මීගමුවේ නීති විරෝධී ක‍්‍රියා සම්බන්ධයෙන් ඉකුත් සති දෙකේ අපි ලිපි කීපයක් පළ කෙරුවෙමු. ධීවර නියෝජ්‍ය ඇමැති සරත් කුමාර ගුණරත්න මහතා එහිදී අප සමග කියා සිටියේ ඒවා ගෝඞ් ෆාදර්ගේ වැඩ බවය.
මේ ගෝඞ් ෆාදර් ඔබද? බස්නාහිර පළාත් සභා ඇමැති නිමල් ලන්සා මහතාගෙන් ඒ පිළිබඳ විමසමු.

ඔබ දේශපාලනයට ආවේ කොයි කාලේද?
1993 තමයි මා දේශපාලනයට ආවේ. 1997 පළාත් පාලන මැතිවරණය සඳහා මීගමුව මහා නගර සභාවට තරග වැදුණා. ඒකෙන් මීගමුවේ දෙවැනි වැඩිම මනාප ගත්තා. 2000 දී ආනන්ද මුණසිංහ හිටපු නගරාධිපති පාර්ලිමෙන්තු මන්ත‍්‍රී කෙනෙකු විදියට පත්වුණාට පස්සේ මං නගරාධිපති වුණා. නැවත 2001 මැතිවරණයේදී එක්සත් ජාතික පක්ෂ පාලන කාලයේදී ලංකාවේ වැඩිම මනාප ප‍්‍රතිශතය අරගෙන මා විපක්ෂ නායක වෙනවා. 2004 දී පළාත් සභා ඡුන්දයට ඉදිරිපත් වී ගම්පහ දිස්ත‍්‍රික්කයෙන් පස්වැනි ස්ථානයට එනවා. නැවත පක්ෂයේ ඉල්ලීම අනුව 2006 පළාත් සභාවෙන් ඉවත් වී මීගමුවට තරග වැද නගරාධිපති වෙනවා. නැවත 2009 දී පළාත් සභාවට තරග වැද දෙවැනි තැනට වැඩිම මනාප අරගෙන පළාත් සභා ඇමැතිවරයෙක් වෙනවා. ඉන්පසු 2014 පළාත් සභා මැතිවරණයෙන් ගම්පහ දෙවැනි වැඩිම මනාප අරගෙන ඇමතිවරයෙක් ලෙස කටයුතු කරනවා.

ඔබ නියෝජනය කරන පක්ෂයෙන් ඔබට තනතුරක් දුන්නේ නැද්ද?
මා ගම්පහ දිස්ත‍්‍රික් සංවිධායකවරයා.

මීගමුවේ කප්පම් ගැනීම් වැඩි වෙලා කියා චෝදනා තියෙනවා. මීගමුවේ කප්පම් ගන්න ගෝඞ් ෆාදර් ඔබද?
මා  දැක්කොත් හිතයි ගෝඞ් ෆාදර් කවුද කියලා. මං තරුණ දේශපාලනඥයෙක්. මීගමුවේ ජනතාව මා ගැන හොඳට දන්නවා. එන්න එන්න මට ඡුන්ද වැඩි වුණා. කුණු ගඳ ගහන මීගමුව නගරය ඉතා ලස්සන නගරයක් කළේ මා කියන එක මීගමු ජනතාව දන්නවා. ඒ නිසා තමයි ඡුන්ද හාර දහසෙන් පටන් අරගෙන ඡන්ද එක් ලක්ෂ ගාණක් එනකම් ආවේ. ගෝඞ් ෆාදර් නම ඇහුවාම අපට බයත් හිතුනා. ලජ්ජත් හිතුනා ඇයි මෙහෙම කියන්නේ කියා.

නමුත් මීගමුවට එන බොහෝ දෙනකුගෙන් කප්පම් ගන්නවා කියා චෝදනාවක් තියෙනවා. කවුද ඒක කරන්නේ?
ලංකාවේ වැඩිම සංචාරකයන් එන්නේ මීගමුවට. වැඩිම සංචාරකයන් සඳහා කාමර අලෙවි කරන්නේ මීගමුවේ. ලංකාවේ වැඩිම අයෝජකයන් එන්න කැමති මීගමුවට. ඇයි මෙහෙම වෙලා තියෙන්නේ. මීගමුවට එන අයට කරදරයක් බයක් සැකක් නැතිව තමන්ගේ ව්‍යාපාර කරන්න අවශ්‍ය පහසුකම් තියෙන නිසා තමයි මීගමුවට විවිධ පිරිස් එන්නේ. මීගමුව කියන්නේ මා ආදරේ කරන තැනක්. මීගමුවේ කප්පම් ගන්නා, වෙනත් ව්‍යාපාර කරන අය ඉන්නවා නම් ඒ සියලූ දෙනා අල්ලන්න කියන එක සීයට සීයක් මා කියනවා. මොකද මා නෙමේ මීගමුවේ සංවිධායක. සංවිධායකතුමා වෙන කෙනෙක්. එතුමා කියන මීගමුවේ වෙනවා කියන දේවල් මා දකින්නේ නෑ. සෑම ආසනයකම විවිධ ප‍්‍රශ්න තියෙනවා. ඔය චෝදනා කරන කෙනා මීගමුවේ නීත්‍යානුකූල සංවිධායක නිසා එහෙම දේවල් වෙනවා නම් එතුමා වගකිව යුතුයි. මා වගකිව යුතු නෑ. එතුමාට පුළුවන් ඒ බව නීතිය ක‍්‍රියාත්මක කරන ආයතනවලට කියන්න.

මීගමුවේ තියෙන වාහන නැවැතුම් පොළවල්වල ටිකට් කඩන්නේ ඔබේ ඥාතියෙක්ද?
මීගමුවේ මොන රථගාලෙද කිව්ව නම් මට කියන්න පුළුවන්.

මාළු වෙළෙද පොළ තියෙන තැනින් කවුද ගන්නේ?
මීගමුව පුංචි රෝමය කියලයි කියන්නේ. එදා ඉඳලා අපේ තාත්තල ඉපදෙන්න පෙර ඉඳලා ධීවර කාර්මිකයෝ සහ එම කර්මාන්තයේ නියුතු පිරිස්වල ආදායමෙන් කොටසක් යන්නේ   දේවස්ථාන වලටයි. මේ සියලූ භූමි අයිති දේවස්ථානවලට. මාළු වෙළෙද පොළ අයිති ප‍්‍රදේශයත් දේවස්ථානයට අයිතියි. ඒවා අදාළ ක‍්‍රමවේදයන්ට තමයි දී තිබෙන්නේ. එහි කවුරුන් හෝ ගන්නවා නම් මගෙන් නෙමෙයි අහන්න  ඕනැ. එය මට අදාළ කාරණයක් නෙමෙයි.

වෙරළ උද්‍යානයේ රථගාල්වල ටිකට් කඩන්නේ කවුද?
වෙරළ උද්‍යානය ගැන කියන්න තියෙන්නෙත් ඒකමයි. එය බදු දී තිබෙන්නේ නගර සභාවෙන්. අවුරුද්දක් පතා ටෙන්ඩර් කැඳවනවා. මීගමුවේ සියයට හැට පහක් හැත්තෑවක් මගේ ඡන්ද දායකයන් ඉන්නේ. කවුරුන් හරි එය පාලනය කළ යුතුයි.

මීගමුවේ දවස ගානේ සම්බාහන මධ්‍යස්ථාන හා ගණිකා නිවාස වැඩි වෙනවා නේද?
මං පිළිගන්නේ නෑ. මීගමුව කියන්නේ සංචාරකයන් එන තැනක්. ඒ හෝටල්වල ලෝකයම පිළිගත් ආයුර්වේද සම්බාහන ඇති. නීති විරෝධී දේවල් තියෙනවා නම් අපි පොලිසියට උපදෙස් දෙනවා උදව් කරනවා මේවා අල්ලන්න. මං පැහැදිලිව කියන්න  ඕනෑ සංවිධායක තුමාගේ බෑනා තමයි ගෙස්ට් හවුස් කරන්නේ. සංවිධායක තුමාගේ පුතා තමයි හෝටල් කරන්නේ. අපි නෙමේ කරන්නේ.

කුඩු ව්‍යාපාරයට සම්බන්ධ දේශපාලනඥයන්ගේ නම් අතර ඔබේ නමත් ඉහළින් කියැවෙනවා නේද?
ඕකත් ඔය මේ අයගේ වැඩක් තමයි. ඔය සංවිධායකතුමා එස්.ටී.එෆ්. කියලා අපේ ගෙදරට පැන්නුවා, අපේ ගෙදර බට් වාහන තියෙනවා කියලා. එස්ටීඑෆ් එකේ 180ක් කුමන්ත‍්‍රණය කර මගේ ගෙදරට පැනලා මගේ ඉඩ කඩම් නවයකට ගිහින් බැලූවා.   අනිත් දවසේ ඔප්පු කළා පොලිස්පතිතුමා වෙනුවෙන් මාධ්‍ය ප‍්‍රකාශක කතා කරලා කිව්වා අපි නිමල් ලන්සගේ ගෙදරට ගියේ මත් කුඩු බලන්න නෙමේ, බට් වාහන පරීක්ෂා කරන්න කියලා. නමුත් එක වාහනයක් තිබුණේ නෑ. මේකට සමාව ඉල්ලනවා කියලත් කිව්වා. මා ඇවිත් හම්බවෙලත් කිව්වා. ඒක එතැනින් අපි ඉවර කළා. නමුත් මේ කුහක, අවස්ථාවාදී දේශපාලනඥයන් තමන්ට බලය ලබා ගන්න බැරිව ඉන්න දේශපාලනඥයන් මගේ ජනප‍්‍රියත්වය වැඩි නිසා මා කපන්න මේවා කරනවා කියන එක මං දන්නවා. මමත් පැහැදිලිවම නීති වීරෝධි වැඩ වලට විරුද්ධයි. කිසිම නීති වීරෝධි දෙයක් කරලා නෑ. එච්චර හොඳට මීගමුවේ ජීවත්වෙන නිසා තමයි මීගමුවේ ජනතාව මට ආදරේ.

එස්ටීඑෆ් එකෙන් මෙතරම් විශාල පිරිසක් එනවා නම් ඉහළ බලධාරීන්ගේ අවසරයක් නැතුව එන්න බැහැනේ. අඩු ගානේ ආරක්ෂක ප‍්‍රධානීන් දැනුම්වත් කරන්නේ නැතිව ද ඔවුන් අවේ? ඔබ කියන විදියට දේශපාලනඥයාගේ කීමට ද විශේෂ කාර්ය බලකාය  අවේ?
කාගේ දැනුම්වත් කිරීමක් උඩ ආවද කියන එක මා දන්නේ නෑ. මට විශාල අසාධාරණයක් කළා. ඒකට පොලිසිය මගෙන් සමාව ගත්තා. මේ ඉන්න සංවිධායක මා වට්ටන්න කරන වැඩක් ද කියන එක ගැන මට සැකයක් තිබුණා.

පහුවදා ජනාධිපතිතුමා ඔබේ නිවසට ආවේ ඔබෙන් සමාව ගන්නද?
නෑ නෑ. ජනාධිපති සමාව ගන්න දෙයක් නැහැ. ජනාධිපතිතුමාට තේරුණා කවුරුහරි මැදිහත් කරුවෙක් සම්බන්ධ වෙලා මට විශාල අසාධාරණයක් කළා කියන එක. ඒ වෙලාවේ මා මානසික පීඩනයකට පත්වෙලා හිටියේ. මා කිසිම නීති විරෝධි ව්‍යාපාරයක් කරන්නේ නෑ කියලා පිළිඅරගෙන ජනාධිපතිතුමා ඒ වෙලාවේ මගේ නිවසට ආපු එක ලොකු ශක්තියක් වුණා. මොකද ජනාධිපති කුඩු කාරයෙක්ගේ ගෙදර එන්නේ නැහැනේ.

මීගමුව ආසන සංවිධායක හා ඔබ අතර ගැටුමක් තියාගෙන මීගමුව සංවර්ධනය කරන්න බැහැ නේද?
මීගමුව සංවර්ධනය කළා කිව්වා නම් ජනතාව දන්නවා මං තරම් මීගමුවට වැඩ කළ වෙන කිසි කෙනෙක් නෑ කියන එක. අද ලංකාවේ තියෙන ලස්සනම බස් නැවැතුම් පොළ මං හැදුවේ. මීගමුවේ තියෙන පාරවල් සියල්ලක් මං හැදුවේ. මං මීගමුවට ආදරෙයි. මීගමුවේ ජනතාව මට ආදරෙයි. ඔය කියන සමහර දේශපාලනඥයන් මීගමුවට බම්බුවක්වත් කරලා නෑ. අසූ ගණන්වල ඉඳලා ඉන්න සංවිධායකට මා අභියෝග කරනවා එතුමා මීගමුවේ සංවර්ධනයට කළ එකම දෙයක් හෝ කියන්න කියා. මීගමුවේ කළපුව විනාශ කරන්නේ ඔහුගේ ගෝලයන්. මීගමුවේ කප්පන් ගන්නේ ඔහුගේ ගෝලයන්. මීගමුවේ හෝටල් බලෙන් අයිති කරගෙන තියෙන්නේ එතුමාගේ ගෝලයන්. මීගමුවේ තිබුණු වටිනාම රජයේ ඉඩම විකුණලා සල්ලි නොදී කප්පමක් විදියට තියාගෙන ඉන්නේ එතුමාගේ ගෝලයන්. එය මා පැහැදිළිව කියනවා.

පළාත් සභා ඡන්දය වෙනුවෙන් රුපියල් කෝටි නවයක් වියදම් කරන්න ඔබට කොහෙන්ද සල්ලි?
නෑ ඒක අමූලික බොරු. මට කෝටි දහයක් තියෙනවා නම්  ඕකට වියදම් කරනවායැ. මීගමුවේ හෝටල් හිමියෝ, ව්‍යාපාරිකයෝ මගේ හිතවත්තු. ඒ එක එක්කෙනා මට උදව් කළා. පෝස්ටර් ගහලා දුන්නා. කටවුට් ගහලා දුන්නා. කෝටි දහයක් තිබුණොත් අපට ඡුන්ද ව්‍යාපාර හය හතක් කරන්න පුළුවන්.

එහෙනම් ඔබේ ඡන්ද ව්‍යාපාරයට කියක් වියදම් වුණාද?
මට ලක්ෂ 150 වඩා ගිහින් නෑ. ඒ සියල්ල මගේ නෑදෑ හිතවතුන්ගේ මුදල්. මගෙන් සත පහක් ගිහින් නෑ.

ඡන්දෙ කාලේ ඔබ නීති විරෝධි ලෙස ගරාජ් අංක තියෙන වාහන පාවිච්චි කළා නේද?
නෑ. මගේ ඡුන්ද ව්‍යාපාර තුළ දවසට රැුස්වීම් 16 විතර කරනවා. ඒවා ඉවර වෙලා මගේ වාහනේ පිටිපස්සෙන් තවත් වාහන එනවා. ඉතින් ඒවා මට බලා ගන්න විදියක් නෑ. මේවා මාධ්‍යයේ ගියොත් හරි, කවුරු හරි කිව්වොත් හරි තමයි අපිත් දැන ගන්නේ. අපි වාහනයට නැග්ග ගමන් යනවනේ.

මෙවර බස්නාහිර ඡන්දය ගණන් කරද්දි ගම්පහ ඇතැම් පැතිවල ඡුන්ද ප‍්‍රතිඵල දෙන්න ප‍්‍රමාද වුණා. සමහර දේශපාලනඥයන් හොරට මානප දාගත් බවට චෝදනාවක් තිබුණා නේද?
මේ මැතිවරණ ක‍්‍රමය තුළ නම් එහෙම කරන්න විදියක් නෑ. එහෙම චෝදනා කරනවා නම් පරාජය භාර ගන්න බැරිව කරන චෝදනාවක් විදියටයි මා දකින්නේ. මේ රාජ්‍ය නිලධාරින් ඉතා අවංකව රාජකාරි කරනවා.

මීගමුවේ කවුරුහරි දේශපාලනඥයෙක් මෙහෙම නීති විරෝධි දේවල් කරනවා නම් ඇයි පොලිසිය බලාගෙන ඉන්නේ?
මීගමුවේ වැලි කපපු එක මාධ්‍යයෙත් ගියා. මීගමුවේ ගොඩක් දේවල් මාධ්‍යයේ ගියා. දේශපාලන බලය තුළ ව්‍යාපාරිකයන් පොලිසියට පැමිණිලි කරන්නේ නෑ. ආණ්ඩුවට පවරාගත් ඉඩම් සම්බන්ධයෙන් මා අල්ලස් කොමිසමට ගිහින් පැමිණිලි කරනවා. මං එතුමාට අභියෝග කරනවා මට මොනයම් හෝ චෝදනාවක් තියෙනවනම් ඔප්පු කරන්න කියලා.

මීගමුවේ දැන් කුඩුවලට අමතරව ගංජත් ව්‍යාප්ත වෙලා නේද?
මේක මීගමුවට විතරක් සීමාවුණු දෙයක් නෙවෙයි. ලංකාව පුරාම විවිධ පුද්ගලයන් විවිධ දේවල් කරනවා. පසුගිය ටිකේ කුඩු ඇල්ලූවාට මීගමුවේ ඇල්ලූවේ නැහැනේ. මීගමුවේ මොනයම් දෙයක් හරි වෙනවා නම් අපි නවත්වනවා. ඔය කියන සංවිධායකට කරන්න බැරිනම් වෙන තැනක් ඉල්ලන් යන්න කියන්න මේක මට දීලා. මං මේක සුරපුරයක් කරලා පෙන්වන්නම්.

මේ ගැටුම නිසා කටුනායක ටැක්සිකරුවන් අසරණ වෙලා නේද?
ටැක්සි කට්ටියට අසාධාරණකම් කරන්නේ එයානේ. අද ටැක්සි ව්‍යාපාරය එතුමාගේ අතට අරගෙන. එයාගේ කවුන්ටරයෙන් කරන්න පුළුවන් වාහන ප‍්‍රමාණයට වැඩියෙන් කරනවා. කටුනායක කවුද කප්පම් ගන්නේ, කවුද බලහත්කාරකම් කරන්නේ කියා ඇහුවනම් ඔවුන් කියයි. ටැක්සි රියදුරු මහත්වරු  හත්සීයක් අටසීයක් විරුද්ධයි මේවට. ටැක්සි රියදුරන්ගෙන් ඇහුවනම් කියයි කවුද අසාධාරණකම් කරන්නේ කියලා. මම පැහැදිළිව කෙළින් කියන්නේ. මම වැරදි වැඩ කර නැහැ. අපට චෝදනා කරන සංවිධායකවරු භීෂණ කාලේ ලංකාවේ හිටියේ නැහැ. රටින් ගිහින් නැවත ලංකාවට ඇවිත් අද මීගමුවේ මහා කෝටිපතියො වෙලා තියෙනවා. පුතාට හෝටල් තියෙන්නේ කොහොමද? බෑනට ගෙස්ට් හවුස් තියෙන්නේ කොහොමද කියා මං අහනවා. මීගමුවේ  අරක්කු විකුණන්නේ කවුද කියා අපි දන්නවා. මට වයින් ස්ටෝර්ස් නැහැ. රෑ නවයෙන් පස්සේ ඇරලා තියෙන වයින් ස්ටෝර්ස් කාගෙද කියා හැමෝම දන්නවා.

නිමල් ලන්සාගේ දේශපාලන ජීවිතයේ එකම හතුරා ඔබ  ඔය කියන ආසන සංවිධායක ද?
මගේ හතුරෙක් විදිහට මා දකින්නේ නෑ. ඔහු හරි ප‍්‍රසිද්ධයි කුමන්ත‍්‍රණය කරන්න. මම එහෙම නෑ. මං කියන්න  ඕනැ දේ මූණටම කියනවා. ඔය පත්තරවලට මොන සාකච්ඡා දුන්නත් එතුමා මා දැක්ක ගමන් හොදට හිනා වෙනවා. මං ඉන්න තැන මොනවත් කියන්නේ නෑ.

ඉතින් මේ ආණ්ඩුව එක එක්කෙනා කියන කේලම් පිළිගන්නවාද?
එතුමා කියන දේ හෝ මං කියන දේ පිළිගන්නේ නෑ. ජනාධිපතිතුමාට ප‍්‍රායෝගික බුද්ධියක් තියෙනවානේ. මම නම් කාටවත් කේළම් කියන්න යන්නේ නෑ. ඒක ජනාධිපතිතුමත් දන්නවා.

ඊළඟ ඡන්දෙදි ඔබ පාර්ලිමේන්තුවට ඉල්ලනවද?
ඒකනේ ඔය සමහරුන්ට අමාරු වෙලා තියෙන්නේ. අවුරුදු හතරක් බුදියගෙන ඉඳලා අද මේ මඩ ගහන  ව්‍යාපාරයක් කරන්නේ. පහුගිය අවුරුදු හතරට මීගමුවට කළ එකම සේවාවක් හෝ කියන්න කියා මා අභියෝග කරනවා.  ටැක්සි කවුන්ටරේ තියෙනවා කියන එක හැමෝම දන්නවා.

මීගමුව ගැන අවසන් වශයෙන් මොනවද කියන්න තියෙන්නේ?
මීගමුව ලස්සන කිරීම,  සංවර්ධනය කිරීම සියයට සීයක් වගකීම තියෙන්නේ මට. මම තමයි මීගමුවට ආදරේ, මීගමුවට වැඩ කළ එකම පුද්ගලයා. ඒකට කවුරුත් අත දාන්නේ නෑ. ලබන මැතිවරණයේ එතුමා ගෙදර යන ගමන් තමයි ඉන්නේ.  එතුමාට ඡුන්ද විසි පන්දහසක් ගන්න බෑ. මං අභියෝග දෙකක් කරනවා. එකක් මා සමග ඡන්දයට ඉල්ලලා මා ගන්න මනාප සංඛ්‍යාවෙන් සියයට  පනහක් ගන්න කියන එක. අනික මීගමුවෙන් මං ගන්න ඡුන්දවලින් සියයට පනහක් ගන්න කියන එක.  ඕනෑම තැනක මා සමග විවාදයකට එන ලෙසත් අභියෝග කරනවා.