2023 සැප්තැම්බර් 5 වැනිදා අඟහරුවාදා බ්‍රිතාන්‍යයේ “චැනල් 4” රූපවාහිනී නාළිකාව ඔවුන්ගේ “ඩිස්පැචස්” වැඩසටහන ඔස්සේ “ශ්‍රී ලංකාවේ පාස්කුදා බෝම්බ ප්‍රහාර” නමින් වාර්තා චිත්‍රපටය විකාශය කළ විට මෙම කුමන්ත්‍රණ න්‍යායට දැවැන්ත ප්‍රචාරයක් ලැබුණි. තමිල් මක්කල් විඩුතලයිප් පුලිගල් (ටී.එම්.වී.පී.) නායක සිවනේසතුරෙයි චන්ද්‍රකාන්තන් හෙවත් පිල්ලයියන්ගේ හිටපු ලේකම් සහ ටී.එම්.වී.පී. පක්ෂයේ හිටපු මාධ්‍ය ප්‍රකාශක මොහොමඩ් මිල්හිලර් මොහොමඩ් හන්සීර් හෙවත් අසාද් මවුලානා ඔහුගේ හිටපු ලොක්කා පිළිබඳ මතභේදාත්මක හෙළිදරව් කිරීම් සිදු කළ තැනැත්තා (විසිල්බ්ලෝවර් - Whistleblower) විය.

ඔක්ස්ෆර්ඩ් ශබ්දකෝෂය “විසිල්බ්ලෝවර්” යන්න අර්ථ දක්වන්නේ “සාමාන්‍යයෙන් යමකු සේවය කරන සංවිධානය විසින් හෝ ඇතුළත සිදු කරන ලදැයි කියන වැරදි ක්‍රියා පිළිබඳ ප්‍රසිද්ධ තොරතුරු සපයයි නම් ඔහු විසිල්බ්ලෝවර් කෙනෙකි” යනුවෙනි. විසිල්බ්ලෝවර් රහසින් තොරතුරු හෙළිදරුව් කරන්නේ මාධ්‍යවේදීන්ටය. කේම්බ්‍රිජ් ශබ්දකෝෂය “විස්ල්බ්ලෝවර් කෙනකු” යන්න විස්තර කරන්නේ “විශේෂයෙන් රජයේ දෙපාර්තමේන්තුවක හෝ සමාගමක සිදුවන නීති විරෝධී දෙයක් ගැන අධිකාරියේ සිටින කෙනකුට පවසන පුද්ගලයකු” ලෙසයි.

යුරෝපයට පලා ගොස් ස්විට්සර්ලන්තයේ දේශපාලන රැකවරණ පැතූ අසාද් මවුලානා නැගෙනහිර පළාතේ මරුතමුනෙයි හි පදිංචිකරුවෙකි. පිල්ලයාන් සහ හිටපු රාජ්‍ය බුද්ධි සේවා ප්‍රධානී මේජර් ජෙනරාල් සුරේෂ් සලේ පාස්කු බෝම්බකරුවන් සමඟ සම්බන්ධතා පැවැත්වූ බවත්, කුමන්ත්‍රණයට සම්බන්ධ බවත් අසාද් මවුලානා චෝදනා කරයි. පිල්ලයාන් සහ සලේ යන දෙදෙනාම වහාම චෝදනා ප්‍රතික්ෂේප කළහ.

අසාද් මවුලානා විසින් කරන ලද චෝදනාවලට හිටපු ජනාධිපති ගෝඨාභය රාජපක්ෂ ද ප්‍රසිද්ධ ප්‍රකාශයක් නිකුත් කරමින් ප්‍රතිචාර දැක්වීය. පාස්කු බෝම්බ ප්‍රහාර එල්ල කළේ තමන් (ගෝඨා) බලයට ගෙන ඒම සඳහා බවට චැනල් 4 රූපවාහිනී නාලිකාව එල්ල කළ චෝදනාව ප්‍රධාන වශයෙන් පදනම් වී ඇත්තේ අසාද් මවුලානා විසින් කරන ලද චෝදනා මත බව එම ප්‍රකාශයේ දී ගෝඨාභය පෙන්වා දුන්නේය. පහත දැක්වෙන්නේ එම ප්‍රකාශයෙන් උපුටා ගත් කොටස් ය:

“චැනල් 4 නාළිකාව විසින් විකාශනය කරන ලද ශ්‍රී ලංකාව පිළිබඳ නවතම චිත්‍රපටයෙන් එල්ල කර ඇති කේන්ද්‍රීය චෝදනාව වන්නේ, 2019 අප්‍රේල් 21 වැනි දින ඉස්ලාමීය අන්තවාදීන් විසින් සිදු කරන ලද පාස්කුදා ඉරිදා මරාගෙන මැරෙන බෝම්බ ප්‍රහාරය, 2019 නොවැම්බර් මාසයේදී මා බලයට පත් කිරීමේ කොන්දේසි නිර්මාණය කිරීම සඳහා හිතාමතාම පහසුකම් සපයන ලද බවයි”.

“යුරෝපයේ දේශපාලන රැකවරණ සඳහා අයදුම්කරුවකු වන හන්සීර් අසාද් මවුලානා විසින් කරන ලද ප්‍රකාශ මත මෙම චෝදනාව රඳා පවතින්නේ, ඔහු 2018 පෙබරවාරි මාසයේදී ප්‍රධාන මරාගෙන මැරෙන බෝම්බකරු සහරාන් සහ ඔහුගේ සහෝදර සයිනි මවුලවි වෙත මේජර් ජෙනරාල් සුරේෂ් සලේ (හමුදා බුද්ධි අධ්‍යක්ෂවරයා ලෙස ඔහුගේ අතීත භූමිකාව සඳහා වඩාත් ප්‍රසිද්ධය) හඳුන්වා දුන් බවට කරන චෝදනාව මතයි”.

 පාස්කු බෝම්බ ප්‍රහාරය පිළිබඳ උද්‍යෝගය

2019 පාස්කු බෝම්බ ප්‍රහාරය පිළිබඳව ශ්‍රී ලංකාව තුළ මේ වන විට විශාල උද්‍යෝගයක් මතුව ඇත. ත්‍රස්තවාදය වැළැක්වීමේ පනත යටතේ ටී.එම්.වී.පී. නායක පිල්ලෙයාන් අත්අඩංගුවට ගෙන රඳවා තබා ගැනීම සහ 2019 අප්‍රේල් 21 ප්‍රහාර පිළිබඳ තොරතුරු පිල්ලෙයාන් හෙළි කරන බවට රජයේ අමාත්‍යවරුන් දිනපතා කරන ප්‍රකාශ හේතුවෙන් මෙම උද්‍යෝගය තවදුරටත් වැඩි කරයි. සමහරු පිල්ලෙයාන් පාස්කු බෝම්බ ප්‍රහාරය පිටුපස සිටින මහ මොළකරු ලෙස පවා නිරූපණය කරති.

ඒ සමඟම, අසාද් මවුලානාම ශ්‍රී ලංකාවේ විනිශ්චය සභාවක සාක්ෂි දෙමින් සහ නීතිඥයන් ඔහුගෙන් හරස් ප්‍රශ්න අසන විට, අසාද් මවුලානා විසින් කරන ලද චෝදනා අධිකරණයකදී ඔප්පු කිරීම ප්‍රායෝගිකව නිෂ්ඵල වනු ඇති බවට අවබෝධය වැඩිවෙමින් පවතී. ඔහුට මෙය දුර සිට විද්‍යුත් ක්‍රම මගින් ද කළ හැකිය. එබැවින් බොහෝ අය, විශේෂයෙන් කතෝලික පල්ලියේ සමහර නියෝජිතයෝ, අසාද් මවුලානා එක්සත් රාජධානියේ චැනල් 4 රූපවාහිනියට පැවසූ දේ සම්බන්ධයෙන් ප්‍රශ්න කළ යුතු හෝ විමර්ශනය කළ යුතු බව දැන් ඉල්ලා සිටිති.

මෙහි ඇති ගැටලුව වන්නේ, ශ්‍රී ලංකා අධිකරණ පද්ධතිය සමඟ පමණක් සහයෝගයෙන් කටයුතු කිරීමට අසාද් මවුලානා කැමති නොවීමයි. ඔහු සාක්ෂි දීමට කැමැත්තෙන් සිටින්නේ ස්වාධීන ජාත්‍යන්තර පරීක්ෂණයක් ඉදිරියේ පමණි. අසාද් මවුලානා චැනල් 4 නාළිකාවේ සහ ජිනීවාහි පැවති ප්‍රසිද්ධ රැස්වීමකදී කළ ප්‍රකාශ පිළිබඳව විස්තරාත්මකව අවධානය යොමු කරන විට, අසාද් මවුලානා ඔහුගේ දෘෂ්ටිකෝණය පැහැදිලිව ප්‍රකාශ කරයි. ඔහු පැවසුවේ මෙයයි: “ශ්‍රී ලංකාවේ ත්‍රස්තවාදී ප්‍රහාර, දේශපාලන ඝාතන සහ පැහැරගැනීම් කිහිපයක් සැලසුම් කිරීම සම්බන්ධයෙන් සාක්ෂිකරුවකු ලෙස, මෙම අපරාධ පිළිබඳ පරීක්ෂණවලදී සාක්ෂි දීමට මම කැමැත්තෙමි. කෙසේ වෙතත්, ශ්‍රී ලංකාවේ බලධාරීන්ට සත්‍යය හෙළි කිරීමට උනන්දුවක් ඇති බව මම විශ්වාස නොකරමි. එබැවින් මම සාක්ෂි දෙන්නේ ජාත්‍යන්තර ස්වාධීන පරීක්ෂණයක් ඉදිරියේ පමණි.”

“ගෝඨා ජයග්‍රහණය කරවීම සඳහා පාස්කු බෝම්බ ප්‍රහාර” කුමන්ත්‍රණ න්‍යාය ඔප්පු කිරීමට හෝ ප්‍රතික්ෂේප කිරීමට අසාද් මවුලානාගේ සාක්ෂියේ ඇති වැදගත්කම වැඩි වැඩියෙන් පිළිගැනීමත් සමඟ, අසාද් මවුලානාගේ පෞරුෂය සහ පෞද්ගලික ඉතිහාසය පිළිබඳව විශාල උනන්දුවක් මතුව ඇත. පාඨකයන් කිහිප දෙනකු ද වැඩි විස්තර ඉල්ලා තිබුණි. මෙම සතියේ මෙම ලිපියෙන් අසාද් මවුලානා ලෙස හැඳින්වෙන මිනිසාගේ අතීත ඉතිහාසය පෙර ලේඛනවල ආධාරයෙන් නැවත සලකා බලන්නේ මෙම පසුබිම තුළ ය.

 මොහොමඩ් මිල්හිලර් මොහොමඩ් හන්සීර්

හන්සීර් අසාද් මවුලානා නමින් හැඳින්වෙන පුද්ගලයා නැගෙනහිර පළාතේ මරුතමුනෙයිහි උපන් අයෙකි. මරුතමුනෙයි යනු කොළඹ සිට කිලෝමීටර් 360 ක් පමණ දුරින් පිහිටි, ප්‍රධාන වශයෙන් මුස්ලිම් වෙරළබඩ නගරයකි. එය අම්පාර දිස්ත්‍රික්කයේ කල්මුනේ මැතිවරණ කොට්ඨාසයේ කොටසකි. හන්සීර්ගේ පියා මොහොමඩ් අලියාර් මොහොමඩ් මිහිලර් ය. හන්සීර් ට උපතේදී දෙන ලද නම මොහොමඩ් මිල්හිලර් මොහොමඩ් හන්සීර් ය. අසාද් මවුලානා යනු ඔහුගේ සැබෑ නම නොවේ. එය තමිල් මක්කල් විදුතලප් පුලිගල් (ටී.එම්.වී.පී.) පක්ෂයට සම්බන්ධ වීමෙන් පසු ඔහු හදාගත් සටන් නාමයකි.

හන්සීර්ගේ පියා මිහිලර්ද ඔහුගේ දේශපාලන චින්තනයෙන් වාමාංශිකයෙක් විය. ඔහු දෙමළ ප්‍රජාවේ සාමාජිකයන් සමඟ, විශේෂයෙන් යාබද පාණ්ඩිරුප්පු දෙමළ ගම්මානයේ අය සමඟ හොඳින් ඇසුරු කළේය. දෙමළ සටන්කාමී සංවිධානයක් වන ඊළාම් ජනතා විප්ලවවාදී විමුක්ති පෙරමුණට (ඊ.පී.ආර්.එල්.එෆ්) පාණ්ඩිරුප්පු හි ශක්තිමත් පැවැත්මක් තිබුණි. මිහිලර්, 1983 ජූලි දෙමළ විරෝධී සංහාරයට පෙර සිටම ඊ.පී.ආර්.එල්.එෆ් සංවිධානයේ සාමාජිකයකුවීමට මෙය හේතු විය.

 ඊ.පී.ආර්.එල්.එෆ්. මිහිලර් හෙවත් කමලන්

“කළු ජූලියෙන්” පසු ඉන්දියාවට ගිය මිහිලර් තමිල්නාඩුවේ කුඹකෝනම් හි ඊ.පී.ආර්.එල්.එෆ් කඳවුරේදී අවි පුහුණුව ලබා ගත්තේය. ඊ.පී.ආර්.එල්.එෆ් සංවිධානය මිහිලර්ට ලබා දුන් නම වූයේ “කමලන්” ය. ඉන්පසු ඔහු අම්පාර දිස්ත්‍රික්කයේ ඊ.පී.ආර්.එල්.එෆ් සංවිධානය සඳහා සේවය කළ අතර, පසුව ඔහු මධ්‍යම කමිටුවටද පත් කරනු ලැබුණි. 1987 ඉන්දු-ලංකා ගිවිසුම 13 වැනි ආණ්ඩුක්‍රම ව්‍යවස්ථා සංශෝධනය හරහා පළාත් සභා ක්‍රමය ගෙන ආවේය. දෙමළ ඊළාම් විමුක්ති කොටි (එල්.ටී.ටී.ඊ.) මෙන් නොව, ඊ.පී.ආර්.එල්.එෆ් සංවිධානය ඉන්දු - ලංකා ගිවිසුමට සහාය දුන් අතර, උතුරු සහ නැගෙනහිර පළාත්වල පළාත් සභා මැතිවරණ පැවැත්වීම සඳහා ඉන්දියාව සමඟ පූර්ණ සහයෝගයෙන් කටයුතු කළේය.

උතුරු සහ නැගෙනහිර පළාත් දෙකම ඇතුළත් උතුරු-නැගෙනහිර පළාත් සභාව සඳහා පැවති පළමු මැතිවරණයට ඊ.පී.ආර්.එල්.එෆ් පක්ෂයද තරග කළේය. මිහිලාර් ද එහි අපේක්ෂකයෙක් විය. ඔහු ඊ.පී.ආර්.එල්.එෆ් සංවිධානය වෙනුවෙන් ක්‍රියාකාරීව මැතිවරණ ප්‍රචාරක කටයුතුවල නිරත විය. අලුතින් නිර්මාණය කරන ලද ඊළාම් ජාතික ප්‍රජාතන්ත්‍රවාදී විමුක්ති පෙරමුණ (ඊ.එන්.ඩී.එල්.එෆ්.) සමඟ සහයෝගයෙන් ඊ.පී.ආර්.එල්.එෆ්. පක්ෂය විසින් උතුරු - නැගෙනහිර පළාත් සභාවේ පළමු පරිපාලනය පිහිටුවනු ලැබීය. කෙසේ වෙතත් පළමු සහ එකම උතුරු - නැගෙනහිර පළාත් සභාවට තේරී පත් වීමට මිහිලාර් ට නොහැකි විය.

උතුරු - නැගෙනහිර පළාත් සභාවේ පළමු මහ ඇමතිවරයා බවට පත්වූයේ අන්නමලෙයි වර්තරාජප්පෙරුමාල් ය. ත්‍රිකුණාමලයට ගිය මිහිලර්, පළාත් සභා කාර්යාලයේ නිලධාරියකු ලෙස සේවය කළේය. 1990 මාර්තු මාසයේදී ඉන්දීය හමුදාව ඉවත් කර ගැනීමෙන් පසුව තත්වය වෙනස් විය. එල්ටීටීඊය අතින් සිදුවන සංහාරයකට බියෙන්, ඊ.පී.ආර්.එල්.එෆ් සංවිධානයේ මුල් පෙළ සාමාජිකයන් බොහෝ දෙනෙක් ඉන්දියාවට පලා ගියහ. මිහිලර් ද ඔවුන්ගෙන් කෙනෙකි.

ඊ.පී.ආර්.එල්.එෆ් සංවිධානයේ ප්‍රියමනාප මහලේකම් කන්තසාමි පද්මනාභ සහ තවත් කාඩර්වරු බොහෝ දෙනෙක් ඔරිස්සා (දැන් ඔඩීෂා) ප්‍රාන්තයට සංක්‍රමණය වූහ. ඔඩීෂාවට ගිය මිහිලර් ද, පද්මනාභගේ ආරක්ෂකයකු ලෙස සේවය කළේය. ඊ.පී.ආර්.එල්.එෆ් සිය ප්‍රධාන කාර්යාලය චෙන්නායි හි කෝඩම්බක්කම් හි චූලයිමෙඩු ප්‍රදේශයේ දිගටම පවත්වාගෙන ගියේය.

පද්මනාභ, 1990 ජුනි 19 වැනි දින චෙන්නායි (එවකට මදුරාසිය) වෙත පැමිණියේය. මිහිලාර් ද ඔහු සමඟ ගියේය. එල්ටීටීඊය පහර දෙන විට පද්මනාභ සිටියේ ශ්‍රී ලංකාවේ සිට පැමිණි ඊ.පී.ආර්.එල්.එෆ් ප්‍රබලයන් කිහිප දෙනකු සමඟ චූලයිමෙඩු හි ඊ.පී.ආර්.එල්.එෆ් කාර්යාලය අසල සැකරියා ජනපදයේ මහල් නිවාසයක සාකච්ඡාවක නිරත වෙමිනි. එම මහල් නිවාසයට කඩාවැදුණු කිරුබන් සහ එක් ඇසක් පමණක් ඇති සිවරාසන්ගේ නායකත්වයෙන් යුත් කොටි කණ්ඩායමක් දිගට හරහට වෙඩි තැබූහ. පද්මනාභ සහ තවත් 12 දෙනෙක් මිය ගියහ. මියගිය අය අතර උතුරු-නැගෙනහිර පළාත් සභාවේ මුදල් අමාත්‍ය කිරුබාහරන්, පාර්ලිමේන්තු මන්ත්‍රී යෝගසංගරි සහ පද්මනාභගේ ආරක්ෂකයා වූ මොහොමඩ් මිහිලාර් හෙවත් “කමලන්” ද වූහ.

 වැඩිමහල් පුත්‍රයා හන්සීර්

මිහිලාර්ට දරුවවෝ හතර දෙනෙක් සිටියහ. ඒ ගැහැනු ළමයින් දෙදෙනෙක් සහ පිරිමි ළමයින් දෙදෙනෙක් වශයෙනි. 1983 දී උපත ලැබූ වැඩිමහල් පුත්‍රයා වන හන්සීර්ට තම පියා අහිමි වන විට වයස අවුරුදු හතකි. ඒ වන විට පවුල දැඩි දුෂ්කරතාවලට මුහුණ දී සිටියේය. ඒ දිනවල ඊ.පී.ආර්.එල්.එෆ්. සංවිධානය සතුව භාරකාර අරමුදලක් තිබූ අතර, එයින් සන්නද්ධ හමුදා හෝ එල්.ටී.ටී.ඊ. වැනි වෙනත් සටන්කාමී කණ්ඩායම් විසින් මරා දැමුණු සාමාජිකයන්ගේ පවුල්වලට උපකාර කෙරුණි. මෙම මූල්‍ය ආධාරය එවකට පවුලට මහත් උපකාරයක් විය. පසුව හන්සීර්ගේ මව නැවත විවාහ වූවාය.

මොහොමඩ් හන්සීර් අධ්‍යාපනය ලැබුවේ මරුතමුනෙයි ෂම්ස් මධ්‍ය මහා විද්‍යාලයෙනි. ඔහු 2003 වසරේදී කෘෂිකර්මාන්තය පිළිබඳ උපාධියක් හැදෑරීම සඳහා පේරාදෙණිය විශ්වවිද්‍යාලයට ඇතුළත් වූ දීප්තිමත් ශිෂ්‍යයෙක් විය. උසස් අධ්‍යාපනය හැදෑරීමේදී මූල්‍යමය දුෂ්කරතා හේතුවෙන් හන්සීර් උපකාර පතා ඩග්ලස් දේවානන්ද වෙත හැරුණේය. ඊ.පී.ආර්.එල්.එෆ් සංවිධානයෙන් කැඩී ගිය ඩග්ලස් එවකට ඊළාම් මහජන ප්‍රජාතන්ත්‍රවාදී පක්ෂයේ (ඊපීඩීපී) නායකයා විය.

 ඩග්ලස් දේවානන්ද

කෙසේ වෙතත්, ඩග්ලස් දේවානන්ද ඊ.පී.ආර්.එල්.එෆ්. සංවිධානයේ සිටියදී මහජන විමුක්ති හමුදාව ලෙස හැඳින්වෙන ඊ.පී.ආර්.එල්.එෆ්. හමුදා අංශයේ අණදෙන නිලධාරියාද විය. හන්සීර්ගේ පියා මිහිලර්/කමලන් ද ඩග්ලස් සමඟ සමීප ඇසුරක් පවත්වාගෙන ගොස් තිබුණි. එබැවින් මිහිලර්ගේ පුතා ඔහුගේ උදව් ඉල්ලා සිටි විට, ඊපීඩීපී නායකයාට හැඟුණේ ඔහුගේ පැරැණි සන්නද්ධ සගයාගේ පුතාට උදව් කළ යුතු බවයි.

ඊපීඩීපී සංවිධානය ඒ වන විට “තිනමුරසු” නමින් සතිපතා පුවත්පතක් ප්‍රකාශයට පත්කළේය. හන්සීර්ට “තිනමුරසු” පුවත්පතේ රැකියාවක් ලබා දීමට ඩග්ලස් පියවර ගත්තේය. හන්සීර් මොහොමඩ් දෙමළ සහ ඉංග්‍රීසි භාෂාව චතුර ලෙස දැන සිටියේය. හොඳ කියවන්නකු වූ හන්සීර් හොඳ දෙමළ භාෂා ලේඛකයෙක් විය. ඔහු ඉංග්‍රීසියෙන් දෙමළට පරිවර්තනය කිරීමට ද සමත් විය. එබැවින් මොහොමඩ් හන්සීර් පේරාදෙණියේ උසස් අධ්‍යාපනය හදාරන අතරතුර, තිනමුරසු හි සේවය කිරීමට පටන් ගත්තේය. සතියකට දින හතරක් පමණක් දේශන පැවැත්වූ බැවින්, හන්සීර් දින තුනක් කොළඹ නැවැතී තිනමුරසු පුවත්පතේ සේවය කළේය. ඔහු අන්වර්ථ නාම යටතේ දේශපාලන ලිපි ලියූ අතර, ඉංග්‍රීසියෙන් දෙමළට ප්‍රවෘත්ති සහ ලිපි පරිවර්තනය කළේය.

වසර දෙකකට පමණ පසු විශ්වවිද්‍යාලයෙන් ඉවත් වූ හන්සීර්, ඩග්ලස්ගෙන් රැකියාවක් ඉල්ලා සිටියේය. දේවානන්ද එවකට කැබිනට් අමාත්‍යවරයෙක් විය. ශ්‍රී ලංකා කජු සංස්ථාව ඔහුගේ විෂය පථයට අයත් විය. අම්පාර දිස්ත්‍රික්කයේ හිටපු පාර්ලිමේන්තු මන්ත්‍රී මාර්කණ්ඩු ගුණසේකරන් හෙවත් ශංකර්, කජු සංස්ථාවේ සභාපතිවරයා විය. හන්සීර් සභාපතිවරයාගේ ලේකම් ලෙස පත් කරන ලදී. මාස කිහිපයකට පසු නැවතත් තම අධ්‍යයන කටයුතු ආරම්භ කළ හන්සීර්, අවසානයේ උපාධිය ලබා ගත්තේය. ඔහු සිංහල භාෂාව ද ඉගෙන ගෙන තිබූ අතර දැන් ත්‍රෛභාෂා විය.

 එල්ටීටීඊ සංවිධානයේ ප්‍රධාන බෙදීමක්

මේ අතර, 2004 දී එල්ටීටීඊයේ නැගෙනහිර කලාපීය අණදෙන නිලධාරී විනයාගමූර්ති මුරලිදරන් හෙවත් “කර්නල්” කරුණා, කොටිනායක වේලුපිල්ලේ ප්‍රභාකරන්ගේ නායකත්වයට එරෙහිව කැරලි ගැසූ විට, එල්ටීටීඊය විශාල බෙදීමකට ලක් විය. දිගු කලක් තිස්සේ එල්ටීටීඊ කරුණා කණ්ඩායම ලෙස හැඳින්වූ බිඳී ගිය කණ්ඩායම, ශ්‍රී ලංකා රජය සහ එහි සන්නද්ධ හමුදා සහ බුද්ධි අංශ සමඟ සන්ධානගත විය.

රාජ්‍ය සහාය ඇතිව කරුණා පාර්ශ්වය නැගෙනහිරදී එල්ටීටීඊයට එරෙහිව සටන් කළේය. කරුණාගේ දෙවැනියා වූ පිල්ලෙයාන් (සිවනේසතුරෙයි චන්ද්‍රකාන්තන්) මඩකලපුවේ ක්ෂේත්‍ර අණදෙන නිලධාරියා ලෙස කටයුතු කළේය. තමිල් ඊළාම් මක්කල් විඩුතලයිප් පුලිගල් (ටී.ඊ.එම්.වී.පී.) නමින් දේශපාලන පක්ෂයක් ද පිහිටුවන ලද අතර, පසුව එම නම තමිල් මක්කල් විඩුතලයිප් පුලිගල් (ටී.එම්.වී.පී.) ලෙස වෙනස් කරනු ලැබීය.

2005 නොවැම්බර් මාසයේදී මහින්ද රාජපක්ෂ ජනාධිපති වීමෙන් පසු ඔහු තම සහෝදරයා වන ගෝඨාභය රාජපක්ෂ ආරක්ෂක ලේකම් ලෙස පත් කළේය. නව ආරක්ෂක ලේකම්වරයා එල්ටීටීඊයට එරෙහි යුද්ධයේදී ටී.එම්.වී.පී. ය විශාල වශයෙන් භාවිත කළේය. දේශපාලන-මිලිටරි සංවිධානයක් ලෙස විවෘතව ක්‍රියා කිරීමට ටී.එම්.වී.පී. යට කොළ එළියක් ලැබුණි.

 දෙමළ මක්කල් විඩුතලයිප් පුලිගල්

මොහොමඩ් හන්සීර්ගේ ජීවිතය සම්පූර්ණයෙන්ම පරිවර්තනය වූයේ මේ අවස්ථාවේදීය. 2006 අප්‍රේල් මාසයේදී රැස්වීමක් සඳහා ඩග්ලස් දේවානන්ද විසින් ඔහුව කැඳවනු ලැබීය. දෙමළ මක්කල් විඩුතලයිප් පුලිගල් සංවිධානය ස්වාධීනව දේශපාලන පක්ෂයක් ලෙස කටයුතු කරන බව ඩග්ලස් හන්සීර්ට පැවසීය.

ඩග්ලස්ට අනුව, කරුණාගේ කණ්ඩායම එල්ටීටීඊයෙන් පිටතට පැමිණ දැන් ප්‍රජාතන්ත්‍රවාදී මාවතේ ඉදිරියට යාමට උත්සාහ කරමින් සිටී. ඔවුන්ව දිරිමත් කළ යුතු බවත්, ටීඑම්වීපී නායකත්වයට ඉංග්‍රීසි සහ සිංහල භාෂා ප්‍රවීණතාවයක් නොමැති නිසා ටීඑම්වීපීයට හන්සීර් වැනි අයගේ සහයෝගය සහ උපකාර අවශ්‍ය බවත් ඊපීඩීපී නායකයා හන්සීර්ට පැවසුවේය. ටීඑම්වීපීයට උදව් කරනවාද කියාඔහු හන්සීර්ගෙන් විමසුවේය.

මදුරාසියේදී තම පියා ඝාතනය කළ එල්ටීටීඊ සංවිධානයට හන්සීර් වෛර කළේය. නැගෙනහිර විවිධ ස්ථානවල මුස්ලිම්වරුන් අමු අමුවේ සමූලඝාතනය කළ සහ උතුරේ මුස්ලිම්වරුන් තුවක්කු පෙන්වා පළවා හරින ලද එල්ටීටීඊ සංවිධානය ඔහු සැළකුවේ ෆැසිස්ට් සංවිධානයක් ලෙසිනි. ටීඑම්වීපී පක්ෂය එල්ටීටීඊ සංවිධානයෙන් වෙන් වී එයට එරෙහිව සටන් කරමින් සිටි බැවින්, හන්සීර් ටීඑම්වීපී සමඟ වැඩ කිරීමට එකඟ විය. මෙය ඔහුගේ පියා වෙනුවෙන් පළිගැනීමේ ඔහුගේ ක්‍රමය විය.

ඉන්පසු දේවානන්ද විසින් රැස්වීමක් සංවිධානය කරන ලද අතර, එහිදී හන්සීර් ටී.එම්.වී.පී. නායක කරුණා සහ නියෝජ්‍ය නායක පිල්ලයාන් හමුවිය. හමුව හොඳින් සිදු විය. කරුණා සහ පිල්ලයාන් යන දෙදෙනාම හන්සීර්ට ක්ෂණිකව කැමති වූහ. සපයන ලද සේවා සඳහා මාසික දීමනාවක් ගෙවීමට කටයුතු කරන ලද අතර, එකඟ වූ මුදල ඉලක්කම් පහක එකක් විය. මොහොමඩ් හන්සීර් ටී.එම්.වී.පී. ය සමඟ එක් වූයේ ඒ ආකාරයෙනි.

 අන්වර්ථ නාමය “අසාද් මවුලානා”

මුලදී හන්සීර්ට අන්වර්ථ නමක් භාවිත කිරීමට සිදු විය. ඔහුට තමාට නමක් තෝරා ගැනීමට යම් කාලයක් ඉල්ලා සිටියේය. හන්සීර් පසුව අසාද් මවුලානා යන නම තෝරා ගත්තේය. මවුලානා යන නමේ තේරුම “අපගේ ස්වාමියා” යන්නයි.

එය අනාගතවක්තෘවරයාගෙන් පැවත එන්නන් ලෙස සැලකෙන අයවද හැඳින්වීමට යොදා ගැනෙයි. කෙසේ වෙතත්, ප්‍රායෝගිකව අනාගතවක්තෘවරයාගෙන් පැවත එන්නන් නොවන අය ද එම නම භාවිත කිරීමට නැඹුරු වෙති. බොහෝ දෙනෙක් එයට සෙයිද් යන නම උපසර්ගයක් ලෙස එකතු කරති.

ශ්‍රී ලංකාවේ මවුලානා යන නම ඇති මුස්ලිම් දේශපාලනඥයන් රැසක් සිට ඇති අතර, හිටපු අමාත්‍ය අලවි මවුලානා, මඩකලපුවේ හිටපු පාර්ලිමේන්තු මන්ත්‍රී අලි සහීර් මවුලානා සහ හිටපු සෙනෙට් සභික මෂූර් මවුලානා යන අයද හංසීර් මෙන්ම මරුතමුනෙයි හි පදිංචිකරුවෝ වෙති.

හන්සීර් සම්බන්ධයෙන් ගත් කල, අසාද් මවුලානා යන නම තෝරා ගැනීමේදී ශ්‍රේෂ්ඨ ඉන්දියානු අධ්‍යාපනඥයකු සහ නිදහස් සටන්කරුවකු වූ මවුලානා අබුල් කලාම් අසාද්ගෙන් ආභාසය ලබා ඇත. ඔහු සාමාන්‍යයෙන් මවුලානා අසාද් හෝ අසාද් මවුලානා ලෙස හැඳින්වේ.

අසාද් පකිස්ථානය නිර්මාණය කිරීමට විරුද්ධ වූ අතර, හින්දු-මුස්ලිම් සමගියේ සංකේතයක් විය. ටී.එම්.වී.පී. සාමාජිකත්වය මූලික වශයෙන් හින්දු වූ නිසාත්, මුස්ලිම්වරයකු වන හන්සීර් හින්දු සහෝදරවරුන් සමඟ සමීපව කටයුතු කිරීමට යන නිසාත්, මුස්ලිම් හන්සීර් වඩාත් අර්ථවත් ලෙස අසාද් මවුලානා යන නම තමා වෙනුවෙන් තෝරා ගත්තේය.

 ටී.එම්.වී.පී. යේ රාජකාරි

ටී.එම්.වී.පී. පක්ෂයේ අසාද් මවුලානා ලෙස දැන් හඳුන්වන මොහොමඩ් හන්සීර්ගේ රාජකාරි තුන් ගුණයකින් වැඩිවිය. ඔහුට දෙසතියකට වරක් පළවන “තමිල් අලයි” දෙමළ පුවත්පතේ මාධ්‍යවේදියකු ලෙස සේවය කිරීමට සිදු විය. ජනවාර්ගික අර්බුදය කෙරෙහි විශේෂ අවධානයක් යොමු කරමින් ටී.එම්.වී.පී. පක්ෂයේ තරුණ සාමාජිකයන්ට ශ්‍රී ලංකාවේ දේශපාලන ඉතිහාසය ඉගැන්වීමට ඔහුට සිදු විය. වඩාත්ම වැදගත් දෙය නම් ඔහු ටී.එම්.වී.පී. පක්ෂයේ මාධ්‍ය ප්‍රකාශක ලෙස පත් කිරීමයි. හන්සීර් දෙමළ සහ ඉංග්‍රීසි භාෂාව පිළිබඳ ප්‍රවීණයකු වූ අතර, සිංහල භාෂාවද යම්තාක් දුරට චතුර ලෙස කතා කළේය.

අසාද් මවුලානා ඉක්මනින්ම මාධ්‍ය සම්මුඛ සාකච්ඡා ලබා දෙමින් සහ මාධ්‍ය සාකච්ඡා පවත්වමින් පක්ෂයේ ප්‍රසිද්ධ චරිතයක් බවට පත්විය. ඔහු ටී.එම්.වී.පී. පක්ෂයේ පොදු මුහුණ ද විය. කාලය ගෙවී යත්ම රජය, රජයේ නිලධාරීන්, සන්නද්ධ හමුදා සාමාජිකයන් සහ බුද්ධි සේවා නිලධාරීන් සමඟ කටයුතු කිරීමේදී ටී.එම්.වී.පී. නායක කරුණා පරිවර්තකයකු ලෙස අසාද් මවුලානා භාවිත කිරීමට පටන් ගත්තේය. ඒ සමගම අසාද් මවුලානාගේ බලපෑම සහ වැදගත්කම වර්ධනය වූ අතර ඔහු ටී.එම්.වී.පී. පක්ෂයේ අනිවාර්ය අංගයක් බවට පත්විය.

පානදුරේ පිහිටි ඔහුගේ නිවසේ සිට නාරාහේන්පිට පිහිටි ටී.එම්.වී.පී. දෙමහල් කාර්යාල පරිශ්‍රයට යන ලෙස පක්ෂය ඔහුගෙන් ඉල්ලා සිටියේය. ඔහුගේ මාසික දීමනාව වැඩි කිරීමට අමතරව, ටී.එම්.වී.පී. පක්ෂය විසින් අසාද් මවුලානාට ඔහුගේ භාවිතය සඳහා ජංගම දුරකතන දෙකක් සහ යතුරුපැදියක් ලබා දෙනු ලැබීය. එසේම ඔහු ටී.එම්.වී.පී. පක්ෂ ධූරාවලියට අන්තර්ග්‍රහණය කර මධ්‍යම කාරකසභිකයකු බවට පත් කළේය. නිල ප්‍රකාශක වීමට අමතරව, ඔහු ටී.එම්.වී.පී. මාධ්‍ය ලේකම් ලෙසද පත් කෙරුණි.

පිල්ලෙයාන්ට සම්බන්ධ වීම

2007 වසරේදී ටීඑම්වීපී පක්ෂය තුළ අභ්‍යන්තර කුමන්ත්‍රණයක් සිදු වූ අතර, එහි ප්‍රතිඵලයක් ලෙස කරුණා බලයෙන් පහ කරනු ලැබුණි. පිල්ලෙයාන් පක්ෂයේ නව නායකයා බවට පත්විය. ඔහුටද අසාද්ගේ සේවයද අවශ්‍ය වූ අතර, අසාද් මවුලානා පිල්ලෙයාන් සමග එකතු විය.

2008 දී නැගෙනහිර පළාත් සභා මැතිවරණය පැවැත්විණි. ටීඑම්වීපී පක්ෂය තරග කළේ එක්සත් ජනතා නිදහස් සන්ධානයේ කොටසක් ලෙසය. අනපේක්ෂිත පියවරකින් පිල්ලෙයාන් නැගෙනහිර පළාතේ පළමු මහ ඇමතිවරයා බවට පත්විය. ටීඑම්වීපී ප්‍රකාශක සහ මාධ්‍ය ලේකම් ධුරයට අමතරව අසාද් මවුලානා ඔහුගේ සම්බන්ධීකරණ ලේකම් ලෙස පත් කිරීමට පිල්ලෙයාන් පියවර ගත්තේය.

පිල්ලෙයාන්ට දෙමළ නොවන අය සමඟ සන්නිවේදනය කිරීමට අසාද් මවුලානාගේ සහාය අවශ්‍ය වූ බැවින්, මරුතමුනෙයිහි තරුණ මුස්ලිම් පිරිමි ළමයා පිල්ලෙයාන්ට අත්‍යවශ්‍ය පුද්ගලයෙක් විය. පිල්ලෙයාන්ගේ “මරියා” ගීතයේ “බැටළු පැටවා” මවුලානා විය. එම ළමා ගීතයේ එන වචනවල මෙන්, “මරියා (පිල්ලෙයාන්) ගිය සෑම තැනකම, බැටළු පැටවා (අසාද් මවුලානා) අනිවාර්යයෙන්ම යා යුතුය. අසාද් මවුලානා පිල්ලෙයාන්ගේ දකුණු අත සහ සර්වබලධාරී බවට පත්විය.

පිල්ලෙයාන් ඔහුගේ “දෙමළ” නියෝජනයන්ට වඩා “මුස්ලිම්” හන්සීර් විශ්වාස කළේය. මෙය සමහරුන්ගේ කෝපයට හේතු විය. ශ්‍රී ලංකා බුද්ධි අංශ සෑම මසකම ටී.එම්.වී.පී. පක්ෂය වෙත රුපියල් ලක්ෂ 35 ක් ගෙවන විට, ටී.එම්.වී.පී. පක්ෂය වෙනුවෙන් එය නිතිපතා ලබාගත්තේ මවුලානා ය. ඇතැම් විට ටී.එම්.වී.පී. පක්ෂයේ මුදල් විශාල ප්‍රමාණයක් තැන්පත් කරනු ලැබුවේ හන්සීර්ගේ පෞද්ගලික බැංකු ගිණුමටය.

මඩකලපුව පාර්ලිමේන්තු මන්ත්‍රී ජෝසප් පරරාජසිංහම් ඝාතනය සම්බන්ධයෙන් පිල්ලෙයාන් වසර පහකට වැඩි කාලයක් සිරගතව සිටියදී, අධිකරණ අවසරය ඇතිව සෑම සෙනසුරාදාවකම පිල්ලෙයාන් බැලීමට ගියේ අසාද් ය. ටීඑම්වීපී කවයන් තුළ සිදුවන දේ මවුලානා විසින් පිල්ලෙයාන්ට දැනුම් දුන් අතර, පිල්ලෙයාන්ගේ උපදෙස් පක්ෂ සාමාජිකයන්ට ද ලබා දුන්නේය. පිල්ලෙයාන්ගේ නඩුව සම්බන්ධයෙන් සියලු නීතිමය කටයුතු සම්බන්ධීකරණය කළේ ද මවුලානා විසිනි.

ඉලක්කම් හතක ආදායම

හන්සීර් විවාහ වූයේ පානදුරේ ඔහුගේ ඥාතියකු වන ෆාතිමා සමඟය. ඔවුන්ට අයේෂා නමින් දියණියක් සහ මුබාරක් නමින් පුතෙක් සිටී. පවුල දෙහිවල එබනේසර් පෙදෙසේ පදිංචිව සිටියේය. පිල්ලෙයාන්ගේ නියෝජ්‍ය නිලධාරියා ලෙස ඔහුගේ රාජකාරිවලට අමතරව, බයිසිකල් එකලස් කිරීම සහ පානීය ජලය තොග වශයෙන් බෙදා හැරීම වැනි වාණිජ කටයුතුවල ද මවුලානා නිරත විය. දේශපාලන සම්බන්ධතා උපයෝගී කරගනිමින් අසාද් “දේශපාලන බලයෙන් මුදල් උපයන්නෙකු” බවටද පත්විය. මවුලානාගේ මාසික ආදායම ඉලක්කම් හතක එකක් යැයි වාර්තා විය.

මොහොමඩ් හන්සීර් නොහොත් අසාද් මවුලානාට සියල්ල හොඳින් සිදුවන බවක් පෙනෙන්නට තිබුණි. එහෙත් ඔහුගේ ලෝකය හදිසියේම කඩා වැටුණි. ශාරීරික හානියක් සිදුවීමට යන බවට සැක කරමින් සහ අනතුරේ සිටින බවට හැඟුණු අසාද් මවුලානා ශ්‍රී ලංකාවෙන් පලා යාමට තීරණය කළේය. ඉන්පසු සිදු වූ දේ ඉදිරි ලිපියෙන් විස්තර කෙරෙනු ඇත.

(***)
“ඩේලි එෆ්ටී” පුවත්පතේ පළවූ ලිපිය සිංහලට පරිවර්තනය කළේ
අනිල් කරුණාරත්න