ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතාගේ පාර්ලිමේන්තු ආගමනය සම්බන්ධයෙන් මේ දිනවල දේශපාලන කරළියේ බොහෝ පුවත් මැවෙමින් තිබේ.

ශ්‍රී ලංකා පොදුජන පෙරමුණේ ආරංචි මාර්ග සඳහන් කළේ මේ මස 8 වැනිදා පෙරවරුවේ බැසිල් රාජපක්ෂ පාර්ලිමේන්තු මන්ත්‍රීධුරයේ දිවුරුම් දීමට නියමිත බවය.. තවද බැසිල් එදිනම ප්‍රබල කැබිනට් ඇමැතිධුරයක ද දිව්රුම් දීමට නියමිත බව ද එම පක්ෂ ආරංචි මාර්ගවලින් පැවසෙයි. බැසිල් පිළිබඳව පැතිර යන ආරංචි අතර ‘බැසිල්ට මුදල් ඇමතිකම ලැබෙනවා. ඊට අමතරව ඔහුට ආර්ථික කටයුතු පිළිබඳ ඇමතිධුරයත් හිමිවෙනවා’ ආදී  නොයෙකුත් ආරංචි අසන්නට ලැබෙමින් තිබේ. රාජ්‍ය ඇමැති ශෂීන්ද්‍ර රාජපක්ෂ කීවේ බැසිල්ට ලබාදිය යුත්තේ සියලු කැබිනට් අමාත්‍යධුර අධීක්ෂණය කිරීමට හැකි බලයක් තිබෙන ඇමතිධුරයක් බවය.

දේශපාලන ආරංචි මාර්ග සඳහන් කළේ ජනාධිපතිවරයා, අගමැතිවරයා හා බැසිල් රාජපක්ෂ ඉකුත් දිනවල ඒ සම්බන්ධයෙන් අවස්ථා කීපයකදීම සාකච්ඡා කළ බවය. මේ අතර ශ්‍රී ලංකා පොදුජන පෙරමුණේ මැති ඇමැතිවරු 113ක් ජනාධිපතිවරයාට ඉකුත්දා ලිපියක් බාර දුන්හ.

එම ලිපියෙන් ඉල්ලා තිබුණේ බැසිල් රාජපක්ෂට ජාතික ලැයිස්තු මන්ත්‍රීධුරයක් ලබාදෙන ලෙසත් ඔහුට වගකිවයුතු කැබිනට් ඇමතිධුරයක් ලබාදෙන ලෙසත්ය. එම ඇමතිවරු එම ලිපිය ජනාධිපතිවරයාට ද බාර දී ඇත.

‘අපි ජනාධිපතිතුමා හමුවී එම ලිපිය බාර දුන්නා. කැබිනට් ඇමැතිවරු ද, රාජ්‍ය හා නියෝජ්‍ය ඇමැතිවරුත් සහ පාර්ලිමේන්තු මන්ත්‍රීවරුන් පිරිසක් එම ලිපියට අත්සන් තැබුවා’ යැයි පොදුජන පෙරමුණේ පාර්ලිමේන්තු මන්ත්‍රීවරයෙක් පැවසීය.

පාස්කුදා ප්‍රහාරය සිදුවී වසර දෙකක් ගතවීම නිමිති කරගෙන සමගි ජන බලවේගය පක්ෂය පාර්ලිමේන්තුවේ දී ඉකුත් අප්‍රේල් මස 21 වැනි දින විරෝධතාවයක් පැවැත්වීය. විපක්ෂනායක සජිත් ප්‍රේමදාස ඇතුළු විපක්ෂ මන්ත්‍රීවරු පාස්කු ප්‍රහාරයට විරෝධය දක්වමින් පෝස්ටර් ප්‍රදර්ශනය කරමින් ද ඇතැම් මන්ත්‍රීවරු කළු පැහැති සාටක පැළඳ ගනිමින් ද එම විරෝධතාවයට එක්ව සිටියහ. විපක්ෂයේ විරෝධතාවයට දැඩි ලෙස වාග් ප්‍රහාර එල්ල කරන්නට ආණ්ඩු මැති ඇමැතිවරු පියවර ගත්හ. මෙම කලබැගෑනිය හේතුවෙන් එදින පාර්ලිමේන්තු රැස්වීමේ කටයුතුවලට ද දැඩි බාධාවක් එල්ල විය. සිද්ධිය සම්බන්ධයෙන් සොයා බලා කරුණු වාර්තා කරන්නැයි කතානායක මහින්ද යාපා අබේවර්ධන කමිටුවක් පත් කළේය.

නියෝජ්‍ය කතානායක රංජිත් සියඹලාපිටියගේ ප්‍රධානත්වයෙන් යුත් එම කමිටුවේ සෙසු සාමාජිකයන් වන්නේ චමල් රාජපක්ෂ, කෙහෙළිය රඹුක්වැල්ල, සුසිල් ප්‍රේමජයන්ත, අනුර ප්‍රියදර්ශන යාපා, ඉමිතියාස් බාකීර් මාකර්, රංජිත් මද්දුම බණ්ඩාර, එම්.ඒ. සුමන්තිරන් යන මැති ඇමැතිවරුය. එම කමිටුව අවසන් වරට ඉකුත් 28 වැනි දින රැස් වූ අතර කමිටුවේ වාර්තාව ඉදිරියේ දී කතානායකවරයාට බාර දීමට නියමිතය.

පළාත් පාලන මැතිවරණයට එක්සත් ජාතික පක්ෂයෙන් තරග කර ජයග්‍රහණය ලබා මේ වනවිට සමගි ජන බලවේගය පක්ෂයට එක්ව සිටින මන්ත්‍රීවරුන් 76 දෙනකු පක්ෂයෙන් ඉවත් කළ පසුව ඒ වෙනුවට නවක මන්ත්‍රීවරුන් පත් කිරීමට එජාප නායක රනිල් වික්‍රමසිංහ ඉකුත්දා පියවර ගත්තේය.

නවක මන්ත්‍රීවරුන්ට පත්වීම් ලිපි ප්‍රදානය කිරීම සිදු වූයේ සිරිකොත පක්ෂ මූලස්ථානයේදීය. බොහෝ කාලයක සිට එජාපයේ නිල පුවත්පත ‘සියරට’ පත්‍රය නතර වී තිබූ අතර නවක මන්ත්‍රීවරුන්ට ලිපි ප්‍රදානය කිරීමට සමගාමීව එම පුවත්පතේ විද්‍යුත් පත්‍රය එළිදැක්වීම ද සිදු සිදු වූයේය. නායක රනිල් සමග එම අවස්ථාවට රුවන් විජයවර්ධන, වජිර අබේවර්ධන, රංගේ බණ්ඩාර, අකිල විරාජ් මෙන්ම සාගල රත්නායක ද එක්ව සිටියහ. එහිදී නායක රනිල් වික්‍රමසිංහ කතාවක් ද කළේය. හමුදා සාමාජිකයන් පරිපාලන  කටයුතුවලට යෙදවීම. ආයතන සංග්‍රහය අනුව කටයුතු කිරීම, මුදල් ප්‍රතිපත්තිය ඇතුළු අංශ ගණනාවක් ඔස්සේ එහිදී රනිල් වික්‍රමසිංහ අදහස් පළ කළේය.

හිටපු ජනාධිපති චන්ද්‍රිකා බණ්ඩාරනායක කුමාරතුංගගේ උපන් දිනය ඉකුත් බදාදා දිනට යෙදී තිබිණ. ඒ නිමිත්තෙන් චන්ද්‍රිකා කුමාරතුංග සිය ෆේස්බුක් ගිණුමේ මෙලෙස සටහනක් තබා තිබුණේය.

‘මට දැන් අවුරුදු හැත්තෑ හයක්. මීට අවුරුදු හැත්තෑ හයකට කලින් මම මේ ලෝකයට ආවේ තනියම. හිස් අතින්. මම විතරක් නෙමෙයි අපි කවුරුත් එහෙමයි. කවදා හරි යන්නෙත් තනියමයි. හිස් අතින්. එහෙත් අපි මේ ලෝකයෙන් යන දවසට එක දෙයක් අරගෙන යනවා. ඒ තමයි අපි මේ ජීවිත කාලය පුරා අප කළ කී දෑ අනුව ඉතිරි වූ හොඳ නම හෝ නරක නම. මේ යථාර්ථය මම කුඩා කල සිටම තේරුම් ගත්තා. මේ ජීවිත කාලයේ දී අපේ ජීවිත ආලෝකමත් කර ගැනීමට මෙන්ම මේ ලෝකය වඩා හොඳ තත්ත්වයකට පත් කිරීමටත් අපි බැඳී සිටිනවා’ ආදී වශයෙන් චන්ද්‍රිකා දිගු පෝස්ටුවක් සිය ෆේස්බුක් ගිණුමට එක්කර තිබිණි.. හිටපු ජනාධිපතිනිය තමාට උපන් දින සුභ පැතුම් එක් කළ පිරිසට සිය ස්තුතිය පිරිනැමීමටද එහිදී අමතක කර නැත.

ජනාධිපති පොදු සමාව යටතේ දුමින් ද සිල්වා නිදහස් කිරීම පිළිබඳව සමාජ ජාලා මාධ්‍යවල ඉකුත් සතිය පුරා බොහෝ කරුණු කාරණා විවේචන ආදිය පළ වූයේය. ඇතැම් පිරිස් ඒ සම්බන්ධයෙන් තමන්ගේ අදහස් හා උදහස් සමාජ මාධ්‍යවල පළකර තිබුණේය.

මේ අතර භාරත ලක්ෂ්මන් ප්‍රේමචන්ද්‍ර හිටපු මන්ත්‍රීවරයාගේ දියණිය හිරුණිකා ප්‍රේමචන්ද්‍ර සිය විරෝධය දක්වමින් ජනාධිපති ගෝඨාභය රාජපක්ෂට ලිපියක් යවා තිබිණි. හිරුණිකා එම ලිපියෙන් දොස් නගා තිබුණේ ජනාධිපති පොදු සමාව යටතේ දුමින්ද සිල්වාට සමාවක් පිරිනැමීම පිළිගත නොහැකි අසාධාරණ කටයුත්තක් බවට කරුණු ඉදිරිපත් කරමිනි. මේ අතර දේශපාලන ආරංචි මාර්ග සඳහන් කළේ දුමින්ද සිල්වාට ජනාධිපති සමාව ලබාදීම සම්බන්ධයෙන් ජාත්‍යන්තරයට කරුණු කියන්නට හිරුණිකා කටයුතු කරමින් සිටින බවය. දුමින්ද සිල්වාට ජනාධිපති පොදු සමාව ලබාදීම පිළිබඳව ශ්‍රී ලංකාවේ ඇමෙරිකානු තානාපතිනිය ද සිය ට්විටර් ගිණුමේ සටහනක් තබමින් විවේචනයක් ඉදිරිපත් කර තිබිණි. ශ්‍රී ලංකාවේ ඇමෙරිකානු තානාපතිවරියගේ කරුණු දැක්විම පිළිබඳ ඇතැම් පාර්ශ්ව විවේචන ඉදිරිපත් කළහ.

‘ශ්‍රී ලංකාව ස්වාධීන රාජ්‍යයක්. ආණ්ඩුක්‍රම ව්‍යවස්ථාවක් තිබෙනවා. එම ව්‍යවස්ථාවෙන් ජනාධිපතිට බලයක් ලබාදී තිබෙනවා. ජනාධිපතිවරයාගේ හෝ රටේ කටයුතු ගැන විවේචන ඉදිරිපත් කරන්න ඇමෙරිකානු තානාපතිනියට බැහැ. එය එතුමියගෙ සීමාව ඉක්මවා යාමක්’ හිතවාදීන් තානාපතිනියට දොස් නගා තිබිණි.

ආණ්ඩුව හා සුළුතර දේශපාලන පක්ෂ නායකයන් අතර පවතින අර්බුදය දිනෙන් දිනම වැඩි වන්නට පටන්ගෙන තිබේ. විමල් වීරවංශ, උදය ගම්මන්පිල මෙන්ම ශ්‍රී ලංකා නිදහස් පක්ෂයේ  නායකයෝ ද ආණ්ඩුව ගැන ඔවුන්ගේ විවේචන ඉදිරිපත් කරන්නට පටන් ගෙන සිටිති. ‘බැසිල් රාජපක්ෂ පාර්ලිමේන්තුවටයි, කැබිනට් මණ්ඩලයටයි එනවට වැඩියෙන්ම විරෝධය දක්වන්නේ ආණ්ඩුවේ සුළුතර පක්ෂයි. බැසිල් ආවම මුලින්ම ඒ අයට කෙනහිලිකම් වෙනවා. ඒ ගැන ආණ්ඩුවේ සුළු පක්ෂ නායකයන් ඉන්නේ අසතුටකින්’ යැයි දේශපාලන විචාරකයෙක් අදහස් දක්වා තිබිණි.

(*** කස්තුරි)