මනුෂ්‍ය ලොව ඇති ඇතැම් දේ මිනිසුන්ට ඉතා පහසුවෙන් දකින්නටත් අවබෝධ කරගැනීමටත් හැකි වෙයි. එනමුත් අපට නොපෙනෙන නොදැනෙන බොහෝ දේ ද අප අවට පරිසරයේ ඇත. උදාහරණයක් ලෙස විදුලිය අපට ඇසට නොපෙනෙයි. එහෙත් සිරුරට ස්පර්ශ වූ විට එය අපට දැනේ. සෑම මිනිසකුගේම සිතේ සිතුවිලි ඇතිවේ. සිතීමේ ශක්තිය මිනිසුන් සතු වූවකි. සාමාන්‍ය මිනිසුන්ට අන් අයගේ සිතුවිලි නොදැනේ, නොපෙනේ. එනමුත් සියල්ලෝම සිතති. එමෙන්ම ඇසට නොපෙනෙන ද්‍රව්‍ය ලොව පවතී. ඇසට හසුනොවන ජීවීහු ලොව ජීවත් වෙති.

ප‍්‍රවීණ යෝග උපදේශක අර්ජුන වික‍්‍රමාරච්චි

භෞතිකවාදීව සිතන පිරිස ඇසට නොපෙනෙන නොදකින දේ ප‍්‍රතික්ෂේප කළත් ඇසට නොපෙනෙන හසුනොවන ද්‍රව්‍යාත්මක දේ සහ ජීවීන් මේ ලොව ජීවත්වන බව සත්‍යයක් ලෙස පිළිගන්නට සාධක සහ සාක්‍ෂි බොහොමයක් පවතී.

ඇස ඉක්මවා දැකීමේ හැකියාව මිනිසා සතු වුවත් ඒ ශක්තිය සියලූ මිනිසුන්ට ලෙහෙසියෙන් ලබාගත නොහැකි ශක්තියකි. එහෙත් මිනිස් ශරීරය වටා මෙන්ම ගහකොළ වටාද පවතින රශ්මිය ඉතා සියුම් කැමරා ඇසට හසුවේ. අප විශ්වාස කරන්නේ අපේ පියවි ඇසට පෙනෙන දෙය පමණක් නම්, අපි අපට පෙනෙන සීමාවෙන් ඔබ්බට දකින්නට නොවෙහෙසෙන්නෝ වෙමු.

ඇත්තටම මේ ලෝකය කියන්නේ අපට පෙනෙන අප අහන දකින ලෝකය විතරක් නෙවෙයි. අපට නොපෙනෙන තව හුඟාක් සියුම් දේ මේ ලෝකයේ තියෙනවා.

මේ විශ්වයේ සවිඥානික දේ වගේම අවිඥානික දේත් පවතිනවා. මේ විශ්වයේ පැවැත්ම තීරණය වන්නේ ඒ සියලූ අවිඥානික හා සවිඥානික දේ මතයි.
සාමාන්‍ය සවිඥානික බව කියන්නේ අවධි බවයි. එදිනෙදා ජීවිතයේ වැඩකටයුතු කරගෙන යාමේදී අප තුළ පවතින අවධි බවයි. වඩා අවධි බව, සිහි ඇති බව භාවනා වඩන අය කෙරෙහි පවතිනවා. ඒ යෝගාවචරයන් අතර මැනවින් පවතින පිරිසුදු සිහියක් පවතිනවා. භාවනාවේ උපරිමය කරා යද්දී සියයට සියයක්ම සිහිය ඇතිවෙනවා. කරන කියන සියලූ දේ කරන්නේ ප‍්‍රකෘති සිහියකින්. ඒ සිහියේ මැනවින් පිහිටි සිත පුද්ගලයාගේ සාර්ථකත්වය පිණිස හේතු වෙනවා.
ඇස ඉක්මවා යමකුට දකින්නට හැකි වීම, කන ඉක්මවා කෙනකුට අසන්නට ලැබීම ආදී අතින්ද්‍රීය ක‍්‍රියා ලෙස ලෝකය හඳුනාගෙන ඇති බොහෝ දේ සවිඥානික බවේ ඉහළම ප‍්‍රතිලාභ ලෙස හඳුන්වන්නට පුළුවන්.

මිනිසාට සහ දෙවියන්ට ඇතැයි කියන දිව්‍ය කන, දිව්‍ය ඇස මිනිසාට ලබාගත හැකියි. ඒ දිව්‍ය කන, දිව්‍ය ඇස උත්සාහයෙන් යුතුව භාවනා කර ලබාගත යුතු දෙයක්.

දිව්‍ය ඇස පින නිසා  ඕපපාතිකව උප්පත්තිය ලබන දෙවියන්ට ඉබේම ලැබෙන දෙයක්. මිනිසාට ද මෙලොව ඉපදෙන විට දිව්‍ය ඇස උත්පත්තිය සමඟම ලැබෙනවා. එහෙත් එය බොහෝම උත්සාහ කර වැසුම් ඉවත් කර පාදාගත යුතු දෙයක්. අධිෂ්ඨානයෙන් උත්සාහයෙන් කැපවීමෙන් භාවනාව දියුණු කිරීම ඔස්සේ ඒ දිව්‍ය ඇස පාදාගත යුතුයි. මිනිස් ඇසින් දැකිය නොහැකි බොහෝ දේ මිනිසුන්ට දිව ඇසින් නොඑසේ නම් තෙවැනි ඇසින් දකින්නට හැකියි. මනුස්ස ලෝකෙත් මේ උත්කෘෂ්ට හැකියාව සහිත මිනිස්සු ඉන්නවා. මේ හැකියාව සහිත සෘෂිවරුන් බොහෝ දෙනෙක් පසුගිය ශතවර්ෂවලදී මේ ලොව ජීවත් වුණා. ඔවුන්ගේ අධ්‍යාත්මික විෂය පථයට අයත් අධිමානසික හැකියාවන්ගෙන් එකක් තමයි දිව්‍ය ඇස හෙවත් තෙවැනි ඇස අවධි කරවා ගැනීම.

දෙවියන්ට මෙන් ඇසීමේ, දැකීමේ හැකියාව තෙවැනි ඇස අවධි කරවාගත් පුද්ගලයාටද ලැබෙනවා. ශ්‍රී රාම මහේෂ් සෘෂිතුමා වරක් ගංඟා නම් නදී තීරයේදී පූරාණානන්ද් නම් සෘෂිතුමා අතින් මේ මහා අතින්ද්‍රිය ඥානය ලැබුවා. ඒ කාලයේ ශ්‍රී රාම මහේෂ් තුමා තරුණ යෝගියෙක්. එම අවස්ථාවේදී සිරුර පුරා ඇති සෑම නාඩි මධ්‍යස්ථානයක්ම අවධි වී, චක‍්‍ර හතම අවධි වී කුණ්ඩලීනී ශක්තිය අවධි වී තෙවැනි ඇස අවධි වී සමාධියකට ශ්‍රී රාම මහේෂ් යෝගි තුමා ඇතුළු වුණා.

එතුමාගේ ගුරු දේවයන්ගේ ස්පර්ශයෙන් සියලූ නාඩි අවධි වී කුණ්ඩලීනී ශක්තිය අවධිව ඒ මොහොතේම යා යුතු සමාධියකට එතුමා පත්වුණා. පැය නවයක් පුරා සමාධියෙන් පසුවූ ශ්‍රී රාම යෝගිතුමා අවධි වී බලද්දී ගුරු දේවයන් නික්ම ගොස් සිටියා. පස්වැනි දිව්‍ය ලෝකයක් තිබුණා නම් මා එහි සිටි බව මට දැනුණා කියලා ශ්‍රී රාම යෝගි තුමා ප‍්‍රකාශ කරලා තිබුණා.

තෙවැනි ඇස අවධි වීමේදී දෙවියන්ට සමාන බලයක් ශක්තියක් ලැබෙනවා. මිනිස් සිරුරේ ඇති ප‍්‍රධාන චක‍්‍ර මධ්‍යස්ථාන හතක් පිළිබඳව අප මීට පෙර පරිච්ෙඡ්දයකදී කතා කළා. දෙබැම මැද පිහිටා ඇති තෙවැනි ඇස ක‍්‍රියාත්මක කළ යුතු මළ ස්වභාවයක පවතිනවා. භාවනාකොට, ආසන හා ප‍්‍රාණයාම ප‍්‍රගුණ කර එහි අවසන් ප‍්‍රතිඵලය ලෙස තෙවැනි ඇස අවධි වීම සිදුවෙනවා. තෙවැනි ඇස පටල හතකින් වැසී තිබෙනවා. පටල හත ඉවත් වී ඒවා ඇසුරේ සිදුරක් ඇතිවී සුවිශාල වූ ආලෝක ධාරාවක් හිස මධ්‍යයේ සිට දෙබැම මැදින් ඉදිරිපසට ආලෝකයක් ගමන් කරයි. එම ආලෝක ධාරාව දස දිශාවට පැතිරෙමින් සිරුර හා බාහිර ලෝකයේ ඇති නොපෙනෙන පෙනෙන හැමදේම ගැන පෙනෙනවා.

මහා කඳු වැටි හරහා ආලෝකය ගලා යමින් හාත්පස දර්ශනය වී ඇසට නොපෙනෙන සියලූ දේ පේන්න ගන්නවා. සියල්ල විනිවිද දැකීමේ හැකියාවක් ලැබෙනවා. අන් අයගේ හැඟීම් සිතුවිලි තමන්ට දැනෙන්නට පටන් ගන්නවා. පෙර විසූ කඳත්, අතීතය, වර්තමානය, අනාගතය තම ඥානයෙන්ම දකින්න හැකියාව ලැබෙනවා. දිවැසිවරු, යෝගිවරු, සෘෂිවරු මේ ශක්තිය ලබාගත්තා.

තෙවැනි ඇස අවධි කර ගැනීම හා එයින් ලද හැකි ඵල ප‍්‍රයෝජන පිළිබඳව අර්ජුන වික‍්‍රමාරච්චි මහතා කළ විචාරයයි මේ. යෝග ශාස්ත‍්‍රයේ තවත් පියවරක් සමඟින් එළඹෙන සතියේදී හමුවෙමු.

සටහන සංජීවිකා සමරතුංග

හිමාලයේ යෝගීන් ඇසුරේ - 01

හිමාලයේ යෝගීන් ඇසුරේ - 02

හිමාලයේ යෝගීන් ඇසුරේ - 03

හිමාලයේ යෝගීන් ඇසුරේ - 04

හිමාලයේ යෝගීන් ඇසුරේ - 05

හිමාලයේ යෝගීන් ඇසුරේ - 06

හිමාලයේ යෝගීන් ඇසුරේ - 07

හිමාලයේ යෝගීන් ඇසුරේ - 08