කොරෝනාව විසින් රට තුළ නිර්මාණය කරනු ලැබ තිබෙන සමාජ අර්බුදය බෙහෙවින් සංකීර්ණය. ව්‍යාකූලය. මෙම සෞඛ්‍යමය ප්‍රශ්නය සමඟ ඈඳුන ආර්ථික සාමාජික හා වෙනත් බහුවිධ ප්‍රශ්න පත්‍රයකටම පිළිතුරු නැතිව සමාජය අන්ද මන්දව සිටී. රට වසා දමන්න යැයි දසතින් එන ඉල්ලීම් ඉවසා සිටිමින් ආණ්ඩුව රට විවෘතව තබාගෙන ඇත්තේ ලක්ෂ හැටපහකට වැඩි මෙරට පෞද්ගලික අංශයේ සුළු ආදායම්ලාභී පවුල්වල සුබසෙත ගැන සලකා බලමිනි. එහෙත් දෛනිකව වාර්තා වන මරණ හා රෝගීන් ගණන ඉහළ යාම නිසා රජය දෙගිඩියාවට හා බියට පත්ව තිබේ.

ආණ්ඩුව රට වසා දමන්නේ නැති නම් තමන් රට වසා දමනවා යැයි කියමින් අඟහරුවාදා වනවිට මෙරට ප්‍රධාන නගර 16ක් පමණ වෙළෙඳ සංගම් විසින් වසා දමනු ලැබීය. මෙලෙස නගර වසා දැමීම පිටුපස පටු දේශපාලනයක් ඇතැයි රජයේ ඇතැම් දේශපාලනඥයන් චෝදනා කරතත් මරණ බිය ඇති සමාජයට එම චෝදනාවලින් පලක් නැති සේය. මෙම පසුබිමේ ශ්‍රී ලංකා ආණ්ඩුවට මෙන්ම ලොව සෙසු සෑම රටකටම කොරෝනා වසංගතයෙන් ගැලවීමට තිබෙන එකම මඟ එන්නත්කරණයයි. ආසියාවේ සෙසු රටවල් හා සමඟ සසඳන විට ශ්‍රී ලංකාව එන්නත්කරණය අතින් අත්පත් කරගෙන තිබෙන ප්‍රගතිය විශිෂ්ටය. ගෙවුණු සඳුදා වනවිට මෙරට සමස්ත ජනගහනයෙන් එක්කෝටි දහඅට ලක්ෂයකට (1,18,00,000) එක් එන්නත් මාත්‍රාවක් හෝ ලබා දී තිබුණි. එන්නත් මාත්‍රා දෙකම ලබා දී තිබූ ජන සංඛ්‍යාව පනස්එක් ලක්ෂයකි (51,00,000). මෙම එන්නත්කරණ ක්‍රියාවලිය ලෝක සෞඛ්‍ය සංවිධානයේ පවා පැසසුමට ලක්විය.

එහෙත් එන්නත ලබාගැනීමට රටේ බහුතර ජනතාව දක්වන උනන්දුව සේම එන්නත ලබා නොගෙන වහන් වී සිටින පිරිසකුත් සිටින බවට නිල වාර්තා ලැබී තිබේ. සමහරු ඒ සඳහා කෙස් පැලෙන තර්ක ඉදිරිපත් කරති. වඳභාවය හටගැනීම, වෙනත් රෝගවලට ගොදුරු වීම, ආගමික හේතු පමණක් නොව ඇතැම් එන්නත් මඟින් ලොව පුරා මානව සංහතියේ දත්ත රැස් කිරීමක් සිදුවන බවට පැතිරෙන ඇතැම් මිථ්‍යා කතා ද තිරය පිටුපස කෙරෙන සමහර සාකච්ඡාවල මාතෘකාය. 21 වැනි සියවසේ දැනඋගත් සමාජයේ ඇතැමුන් මාරාන්තික බිහිසුණු වසංගතයක් හමුවේ මෙලෙස හැසිරීම ඛේදයට කරුණකි.

ලෝක සෞඛ්‍ය සංවිධානය ප්‍රමුඛ පිළිගත් විද්වත් පර්ශද සියල්ලම කොරෝනාව උදෙසා නිර්දේශ කරන එකම විසඳුම එන්නත්කරණයයි. මෙරට වෛද්‍ය ක්ෂේත්‍රයේ ප්‍රවීණයන් ද ආණ්ඩුව කරන ආණ්ඩු පක්ෂය මෙන්ම විපක්ෂය ද ජනතාවට කියා සිටින්නේ හැකිතාක් එන්නත් ලබාගන්නා හැටියටයි. මෙම පසුබිමේ සෞඛ්‍ය අංශ මෙන්ම ආරක්ෂක අංශ ද එන්නත්කරණයේදී ප්‍රශස්ථ මෙහෙවරක යෙදෙමින් අප්‍රමාණ කැපවීමෙන් සේවය කරන්නේ සිය ජීවිත අවදානම ද නොතකමිනි. රජය ගත වූ කාලයේ එන්නත්කරණය ඇතුළු කොරෝනාවේ වියපැහැදම් වෙනුවෙන් රුපියල් කෝටි 25,000ක් පමණ වැයකර ඇති බව මුදල් අමාත්‍යාංශය කියයි. මේ සියල්ල කරන්නේ ඉමක් කොනක් නොපෙනෙන මේ මහා ව්‍යසනයෙන් ජනතාව ගලවා ගැනීම පිණිසය. එම නිසා රටේ සියලු‍ දෙනාගේ යුතුකම හා වගකීම වන්නේ එන්නත්කරණයට සහභාගි වී මේ ජාතික විපතින් රට හා සහෝදර ජනතාව බේරා ගැනීමයි.

දැනට ලැබෙන වාර්තා අනුව මෙරට කොරෝනාවෙන් වැඩිපුරම මරණයට පත්වන්නේ වයස අවුරුදු හැටට වැඩි පිරිසය. එහි දළ ප්‍රතිශතය සියයට 77ක් පමණ වේ. කෙතරම් ධනය බලය වස්තු සම්පත් තිබුණත් කොරෝනා මාරයාට ඒවා ගණනක් නැති බව කොරෝනාවෙන් මියගිය මහා ධනවතුන් ආදීන්ගේ නාමාවලිය දකින විට සිහිපත් වේ. මේ බරපතළකම නිසාම ආරක්ෂක අංශ එන්නත්කරණයට සහභාගි වීමට හැකියාවක් නැති වියපත් ආබාධිත රෝගීන් සහ වෙනත් ලෙඩ රෝගවලට ගොදුරු වූ තැනැත්තන් සොයා ඔවුන්ගේ නිවෙස්වලට ගොස් ජංගම ලෙස එන්නත් ලබාදීම ද අරඹා තිබේ.

මේ වනවිට ලැබී තිබෙන නිල වාර්තා අනුව මෙරට වයස අවුරුදු 60ට වැඩි ජනගහනය ලක්ෂ 27කි. එයින් ලක්ෂ 24ක්ම එන්නත් ලබාගෙන තිබේ. කවර හේතුවක් නිසා හෝ තවත් ලක්ෂ 3ක පමණ පිරිසක් තත්ත්වය මෙතරම් දරුණු වී තිබියදීත් එන්නත් ලබා නොමැත. එම හේතු නිසා හෝ දැනට පැතිරෙන විකෘති ඩෙල්ටා ප්‍රබේදය නිසා හෝ ශ්‍රී ලංකාවේ කොරෝනා මරණ අනුපාතය දිනෙන් දිනම ඉහළ නගිමින් ඇත.

කොරෝනාව ගැන ජාත්‍යන්තර පර් යේෂණ පවත්වන ‘වර්ල්ඩෝ මීටර්’ වෙබ් අඩවිය මේ සතියේ ප්‍රකාශ කළ ආකාරයට කොරෝනා මරණ අනුපාතය අතින් ශ්‍රී ලංකාව දැන් සිටින්නේ ලොව හතරවැනි තැනය. ලොව වැඩිම මරණ අනුපාතය වාර්තා කරන ජෝර්ජියා දේශයේ මරණ අනුපාතය ජනගහනය දස ලක්ෂයකට මරණ 12.7කි. ශ්‍රී ලංකාවේ මරණ අනුපාතය ජනගහනය දස ලක්ෂයකට මරණ 7.3කි. තත්ත්වය කොතරම් බරපතළ දැයි වටහාගන්නට එම සුළු සංඛ්‍යා දත්තය වුව ද ප්‍රමාණවත්ය.

කොරෝනා එන්නත් ලබාගත් සංකූලතා ඇති අයකුට රෝගය බෝ නොවන බවට සහතිකයක් නැත. එහෙත් එන්නත් ලබාගත් අයගේ මරණ අනුපාතය ඉතාමත් සොච්චමකි. එන්නත්කරණය මධ්‍යයේ වුව ද ඩෙල්ටා කොරෝනා ප්‍රබේදය පැතිරීම පාලනය නොවේ. ඩෙල්ටාවට අමතරව මෙරට තුළින්ම තවත් විකෘති වයිරස ප්‍රබේදයක් හටගනිමින් තිබෙන බව පර් යේෂකයෝ වාර්තා කරති. මේ සියල්ලෙන් ගම්‍ය වන්නේ මෙයට පෙර හටගත් වසංගත මෙන් කොරෝනාව පහසුවෙන් හමාර නොවනු ඇති බවය. එබැවින් කල් නොමරා රජය විශාල මුදලක් වැයකොට අප්‍රමාණ වෙහෙසක් ගෙන කරනු ලබන එන්නත්කරණයේ ප්‍රයෝජනය ලබාගැනීම සමාජ වගකීමකි. එසේ නොකරන්නේ නම් ඔබ කරන්නේ මරණය හමුවේ බාල් නැටීමක් බව සිහිපත් කරනු වටී.

(***)