුනක් ලැබ සිටින පුද්ගලයකු වන බවත් අප ප්‍රවෘත්තියෙහි වැඩිදුරටත් සඳහන්ය. එම ප්‍රධාන සැකකරු සතුව අයිස් මත්ද්‍රව්‍ය ග්‍රෑම් පහක් සහ මත්පැන් බෝතල් ගණනාවක් වූ බවත් ප්‍රවෘත්තියේ සඳහන්ය.

මෙබඳු මාරාන්තික ලෝක ව්‍යාප්ත වසංගතයකදී ආණ්ඩුවකට කළ හැකි වන්නේ එතැන් පටන් සෞඛ්‍ය විශේෂඥයන්ගේ උපදෙස් අනුව රට මෙහෙයවීමය. මාරක වසංගතය මැඩලීමට කළමනාකරණ කටයුතු සංවිධාන කිරීමය. ඒ සඳහා අවශ්‍ය ප්‍රතිපාදන ලබාදීමය. රටට සාර්ථකත්වයට පත්විය හැකි වන්නේ රට හමුවේ ඇති බැරෑරුම් තත්ත්වය වඩාත් හොඳින් අවබෝධ කරගනිමින් එම උපදෙස්වලට අනුව සෑම පුරවැසියකුම ක්‍රියා කරන්නේ නම් පමණි. ආණ්ඩුවකට ජනතාවට පහසුකම් සැපැයිය හැකි වුව ද මොළය ලබාදිය නොහැක. එය තම තම නැණ පමණින් දැනගත යුත්තකි.

ඉකුත් බ්‍රහස්පතින්දා රාත්‍රියේ සිට සඳුදා පෙරවරු 4 දක්වා සංචරණ නීතිය බලගන්වනු ලැබුවේ අලුත් අවුරුදු කොරෝනා පොකුර සිතිවිලිවලට වඩා වේගයෙන් ප්‍රසාරණය වූ හෙයිනි. කොරෝනා ආසාදිත මරණ කණස්සල්ල භීතිය දනවමින් වේගයෙන් ඉහළ යාම හේතුවෙනි. එම තත්ත්වය පාලනය කිරීමට කුමක් හෝ කළ යුතු ‘බැරිම තැන හන්දියකට’ රට පැමිනුණි. සංචරණ නීතිය ආදේශ වූයේ ඒ අනුවය. මංචාඩි කාලක් හෝ මොළයක් සහිත පුරවැසියකු වේ නම් වහාම එම තත්ත්වය තේරුම් ගෙන ඒ අනුව තම හැසිරීම් පාලනය කරගනු ලබයි. එහෙත් වරෙන්තු තුනක් සහිත අපරාධකරුවකු බව කියන පුද්ගලයා සිදු කර තිබෙන්නේ කාන්තාවන් හා පිරිමින් ඒකරාශි කරගනිමින් මත්පැන් හා මත්ද්‍රව්‍ය සාදයක් පැවැත්වීමය.

බෞද්ධයාගේ පරම පූජනීය දිනය වන්නේ වෙසක් පුර පසළොස්වක පොහෝ දිනය වේ. ඉතිහාසයක් පුරාම මෙරට බොදුනු නොබොදුනු ජනයා වෙසක් උළෙල අතිඋත්කර්ෂවත් ලෙස සමරති. එහෙත් ත්‍රෛනිකායික මහනාහිමිවරු නිවේදනයක් නිකුත් කරමින් කොරෝනා වසංගත තත්ත්වය හේතුවෙන් මෙවර වෙසක් පුර පසළොස්වක පොහෝ දිනයේ දී විහාරස්ථාන හා ඉන් පිටත ස්ථානවල ජනතාව ඒකරාශි වන දාන, ශීල, භාවනා ආදී පින්කම්, වෙසක් තොරණ ආදිය සංවිධාන නොකර සෞඛ්‍ය නිර්දේශ අනුව තම තමන්ගේ නිවෙස්වලම රැඳී සිටිමින් ප්‍රතිපත්ති පූජාවන්හි නිරත වන්නැයි ජනතාවගෙන් ඉල්ලා සිටියහ.

අන්තවාදී උම්මත්තකයකු වන සහරාන් නිසා 2019 වෙසක් මංගල්‍යය අපට අහිමිව ගියේය. කොරෝනා මාරාන්තික වයිරසය නිසා 2020 වෙසක් මංගල්‍යය අපට අහිමිව ගියේය. මෙවර ද එය සිදුව තිබේ. රට තුළ පවතින බැරෑරුම් තත්ත්වය සැලකිල්ලට ගනිමින් සම සිතින් මේ සියල්ල උපේක්ෂාවෙන් දරා ඉවසා සිටිය යුතු වේ.

අතිගරු මහනායක ස්වාමීන්ද්‍රයන් වහන්සේලාගේ ඉල්ලීම අතිශයින්ම වැදගත්ය. වසන්තයෙන් පසුව වසංගතය පැමිණෙන බව නොදැනුණු අවිචාරවත් සුළුතරයක් නිසා රට තුළ කොරෝනා තුන්වැනි රැල්ල ඇරැඹුණි. මෙවර රට ආක්‍රමණය කර තිබෙන්නේ මෙතෙක් මෙරටට පැමිණි පන්නයේ කොරෝනා වයිරසයක් නොව ඊට වඩා භයානක විකෘති ප්‍රබේදයක් බව සෞඛ්‍ය විශේෂඥයෝ පුන පුනා කීහ. එම තුන්වැනි රැල්ලේදී කොරෝනා ආසාදිත මරණ සංඛ්‍යාව ඉහළ යාමෙන්ම ඒ බව මනාව ඔප්පු වේ. එහෙත් තම තමන්ගේ මනස්වල දිග පළලට අනුව පමණක් සිතන මතන තීන්දු තීරණ ගන්නා සාමූහික විචාර බුද්ධියෙන් පිරිහුණු පිරිස ඒ අනතුරු ඇඟවීම නොතැකූහ. අද මේ අනතුර එහි ප්‍රතිඵලය විනා අන් යමක් නොවේ.

‘ගිය නුවණ ඇතුන් ලවාවත් ඇද්දවිය නොහැක’ එය ඒකාන්ත සත්‍යයකි. එහෙත් වැරැදි නිවැරැදි කරගැනීමේ ඉඩකඩක් ද වේ. එම ඉඩකඩ නිසි පරිදි ප්‍රයෝජනයට ගන්නේ නම් මේ සැහැසි ග්‍රහණයෙන් මිදීමට එය හේතුවකි. එළැඹ ඇති පැය වෙන් කළ යුතු වන්නේ ඒ වෙනුවෙනි.

වෙසක් මංගල්‍යය නිවෙස් තුළම රැඳී සිට සමරන්නැයි අතිගරු මහනායක ස්වාමීන්ද්‍රයන් වහන්සේලා විසින් සිදු කරනු ලැබ ඇති ඉල්ලීම නමස්කාර පූර්වකව පිළිගැනීම බෞද්ධයන්ගේ වගකීමය. මෙවර වෙසක් උළෙල සකල ජනී ජනයාගේ ජීවත් වීමේ උරුමය වෙනුවෙන් කැප කරන්නේ නම් මෙතැන් සිට එළැඹෙන සෑම වෙසක් මංගල්‍යයක්ම උත්කර්ෂවත් ලෙස සැමරීමේ අවස්ථාව අපට හිමිවනු නියතය.

(***)