ආණ්ඩුවේ ජය, ස.ජ. බලවේගයේ ජයග්‍රහණය, එජාපයේ පරාජය ගැන සහ ජාතික ලැයිස්තු මන්ත්‍රීධුර බෙදීම පිළිබඳ ගැටලු හා ආණ්ඩු පාලනයේ ඉදිරි දැක්ම ආදී කරුණු රාශියක් ගැන කතාබහට අද එක්වන්නේ ස.ජ.බ. ජාතික ලැයිස්තු ධූරාපේක්ෂක ඉරාන් වික්‍රමරත්න මහතාය.

ප්‍රශ්නය:- ජනාධිපතිවරණයක් පරාජය වී කෙටි කලෙකින් සජිත් ප්‍රේමදාස කඳවුර මහමැතිවරණයකින් දැවැන්ත පරාජයක් ලැබුවා. ඇත්තටම ඔබලාට වැරදුණේ කොතැනද?
පිළිතුර:- පොහොට්ටුවට ජනාධිපතිවරණයේදි ලැබුණු ඡන්ද පොඩ්ඩක් අඩු වුණත් ඒ වගේම ලැබුණා. සංඛ්‍යාත්මකව බලද්දි දෙමළ හා මුස්ලිම් පක්ෂවල ඡන්ද අත්හැරියාට තවත් ඡන්ද ලක්ෂ දහ අටක් විතර මෙවර අපට ලැබිලා නෑ. ඒ ඡන්ද පොළට නොගිය එක්සත් ජාතික පාක්ෂිකයන්. ඔවුන් ඡන්ද පොළට නොයන්න හේතු ගණනාවක් තිබෙනවා. ඔවුන් කොහොමත් යූ.එන්.පී එකට ඡන්දය දෙන්න ලෑස්ති නෑ. අපට දෙන්නත් අදිමදි කළා. සමගි ජනබලවේගය ඇත්තටම පක්ෂයක්ද, ඒකට දෙන ඡන්ද අවලංගු වෙන්න පුළුවන්ද වගේ විවිධ බොරු ප්‍රචාරත් කළානෙ. මේ බෙදීම ගැන පැහැදිලිකමක් තිබුණෙත් නෑ. අනෙක් අතට​ කොරෝනා වගේ තත්ත්වයත් බලපෑවා. ගණනය බැලුවාම මෙහෙම විස්තර කරන්න පුළුවන්. ඒ වගේම ආණ්ඩුව පැත්තෙන් කොරෝනා හොඳට කළමනාකරණය කළ බවට හොඳ මතයක් හැදුවා. දෙවැනිව ජනමාධ්‍ය පාවිච්චි කරලා බලාපොරොත්තු ඇති කළා. ඉතින් ඒ බලාපොරොත්තු යටගහන්න ඉඩනොදෙන්නත් මම හිතන්නේ දැන් ජනමාධ්‍යට වගකීමක් තිබෙනවා. අපි මැතිවරණ ප්‍රතිඵලයට ජනතා මතයට හිස නවනවා. ඒ වගේම ආණ්ඩුවටත් බහුතර බලයක් ජනතාව දීලා තිබෙනවා. නිදහසට කරුණු නොකියා බැහැලා වැඩ කරන්නයි දැන් තියෙන්නේ.

ප්‍රශ්නය:- සමගි ජනබලවේගයේ ජයග්‍රාහී අපේක්ෂකයන්ගෙන් තුනෙන් එකක්ම දෙමළ හා මුස්ලිම් ජාතිකයන්. මෙම සංයුතිය සැලකූ විට ඔබලාට අහිමිව තිබෙන්නේ සිංහල ඡන්ද යැයි කීවොත් එය වැරැදිද?
පිළිතුර:- සාධාරණව බැලුවොත් අහිමි වෙලා තිබෙන්නේ එක්සත් ජාතික පක්ෂයට ඡන්දය දෙන පිරිසයි. ඔව්. ඒ අයගෙන් වැඩි පිරිස සිංහල පාක්ෂිකයන් කියන්න පුළුවන්.

ප්‍රශ්නය:- එහෙත් දැනටම ජාතික ලැයිස්තු මන්ත්‍රී ධුර සඳහා සමගි ජනබලවේගයේ ජාතිකත්වය මත පදනම් වූ දේශපාලන කණ්ඩායම් ඉල්ලීම් කරනවා. මේ ගැන ඔබ මොකද හිතන්නේ?
පිළිතුර:- අපේ චින්තනය එකමුතු රටක්. අපට ජාතිවාදයක් වගේම ආගම්වාදයක් කුලභේදයක් නෑ. හැබැයි අපේ චින්තනය ඒක යැයි කියලා කවුරු හරි අපිව බිත්තියට හේත්තු කරන්න හදනවා නම් ඒකට ඉඩදෙන්න බෑ.  

ප්‍රශ්නය:- තුනෙන් දෙකකට ආසන්න පාර්ලිමේන්තු බලයක් සහිත ආණ්ඩුවක් සමග වැඩ කරද්දි විපක්ෂයට තිබෙන කේවල් කිරීමේ බලය ඉතාම අඩුයි. සමගි ජනබලවේගය වැඩ කරන්නේ කොහොමද?
පිළිතුර:- 2010 දිත් විපක්ෂයක් හැටියට අපට හිටියේ මන්ත්‍රීවරු හතලිස් ගණනයි. මමත් ඒ පාර්ලිමේන්තුවේ අලුත් මන්ත්‍රීවරයෙක්. ඒත් අපි විපක්ෂයේ කාර්යභාරය හරියටම බැහැලාම කළා. ඉතින් දැන් තුනෙන් දෙකක බලයකුත් තිබෙද්දි ජනතාවට දුන් පොරොන්දු ඉටුකිරීමට ආණ්ඩුවට පහසුයිනෙ. ජනතාවට හිතකර තීන්දුවලදී ආණ්ඩුවට අපේ සහාය ලබාදෙනවා. ඒ අය එහෙම නොකරන තැනදි අපට අනිවාර්යයෙන්ම විරුද්ධවීමට වෙනවා. සංඛ්‍යාව අඩුවුණාට අපට ලොකු කාර්යභාරයක් තිබෙනවා. ඡන්ද සංඛ්‍යාවෙන් හැමදේම මනින්න බෑ.

ප්‍රශ්නය:- ඔබ එහෙම කිව්වත් එක්සත් ජාතික පක්ෂයේ හා සමගි ජනබලවේගයේ අසමගිය නිසා පොදුජන පෙරමුණට වැඩි වූ ඡන්ද ප්‍රතිශතයෙන් තමන්ගේ ආසන සංඛ්‍යාවත් අඩු වූ බවට ජාතික ජනබලවේගයේ ඇතැමුන් චෝදනා කරනවා. ඇත්තටම මාතරදි හඳුන්නෙත්තිට වුණේ ඒ වැඩේ නේද?
පිළිතුර:- ලංකාවේ සමාජයේ යම්කිසි වෙනසක් වෙලා තිබෙනවා. ඒත් දේශපාලන පක්ෂවල වෙනස්වීම ප්‍රමාදයි. සමගි ජනබලවේගය නිර්මාණය වෙලා තිබෙන්නේ ඒ සමාජ වෙනස දැකලා ඒකට ඔබින විදියට. අලුත් නායකත්වයක් හදන්නට වෘත්තියවේදීන්ගෙන් සමන්විත අලුත් පෙරමුණක් හදන්නට එක්සත් ජාතික පක්ෂ කෘත්‍යාධිකාරි මණ්ඩලය තීරණයක් ගත්තා. රිබ්‍රෑන්ඞ් එකක් ඕනෑ වුණේ. කෘත්‍යාධිකාරියේ බහුතරය හිතුවත් ඒකට ඉඩ ලැබුණේ නෑ. පක්ෂයේ ව්‍යවස්ථාව ප්‍රජාතන්ත්‍රවාදීකරණයට ඉඩලැබුණේත් නෑ. ජනමතය තේරුම් ගත් නිසා තමයි අකමැත්තෙන් හෝ එලියට බහින්න සිදුවුණේ. මේ රටේ ඒ වෙනස තව අවුරුදු දෙක තුනකින් පැහැදිලි වෙයි.

ප්‍රශ්නය:- සමගි ජනබලවේගය ගැන අසත්‍ය තොරතුරු ජනගත වුණා යැයි ඔබ කිව්වා. ඒත් ස.ජ.බයේ පිරිස්වල එ.ජා.ප පක්ෂ සාමාජිකත්වය අහිමි කිරීමට එ.ජා.පය කටයුතු කළා. තාම එ.ජා.ප පෙකණිවැල කපලා නැද්ද?
පිළිතුර:- සමගි ජනබලවේගය කියන්නේ පක්ෂයක්. අලුත් පක්ෂයක්. අලුත් නායකයන් හා අලුත් චින්තනයක් සහිත පක්ෂයක්. අනෙක් පක්ෂ සමග වැඩ කිරීමට අපි විවෘතයි. ඒ වගේම එක්සත් ජාතික පක්ෂයටත් අපි දොර විවෘත කරලා තිබෙන්නේ. ඒක එ.ජා.පය ගන්න ඕනෑ තීරණයක්. අපේ ප්‍රතිපත්තිවලට එකඟ නම් එකට වැඩකරන්න පුළුවන්. ජනමාධ්‍ය ගැන ඇහුව නිසා කිව්වොත් ජනමාධ්‍යයෙන් අපට සාධාරණයක් වුණේ නෑනෙ. විශේෂයෙන්ම විද්‍යුත් මාධ්‍ය මේ රටේ ජනමතයක් නිර්මාණය කළානෙ. ජනමාධ්‍ය දැන් ඒ ගැන හොයන්න ඕනෑ.

ප්‍රශ්නය:- සමගි ජනබලවේගයට එ.ජා.පයෙන් ගන්න දැන් කිසිම දෙයක් නැද්ද? සිරිකොතට අයිතියක් කියන්නෙම නැද්ද?
පිළිතුර:- නෑ. ඔය කතාවත් හැදුවෙ ජනමාධ්‍ය. ඕක සජිත් ප්‍රේමදාස මහතා පැහැදිලිව කිව්වානෙ. අපට ගොඩනැගිල්ලක් ඇල්ලීමේ කිසිම අරමුණක් නෑ. අපට තිබෙන්නේ මිනිස්සු අපේ මතයට හරවාගන්න එකයි. අපි දැන් මේ රටේ ප්‍රධාන විපක්ෂය. අපේ පක්ෂයට වෙන්නේ මාස ගණනයි. ක්‍රියාකාරිව සති ගණනාවයි. කෙටි කාලයකින් මේ රටේ හැම දිස්ත්‍රික්කයේම මන්ත්‍රීවරුන් පත්කිරීමට අපට හැකිවෙලා තිබෙනවා. එක පැත්තකින් සංඛ්‍යාත්මක පරාජයක් තිබුණත් අනෙක් පැත්තෙන් පක්ෂයක් හැටියට ගත්තොත් ජයග්‍රහණයක් තිබෙනවා. මේ රටේ දැන් තිබෙන එකම විකල්පය අපි කියලා පෙන්වලා තිබෙනවා. එක්සත් ජාතික පක්ෂයටත් ඕනෑ නම් අපි එක්ක එකතු වෙලා මේ ගමන යන්න පුළුවන්.

ප්‍රශ්නය:- ආණ්ඩුවට සහාය දැක්වීමට විපක්ෂයේ පිරිසක් සූදානම් බවට මාධ්‍ය වාර්තා පළවෙනවා. මේ කියන පිරිස අතරේ සමගි ජනබලවේගයේ අය නෑ කියල ඔබට සහතික වෙන්න පුළුවන් ද?
පිළිතුර:- ආණ්ඩුවක් හැමතිස්සෙම බලන්නේ තමන්ගෙ බලය තහවුරු කරගන්නනෙ. ඔබේ ප්‍රශ්නයට අනුවම ආණ්ඩුව තුනෙන් දෙකකුත් තියාගෙන විපක්ෂයේ අය බාගන්න බලනවා නම් එයින් පෙනෙන්නේ තමන්ගෙ බහුතර බලය දිගටම තියාගන්න පුළුවන්ද කියලා විශ්වාසයක් නැතිකමනෙ. එහෙම දෙයක් සිදුවෙනවා නම් ඒක මට පුදුමයක්.

ප්‍රශ්නය:- 19 වැනි සංශෝධනය ඕන නෑ කියලා ආණ්ඩුවේ ප්‍රධාන කථිකයන්ම කියනවා. 19 යේ නිර්මාතෘ කණ්ඩායමක් හැටියට මේ දේශපාලන යෝජනාව ගැන මොකද හිතන්නේ?
පිළිතුර:- පළමුව කියන්න ඕනේ මේ 19 වැනි සංශෝධනය ගේන්න හේතු තිබුණා. එවක හිටපු ජනාධිපතිතුමා ධුරයේ වාර සීමා අහෝසි කරලා ජීවිත කාලයටම බලයේ ඉන්න තමයි ව්‍යවස්ථාව හැදුවෙ. අපි ඒකට එදත් විරුද්ධයි. අදත් විරුද්ධයි. මොකද ප්‍රජාතන්ත්‍රවාදී සමාජයක කුමන හෝ සීමාවක් පැවැතිය යුතුයි. දෙවැනි එක අගවිනිසුරු ධුරයට පත් පළමු කාන්තාව පන්නලා දාලා අධිකරණය විධායකයට යටත් කළා. මේ රටේ මිනිස්සු ඒකත් ප්‍රතික්ෂේප කළා. අපි 19න් කළේ විධායක ජනාධිපතිවරයාගේ ඒ අත්තනෝමතික බලය සීමා කරලා ජනතා පරමාධිපත්‍ය තහවුරු කිරීම. විධායකයේ බලය පාර්ලිමේන්තුවට වගකියන තැනකට ගෙනඒමයි. ස්වාධීන කොමිෂන් සභාවලට වගේම ඉහළ තනතුරුත් 19ට පෙර වගේ පසුත් පත්කළ හැක්කේ ජනාධිපතිවරයාට පමණයි. ඒත් ව්‍යවස්ථා සභාවට එසේ පත්කරන පිරිස් සුදුසුද කියලා සෙවීමේ අවස්ථාවක් දැන් තිබෙනවා. වෙනස එච්චරයි. නමක් ප්‍රතික්ෂේප වුණොත් අලුතින් කෙනෙක් පත්කරන්නෙත් ජනාධිපතිවරයාම තමයි. මේකෙ අඩුපාඩු තිබෙනවා නම් ඒක සාකච්ඡා කරන්න පුළුවන්. ඒත් මේ ආණ්ඩුවට එහෙම ගැටලුවක් එන්න බෑ.

ප්‍රශ්නය:- ව්‍යවස්ථාවක් කියන්නේ නෛතික තර්ක මත ගොඩනැගීමක්. 19 මේ ආණ්ඩුවට ප්‍රශ්නයක් වෙන්නම බෑ කියන්නේ කොහොමද?
පිළිතුර:- ඇයි ඉතින් අයියයි මල්ලියි රට පාලනය කරනවා නම් තවත් බලය තහවුරු කරගන්න හදන්නේ මොකටද? තිබෙන බල රාමුව තුළ වැඩ කරන්න පුළුවන්නෙ. අඩුපාඩු සාකච්ඡා කරන්න පුළුවන්. නැත්නම් එදා වුණ දේ තමයි නැවතත් මේ වෙන්න යන්නේ.

ප්‍රශ්නය:- ආණ්ඩුවේ ආර්ථික දර්ශනය ක්‍රියාවට නැගීම ආර්ථික ක්‍ෂේත්‍රයේ ප්‍රාමාණිකයකු හැටියට ඔබ දකින්නේ කොහොමද?
පිළිතුර:- රට තිබෙන්නේ විශාල ආර්ථික අර්බුදයක කියලා කවුරුත් දන්නවා. මිනිස්සු ගතකරන්නේ ඉතා දුෂ්කර ජීවිතයක් වුණත් බදු බර අඩු කරලා නෑ. කුඩා ව්‍යාපාරිකයන් දේශීය වෙළෙඳපොළෙන් ජාත්‍යන්තරයට ගෙනයෑමේ සිට ඉදිරි ක්‍රියාමාර්ග සම්බන්ධයෙන් අපි අපේ ප්‍රතිපත්ති මාලාවෙන් කරුණු ඉදිරිපත් කළා. අපි කතා කළේ ප්‍රාග්ධනය සම්පාදනය ගැනයි. අපට ආර්ථික සැලැස්මක් විතරක් නෙවෙයි. එය ඉදිරිපත් කිරීමට කණ්ඩායමක් ඉන්නවා. ඒ අයත් රට වටේ ගියානෙ. නොයෙක් පොරොන්දු දුන්නනෙ. දැන් වගකීම තිබෙන්නෙත් ඒ අයටයි. ආර්ථිකය පැත්තෙන් ජනතාවට හිතකර පියවර ගනිද්දි අපි සහාය දෙනවා. අපි විපක්ෂයනෙ දැන්.

ප්‍රශ්නය:- යහපාලන සම්මුතියේ කොටස්කාරයකු වූ හිටපු ජනාධිපතිවරයා නම් මේ ආණ්ඩුවේත් කොටස්කරුවකු වී ආසන 15ක් දිනාගෙන සිටිනවා. සම්මුතිගත වීමෙන් වරදක් වුණා කියලා හිතනවද?
පිළිතුර:- ඒ ක්‍රියාවලියේ සෘණ පැති වගේම ධන පැතිත් තිබෙනවා. උදාහරණයකට 19 වැනි සංශෝධනය කියන්නේ එහි ධන පැත්තක්. ජනතා පරමාධිපත්‍ය තහවුරු කිරීමක්. තොරතුරු දැනගැනීමේ පනත කියන්නේ ජනතා පරමාධිපත්‍ය තහවුරු කිරීමක්. ආර්ථික වර්ධන වේගය අඩු වුණත් අයවැය හිඟය පහළට ආවා. උද්ධමනය අඩු වුණා. දශක ගණනකට පසු ප්‍රාථමික ඉතිරියක් තිබුණා. සෘණ පැතිත් තිබුණා. පාලනය පිළිබඳව ප්‍රශ්න තිබුණා. හොරු අල්ලනවා කිව්වාට නීතිය ක්‍රියාත්මක කිරීමේ ප්‍රමාද තිබුණා. හිටපු ජනාධිපති හා අගමැති යන නායකයන් යහපාලනය කඩාවැටීමේ වගකීම ගන්න ඕනෑ.  

ප්‍රශ්නය:- ඡන්දපොළට නොගිය එ.ජා.ප පාක්ෂිකයන් සමගි ජනබලවේගයට දිනාගත හැකි යැයි ඔබ හිතනවාද? පවතින තත්ත්වය යටතේ ස.ජ.බට තිබෙන්නේ විශාල අභියෝගයක් නේද?
පිළිතුර:- ඔව්. අපිට අභියෝගයක් තිබෙනවා. අපි ක්‍රමානුකූලව ජනතා අභිලාශ තේරුම්ගෙන ඉදිරියට යනවා. සමගි ජනබලවේගය කිසිම වෙලාවක ජනතා අභිලාශ මිස පුද්ගලික අභිලාශ මත ගමන්කිරීමට ඉඩක් නෑ. සියලු පුරවැසියන්ට සමානව සලකන එකමුතු ශ්‍රී ලංකාවක් ගොඩනැගීම අපේ අරමුණයි. කාටවත් අපිව ඒ චින්තනයෙන් එළියට දාන්න බෑ. අපි ඒවාට යටවෙන්නෙත් නෑ. ශක්තිමත් නායකයෙක් හා කණ්ඩායමක් අපට ඉන්නවා. ඔවුන් දූෂණයට එරෙහි කණ්ඩායමක්. අපි එයින් අලුත් රටක් ගොඩනගනවා.

(*** සංවාද සටහන  - බිඟුන් මේනක ගමගේ)