“රෑ දෙගොඩ හරිජාමේ කොල්ලෝ තුන් දෙනෙක් සුදු ඇඳගත්තු ගැහැණු කෙනෙකුගේ හොල්මනක් දැකලා. ඒ ගෑණියේ ඔලුව පේන්න තිබුණේ නැහැ කියලයි කියන්නේ. හිසක් නැති මේ හොල්මන දැකපු එක කොල්ලෙක් බය වෙච්ච පාරට මැරිලා වැටිලා”

මේ කතාව ලැව්ගින්නක් සේ අම්බලන්ගොඩ හා ඒ අවට ගම් දනව් පුරා පැතිර යන්නට වැඩි වේලාවක් නම් ගතවූයේ නැත. 

ඇතැමුන් පැතිර ගිය මේ කතාව අසා බියෙන් සංත්‍රාසයට පත්ව ඇතැයි කියන්නේ ඒ ගැන හරිහැටි සොයා බැලීමකින් තොරව විශ්වාස කිරීමට යාම නිසාය. 
සුදු පාට ගවුමකින් සැරසී සිටි හිසසුන් හොල්මනක් බවට පැවසුනු කාන්තා රුවක් දැකීම නිසා බියට පත්ව මිය ගියා යැයි පැවසුනු තරුණයා සම්බන්ධව සොයා බැලීමට මා තීරණය කළේ මේ කතාවේ සත්‍ය අසත්‍යතාවය ඇත්ත ඇති සැටියෙන් හෙළිකර ප්‍රදේශවාසීන් තුළ පවතින බිය හා සැක සංකා දුරුකිරීම සඳහාය. 

මියගොස් තිබුණේ අම්බලන්ගොඩ පොලිස් වසමට අයත් කුලීගොඩ, දිඹුල්දූවේ පදිංචිව සිටි මුකදන්ගේ රුවන් මධුශංක සිල්වා නමැති 19 හැවිරිදි තරුණයෙකි. 

මධුශංඛ තරුණයා හා ගමේ හිතවත් තරුණයින් පිරිසක් සමග එක්වී පොහොය දිනය වෙනුවෙන් දන්සලක් දීමට ලක ලැහැස්ති වී ඇත්තේ ප්‍රදේශවාසීන්ගේද ආධාර උපකාර ඇතිවය. 

ඔහු හිතමිතුරන්ද සමග එක්වී ගමේ ගෙයක් ගෙයක් ගානේ පසුගිය දවස්වල ගොස් ඇත්තේ පොහොය දිනය වෙනුවෙන් පැවැත්වෙන දන්සලට ආධාර සොයාගෙනය. 

තරුණ කැල එක්වී කරන මේ සද්ක්‍රියාව වෙනුවෙන් ගම්මුන් ද නොමසුරුව ආධාර කළෝය. 

ගමේ දන්සල පැවැත්වෙන ස්ථානයේ තරුණයින් එක්වී ටෙන්ට් එකක්ද කල්තියාම ගසා ඇති අතර ඒ වැඩ කටයුත්ත අවසන්වන විට හොඳටෝම රෑබෝවී තිබිණි. 

“මචං මට ඉන්න හිටින්න බැහැ. ලොකු බඩගින්නක් තියෙනවා. වරෙල්ලා අපේ ගෙදර ගිහින් බත් ටිකක් කාලා එමු” කියා යෝජනාකර ඇත්තේ වෙන කවුරුවත් නොව මධුශංඛය. 

“ඒක හොඳ අදහස. අපිටත් යකෙක් කන්න තරම් බඩගිනියි. එහෙම නම් යමු” කියා මධුශංක සමග ඔහුගේ ගෙදර යාමට අයේෂ්, දිනේෂ් සහ දිමුතුද පැමිණ ඇත. 

එතැනින් එහාට සිදුවූ ලොමු ඩැහැගන්වන සිද්ධිය කීමට මුලින්ම ඉදිරිපත් වුණේ එච්.එම්. අයේෂ් (19) නමැති තරුණයාය. 

මේ අයේෂ් කී කතාවයි. 

“දන්සල දෙන්න හදපු ටෙන්ට් එක යටට වෙලා අපි කට්ටිය ඉද්දී මධුශංක කිව්වා මට හරි බඩගිනියි, මම බත් ටිකක් කාලා එන්න ගෙදර යන්න ඕනෑ. ඔය ගොල්ලොත් මාත් එක්ක ගෙදර යන්න එන්න කියා. මධුශංඛ එක්ක මමත්, දිනේශ් හා දිමුතුද ගියා. අපි හතර දෙනා තුන්මංහංදිය ළඟට යද්දී ලස්සන ගැහැණු ළමයෙක් අපි දිහෑ බලාගෙන ඉන්නවා දැක්කා. එතකොට තුන්මංහන්දිය ගාව තිබුණ ලයිට් කනුවේ ලයිට් එක දැල්වෙමින් තිබුණා. ගැහැණු ළමයා කොණ්ඩය කඩා දාගෙන වගේ හිටියා මතකයි. මමයි මුලින්ම ඒ ගැහැණු ළමයාව දැක්කේ. ඒ ලයිට් කණුව එක්කම තාප්පයක්ද තියෙනවා. ලයිට් කණුවයි ඒ තාප්පයයි අතර තියන හිඩැස අතරේ තමා ගැහැණු ළමයා හිටියේ. සුදු පාට දිග ගමුවක් හා සුදු පාට බ්ලවුස් එකක් ඒ ගැහැණු ළමයා ඇඳගෙන හිටියා. 

මේ ගැහැණු ළමයා දැක්ක ගමන් මගෙත් එක්කම හිටිය යහළුවෝ තුන්දෙනා කිව්වා අන්න මචං අතන ලස්සන කෙල්ලක් ඉන්නවා කියා. එහෙම කිව්වට පස්සෙ මගේ යහළුවෝ තුන්දෙනා ඒ කෙල්ලව දැක්කේ. කෙල්ල දැක්ක ගමන් අපි තුන් දෙනා හිටිය තැනම නැවතුනා. කෙල්ලත් අපි දිහා කිසිම හැලහොල්මනක් නැතිව බලාගෙන ඉන්නවා. අපි හතර දෙනායි ඒ කෙල්ලයි අතර පරතරය මීටර් 100 ක් විතර තියෙන්න ඇති. අපිත් හිටිය තැනටම වෙලා කෙල්ල දිහා බලාගෙන ඉන්නවා. කෙල්ලත් හෙල්ලෙන්නෙවත් නැතිව ඇස්පිය ගහන්නෙවත් නැතිව අපේ දිහෑ බලාගෙන ඉන්නවා. මගේ මතකයේ හැටියට පැය කාලක් විතර මේ විදිහට ඉන්න ඇති. අපි මේ ගැහැණු ළමයා දකිනකොට වෙලාව රෑ 12.00 විතර වෙලා තිබුණා.” 

ඊට පස්සේ මොකද වුණේ කියා ඇසූ ප්‍රශ්නයට අයේෂ් දුන්නේ මෙවැනි පිළිතුරකි. 

අපි හතර දෙනා ඇය ළඟට ගිහින්ම කතා කරන්න තීරණය කළා. එහෙම තීරණය කරලා අඩියක් දෙකක් ඉස්සරහට යනවාත් එක්කම මෙච්චර වෙලාවක් කිසිම කතා බහක් නැතිව ගල් පිළිමයක් වාගේ හිටගෙන හිටිය ඒ ලස්සන කෙල්ල එක පාරටම නොපෙනී ගියා. අපි හතර දෙනා හොඳටම බය වුණා. කොච්චර බය වුණාද කියනවා නම් යන්න ගිය ගමන නතර කරලා ආපහු ටෙන්ට් එක ළඟටම දුවගෙන ආවා. 

ටෙන්ට් එක යට තිබුණු පුටුවල අපි හතරදෙනා වාඩිවෙලා හිටියා. මධුශංඛගේ මල්ලි නුවන් ද අපි එතනට එනකොට ඇවිත් හිටියා. එයාටත් අපි දැකපු දේවල් කිව්වා. මධුශංක ටෙන්ට් එක යට තිබුණ ප්ලාස්ටික් පුටුවක වාඩිවෙලා හිටියේ ඒ පුටුව උඩ කකුල් දෙකත් තියාගෙනයි. මධුශංඛ එයාගේ හෑන්ඞ්ෆෝන් එකේ නම්බර ඔබමින් තමා ඒ වෙලාවේ හිටියේ.”

සුදු සරමකින් හා සුදු කමිසයකින් සැරසුණු පිරිමි කෙනෙක් හා සුදු සායක් හා සුදු හැට්ටයක් හැඳගත් කාන්තාවක් ටෙන්ට් එක ළඟට පැමිණ ඇත්තේ මේ තරුණයන් පස් දෙනා ටෙන්ට් එක යට තිබූ පුටුවල වාඩිවී සිටි අතරවාරයේය.

සුදු හැඳගෙන ආ මේ යුවළ ගැන මෙන්ම ඊට පසු සිදුවූ දේවල් ගැනත් සිය මතකය අවදි කරමින් අයේෂ් මෙසේ පැවසීය. 

සුදු ඇඳගෙන ආපු දෙන්නා දැකපු ගමන්ම අපි හොඳටම බය වුණා. මධුශංඛ පුටුවත් එක්කම බිම පෙරළුනා. ඒත් එක්කම මධුශංඛගේ කටින් සෙම දාන්න පටන් ගත්තා. දිවත් එළියට ඇවිත් තිබුණා. එයාට මුත්‍රා පහවී තිබෙන අයුරුත් මම දැක්කා. මධුශංඛගේ මල්ලීවන නුවන් අයියේ අයියේ කියා කෑ ගැසුවා. ඒත් මධුශංක කිසිවක් කතා කළේ නැහැ. දත කට පූට්ටුවෙලා වාගේ තිබෙන බව පෙනී ගියා. මධුශංඛගේ ගෙදර අයට ඒ වෙලාවෙම සිද්ධිය ගැන දැනුම් දුන්නා. පස්සේ ඒ ගොල්ලොත් ඇවිත් මධුශංඛ බලපිටිය රෝහලට අරගෙන ගියා.”

සුදු ඇඳගෙන මධුශංඛලා හිටිය ටෙන්ට් එක ළඟට ආවේ කවුද? කියන එක ගැන ඔබට ලොකු කුතුහලයක් දැන් ඇතිවී තිබෙන බව අපි හොඳාකාරවම දන්නෙමු. 

සුදු හැඳගෙන ආවේත් වෙන කවුරුවත් නොව හොල්මන්, එහෙමත් නැතිනම් අවතාර දෙකක් බව ඔබ සිතා සිටින බව නම් නිසැකයෙන්ම අපට කීමට පුළුවන. 

හොඳයි අපි ඒ ගැනත් අයේෂ්ගේ වචනවලින්ම අසා දැන ගනිමු. 

“ටෙන්ට් එක ළඟට සුදු හැඳගෙන ඇවිත් තිබුණේ වෙන කවුරුවත් නම් නොවේ. අපේ ගමේම ඉන්න සුගත් මාමයි, එයාගේ නෝනයි. ඒ මාමයි නැන්දයි අපි හිටිය තැනට ඇවිත් තිබුණේ එයාගේ පුතාත් අපිත් එක්ක ඉන්නවාද කියා බලන්නයි. ඒ දෙන්නා මළ ගෙදරක ගිහින් ගෙදර යන ගමන් තමා අපි ඉන්න තැනට ඇවිත් තියෙන්නේ. ඒ දෙන්නා අපිට ඒ බව කිව්වා. කලිනුත් බය වෙලා හිටිය මධුශංඛ මේපාර හොල්මන් දෙකක්ම ඇවිත් කියා බය වෙච්ච පාරට එයා ඉඳගෙන හිටිය පුටුවත් එක්කම බිම පෙරළෙන්න හේතුව වෙන්න ඇති කියා සිතනවා. 

මේ සිද්ධිය වෙන කොට පාන්දර 3.00 ට විතර ඇති. ඒ වෙලාවේ මධුශංඛගේ මල්ලි හිටිය නිසා හොඳට ගියා. මොකද ඔහු වෙච්ච දේවල් සේරම දැක්ක නිසා. ඔහු නොසිටින්නට අපි තුන්දෙනාව මධුශංඛගේ මරණය ගැන සැක කරලා පොලිස් අත්අඩංගුවට ගන්නත් ඉඩ තිබුණා. එහෙම වුණා නම් අපි ලොකු කරදරයක වැටෙනවා” යැයි අයේෂ් කියා සිටියේ ඉදිරියේදී සිදුවීමට ඉඩ තිබූ අවදානමක් ගැනද සිහිපත් කරමිනි. 

හම්බුවත්ත කුලීගොඩ පදිංචි තුෂාර දිනේශ් (18) තරුණයාද කිව්වේ අයේෂ් කී කතාවමය. 

තුංමන්හන්දියේ දී එදින රෑ 12.00 ට විතර දුටු සුදු හැඳගෙන හිටියේ තරුණියකගේ අවාතරයක් බවට තමා විශ්වාස කරන බව තුෂාර දිනේෂ් කීවේ ඒ අවතාරයට වෙච්ච බයට කට්ටඩින් ගෙන්වා මතුරා තුන්දෙනාට නූල් පවා ගැට ගැසූ බවයි. 

කේ. ඩබ්ලිව්. දිමුතු සඳරුවන් (19) තරුණයා පැවසූ ආකාරයට විදුලි පහන් කණුව ළඟදී ඔහු දැක ඇත්තේ සුදු සාරියකින් සැරසී සිටි හිස නොමැති තරුණියකි. 

“තරුණියගේ අවතාරය දැකලා බය වෙලා ටෙන්ට් එක ළඟට ආවාට පස්සේ ඒ බය යන්නත් එක්ක අපි සින්දුත් කිව්වා. ටෙන්ට් එක ළඟට ආවේ ගමේ අපි දන්නා හඳුනන අන්කල් කෙනෙක් හා ඇන්ටි කෙනෙක්. මළ ගෙදරක ගිහින් ගෙදර යන ගමන් ඒ දෙන්නා අපි ඉන්න තැනට ආවේ එයාලාගේ පුතා අපිත් එක්ක ඉන්නවාද කියා බලන්නයි. ඒ දෙන්නා ආවේ සුදු ඇඳගෙනයි. මධුශංඛ හිටියේ ඒ දෙන්නාට පිටුපාලයි. මධුශංඛ පිටුපස හැරිලා බලනකොටම ඒ අන්කල්වයි, ඇන්ටිවයි දැක්කා. ඔවුන් දෙන්නා දැක්ක ගමන් බියවී මධුශංඛ බිම ඇදගෙන වැටුණා” යැයි සඳරුවන් තරුණයා කීය. 

“මේ සිද්ධිය දැන ගත්තට පස්සේ අපි එතැන්ට දුවගෙන ගියා. පුතාට කතා කළත් ඔහු කිසිවක් කතා කළේ නැහැ. පුතා මියාගොස් ඇති බව මට තේරුම් ගියා. ඒත් ත්‍රීවීල් එකක දාගෙන පුතාව බලපිටිය රෝහලට අරගෙන ගියා. දොස්තර මහත්තයෙක් පරීක්‍ෂාකර බලා කිව්වා පුතා මියගොස් ඇතැයි කියා. පුතාට මොනවා වුණාද කියා කියන්න මා දන්නේ නැහැ. අපි දන්නෙත් එයාගේ යහළුවෝ කියන කතාව පමණක්” යැයි මධුශංඛගේ මව වන එච්. අජන්තා මහත්මිය පැවසුවේ කඳුළින් පිරි දෙනෙතින් යුතුවය. 

මියගිය මධුශංඛගේ මරණ පරීක්‍ෂණය සිදු කළේ වතුගෙදර හදිසි මරණ පරීක්‍ෂක කරුණාසේන මලවිගේ මහතාය.

පශ්චාත් මරණ පරීක්ෂණය පවත්වා ඇත්තේ ඇල්පිටිය මූලික රෝහලේ ප්‍රධාන අධිකරණ වෛද්‍ය නිලධාරී විශේෂඥ වෛද්‍ය චන්න පෙරේරා මහතා විසිනි. 
ඉදිරිපත්වූ සාක්කි සහ අධිකරණ වෛද්‍ය විශේෂඥ චන්න පෙරේරා මහතාගේ පශ්චාත් මරණ පරීක්‍ෂණ වාර්තාව සැලකිල්ලට ගත් හදිසි මරණ පරීක්‍ෂකවරයා මෙය බිම ඇදවැටීම නිසා ගෙල ප්‍රදේශයට ඇතිවූ කම්පනයෙන් සුසුම්නාව කැඩීයාමෙන් සිදුවූ මරණයක් බවට තීන්දු කළේය. 

පොලිස් සැරයන් ඩී. සල්පගේ මහතා (58442) මෙම මරණ පරීක්‍ෂණයේ සාක්කි මෙහෙයවනු ලැබීය. 

මෙම මරණ පරීක්‍ෂණයේ සාක්කි විභාගය අවසානයේ මට පෙනීගියේ මේ තරුණ ළමයි දැක ඇත්තේ අවතාරයක් නොවන බවයි. මහ රෑ ජාමයේ අනවශ්‍ය ගමනක් යන්න ගිය කාන්තාවක් දකින්න ඇති. මේ ළමයින්ව දැක්කාම ඇය එක පාරටම යන්න ඇති. ඒක නිසා තමා මේ ළමයි කියන්නේ ඇය එක පාරටම අතුරුදන්වූවා යැයි කියා. ඒ හරියේ ගෙවල් තියනවා. මේ ළමයි හතර දෙනා බය වෙන්නේ නැතිව තවදුරටත් සොයා බැලුවා නම් ඔවුන් අවතාරයක් යැයි කියා බියට පත්වූ තරුණිය හෝ කාන්තාව අල්ලා ගන්න තිබුණා. එතකොට ඔවුන්ගේ සිත්වල තිබුණ බය සැකසංකා නැතිකර ගන්න තිබුණා. එහෙම වුණා නම් මෙවැනි අවාසනාවන්ත මරණයක් සිදුවෙන්නෙත් නැහැ. 

මම නම් මෙය හොල්මනක් කියා කිසිසේත්ම පිළිගන්නේ නැහැ. තරුණ ළමයි ටික දැක්කාට පස්සේ ඇය තරමක් වෙලා බලාගෙන ඉඳලා ඔවුන් ඇය ළඟට එනවාත් එක්කම එතැනින් ඉක්මණට යන්න ඇති. කොහොම හරි ගෙදරකට යන්න ඇති කියා සැක කරන්නත් පුළුවනි.”

ඒ හදිසි මරණ පරීක්‍ෂක මලවිගේ මහතා මේ මරණය සම්බන්ධයෙන් ඉරිදා ලංකාදීපයට අදහස් දක්වමින් කී කතාවයි. 

ඔය තරුණයින් හතර දෙනා සුදු හැඳගත් කාන්තාවකගේ අවතාරයක් දුටුවා යැයි කියන ප්‍රදේශයේ ඉන්න අයගෙන්ද මම මේ ගැන තොරතුරු සොයා බැලුවා. ඔවුන් කිසිම කෙනෙක් මීට පෙර කිසිම අවතාරයක් දැකලා නැහැ. එහෙම අවතාරයක් ඔය කියන ප්‍රදේශයේ රෑට සැරි සැරුවානම් ප්‍රදේශවාසීන්ගෙන් එක්කෙනෙක් දෙන්නෙක් හරි අවතාරය දකින්න ඕනෑ. ඕනෑතරම් අය මහ රෑට ඔය තුන්මං හංදිය පහුකරගෙන ගමන් බියන් යනවා. කිසිම කෙනෙක් මේවනතෙක් අවතාරයක් දැකලා නැහැ” යැයි හදිසි මරණ පරීක්‍ෂකවරයා අවසාන වශයෙන් කීය. 

“අපිත් මහ රෑ ඔය තුන්මංහන්දිය ළඟින් ගමන් බිමන් යනවා. ඒත් කිසිම දවසක අවතාරයක් මුණගැහිලා නැහැ” යැයි ඒ අවට පදිංචිකරුවෝ රැසක්ම පැවසූහ. 

සිය පුතා සිටින්නේද කියා සොයා බැලීමට පැමිණි අඹු-සැමි යුවළක් දැක ඒ දෙදෙනා හොල්මනක් යැයි සිතා වරදවා තේරුම්ගෙන අධික ලෙස බියට පත්වීම නිසා පුටුවෙන් ඇදවැටී සුදුම්නාවට හානි සිදුවීම නිසා අවසානයේ භද්‍ර යොවුන් වියේ පසුවූ තරුණයෙක් මිය ගියේ ඔහුගේ මුළු පවුලටම සදාකාලික කඳුළක් උරුමකර දෙමින්ය. 

හොල්මන්, අවතාර, භූතයන් හා යක්‍ෂයින් කියා අදෘශ්‍යමාන බලවේග නොමැත. ඒවා මිනිසුන් විසින්ම අනාදිමත් කාලයක සිට නිර්මාණය කරගත් සංකල්පයන්ය. 

මෙවැනි මිත්‍යා විශ්වාස පවතින තාක්කල් මේවගේ අවාසනාවන්ත සිද්ධීන් වැළැක්වීමට හැකියාවක් නොමැති බවද කිව යුතුව ඇත. 

කොළඹ ජාතික මානසික සෞඛ්‍ය ආයතනයේ රෙජිස්ට්‍රාර්, මනෝ වෛද්‍ය ෆර්ඩිනර් පෙරේරා මහතා මේ තරුණයින් සමග කතාබහ කර ඔවුන්ගේ සිත් තුළ පවතින බිය හා සැක සංකා දුරු කිරීමට පියවරගත් අතර මේ හා සම්බන්ධව මනෝ වෛද්‍යවරයා කරන විග්‍රහයද මේ සමගම වෙනම පළකර ඇත.