අපේ රටේ සමහර දෙනෙක් මිථ්‍යා මත විශ්වාස කොට ඒවා මූලික කොට එවැනි දේවල්වලට ඇලී ගැලී ජීවත් වෙද්දී තවත් සමහර පිරිසක් දවසේ වැඩි කාලයක් තමන් සොයා ගන්නා තම වේතනයෙන් වැඩි මුදලක් මෙවැනි අදෘශ්‍යමාන බලවේග ඔස්සේ එම කටයුතුවලට හා පුද්ගලයන්ට වියදම් කොට ජීවිතය ගොඩනගා ගන්නට වැර වීරිය දරති. සමහර දෙනෙක් නිධන් හෑරීම සඳහා පිදේණි වශයෙන් බිලි පූජාවන් පවත්වති. ඒ වෙනුවෙන් ප‍්‍රාණගාතයන් සිදු කරති.

මේ ආකාරයටම දෙවියන් කෙරෙහි දැඩි විශ්වාස කරන ලද මාවනැල්ලේ වෑගන්තලේ ජීවත් වූ පවුලක් තම නිවසේ කරදර උදෙසා තම නැගණියගේ පුතකු ලවා ගුරුකම්, ශාන්තිකර්ම, සෙත් ශාන්ති කිහිපයක් නිවෙසටත් ලෙඩ දුක්වලින් නිතරම පෙළෙන ලොකු පුතු වෙනුවෙන් කර කියා ගැනීමේ අරමුණින් ගෙන්වා ගත්තේය. එම කටයුතු කරද්දී නිවෙස් හිමියෝ කට්ටඩියා (කපුවා) දැඩි ලෙස විශ්වාස කර සිටියහ. එනමුත් වයස අවුරුදු 31 වූ වැඩිමහල් පුතු පසුගිය 02 වැනිදා මිය ගොස් ඇති බවට ආරංචියක් අපට දැන ගන්න ලැබිණ. මෙහි සුල මුල සොයා ගිය අතරේ දැන ගන්නට ලැබුණේ මෙම ශාන්තිකර්ම බලි තොවිලය එම නිවසේ පැවති දිනයේ හරක් මස් අනුභව කර පැමිණි පුතුට දේව දඬුවමක් ලෙස දින 21ක් තම නිවෙස් හිමියන් විසින් කාමරයක දමනු ලෙසට කට්ටඩියාගේ කීමට ඉංග‍්‍රීසි බෙහෙත් නොකොට සිර කර තිබීම හේතුවෙන් මෙම තරුණයා මිය ගිය බවයි. පසුව මේ සඳහා ඥාතීන් හා ගම්වාසීන් එක්ව මෙම පවුලේ මාපියන් හා වැඩිහිටියන්ට දැඩි ලෙස චෝදනා කර සිටියේ මෙම මරණය සිදු වූයේ ශාන්තිකර්මය සිදු කළ කපුවා නිසා බවයි.

මෙම සිද්ධියෙන් මියගොස් ඇත්තේ මාවනැල්ල වෑගන්තලේ  ඊ. ඒ. ආර්. ප‍්‍රසන්න පි‍්‍රයලාල් නමැති අවිවාහක තරුණයෙකි. පසුගිය මැයි 11 වැනි දින යාළුවකු මුණගැසීමට කොළඹ ගොස් මධ්‍යම රාත‍්‍රියේ නිවෙසට එමින් සිටියදී සිිහිසුන්ව ප‍්‍රසන්න ඇද වැටී ඇත. එදින තම ඥාති පුතකු සිය කැමැත්තෙන් තම නිවෙසට ගෙන්වාගෙන මෙම ශාන්තිකර්මයත් හා බලිතොවිල් ශාන්තියත් කරමින් සිටි බව ප‍්‍රසන්නගේ මව වන ඒ. ආර්. එම්. ගුණරත්න මැණිකේ මහත්මිය අප සමග කීවාය. වැඩිදුරටත් අදහස් දැක්වූ ගුණරත්න මැණිකේ මහත්මිය මෙසේද කීවාය.

මේ මරණයට පත්වූයේ මාගේ වැඩිමහල් පුතා. මට පුතාලා තුන් දෙනෙකුයි දුවලා දෙන්නෙකුයි ඉන්නවා. අපේ ගෙදර කරදර වැඩියි. මාගේ එක පුතෙකුත් ආමි එකේ ඉඳලා මැරුණා. දවසක් අපි නිමිත්තක් බලපුවාම කීවා තවත් මාස තුනකින් කරදරයක් වෙන්න තියෙනවා ඒක නිසා ශාන්තිකර්මයක් කරන්න කියලා. මේ ශාන්තිකර්මය කරපු දවසේ ලොකු පුතා හිටියේ නැහැ. එයාගේ යාළුවෙකු රට යනවා කියලා එයා එහේ ගිහින්. ඒ අතරේ එයා නැති වුණත් අපි මේ කටයුතු ලෑස්ති කළා. ප‍්‍රසන්න පුතා කොළඹ ගිහින් එදා මධ්‍යම රාති‍්‍රයේ තමයි ආවේ. මෙයා ඒ එනකොට හරක් මස් කාලා තියෙනවා. එදා අපි තොවිලය කරපු නිසා තොවිලයේ බලයෙන් හරක් මස් කාපු පුතා සිිහිසුන්ව ගෙදරට මීටර් ගාණකට ඈතින් වැටිලා තියනවා. සිහිසුන් නැතිව වැටුණේ ශාන්තිකර්මය පැවත්වූ නිසා ඒකට මස් වර්ග ”කිලි” වූ නිසාලූ. මේ බව අපිට කීවේ අපේ කට්ටඩි පුතා. මේ මස් කාපු වරදට දෙයියෝ එයාට දඬුවම් දීමක් සිදුකර ඇති බවට සිහිසුන්ව ඇදවැටුණ පුතා ගැන කට්ටඩියාගෙන් විමසූ විට අපිට කීවා. පස්සේ එයාට එන්න එන්න අමාරුවී ඇති අතර කෑමක් බීමක්ද නොගත් බව පවසයි.

නමුත් කට්ටඩි පුතා කීවේ ඉස්පිරිතාලේ ගෙන යන්න එපා හොඳ වෙයි කියලා. එයා බයිපාස් සැත්කමක්් මීට කලින් කරලයි තිබුණේ. ඒකට බෙහෙත් බිබී තමයි හිටියේ. ඒ බෙහෙතුත් ගෙදර තිබුණ නිසා අපි බෙහෙත් ගේන්න අරන් ගියේ නැහැ. මේ රෝගය වැඩි වුණ නිසා අපි රෝහලට අරන් යන්න කිහිප වරක් අපේ නංගිගේ පුතාගෙන් අහනකොට (කට්ටඩියා) දින 21කට පසු ”දේව දඬුවම” ඉවත් වෙයි කියලා කීවා. නමුත් අවසන් කාලේ ගොඩාක් අමාරු වුණ නිසා මාවනැල්ලේ රෝහලට අරන් ගියා. නමුත් අරන් ගිහින් ගොඩාක් වේලා යන්න වුණේ නැහැ රෝහලේ්දී ලොකු පුතා මිය ගියා යැයි ඇය පැවැසුවා. ඇය වැඩිදුරටත් අදහස් දක්වමින් කියා සිටියේ තම නැගණියගේ පුතා වන ශාන්තිකර්මය සිදු කළ පුතණුවන්ගේ කිසිදු වැරැුද්දක් නොවන බවයි. ඔහුද පුතණුවන් බේරා ගැනීමට අපමණ උත්සාහ කළ බවද කීවාය. නමුත් ගම්මුන් එයාගේ වරද කියලා එයා මරන්න දඟලනවා. එයාව හොයා ගෙන එයාගේ නිවෙස තියන රඹුක්කන පවා ගියාලූ. එහෙත් දේවාලයක් තියනවා. ඒ ගිහින් එහේ බඩු මුට්ටුවලට පවා හානි කරලා ඇවිල්ලා පුතා හොයා ගන්න බැරිව. මටත් කියලා තමයි ගියේ.

අපි මිය ගිය ප‍්‍රසන්නගේ නිවසට ගිය මොහොතේ නිවසේ ශාන්තිකර්ම සඳහා අටවා තිබූ ”මල්පැල අට්ටාල” කඩා බිඳ දමා තිබිණි.

‘‘මේ මරණය මාපියන්ගේ වරදින් සිදු වූ මරණයක්. ගම්වාසීන්ට මේ නිවෙසට එන්න දුන්නේ නැහැ. නැදෑයන් වන අපිට එන්න දුන්නෙත් නැහැ ”කිලි” අහුවෙනවා කියලා. වැටවල් බැඳලා ටකරන් ගහලා වැළැක්වුවා. අන්තිමේදී කොල්ලා මළා. මැරිච්ච බව දැනගත් මේ හොර කට්ටඩියා දැන් ගමෙන් පළා ගිහින්. ඊට පස්සේ මම ගමේ අයත් එක්ක හොර ”ගුරා” හොයාගෙන ගියා රඹුක්කන ගෙදරට....” අවමඟුල වූ නිවෙසේ සිිටි තැනැත්තෙක් අපට කීවේය. ඒත් කට්ටඩියා නෑ.” ඔහු එම තරුණයාගේ බාප්පා වන ඊ. ඒ. ආර්. පොඩි බණ්ඩාය.

මේ හදිසි මරණයෙන් මිය ගිය ප‍්‍රසන්නට ගම්වාසීන් හා ඥාතීන් ආදරයක් හා ළෙන්ගතු කමක් දක්වන්නේ ඔහු පාසල් යන කාලයේ සිට ගමේ කවුරු කවුරුත් සමඟ සමාජයේ පොදු වැඩ සඳහා ලබා දුන් සහය නිසාය. ප‍්‍රසන්නට මේ නිසා යාළුවෝ බොහෝ පිරිසක්ද වූහ.  ඕනෑම රාත‍්‍රීයක දහවල් කාලයක ගමේ කටයුත්තකට පැමිණෙන ලෙස ලබා දෙන දුරකථන පණිවිඩය ලැබූ සැණින් ඔහු පැමිණෙන්නේය. මේ පිළිබඳ ඔහුගේ සමකාලීන පාසල් මිතුරෙකු වන නිවෙසට ආසන්න නිවසක ජීවත් වන පී. ඞී. ජී. වසන්ත බාලසූරිය (31) අපට සිද්ධ වූ කරුණු කාරණ සියල්ලම කීවේය.

”මෙයාට හදිසියේ සිද්ධ වූ රෝගාබාධ තත්ත්වයක් නිසා ”බයිපාස්” සැත්කමක් කළේ මීට වසරකට පමණ ඉහතදී. මේ සැත්කමෙන් පසු පවා හොඳට හිටියා. ඒ ඉන්න අතරදී සමහර අවස්ථාවල ගමේ කොල්ලෝ එක්ක විනෝද වෙන්න මත්ද්‍රව්‍ය පාවිච්චි කළා. මස්් වර්ග කෑවා. නමුත් ඒ විශේෂ අවස්ථාවක පමණයි. මෙහෙම ඉඳලා අන්තිමේදී අකාලයේ නිරපරාදේ නොසැලකිලිමත්කම නිසා මිය ගියා.

මම එක දවසක් බලන්න ගියා. එදා මම ප‍්‍රියාව රෝගාතුරු වෙලා ඉන්නවා දැකලා මොකද ප‍්‍රියා කියලා ඇසුවා. එතකොට ”මට වසන්ත” කියලා එක පාරක් කතා කළා. ඊට පසුව කතා කරන්න බැරිව ගියා.

”එයාට දෙයියො දී ඇති දඬුවම ඉවර නැති නිසා කතා කරන එකත් දෙවියන් දවස් හතකට නවතා ඇති බව තමන්ට නිවසේදී දැනුම් දුන්නේ යැයි ඔහු කියයි.
”කිලි” අහුවෙනවා කියලා එම ගෙදරට පිට කාටවත් යන්න දුන්නේත් නැහැ. ගෙදර වටේ ලණු ගසලා ”ටිකට්වලට පෙන්වන සංගීත සංදර්ශනයකට” වගේ ටකරන් ගසා මේ තොවිල් කටයුතු සිදු කළා. පිරිමි අයට පවා ”කිලි” අසුවෙනවා කියලා යන්න දුන්නේ නැහැයි ඔහු අදහස් පළකරමින් කීවේය.

මිය ගිය ප‍්‍රසන්නගේ මව ඒ.ආර්.එම්. ගුණරත්න (49) මහත්මිය : පසුගිය මැයි 11 වැනි දින යාළුවෙකු මුණගැසීමට කොළඹ ගොස් මධ්‍යම රාත‍්‍රියේ නිවසට එමින් සිටියදී සිිහිසුන්ව මාගේ ලොකු පුතා ප‍්‍රසන්න ඇදවැටුණා. එදින ප‍්‍රසන්නගේ නිවසේ තම මවගේ නැගණියකගේ පුතෙකු වන දැනට කට්ටඩියෙකු ලෙස කටයුතු කරන පුතණුවන් විශාල ශාන්තිකර්මයක් කරමින් සිටියා. පුතා එදා කොළඹ යාළුවා හම්බ වෙන්න ගිහින් ගෙදර ඇවිත් තියෙන්නේ හරක් මස් කාලා. දෙවියන්ගේ වාහනය හරකා නිසා මේ පුතාට ගෙදර එන්න බැරි වුණා. එයා ගෙදරට මීටර් ගාණක් තියෙද්දී කෑ ගහගෙන සිහිසුන්ව බිම වැටුණා.

ශාන්තිකර්මය කරපු පුතා අපිට කීවේ ප‍්‍රසන්න පුතාට දෙවියෝ දඬුවම් දුන් බවයි.

ඒක හොඳ වෙන්න දින 21ක් දෙයියෝ එක්තැන්ව ඉන්න දඬුවමක් දෙන බවද කීවා. එදා ඉඳලා පුතා ලෙඩ වුණා. පස්සේ එයාට එන්න එන්න අමාරු වුණා. කෑමක් බීමක් ගත්තෙත් නැහැ. නමුත් කට්ටඩි පුතා කීවේ ඉස්පිරිතාලේ ගෙන යන්න එපා හොඳවෙයි කියලා. එයා හෘද සැත්කමක් කලින් කරලා තිබුණේ. ඒකට බෙහෙත් බිබී තමයි හිටියේ. ඒ බෙහෙත් තිබුණ නිසා අපි බෙහෙත් ගේන්න අරන් ගියේ නැහැ. අපිටත් ලොකු විශ්වාසයක් තිබුණා පුතාට හොඳ වෙයි කියලා. පස්සේ 02 වැනිදා මේ රෝගය වැඩිවුණ නිසා අපි රෝහලට අරන් යනකොට එයාට ගොඩාක් අමාරු වෙලා මැරුණා යැයි ඇය පවසයි.

”දවසක් අපි නිමිත්තක් බලපුවම කීවා තවත් මාස තුනකින් කරදරයක් වෙනාව කියලා. ඒක තමයි මේ වුණේ. නිමිත්ත බලපු දවසේ ඉඳලා හරියටම මාස තුනයි” ඇය කීවාය.

පුතා (කට්ටඩියා) බැලූවේ කොහොම හරි බේරා ගන්න තමයි. එයාගේ නරක වේලාවට මැරුණා. ඒ පුතා රඹුක්කනත් දේවාලයක් කරනවා. අපි තමයි යන්න කීවේ. නැත්නම් ගමේ අය මේක වැරැුදියට තේරුම් ගෙන මොනවා කරයිද මන්දා”

තම බිරිඳගේ අදහස එසේ අනුමත කරන මිය ගිය ප‍්‍රසන්නගේ පියා වන ඊ. ඒ. ආර්. රම්බංඩා මහතා කීය. මේ මරණයෙන් පසුව ගම්මුන් තමන්ට අඩන්තේට්ටම් කරන බවට දැනෙන නිසා ඒ පිළිබඳ මරණ පරීක්ෂණයේදීද සිහිපත් කරන බවත් ඒ පිළිබඳ අවශ්‍ය නිතීය හරි හැටි ක‍්‍රියාත්මක කරන ලෙස ඔහු මාවනැල්ල පොලිසියෙන් ඉල්ලා සිටින බවද කියා සිටියේය.

මේ පිළිබඳ අපිට අදහස් දැක්වූ වෑගන්තලේ සුමිත් මිහිර බංඩාර මෙසේ කීවේය. ”මේ කට්ටඩියාට නිවෙසට එන බාහිර පිරිමි ”කිලි” කියලා ඔවුන් නැවත්තුවා. මෙයාට තිබුණේ ගෑනු එක්ක ඉන්න අවශ්‍ය වුවමනාවක්. මේ නිසාම මේ කටයුතුවලට ගැනු ළමයි දෙන්නෙක් ළඟ තියාගෙන වැඩ කරගෙන ගියා. එයාලා සමහර දවස්වල රෑට පාන්දරට දවල්ට කුරුණෑගල පැත්තේ ”කස්තුරි” හොයන්න කියලා එක්ක යනවා. කොහොම හරි සාත්තු කරනකොට ළඟ තියාගෙන හිටපු කස්තුරි හොයන්න එක්ක ගිය තරුණියක් සමග මේ කපුවා කැලෑ පැනලා ගිහින්.

මේ සියල්ල එසේ සිදු වුවත් ඉකුත් 03 වැනිදා මරණය පිළිබ`ද මරණ පරීක්‍ෂණයක් මාවනැල්ල මහ රෝහලේදී පැවැත්විණි. එහිදී ගම් නවයක් පත්තුවේ හදිසි මරණ පරීක්‍ෂක හා මාවනැල්ල රෝහලේ හදිසි මරණ පරීක්‍ෂක ඩබ්ලිව්. එම්. ආනන්ද වීරකෝන් මහතා සහ මාවනැල්ල පොලිසියේ පොලිස් සැරයන් 23809 එච්. ඒ. රත්නායක යන මහත්වරුන් පරීක්ෂණ කටයුතු අවසානයේ මාධ්‍යයට පවසා සිටියේ මෙම මරණය දැඩි ලෙස රෝගාතුරවීමකින් නිසි ප‍්‍රතිකාර නොලැබීම මත සිදු වූ මරණයක් බවයි. තවද මෙම රෝගියා ”බයිපාස්” සැත්කමක් කළ කෙනෙකු ලෙස ගොඩ වෙදකම් නිසා යම් ආසාදන තත්ත්වයක් හට ගන්නට ඇති බවද නිගමනය විය.