ස්ටාර්ලින්ක් අක්‍රිය කළහොත් යුක්රේනයේ “සම්පූර්ණ ඉදිරි පෙළ” බිඳ වැටෙනු ඇති බවට එලොන් මස්ක් කළ ප්‍රකාශයට, ප්‍රතිචාර දක්වමින් පෝලන්ත විදේශ අමාත්‍ය රඩොස්ලෝ සර්කෝර්ස්කි “එක්ස්” පණිවුඩයක් නිකුත් කළේ මාර්තු 10 වැනිදාය.

කෝපයක් නොමැති නම්, මඳක් කලබලයට පත් වූ බවක් පෙනෙන්නට තිබූ සර්කෝර්ස්කි, යුක්රේනය තුළ ස්ටාර්ලින්ක් භාවිතය සඳහා පෝලන්තය මුදල් ගෙවන බවත්, එය විශ්වාස කළ නොහැකි බව ඔප්පු වුවහොත්, ඔහුගේ රට විකල්ප වෙත හැරීමට පසුබට නොවන බවත්, තමා “ආක්‍රමණශීලිත්වයට ගොදුරු වූ තැනැත්තාට තර්ජනය කිරීමේ ආචාර ධර්ම” ගැන ප්‍රශ්න කරන බවත් සිය ට්වීටර් පණිවුඩය හරහා ප්‍රකාශ කළේය.

එසැණින්ම මස්ක් සහ එක්සත් ජනපද රාජ්‍ය ලේකම් මාර්කෝ රුබියෝ ඊට ප්‍රතිචාර දැක්වූ අතර, විදේශ අමාත්‍යවරයා “නිකම්ම දේවල් ගොතා පවසන” බවට චෝදනා කළ රිබියෝ “හරි නම් ඔබ ස්තුතියි කිව යුතුයි, මොකද ස්ටාර්ලින්ක් තිබුණේ නැති නම් යුක්රේනය මෙම යුද්ධය පරාජයට පත්වෙන්නේ මීට බොහෝ කාලයකට පෙරයි”‍ යනුවෙන් පැවැසීය.

මස්ක්ගේ ප්‍රතිචාරය වඩාත් ඍජු එකක් විය. ඔහු පෝලන්ත විදේශ අමාත්‍යවරයාව “පුංචි මිනිහෙක්” ලෙසින් අඟවමින් “නිහඬව සිටින ලෙස” ඔහුගෙන් ඉල්ලා සිටිමින්, පෝලන්තය ගෙවන්නේ “වියදමෙන් ඉතා සුළු කොටසක්” බව ද පැවැසීය. ස්ටාර්ලින්ක් ආයතනයට ආදේශකයක් නොමැති බව ද ඔහු වැඩිදුරටත් පැවැසීය. එක් අතකින් එම ප්‍රකාශය එය පැහැදිලිවම සත්‍යයකි. බීබීසී පුවත් සේවය පවසන පරිදි, 2022 වසරේ සිට “යුක්රේනයේ හමුදා මෙහෙයුම්වල යතුර” ලෙසින් සැලකෙන්නේ ස්ටාර්ලින්ක් පද්ධතියයි. පසුව අදහස් දැක්වූ මස්ක්, රට තුළ ස්ටාර්ලින්ක් නැවැත්වීමට තමාට කිසිදු අදහසක් නොමැති බව ද ප්‍රකාශ කළේය.

වොෂිංටනය සහ යුරෝපය අතර සති ගණනාවක් තිස්සේ වර්ධනය වන ආතතින්ගෙන් පසුව මෙම ගැටුම හටගත් අතර, ජනාධිපති ඩොනල්ඩ් ට්‍රම්ප් සහ උප ජනාධිපති ජේ.ඩී. වැන්ස් ඇතුළු ඉහළ පෙළේ එක්සත් ජනපද නිලධාරින් කලාපයට, විශේෂයෙන් යුක්රේනයට එක්සත් ජනපදය ලබා දෙන ආධාර සම්බන්ධයෙන් යුරෝපය ප්‍රමාණවත් ලෙස කෘතඥ වී නොමැති බවට චෝදනා කළහ.

වැන්ස් සහ ට්‍රම්ප් යන දෙදෙනාම රුසියාව සමග සටන් විරාමයක් අනුගමනය නොකිරීම සම්බන්ධයෙන් යුක්රේන ජනාධිපති වොලොදිමියර් සෙලෙන්ස්කිට ධවල මන්දිරයේදී තරවටු කරන විට, එක්සත් ජනපද රාජ්‍ය ලේකම් රුබියෝ කළේ යන්තම් සැඟවුණු කෝපයකින් ඒ දෙස බලා සිටීම පමණකි. සියලු චෝදනාවලට මුහුණ දීමට සිදු වූයේ ජනාධිපති වොලොදිමියර් සෙලෙන්ස්කිටය.

මෙම යෝජනා ක්‍රමය තුළ, රජයේ කාර්යක්ෂමතා දෙපාර්තමේන්තුවේ ප්‍රධානියා වන මස්ක්, ලොව ධනවත්ම පුද්ගලයා පමණක් නොව, මේ වන විට ලෝකයේ වඩාත්ම බලගතු පුද්ගලයා බවට පත්ව ඇත. ඔහු නායකත්වය දෙන එක්ස්, ස්පේස් එක්ස්, ටෙස්ලා පමණක් නොව ස්ටාර්ලින්ක් ඇතුළු සමාගම් හොඳින් හෝ නරකින්, ප්‍රධාන තැනක් ගනිමින්, ට්‍රම්ප්ගේ කඩාකප්පල්කාරි න්‍යායපත්‍රයේ තීරණාත්මක කොටසක් බවට පත්ව ඇත.

එක්සත් ජනපදය තම මිත්‍ර පාක්ෂිකයන්ට දැඩි ලෙස පහර දෙන විට, තීරුබදු පනවා ඔවුන් සමග වෙළෙඳ යුද්ධ අවුළුවාලන විට සහ විදේශ ආධාර වැඩසටහන් අත්හිටුවන විට, බොහෝ දෙනකුට කල්පනා වන්නේ සෑම කලාපයකම පාහේ පවතින මස්ක්ගේ සමාගම්, ගෝලීය දකුණට කෙසේ බලපානු ඇති ද? යන්නයි.

එලොන් මස්ක්, පෝලන්ත විදේශ අමාත්‍යවරයා සමග ඇති කරගත් ආරවුල සහ බ්‍රිතාන්‍ය අගමැති ඇතුළු අනෙකුත් තේරී පත් වූ නිලධාරින්ට එරෙහිව ඔහු කළ ට්වීට් පණිවුඩවලින් පෙනී යන්නේ ඔහු බටහිර ලෝකයේ නායකයන් සමඟ වාචික වාදයකට පැටලීමට කැමැත්තක් දක්වන බවයි. එය කෙතරම් ජනප්‍රිය වී ඇත්ද යන්න සලකා බලන විට පෙනී යන්නේ මෙම ගැටුම්වලදී, විශේෂයෙන් ගෝලීය දකුණ පුරාම ස්ටාර්ලින්ක් සමාගම ඔහුගේ විශාල සැරයටිය සහ ආයුධය බවට පත්විය හැකි බවයි.

සියල්ල සලකා බැලූ විට, ස්ටාර්ලින්ක් නියෝජනය කරන්නේ ගෝලීය විදුලි සංදේශනයේ ඊළඟ පියවරයි. මස්ක්, පසුගිය වසරේ ට්‍රම්ප්ගේ කණ්ඩායමට පැනීමට පෙර සිටම මෙය පැහැදිලි විය.

3G සිට 5G දක්වා සංක්‍රමණය වීමේ පසුබිමට එරෙහිව එහි වර්ධනය වන බලපෑම සලකා බැලිය යුතුය. 2000 දශකයේ මුල් භාගයේදී 3G හඳුන්වා දුන් විට, එය ප්‍රථම වරට ජනතාව අතරට මොබයිල් බ්‍රෝඩ් බ්‍රෑන්ඩ් රැගෙන ආ අතර, එය මොබයිල් ඉන්ටර්නෙට් බ්‍රවුසිංග්, වීඩියෝ ඇමතුම් සහ විද්‍යුත් තැපැල් ප්‍රවේශයේ නව යුගයක් සක්‍රිය කළේය.

0.2 සිට 2 Mbps (තත්පරයට මෙගාබයිට්) දක්වා වූ වේගයක් සමගින්, ඩේටා-හෙවි සේවා සඳහා 3G පහසුකම් සපයන ලද අතර, එය කලින් ලබාගත හැකි වූයේ ස්ථාවර බ්‍රෝඩ්බ්‍රෑන්ඩ් සම්බන්ධතා හරහා පමණකි. 10 Mbps සිට 100 Mbps වේග පරාසයක් සහිත 4G ජාල හඳුන්වා දෙනු ලැබුවේ 2000 දශකයේ අග භාගයෙන් පසුවය.

ජංගම තාක්ෂණයේ නවතම පිම්ම නිසැකවම සිදු වූයේ 2020 ගණන්වල 5G හඳුන්වා දීමත් සමගය. 5G ජාල අතිශය අඩු ප්‍රමාදය (Ultra-low latency) වැඩි කලාප පළල (Greater Bandwidth) සහ 1 Gbps (තත්පරයට ගිගා බයිට්) ඉක්ම වන උපරිම බාගත කිරීමේ වේගය ලබා දෙන අතර, එය ස්වයංක්‍රීය වාහන, අතථ්‍ය යථාර්ථය සහ දුරස්ථ සැත්කම් වැනි තත්‍ය කාලීන යෙදුම් සඳහා සහාය දක්වයි. 3G සිට 5G දක්වා වූ මෙම පරිණාමය ජංගම සන්නිවේදනය වැඩිදියුණු කළා පමණක් නොව, ස්ටාර්ලින්ක් වැනි උසස් චන්ද්‍රිකා අන්තර්ජාල විසඳුම් සඳහා ද අඩිතාලම දමා ඇත.

ස්පේස් එක්ස් සමාගම විසින් ස්ටාර්ලින්ක් ආරම්භ කරනු ලැබුවේ පහළ පෘථිවි කක්ෂ (Low Earth Orbit LEO) චන්ද්‍රිකා තාක්ෂණය භාවිත කරමින් ගෝලීය ජාලයක් ස්ථාපිත කිරීමේ අරමුණ ඇතිවය. දුරස්ථ කක්ෂවල විශාල චන්ද්‍රිකා කිහිපයක් භාවිත කරන සම්ප්‍රදායික චන්ද්‍රිකා අන්තර්ජාලය මෙන් නොව, ස්ටාර්ලින්ක් ප්‍රවේශයට පෘථිවියට බොහෝ සමීපව කුඩා චන්ද්‍රිකා දහස් ගණනක් යෙදවීම ඇතුළත් වේ. මෙම වසරේ ජනවාරි මාසයේදී පමණක්, ඉන් 120ක් අභ්‍යවකාශයේ සිට පෘථිවියට ඇද වැටුණු අතර, එය විද්‍යාඥයන් සහ පරිසරවේදින් අතර දැඩි කනස්සල්ලක් ඇති කළේය.

මේ වන විට, ස්ටාර්ලින්ක් චන්ද්‍රිකා 8,000කට වඩා සංඛ්‍යාවක් දියත් කර ඇති අතර, ඉදිරි වසරවලදී තාරකා මණ්ඩලය සැලකිය යුතු ලෙස පුළුල් කිරීමට සැලසුම් කර ඇත. ස්ටාර්ලින්ක් සමාගම රේඩියෝ සංඛ්‍යාත තාක්ෂණය වෙනුවට නිදහස් අවකාශ ප්‍රකාශ (Free Space Optics-FSO) භාවිත කරන බව සැලකිල්ලට ගත යුතුය. FSO ලේසර් සන්නිවේදනය භාවිත කරන අතර, ඒ නිසා චන්ද්‍රිකා සම්පත් අවශ්‍ය වන්නේ අඩුවෙනි. චන්ද්‍රිකා වේදිකාවලට ඒකාබද්ධ කිරීම පහසුය. FSO පර්යන්ත 10 Gbps දක්වා වේගයක් ලබා දෙන අතර, අනාගත දියුණුව හරහා මෙය Gbps සිය ගණනක් දක්වා වැඩි කළ හැකිය.

ෆයිබර් ඔප්ටික් තාක්ෂණය හරහා වේගවත් අන්තර්ජාල සේවාවක් සපයන අතර, එය බොහෝ විට 1 Gbps දක්වා ළඟා වන අතර, ප්‍රමාදයක් අඩුය. එහි සමමිතික උඩුගත කිරීමේ සහ බාගත කිරීමේ වේගය සමඟ වීඩියෝ සම්මන්ත්‍රණ සහ ක්‍රීඩා අත්දැකීම් සඳහා වඩාත් සුදුසුය. එහෙත් ග්‍රාමීය ප්‍රදේශවල ස්ථාපනය කිරීම සඳහා ෆයිබර් ලබාගැනීමේ හැකියාව සීමිත විය හැකි අතර මිල අධික විය හැකිය.

ඊට වෙනස්ව, ස්ටාර්ලින්ක්, පහසු ස්ථාපන ක්‍රියාවලියක අමතර ප්‍රසාද දීමනාවක් සමග ගෝලීය වශයෙන් පුළුල් ආවරණයක් සපයයි. අනෙක් අතට, එය ප්ලග් ඇන්ඩ් ප්ලේ සංකල්පය මත පදනම්ව ජංගම දුරකතන සඳහා නම්‍යශීලි බවක් ලබා දෙන අතර, එහි වේගය එහි ඉහළ ප්‍රමාදය සහ කාලගුණය මත පදනම්ව වෙනස් විය හැකිය.

ගෝලීය දකුණේ ස්ටාර්ලින්ක්

ස්ටාර්ලින්ක්හි ව්‍යාප්තිය ගෝලීය උතුරට පමණක් සීමා වී නැත. ගෝලීය දකුණේ ද එහි පැවැත්ම පුළුල් කර ඇත. ස්ටාර්ලින්ක් 2023 දී, නයිජීරියාවෙන් ආරම්භ වී මේ වන විට අප්‍රිකාව තුළ දියුණුවක් ලබා ඇත. එතැන් සිට, එය කෙන්යාව සහ මොසැම්බික් ඇතුළු තවත් රටවල් 13කට ව්‍යාප්ත වී ඇත.

කැමරූන් සහ දකුණු අප්‍රිකාව වැනි රටවල් සමඟ සාකච්ඡාවලට ජාතික ආරක්ෂක ගැටලු බාධාවක් වී ඇති අතර, ජනගහනයෙන් සියයට 40ක් පමණක් විශ්වාසදායක අන්තර්ජාල ප්‍රවේශය භුක්ති විඳින මහාද්වීපයක ස්ටාර්ලින්ක් සැලකෙන්නේ නවෝත්පාදනයක් ලෙසින්ය.

ඒ අර්ථයෙන් ගත් කල, දකුණු අප්‍රිකාවේ සිදු වූ දෙය, එක් මට්ටමකදී, ඉදිරි වසර කිහිපය තුළ මස්ක් සහ ඔහුගේ සමාගම්වලින් අපේක්ෂා කළ හැකි දේ පිළිබඳ පූර්ව නිගමනයකි. රජයේ කාර්යක්ෂමතා දෙපාර්තමේන්තුවට පත් කිරීමෙන් සති කිහිපයකට පසු, මස්ක්, ප්‍රිටෝරියාහි “ජාතිවාදි” නීති හරහා සුදු ගොවියන්ට දඬුවම් කරන බවට ප්‍රකාශ කිරීමට පටන්ගත්තේය. මෙම පියවරවල ප්‍රතිඵලයක් ලෙස දකුණු අප්‍රිකාවට ලබාදෙන ආධාර කපා හරින බවට වොෂින්ටනය තර්ජනය කළ අතර, සුදු ගොවියන්ට එක්සත් ජනපදයේ සරණාගතභාවය ලබාගන්නා ලෙසට ජනාධිපති ඩොනල්ඩ් ට්‍රම්ප් ආරාධනා කළේය.

මේ දෙක අතර ඍජු සම්බන්ධයක් ඇති කරගැනීම දුෂ්කර වුව ද, විචාරකයන් තර්ක කරන්නේ ස්ටාර්ලින්ක් සහ දකුණු අප්‍රිකානු රජය අතර පැවැති සාකච්ඡා ඇනහිටීම නිසා, දකුණු අප්‍රිකාවේ අභ්‍යන්තර දේශපාලනයට විවෘතව සහ පැහැදිලිව මැදිහත් වීමට මස්ක් පෙළඹුණු බවයි. විශේෂයෙන් මස්ක් සහ දකුණු අප්‍රිකානු රජය අතර සාකච්ඡා බිඳ වැටීමට ප්‍රධාන හේතුව වූයේ, විදේශීය විදුලි සංදේශ බලපත්‍රලාභින්ට ඔවුන්ගේ කොටස්වලින් සියයට 30ක් ඓතිහාසිකව අවාසි සහගත කණ්ඩායම්වලට විකිණීමට අවශ්‍ය වන දකුණු අප්‍රිකානු නීතියක් අනුගමනය කිරීම ස්ටාර්ලින්ක් සමාගම ප්‍රතික්ෂේප කිරීම නිසාය.

මස්ක් දිගු කලක් තිස්සේ දකුණු ආසියාව දෙස බලා සිටි නමුත් කලාපයේ විශාලතම වෙළෙඳපොළ වන ඉන්දියාවට ඇතුළු වීමට ගත් උත්සාහයන් ගැන ඔහු කලකිරීමට පත් විය. මෑතක් වන තුරුම, බලවත් ටෙලිකොම් සමාගම්වල පීඩනය මෙන්ම මනිපූර්හි සිදුවීමක් ඇතුළුව ආරක්ෂක ගැටලු හේතුවෙන්, මෝදි රජය මස්ක්ට රටට ප්‍රවේශය ලබා දීමට අකැමැති බවක් පෙනෙන්නට තිබුණි. සති දෙකකට පෙර ස්ටාර්ලින්ක් ඉන්දියාවේ විශාලතම ටෙලිකොම් සමාගම් දෙකක් වන රිලයන්ස් ජියෝ සහ භාරතී එයාර්ටෙල් සමඟ ගිවිසුම් අත්සන් කළ විට තත්වය වෙනස් විය.

ස්ටාර්ලින්ක් සමාගම ඉන්දියාවේ ක්‍රියාත්මක වන්නේ කෙසේද යන්න ගැන දැක ගැනීමට තවමත් බලා සිටිය යුතුය. ප්‍රවෘත්ති වාර්තා අනුව, ආරක්ෂක ගැටලු විසඳීමට සහ දේශීය තරගකාරිත්වය ආරක්ෂා කිරීමට දිල්ලි රජය මස්ක්ට දැඩි කොන්දේසි පනවනු ඇත. ඔහු ඇතුළු වන සෑම ගනුදෙනුවකදීම තමා සැම විටම තම මාර්ගය සොයා ගන්නා බව පැහැදිලි කර ඇති මස්ක්, දිගුකාලීනව එයට අනුකූල වේ ද යන්න ප්‍රශ්නාර්ථයකි. කෙසේ වෙතත්, X “වාරණය” කළ බවට චෝදනා කරමින් මස්ක් දැනටමත් ඉන්දීය රජයට නඩු පවරා ඇත.

ඊට වෙනස්ව, බංග්ලාදේශය සහ ශ්‍රී ලංකාව ස්ටාර්ලින්ක් වඩාත් සාදරයෙන් පිළිගෙන ඇත. උදාහරණයක් ලෙස, ශ්‍රී ලංකා විදුලි සංදේශ නියාමන අධිකාරිය මේ වසරේ ජනවාරි මාසයේදී එහි තීරුබදු සැලසුම් අනුමත කළේය. බංග්ලාදේශය ස්ටාර්ලින්ක් වෙතින් ප්‍රතිලාභ ද අවධාරණය කර ඇත. අනෙකුත් රටවල් අතර, නේපාලය තවමත් බිඳ දැමීමට දුෂ්කර කාර්යයක් බව ඔප්පු වී ඇත. නේපාල නීතියට අනුව අවම වශයෙන් සියයට 20ක දේශීය කොටස් අවශ්‍ය වන අතර, මස්ක් සහ ස්ටාර්ලින්ක් එම කොන්දේසියට ඔවුන් එකඟ නොවන බව පවසා ඇත.

ලෝකයේ බලවත්ම මිනිසා එක්සත් ජනපද විදේශ ප්‍රතිපත්තිය හැඩගැස්වීමේදී අත පෙවීමක් ලබා ගැනීමත් සමඟ, එලොන් මස්ක් තම ලීවරය භාවිත කර එක්සත් ජනපදය සහ අනෙකුත් රටවල් අතර ඇති, විශේෂයෙන් විදේශ ආධාර මත යැපෙන සහ වොෂින්ටනය විසින් USAID සහ අනෙකුත් වැඩසටහන් කපා හැරීම නිසා විශාල පහරකට ලක් වූ ගෝලීය දකුණේ රටවල් සමඟ ඇති සබඳතාවලට බලපෑම් කරයි ද යන්න අපට තවමත් පැවැසිය නොහැක.

ස්ටාර්ලින්ක් සහ ස්පේස් එක්ස් යනු මස්ක්ගේ ගෝලීය අභිලාස දෙපස සිටින ආරුක්කු දෙකයි. ඔහු ජාත්‍යන්තර අභ්‍යවකාශ මධ්‍යස්ථානය (ISS) ඉවත් කිරීමට සහාය දක්වමින් ට්වීට් පණිවුඩයක් නිකුත් කර ඇති අතර, එත් අතකින් ගෝලීය දකුණ සඳහා ස්ටාර්ලින්ක් අත්‍යවශ්‍ය සේවාවක් ලෙසින් සකස් කර තිබීම පුදුමයට කරුණක් නොවේ.

කෙසේ වෙතත්, මෙම අරමුණු ඉටු කරගැනීම සඳහා ඔහුට වොෂින්ටනයෙන් හිස් චෙක්පතක් ලැබේද, නැද්ද යන්න විවාදාත්මකය. එක්සත් ජනපද දේශපාලන විශ්ලේෂකයකු මෙම ලේඛකයා සමඟ සම්මුඛ සාකච්ඡාවකදී සඳහන් කළේ, “ඔහුට අවශ්‍ය සියලු‍ දේ සඳහා මුදල් වැය වෙනවා. ඔහු (ධවල මන්දිරය) ඕනෑවට වඩා අසතුටට පත් කළහොත්, ඔහුට අවශ්‍ය දේ නොලැබී යන්න ඉඩ තියෙනවා” යනුවෙනි.‍ වාර්තා වන පරිදි, ට්‍රම්ප් ඔහුගේ ජනවරම සීමා කර ඇති අතර, මෑතකදී කොංග්‍රසය අමතමින් කළ කතාවේදී කියා සිටියේ රජයේ දෙපාර්තමේන්තු ප්‍රධානින්ට ඔවුන්ගේ අදාළ කාර්යාල සම්බන්ධයෙන් බලය ඇති බවයි.

කෙසේ වෙතත්, අනෙක් අතට, මස්ක් “හොඳින් වැඩ” කරන බවට ට්‍රම්ප් කළ ප්‍රශංසනීය ප්‍රකාශවලට අමතරව, උපජනාධිපති වැන්ස් සහ රාජ්‍ය ලේකම් රුබියෝ යන දෙදෙනා ද, ඔහුගේ වේදිකාවේදී මස්ක් ආරක්ෂා කිරීමට ඉක්මන් වී ඇත. පෝලන්ත විදේශ අමාත්‍යවරයා සමඟ ඇති වූ ආරවුල මෑත කාලීන උදාහරණයයි. එක් මට්ටමකින්, ඉහළ නිලධාරින් මස්ක් දිගටම ආරක්ෂා කරන ආකාරය බැලූ විට, ට්‍රම්ප් ඔහුගේ බලතල කපා හැරීමේ, නැතහොත් මෑත වාර්තා පෙන්වා දෙන පරිදි ඒවා සීමා කිරීමේ හැකියාව පිළිබඳව සැක පහළ කරයි.

සැබැවින්ම ගෝලීය දකුණ සඳහා, මේ කිසිවක් වැදගත් නොවේ. ඔවුන්ට ඇති ප්‍රශ්නය නම්, ස්ටාර්ලින්ක් ආයතනය ඔවුන් පොරොන්දු වන දේ කරයි ද, අන්තර්ජාල ප්‍රවේශය පුළුල් කරයි ද, නැතහොත් හිසට ඉහළින් එල්ලා ඇති කඩුවක් බවට පත්වෙමින්, මස්ක් විසින් එම රටවලට ලබා දෙන සේවා සඳහා ඉහළ ගාස්තු ගෙවන විට පවා ඔහු සමඟ හොඳින් සෙල්ලම් කිරීමට බල කරයිද? යන්නයි.

කෙසේ වෙතත්, යුක්රේනය පිළිබඳ මස්ක්ගේ ප්‍රකාශවලින් පෙනී යන්නේ, වර්තමානයේදී ස්ටාර්ලින්ක් ක්‍රියාත්මක වන කිසිදු රටකින් එහි ප්‍රවේශය සම්පූර්ණයෙන්ම ඉවත් කරගැනීමට ඔහු සූදානම් නැති බවයි. මෙහි මුදල් සහ ලාභ සාධකයක් සම්බන්ධ විය හැකිය. මෙම රටවල් සමඟ ඔහුගේ කටයුතුවලදී ඔහු ස්ටාර්ලින්ක් විශාල සැරයටියක් ලෙස භාවිත කළ ද, ඔහුට තවමත් සම්පූර්ණ ඉවත් වීමේ අවදානමක් ගැනීමට අවශ්‍ය නොවනු ඇත. එබැවින් ඔහු යුක්රේනය සහ ග්‍රාමීය ප්‍රදේශ වැනි ගැටුම් කලාපවල ස්ටාර්ලින්ක්හි වැදගත්කම ගැන ට්වීට් ප්‍රකාශ නිකුත් කරන අතරම, ඔහුට පෙර සිටි සියලු‍ම ප්‍රකෝටිපතියන් කළ ලෙසින්, ලෝකයේ ප්ලග් එක ගලවා දැමීමේ බලය ඔහුට ඇති බව අපට මතක් කර දීම අතර දෝලනය වෙමින් සිටිනු ඇත. මෙය නොසන්සුන් තත්වයක් වන නමුත් එය දිගටම පවතින එකකි.

(බ්‍රයන් ජයවර්ධන වෙස්ට්මිනිස්ටර් විශ්වවිද්‍යාලයේ පරිගණක විද්‍යා උපාධි අපේක්ෂකයකු වන අතර, ඔහු මෘදුකාංග සංවර්ධනය, UI/UX නිර්මාණය, නවෝත්පාදනය, ඩිජිටල් පරිවර්තනය සහ වෙනත් සමාන මාතෘකා කෙරෙහි දැඩි උනන්දුවක් දක්වයි. ඔහු සිය අධ්‍යයන කටයුතුවලට අමතරව, තාක්ෂණික කර්මාන්තයේ දියුණුව සහ ඩිජිටල් පරිවර්තනය කෙරෙහි ඒවායේ බලපෑම ගවේෂණය කරන අතරම අඛණ්ඩ ඉගෙනීමේ සහ පර්‌යේෂණවල නිරත වේ. [email protected] යන විද්‍යුත් ලිපිනයෙන් බ්‍රයන් සම්බන්ධ කරගත හැකිය.

උදිත දේවප්‍රිය යනු, ඉතිහාසය, කලාව සහ සංස්කෘතිය, දේශපාලනය සහ විදේශ ප්‍රතිපත්තිය පිළිබඳ නිත්‍ය විචාරකයකු වන අතර, [email protected]විද්‍යුත් ලිපිනයෙන් ඔහු සම්බන්ධ කරගත හැකිය. ඔහු සහ උත්පලා විජේසූරිය අවිධිමත් කලා හා සංස්කෘතික පර්‌යේෂණ සාමූහිකයක් වන U&U හි ප්‍රධානීහු වෙති.)

(***)
බ්‍රයන් ජයවර්ධන සහ
උදිත දේවප්‍රිය විසිනි

සිංහලට පරිවර්තනය කළේ
අනිල් කරුණාරත්න