බස් ගාස්තු වැඩිකිරීම පිළිබඳ යෝජනා ජාතික ගමනා ගමන කොමිෂන් සභාව විසින් පෞද්ගලික ප‍්‍රවාහන අමාත්‍යංශයේ ලේකම්වරයා වෙත ඉදිරිපත් කරන ලදුව පෞද්ගලික ප‍්‍රවාහන අමාත්‍ය සී.බී. රත්නායක මහතා කැබිනට් අනුමැතිය සඳහා ඉදිරිපත් කොට ඇත.

තවමත් ඒ සඳහා කැබිනට් අනුමැතිය නොලැබුණු බවත්, අමාත්‍ය මණ්ඩල තීරණ අනුව ලබන මස පළමුවැනිදා සිට බස් ගාස්තු වැඩිවනු ඇති බවත් ජාතික ගමනා ගමන කොමිෂන් සභාව පවසයි.

සෑම වසරකම ජූලි පළමුවැනිදා බස් ගාස්තු සංශෝධනය කෙරෙන අතර ඒ සඳහා කැබිනට් අනුමැතියක් අවශ්‍ය නොවන බවත් වසර මැද ඞීසල් මිල ඉහළ යාම වැනි කරුණු හේතුවෙන් කරන බස් ගාස්තු සංශෝධනයකට අනිවාර්යයෙන්ම කැබිනට් අනුමැතිය ලැබිය යුතු බව ජාතික ගමනා ගමන කොමිෂන් සභාවේ සභාපති රොෂාන් ගුණවර්ධන මහතා ඉරිදා ලංකාදීපයට පැවැසීය.

ඒ අනුව තෝරා ගැනීමේ ක‍්‍රමවේද 12 ක් හරහා දර්ශක මිනුම් කොට ලබාගත් තොරතුරු වාර්තාවක් කොමිෂම පෞද්ගලික ප‍්‍රවාහන අමාත්‍යංශ ලේකම්වරයාට භාරදුන් බවත් එය රහස්‍ය වාර්තාවක් බවත් ගුණවර්ධන මහතා කීය.

බස් ගාස්තු වැඩිකිරීම පිළිබඳ අවසන් තීරණය ගන්නේ පෞද්ගලික ප‍්‍රවාහන අමාත්‍යංශය මිස ගැමුණු විජේරත්න මහතා නොවේ යැයි කී සභාපතිවරයා, පෞද්ගලික බස් රථ නියාමනය සිදුවන්නේ ජාතික ගමනා ගමන කොමිෂන් සභාව මගින් බව ඔවුන් මතක තබාගත යුතු යැයිද කීය.

සමස්ත ලංකා පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා මෙසේ ප‍්‍රකාශ කළේය.

අපි ඉල්ලූවේ බස් ගාස්තු වැඩිවීමක් නොවෙයි. සහනාධාරයක්. නමුත් දුන්නේ නැහැ. අකමැත්තෙන් වුනත් බස් ගාස්තු වැඩිවීමකට යන්න වුණේ ඒ නිසයි. ආණ්ඩුව කියන්නේ සියයට 7 ක වැඩිවීමක් ලබාදෙන ලෙසයි.

ඒ අනුව රුපියල් 9 ගාස්තුව වෙනස් වෙන්නේ නැහැ. සෙසු ගාස්තු වැඩිවීම මෙහෙමයි.

රුපියල්     12    -    13 ට
රුපියල්    16    -    17 ට
රුපියල්    19    -    21 ට
රුපියල්    23    -    25 ට
රුපියල්     27    -    28 ට
රුපියල්     30    -    32 ට
රුපියල්     32   -    34 ට

ආදී වශයෙන් වැඩිවෙනවා.
රුපියල් 9 සිට ඉහළට ගමන් ගාස්තු 18 ක්ම කාසි සමග එන මුදලක්. 19 වන ගමන් ගාස්තුව රුපියල් 60 ක්. ගමන් ගාස්තු අවස්ථා 18 ක්ම මාරු කාසි සමග අයවීම තුළ දෙපාර්ශ්වයම එනම් කොන්දොස්තර හා මගියා යන දෙදෙනාම අපහසුවට පත්වෙනවා.
කෙසේ වෙතත් මෙවර ගමන් ගාස්තු වැඩිකිරීම අපේ වුවමනාවක් නොවෙයි. මේ මොහොතෙත් අපි ඉල්ලන්නේ ගමන් ගාස්තු වැඩි නොකර ඉන්ධන සහනාධාරය දෙන්න කියලයි. ගැමුණු විජේරත්න මහතා කියයි.

සටහන විනීතා එම්. ගමගේ