ප‍්‍රශ්නය: මොකද මේ රණ්ඩු කරගෙන.
පිළිතුර: මම රණ්ඩුවකට ගියේ නැහැ. රස්තියාදුකාරයෝ දේශපාලනඥයෝ වුණාම ඇතිවෙන තත්ත්වය තමයි.

ප‍්‍රශ්නය: ඒ කිව්වෙ, පැහැදිලි නැහැ.
පිළිතුර: බොහොම කැත විදියට තමයි කතා කළේ.

ප‍්‍රශ්නය: කොහොමද?
පිළිතුර: අයිසෙ, තමුසෙ, නපුංසකයා ඔන්න ඔය වගේ නොගැළපෙන වචන. කුණුහරුපත් කිව්වා. පදනමක් නැති චෝදනා එල්ල කළා.

ප‍්‍රශ්නය: ඔබේ ඉවසීමේ සීමාව ඉක්මවල ගියා.
පිළිතුර: මේකයි. පදනමක් විරහිතව චෝදනා කරනවා. රාජපක්ෂ පවුලට චෝදනා කරනවා. ඒවා මොනවද කියල කියන්නෙ නැහැ. පදනම් විරහිතයි. එතනෝල් ගෙන්වීම ගැන කියනවා. හොරකම්, වංචා ගැන කියනවා. ඉබාගාතෙ යන චෝදනා කරනවා. පදනමක් නැහැ. අදාළව කරුණු ඉදිරිපත් කළෙත් නැහැ.

ප‍්‍රශ්නය: ඔය වගේ චෝදනා විපක්ෂයේ හැමෝම වගේ කරනවානේ.
පිළිතුර: චෝදනා කරනකොට සාධක ඇතිව කතා කරන්න  ඕනැ. අපි එහෙමයි. මේ මනුස්සය පදනම් විරහිත චෝදනා කළා. කුණු වෙබ් අඩවියක ප‍්‍රචාරය කරපු දෙයක් අල්ලගෙන මට මඩ ගැහුවා.

ප‍්‍රශ්නය: ඔබ සීමාව ඉක්මවල ගියෙ ඇයි?
පිළිතුර: මම සීමාව ඉක්මවල ගියේ නැහැ. හරීන් තමයි සීමාව ඉක්මවල ගියේ. මට කතාකරන්න නොදී දිගින් දිගටම බාධා කළා.

ප‍්‍රශ්නය: විවාදයකදි එහෙම දේවල් වෙනවා නේද?
පිළිතුර: ඔය මනුස්සය මට පුළුවන් තරම් මඩ ගැහුවා. ඒක මගේ ජයග‍්‍රහණයටත් හේතුවුණා. මම සල්ලි අරගෙන රජයට ආව කිව්වා. ඔහොම බොරු කියන්න හොඳ නැහැ.

ප‍්‍රශ්නය: ඔබට කේන්ති ආවේ ඒකද?
පිළිතුර: මට කතා කරන්න නොදී මහ ජරා කතා කිව්වා.

ප‍්‍රශ්නය: ඔබ නාමල්ගෙ නම ගාව ගත්තෙ.
පිළිතුර: නෑ... නෑ... එහෙම ගාව ගත්ත නෙවෙයි. දවල්ට රාජපක්ෂ පවුලට බනිනවා. ?ට නාමල්ට කතා කරනවා. මම ඒක කිව්වා.

ප‍්‍රශ්නය: නාමල් හරීන් දෙන්න මත්පැන් බොනවද?
පිළිතුර: නැහැ... නැහැ. මම එහෙම කිව්වෙ නැහැ. අනික නාමල් මත්පැන් බොන කෙනෙකුත් නොවෙයි.

ප‍්‍රශ්නය: මේ ගැටුමට පෞද්ගලික ප‍්‍රශ්නයක් හේතුවෙල තියෙනවද?
පිළිතුර: කිසිම පෞද්ගලික ප‍්‍රශ්නයක් නැහැ. එයත් එක්ක මොන පෞද්ගලික ප‍්‍රශ්නද?

ප‍්‍රශ්නය: පුද්ගලයෙකුට රජය විවේචනය කරන්න පුළුවන්නේ.
පිළිතුර: පුළුවන්. ඒත් චෝදනා කරන විට සාධක ඇතිව චෝදනා කරන්න  ඕනැ.

ප‍්‍රශ්නය: දෙන්නා ගහගත්තද?
පිළිතුර: නෑ. එහෙම දෙයක් වුණේ නැහැ.

ප‍්‍රශ්නය: ඔබට ගැහුව කියනවා.
පිළිතුර: ඒ බොරු. එහෙම දෙයක් උනේ නැහැ.

ප‍්‍රශ්නය: ඔබ හරීන්ට ගැහුවද?
පිළිතුර: නැහැ.

ප‍්‍රශ්නය: ඔබ මීට පෙරත් මේ වගේ විවාදවලදි ආරවුල් කරගෙන තියෙනවද?
පිළිතුර: නැහැ. අපි බොහොම සුහදව විවාද කරල තියනවා. අජිත් පෙරේරා මන්ත‍්‍රීතුමා එක්ක එහෙම විවාද කරල තියෙනවා. මෙහෙම නැහැ.

ප‍්‍රශ්නය: මාර චණ්ඩියෙක් වෙලානේ.
පිළිතුර: අනේ නෑ. මම බොහොම අහිංසක මනුස්සයෙක්.

ප‍්‍රශ්නය: දයාසිරි ජයසේකර මහ ඇමැතිවරයට ගැහුව කියල ආරංචියි.
පිළිතුර: මගේ ෂර්ට් එකෙන් අල්ලල හොල්ලනකොට මට ඉවසගෙන ඉන්න බැරි වුණා.

ප‍්‍රශ්නය: ගැහුවද?
පිළිතුර: මගේ ෂර්ට් එකෙන් අල්ලල කුණුහරුප කියල බණිනකම් අහගෙන ඉන්න මම මොකෙක්ද? මම දුන්න එකක් ඇදගෙන වැටෙන්න.

ප‍්‍රශ්නය: ඔබ ගහනකම් එයා බලාගෙන හිටියද?
පිළිතුර: නැහැ. මාව හැපුවා!

ප‍්‍රශ්නය: ඉතින්
පිළිතුර: මම කිව්වා. ගෑනියෙක් වගේ හපන්න එපා යකෝ. අතින් පයින් ගහපන් කියලා.

ප‍්‍රශ්නය: ඔබට තුවාල වුණාද?
පිළිතුර: මගේ මූණ සීරිල තිබුණා. ලේ පොඞ්ඩක් ආවා. මම ගණන් ගත්තෙ නැහැ.

ප‍්‍රශ්නය: ඔය තරම් දුර දිග යන ආරවුලක් ඇති වුණේ පෞද්ගලික හේතුවක් නිසාද?
පිළිතුර: කිසිම පෞද්ගලික හේතුවක් නැහැ.

ප‍්‍රශ්නය: කාන්තා ප‍්‍රශ්නයක්වත්.
පිළිතුර: අපෝ නැහැ. ගෑනු ප‍්‍රශ්න නැහැ.

ප‍්‍රශ්නය: ඔය තරම් දුර දිග ගියේ.
පිළිතුර: දයාසිරිට මල පැන්නා. කෙනෙක් මගෙන් ප‍්‍රශ්නයක් ඇහුවා. නිල්පාට කමිසයක් ඇඳගෙන ඉන්නෙ අනිත් පැත්තට යන්න අදහසක් තියෙනවද කියල. ඒ ප‍්‍රශ්නයට මම උත්තර දුන්නා. ඒ පිළිතුර දයාසිරිට හොඳට වැදුනා. මම කිව්වා, ”සමහර අය වගේ රජයට බැනල රෙද්දක් ඇඳගෙන නම් යන්නෙ නැහැ. මම ඔය වෙන අය වගේ කටින් එකක් කියල වෙන එකක් කරන කෙනෙක් නොවෙයි හිඟමන් යන්නෙ නැහැ” කියල කිව්වා.

ප‍්‍රශ්නය: ඒකටද කේන්ති ගියේ.
පිළිතුර: එයා කිව්ව මම නාමල් එක්ක බොන්න යනවා කියලා. සමාජ ශාලා යනව කියල. මම දන්න විදියට නම් නාමල් බොන්නෙ නැහැ. ඔහොම කතා කරනකොට එයා හොඳටම කේන්තියෙන් මට බාධා කර කර හිටියෙ.

ප‍්‍රශ්නය: ඊට පස්සෙ.
පිළිතුර: එතකොට ”බ්රේක්” එකක් ආවා. බ්රේක් එකේදිත් මට බැන්නා. ගෙඹි වැඩ කරන්න එපා කිව්වා. මම ඇහුව කවුද ගෙම්බා කියලා. එයා මයික් එකයි පුටුවයි පෙරළගෙන ඇවිත් තමයි මට ගහන්න හැදුවෙ.

ප‍්‍රශ්නය: ආරාවුල ඇති කරන්න මූලික වූයේ ඔබද?
පිළිතුර: නැහැ. මම හරිම ගෞරවාන්විතව ඔහු පිළිගත්තා. ජයග‍්‍රහණයට සුබ පැතුවා. මගේ හොඳ යාළුවෙක්. වසරකට විතර පස්සෙ හමු වුණේ මට. සතුටුයි කියල කිව්වෙ.

ප‍්‍රශ්නය: ඔහු මොනවද කිව්වෙ?
පිළිතුර: මගේ එක්ක කිසිම යාළුකමක් නැහැ. කියල බනින්න පටන් ගත්තා. කටින් බය කර ගන්න හැදුවා.

ප‍්‍රශ්නය: ඔබ කියල තිබුණ ඔහු රජයෙන් මුදල් ගත්තා කියලා.
පිළිතුර: ඒක වෙබ් සයිට් එකක තිබුණ කතාවක්.

ප‍්‍රශ්නය: ඔබ දැන් දයාසිරි ජයසේකර මහ ඇමති එක්ක අමනාපයෙන්ද?
පිළිතුර: නැහැ. මගේ අමනාපයක් නැහැ. හොඳකුත් නැහැ. මම ඒක අමතක කළා.

ප‍්‍රශ්නය: පොලීසියට පැමිණිලි කළාද?
පිළිතුර: නැහැ.

ප‍්‍රශ්නය: ඔය සිද්ධියෙන් පසු නාමල් ඔබට කතා කළාද?
පිළිතුර: නාමල් කතා කළා. අයිය මාව ආරක්ෂා කළ බව ආරංචියි කියල මට ස්තුති කළා.

ප‍්‍රශ්නය: වෙන කවුද කතා කළේ.
පිළිතුර: අපෝ කථා කළා. ෆෝන් එකට පසුවදා දවසෙම නිවනක් තිබුණෙ නැහැ.

ප‍්‍රශ්නය: පසුවදා පාර්ලිමේන්තු නාවෙ ඇයි?
පිළිතුර: මම කලින් දාගත්ත වැඩ ගොඩක් තිබුණ.