ග්‍රාමසේවක වසම් 52ක් අයත් වන සමස්ත පිළියන්දල පොලිස් බල ප්‍රදේශයම පසුගිය ඉරිදා හුදෙකලා කැරෙන බව නිවේදනය කෙරිණ. එසේ කෙරුණේ, කැස්බෑව සෞඛ්‍ය සේවා නිලධාරිනී වෛද්‍ය සමන්තිකා විජේසුන්දර මහත්මියගේ නියමයකට අනුවය. 

එසේ කිරීමට ඇයට නෛතික වශයෙන්ම බලතල හිමිව තිබෙන අතර, සෞඛ්‍ය සේවා නිලධාරිනිය එවන් තීන්දුවක් ගෙන තිබුණේ මාරාන්තික වෛරසයේ ව්‍යාප්තිය සැළකිල්ලට ගෙනය. ඊට පෙර ගෙවුණු දින තුන ඇතුළත පමණක් කෝවිඩ්-19 ආසාදිතයන් 147 දෙනෙක් එම ප්‍රදේශයෙන් හඳුනාගෙන තිබූ අතර, ඔවුන් වාසය කළ නිවෙස්වල නිවැසියන් සහ ඔවුන් හා ගැවසුණු තවත් සිය ගණන්දෙනා, ඔවුන්ගේ නිවෙස්වලම නිරෝධායනයට යොමුකිරීමට අවශ්‍ය වුනි. 

ඉරිදා සිට බදාදා වන විට පමණක් එම ප්‍රදේශයෙන් ආසාදිතයන් 219 දෙනෙක් වාර්තාවී තිබිණ.

සමස්ත පිළියන්දල පොලිස් බල ප්‍රදේශයම හුදෙකලා කෙරෙන බව ඉරිදා සවස 6.00 ට පමණ යුද හමුදාපතිවරයා නිවේදනය කළේ ය. එය වහාම ක්‍රියාත්මක කැරෙන බවත්, ඔහු පැවසුවේ ය. මේ හමුවේ ඇතැම් ප්‍රාදේශීය දේශපාලඥයින් සහ වෙළඳුන් කෝපයට පත්වූ අතර, ඔවුහු කැස්බෑව ආසනය නියෝජනය කරමින් පාර්ලිමේන්තුවටත්, අමාත්‍යධූරයකටත් පත්ව සිටින ගාමිණී ලොකුගේ මහතාට පැමිණිලි කළහ. 

එයින් පසුව පොලිසිය තවදුරටත් පිළියන්දල යනු හුදෙකලා කර ඇති ප්‍රදේශයක් ලෙස සැළකූයේ නැත. වෙළදසැල් විවෘත කර පැවැති අතර නගරයේ ජනතාව ගැවසෙණු ද දක්නට හැකිවිය. ප්‍රවාහන සේවා ද සාමාන්‍ය අයුරින් ක්‍රියාත්මක විය. පිළියන්දල මෙම තත්ත්වය, එතෙක් අගුලුලා තිබූ වෙනත් ප්‍රදේශ හා සැසදීමේ දී අහසට පොළව මෙන් වුනි.

කෙසේවුවත්, ඉරිදා රාත්‍රිය වන විට තවත් නිවේදනයක් නිකුත් විය. ග්‍රාම නිලධාරී වසම් 10 ක් හැරෙන්නට පිළියන්දල පොලිස් බල ප්‍රදේශයේ සෙසු ප්‍රදේශයන් ලොක්ඩවුන් කැරෙන බව එහි සදහන් විය. එම ප්‍රදේශ ද සදුදා අලුයම 5.00 සිට විවෘත කරන්නේ යැයි ද එම නිවේදනයේ වැඩිදුරටත් දැක්විණ.

පොලිසියේ සහ තෝරාගත් රජයේ නිලධාරීන් පිරිසක් සමග අමාත්‍ය ලොකුගේ මහතා ගෙවුණු ඉරිදා කැස්බෑව ප්‍රාදේශීය ලේකම් කාර්යාලයේ දී රැස්වීමක් පවත්වා ඇතැයි පසුව අනාවරණය විය. කෙසේවුවත් සදුදා දින කැස්බෑව සෞඛ්‍ය නිලධාරිනී වෛද්‍ය සමන්තිකා විජේසුන්දර මහත්මිය පැවසුවේ කැස්බෑව ද ඇතුළත් පිළියන්දල පොලිස් බල ප්‍රදේශයේ ලොක්ඩවුන් තත්ත්වය ලිහිල් කිරීමට තමා කිසිදු අයුරකින්වත් නිර්දේශ නොකළ බවය.

“එම ප්‍රදේශයෙන් සිය ගණනක් කෝවිඩ් ආසාදිතයන් වාර්තා වනවා. එනිසාම එහි පුද්ගලයින්ගේ සංචරණය සීමා කිරීම අත්‍යාවශ්‍යයි” යයි ඇය මාධ්‍ය හමුවේ කීවා ය.

තමා ඇතැම් ප්‍රදේශවල ලොක්ඩවුන් තත්ත්වය ඉවත් කිරීමට කටයුතු කළේ අදාළ නිලධාරීන්ගේ අදහස් විමසීමෙන් පසුව බව අමාත්‍ය ලොකුගේ මහතා පැවසුවේ ය.

නිදහසේ සැරිසැරීම

“සියලුම ප්‍රදේශ ලොක්ඩවුන් කිරීම අනවශ්‍ය බව අපගේ බුද්ධි අංශ සහ වෙනත් ආරංචි මාර්ග කියා සිටියා” යයි ඇමතිවරයා කීවේය. 
එසේවුවත්, සිය කාර්යමණ්ඩලයේ ඇතැම් සාමාජිකයන්ට කෝවිඩ්-19 වෛරසය ආසාදනයව තිබෙන බවත්, තමා නිරෝධායන නොවන බවත්, අමාත්‍යවරයා පිළිගත්තේ ය.

කාර්යමණ්ඩල සාමාජිකයන්ට කෝවිඩ්-19 වෛරසය ආසාදනයව තිබිය දී, නිදහසේ සරමින් සිටින්නේ කෙසේදැයි මාධ්‍ය විමසූ විට ඔහුගේ පිළිතුර වූයේ... “මම දැනටමත් එන්නතෙන් එක් මාත්‍රාවක් ලබාගෙන තිබෙනවා. ඒ වගේම පීසීආර් පරීක්ෂණයකුත් සිදුකළා” යන්නයි. 

සදුදා රාත්‍රියේ සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා රූපවාහිනී සංවාද වැඩසටහනකට සහභාගීව සිටිනු නැරඹීමට හැකිවිය. පැය 24ක් ගතවීමටත් මත්තෙන් පිළියන්දල පොලිස් බල ප්‍රදේශයට පැනැවුණු ඇඳිරි නීතිය ලිහිල් කිරීම සම්බන්ධව ඔහුගේ අදහස් විමසීමක් සිදුවුණේදැයි ප්‍රශ්න කැරුණු විට, ඒ සම්බන්ධයෙන් තමාගේ අදහස් විමසීමක් සිදුනොවුණු බවත්, විමර්ශනයක් සිදුකරන බවත්, වෛද්‍ය ගුණවර්ධන මහතා පැවසුවේ ය.

ඒ අනුව, සෞඛ්‍ය අමාත්‍යංශයේ සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය එස්. එම්. ආර්නෝල්ඩ් මහතා ප්‍රමුඛ සිව් පුද්ගල කමිටුවක් මෙම සිදුවීම සම්බන්ධයෙන් විමර්ශනය කිරීමට පත් කෙරිණ. ඔවුහු පිළියන්දල සහ කැස්බෑව සෞඛ්‍ය අමාත්‍යංශ කාර්යාල වෙත ගොස් කරුණු විමසා බැලූහ. 

පිළියන්දලට පනවා තිබූ ලොක්ඩවුන් තත්ත්වය වහා ඉවත් කිරීමට කටයුතු කැරුණු ආකාරය විවිධ ස්ථානවල සාකච්ඡාවට බදුන් වූ අතර, රටේ කෝවිඩ්-19 වසංගත තත්ත්වය සම්බන්ධයෙන් පැවැති විවාදයේ දී ජනතා විමුක්ති පෙරමුණේ නායක පාර්ලිමේන්තු මන්ත්‍රී අනුර කුමාර දිසානායක මහතා අදහස් දක්වමින් “සෞඛ්‍ය විෂයට අදාළ තීරණ ගතයුතුව තිබෙන්නේ එම විෂයට අදාළ නිලධාරීන් මිස දේශපාලඥයින් නොවේ” යයි පැවසුවේ ය.

ගාමිණී ලොකුගේ අමාත්‍යවරයාගේ ක්‍රියාකලාපයට අගමැති මහින්ද රාජපක්ෂට ද, ප්‍රසිද්ධ ප්‍රතිචාරයක් දැක්වීමට සිදුවිය. කුමන තනතුර දැරුවත්, සියලුම දෙනා සෞඛ්‍ය මාර්ගෝපදේශයන්ට ගරු කළ යුතුව තිබෙන්නේයැයි ඔහු අවධාරණය කළේ ය.

අමාත්‍ය ලොකුගේ මහතාගේ මැදිහත්වීම විවේචනය කළෝ අතර රජයේ වෛද්‍ය නිලධාරීන්ගේ සංගමය ද ප්‍රධාන විය. එහි සහකාර ලේකම්, වෛද්‍ය නවීන් ද සොයිසා මහතා බ්‍රහස්පතින්දා පැවැති මාධ්‍ය හමුවක දී අදහස් දක්වමින් මෙසේ කීවේ ය.

“කලාපය භාර සෞඛ්‍ය වෛද්‍ය නිලධාරීවරියක් ගත් තීරණයක් අමාත්‍යවරයෙකුගේ මැදිහත්වීමකින් අනිත් පැත්ත හරවපු හැටි අපි පිළියන්දල දී දුටුවා. මේක හරිම නින්දා සහගත ක්‍රියාවක් වගේම අපි රටක් හැටියට ලැජ්ජා විය යුතු දෙයක්. අපි මේ ගැන අපේ දැඩි විරෝධය දැක්වූවා. නිරෝධායන ප්‍රඥප්තිය යටතේ බලයලත් නිලධාරියා ලෙස පත්කර තිබෙන සෞඛ්‍ය සේවා අධ්‍යක්ෂ ජනරාල්වරයා මේ පුද්ගලයාට එරෙහිව පියවර ගත යුතුව තිබෙනවාය කියා අපි විශ්වාස කරනවා” යයි වෛද්‍ය නවීන් ද සොයිසා මහතා පැවසීය. 

ලොක්ඩවුන් එසේත් නැතිනම් ප්‍රදේශයන් අගුලු දැමෙන්නේ එසේත් නැතිනම් හුදෙකලා කෙරෙන්නේ ජීවිත බේරා ගැනීම සදහාමය. එවැනි තත්ත්වයකදී අමාත්‍යවරයෙක් එම අරමුණින් ගන්නා තීරණයක් වෙනස් කිරීම, අවධානය යොමු කළ යුතුව තිබෙන කාරණයකි. 

සියලුම අමාත්‍යවරුන් සිය බල පරාක්‍රමය මෙසේ පෙන්වීමට කටයුතු කළේ යැයි අපි නිකමට සිතමු?, එසේවී නම් යුද හමුදාපතිවරයා සහ සෞඛ්‍ය බලධාරීන් මෙරට කොරෝනා වසංගත තත්ත්වය මර්දනය කිරීමට ගන්නා සියලුම පියවර ගඟට කැපූ ඉණි මෙන් වනු ඇත. මුව ආවරණ වැරදියට පැළඳගෙන සිටියේ යැයි පුද්ගලයින් බලහත්කාරයෙන් බස් රථවලට පටවා ගැනෙන තත්ත්වයක නිරෝධායන රෙගුලාසි වෙනස් කළ ගාමිණී ලොකුගේ අමාත්‍යවරයා සම්බන්ධයෙන් අනුගමනය කෙරෙන්නේ නිහඬ පිළිවෙතක් බව පෙනෙන්නට තිබේ.

ඇඳක් සොයාගැනීමේ අභියෝගය

ඇඳන් හිගය නිසා රෝහල්වල මතුව තිබෙන බරපතල තත්ත්වය අගහරුවාදා පැවැති රජයේ පාර්ලිමේන්තු කණ්ඩායමේ රැස්වීමේ දී, අවධානයට ලක්විය. එහි මුලසුන හෙබවූයේ අගමැති මහින්ද රාජපක්ෂ මහතාය. 

මන්ත්‍රී ලලිත් එල්ලාවල මහතා අදහස් දක්වමින්, ආරක්ෂක අංශ සහ සෞඛ්‍ය අංශ අතර සම්බන්ධීකරණයේ ගැටලුවක් සම්බන්ධයෙන් ද ඔහු අදහස් පළකළේ ය.

“අපි සෞඛ්‍ය අමාත්‍යංශය ඇමතුවහම, මිලටරිය සමග සම්බන්ධ වෙන්නය කියා ඔවුන් කියනවා,” යයි මන්ත්‍රීවරයා කීවේ ය. ඔහු එසේ මතුකළේ, කෝවිඩ්-19 ආසාදිතයකු සමග ඇසුරු කළ, එනිසාම කෝවිඩ්-19 ආසාදිතයන් යැයි සැක කෙරෙන, එම පුද්ගලයාගේ පවුලේ සාමාජිකයන්ට හෝ ඥාතීන්ට හෝ රෝහලක ඇඳක් ලබාගැනීමේ ගැළුවක් පවතින්නේ යැයි සිය ඡන්ද දායකයින් මතුකර තිබූ ප්‍රශ්නයකි.

මේ ප්‍රශ්නවලට පිළිතුරු දීම සදහා ජනපති ජ්‍යෙෂ්ඨ උපදේශක ලලිත් වීරතුංග මහතාද, මෙම රැස්වීමට සහභාගීව සිටියේ ය. මෙම වසරේ සැප්තැම්බර් හෝ ඔක්තෝබර් මාසය වන විට ශ්‍රී ලංකාවට එන්නත් ලැබෙනු ඇතැයි විශ්වාසය පළකළ ඔහු, රටේ සියලුදෙනාවම එන්නත්කරණය කිරීමට හැකිවනු ඇතැයි පැවසුවේ ය.

එන්නත් ආනයනය කිරීමට සහ ජනතාවට එන්නත් ලබාදීමට පෞද්ගලික අංශයට අවසර නොදෙන්නේ මන්දැයි ඇතැම් පාර්ලිමේන්තු මන්ත්‍රීවරු විමසා සිටියෝ ය. එයට පිළිතුරු දුන් වීරතුංග මහතා පවසා සිටියේ ලොව වටා රජයන්ගෙන් ඉදිරිපත්ව තිබෙන ඉහළ ඇනවුම් නිසා, එම එන්නත් පෞද්ගලික ආනයනකරුවන් හරහා ආනයනය කිරීමට ඒවායේ නිශ්පාදකයන් අවසර නොදෙන බවය. එන්නත් තොග ලබාගත හැක්කේ එක් එක් රජයන් ලබා දී තිබෙන ඇනවුම් සම්පූර්ණ කිරීමෙන් පසුව බවත්, ජනපති ජේ්‍යෂ්ඨ උපදේශකවරයා වැඩිදුරටත් කීවේ ය.

රැස්වීම අවසන් වූ පසුව පැමිණ සිටි ඇතැම් පාර්ලිමේන්තු මන්ත්‍රීවරු කෝවිඩ්-19 වසංගතයේ මර්දන කටයුතුවල අගමැති මහින්ද රාජපක්ෂ මහතා වැඩිමනත් පෙනෙන්නට නොසිටීම සම්බන්ධයෙන් ප්‍රශ්න කළෝ ය. සිය ගැටලු අගමැතිවරයා හරහා ඉදිරිපත් කළ හැකි නොවේදැයි ඇතැමුන් විමසා සිටීම එවැනි ප්‍රශ්නයක් ඉදිරිපත් වීමට තුඩු දුනි. 

ඒ අතර, තවත් අයෙක් පෙන්වා දුන්නේ ආර්ථිකය නගා සිටුවීම පිළිබද ජනපති කාර්යසාධන බලකායේ සභාපති බැසිල් රාජපක්ෂ මහතා ද, කෝවිඩ්-19 මර්දන කටයුතුවල එතරම් දකින්නට නොසිටින බවය. කෙසේවුවත් තවත් මන්ත්‍රීවරු අදහස් දක්වන්නට පටන් ගැනීම නිසා එම සාකච්ඡාව දුරදිග නොගියේ ය.

පොහොට්ටුව අභ්‍යන්තරයේ ගැටළු

රට පාලනය කරන ශ්‍රී ලංකා පොදුජන නිදහස් සන්ධානයේ කටයුතු සිතා සිටින ආකාරයට සුමටව සහ සාමකාමීව සිදුනොවන බව පසුගිය අගහරුවාදා නැවත වරක් පෙනී ගියේ ය. සන්ධානයේ හවුල්කාර දේශපාලන පක්ෂවල නායකයන් සමග රැස්වීමක් පැවැත්වීමට අගමැති මහින්ද රාජපක්ෂ මහතා සූදානමින් සිටියත්, එක් කණ්ඩායමක් එම රැස්වීමට සහභාගීවූයේ නැත. ඔවුන් අතරට, අමාත්‍ය විමල් වීරවංශ (ජාතික නිදහස් පෙරමුණ), අමාත්‍ය උදය ගම්මන්පිල (පිවිතුරු හෙළ උරුමය) යන මහත්වරද අයත් වූහ. 

සන්ධානයේ හවුල්කාර දේශපාලන පක්ෂවල නායකයින් නොවන පුද්ගලයින් ද, රැස්වීමට සහභාගීව සිටියේ යැයි ඔවුහු පැමිණිලි කළහ. ඒ අනුව ගත් කළ, සන්ධානය අභ්‍යන්තරයේ වන ගැටුම තවමත් එළෙසමය. මෙළෙසම තවත් අවස්ථාවක දී, ඔවුහු අගමැතිවරයා මගහැර සිටියේ ඔවුන්ගේ අරමුණ සම්බන්ධයෙන් ප්‍රශ්නාර්ථ මතු කරවමිනි. එහෙත්, ශ්‍රී ලංකා පොදුජන පෙරමුණේ බලවත් පාර්ශවයන් මෙය දකින්නේ දේශපාලනමය බලයක් පෙන්වීමක් ලෙස පමණි. ඒ හැරෙන්නට, සන්ධානය හැර යෑමට මෙම පක්ෂ කටයුතු කරනු ඇතැයි සිතීම අපහසු බව ඔවුන්ගේ අදහස වේ. ඒ කෙසේවුවත්, සන්ධානයේ කටයුතු පෙර සදහන් කළ ලෙස සුමටව හා සාමකාමීව සිදුනොවන බවටත් එහි අභ්‍යන්තරයේ යම් යම් ගැටලු පවතින බවටත් ඉහත සිදුවීම්වලින් යම් සංඥාවක් ලබා දේ.

මෙවැනි තත්ත්වයක් රට පාලක සන්ධානයේ පවතින්නේ, කෝවිඩ්-19 වසංගත තත්ත්වය ඉතා බරපතල ලෙසම රට වෙළාගනිමින් සිටින මෙන්ම අනෙක් පසින් ඒ හා සමාන බරපතල මට්ටමින් රටේ ආර්ථිකය කඩා වැටෙමින් පවතින වාතාවරණයකය. 

දිනෙන් දිනම ඉහළ යන ආසාදිතයන්ට උවටැන් කිරීම සදහා පහසුකම් සැපයීමට යුද හමුදාවට හැකිව ඇතත් එය පමණක් ප්‍රමාණවත් නොවනු ඇත. වෛද්‍යවරු, හෙදියන් සහ උපකරණ ද දැන් අවශ්‍යය. මේ මොහොත, ශ්‍රී ලංකාවට අතිශයින් තීරණාත්මකය.

ද සන්ඩේ ටයිම්ස් අනුග්‍රහයෙනි
පරිවර්තනය - කෝවිද ගුණසේකර
--------------------------------------------------------