සෞඛ්ය සේවාවට අයත් වෘත්තීන් 14ක් සහ කනිෂ්ඨ කාර්ය මණ්ඩල විසින් මෙහෙයවනු ලැබූ වැඩවර්ජනය ඊයේ (06) නිම විය. සෞඛ්ය ඇමැතිවරිය සහ නිලධාරීන් සමඟ පැවැති සාකච්ඡාවකින් අනතුරුව ඉල්ලීම්වලට අදාළ කැබිනට් පත්රිකාව මීළඟ කැබිනට් රැස්වීමට ඉදිරිපත් කිරීමට ලබාදුන් පොරොන්දුවට අනුව අදාළ තීරණය ගත් බව ප්රකාශ විය.
මෙම වැඩවර්ජනයට මුලපිරුණේ තම ඉල්ලීම් හතෙන් පහකටම විසඳුම් ලැබීම හේතුවෙන් හෙද සංගම් මගින් දියත් කරන ලද ලෙඩ නිවාඩු දැමීමේ වෘත්තීය සමිති ක්රියාමාර්ගය අත්හිටවූ බව රාජ්ය එක්සත් හෙද සේවා සංගමයේ සභාපති මුරුත්තෙට්ටුවේ ආනන්ද හිමියන් සිකුරාදා (02) පස්වරුවේ කළ ප්රකාශයෙන් පසුවය. එම ප්රකාශයේ තීන්ත වියැකෙන්නටත් පෙර සෞඛ්ය සේවා අංශ 14කින් ඊළඟ වෙඩිමුරය එල්ල විය.
වෛද්යවරුන් සහ හෙද හෙදියන් හැරුණුවිට සෞඛ්ය සේවාවට අයත් සෙසු සියලුම තීරණාත්මක අංශ මේ වැඩවර්ජනය හේතුවෙන් අකර්මණ්ය විය. පසුගිය සතියේ දින දෙකකදී හෙද සංගම් මගින් මෙහෙයවනු ලැබූ ලෙඩ නිවාඩු දැමීම හේතුවෙන් රටේ රෝගීන් අති විශාල පිරිසක් මහත් අසරණභාවයට පත්ව සිටියහ. ඔවුන් තමන් ඉල්ලීම් දිනාගෙන සටන අවසන් කළ බවට කරන ප්රකාශයේ යටි පෙළෙන් කියැවෙන්නේ රජයේ රෝහල්වලින් ප්රතිකාර ගැනීමට එන අහිංසක රෝගීන් ප්රාණ ඇපයට ගෙන තම අවශ්යතා ඉටුකරගත් බවය.
වෛද්ය සංගමයද මේ ආකාරයටම මීට පෙර තම අවශ්යතා ඉටුකර ගත්තේය. මේ වර්ජන හේතුවෙන් අසරණ වන රෝගීන් අතර කොරෝනා සම්බන්ධ රෝගීන් පමණක් නොව වෙනත් රෝග සඳහා ප්රතිකාර ගැනීමට රජයේ රෝහල් කරා පැමිණෙන රෝගීහු විශාල පිරිසක්ද සිටියහ. එම සටන ජයග්රහණයකින් කෙළවර වීමෙන් පසුව ඇරඹී ඊයේ අවසන් කෙරුණු අතුරු වෛද්ය සේවා ඒකාබද්ධ පෙරමුණට අයත් සමිති 14ක් සහ රෝහල් කනිෂ්ඨ කාර්ය මණ්ඩල මගින් දියත් කළ සටනේ වින්දිතයන් බවට පත් වන්නෝද රෝගීහුමය.
අතුරු වෛද්ය සේවා වෘත්තීය සමිති නායකයන් ප්රකාශ කළේ හෙද සේවාවට පමණක් සුවිශේෂ වරප්රසාද ලබාදීමට විරෝධය දැක්වීම සඳහා තමන් වෘත්තීය සමිති ක්රියාමාර්ගයකට අවතීර්ණ වූ බවය. හෙද වර්ජනය විසඳීම සඳහා හෙද සේවාවට උසස්වීම් ක්රමවේදයක් ලබාදීම, මාණ්ඩලික තත්ත්වය ලබාදීම සහ නිලඇඳුම් දීමනා ඉහළ දැමීමට ගත් තීන්දු හේතුවෙන් තමන් නියෝජනය කරන සමාන්තර ශ්රේණිවලට එම වරප්රසාද නොලැබී යාම මේ ගැටලුවට හේතුව බවද අදාළ සමිති නායකයන් විසින් පෙන්වා දී තිබිණි. එහෙත් කනගාටුවට කාරණය නම් මේ වෘත්තීය සමිති සටන් හේතුවෙන් රටේ අහිංසක රෝගීන්ගේ වරප්රසාද නොලැබී යාමේ වගකීම දැරීමට කිසිවකුත් නොසිටීමය. ඇතැම් රෝගීන්ට ජීවත්වීමේ වරප්රසාදය පවා අහිමි වී යාමට මෙවැනි වර්ජන හේතුවන බවද පෙන්වා දිය යුතුය.
එය කෙසේ වුවද සෞඛ්ය සේවාව වැනි රටේ ජනතාවගේ පැවැත්ම සහතික කරන වෘත්තීය සමිති සමඟ ගනුදෙනු කිරීමේදී රජයේ බලධාරීන්ද මීට වඩා පවතින යථාර්ථය පිළිබඳව ප්රමාණවත් අවබෝධයකින් ක්රියා කළ යුතුය. සෞඛ්ය ක්ෂේත්රයේ එක් සේවාවකට වරප්රසාද ලබාදෙන විට එවැනිම ගැටලුවලින් පීඩා විඳින සෙසු වෛද්ය සේවාද සමාන වරප්රසාද ඉල්ලා සිටීම බලාපොරොත්තු විය යුත්තකි. හෙද සේවා සංගම් සහ ජනාධිපතිවරයා අතර සාකච්ඡාව සංවිධානය කළ බලධාරීන් මේ තත්ත්වය පෙන්වා දිය යුතුව තිබිණි. එය පෙන්වාදීම පමණක් ප්රමාණවත් නැත. අපේ රට දැන් සිටින්නේ ආර්ථික ගිනි කන්දක් මතය. ඒ යථාර්ථය මේ රටේ සියලු වෘත්තීය සමිති නායකයන්ට පෙන්වාදීම ආණ්ඩුවේ වගකීමක් බව අපගේ වැටහීමය.
වරප්රසාද වෙනුවෙන් සටන් වැදීම වෘත්තීය සමිතිවල අයිතියකි. ඒ අයිතිය ක්රියාත්මක කරන හැමවිටම ඉල්ලීම් සහ වරප්රසාද ලබාදීමට පියවර ගතහොත් රට මේ අර්බුදකාරී අවස්ථාවේ ඉදිරියට ගෙන යාම බරපතළ ගැටලුවක් වනු ඇත. සේවාව කොතරම් අත්යාවශ්ය වුවද රටේ පවතින සැබෑ තත්ත්වය පිළිබඳව එම වෘත්තීය සමිතිවලට අවබෝධ කර දීම හැර මේ අවස්ථාවේදී ආණ්ඩුවට ගත හැකි වෙනත් මගක් නැත. එක් වෘත්තීය සමිතියකට පමණක් සවන් දී ඔවුන්ගේ ඉල්ලීම් ඉටුකිරීම ඇවිළෙන ගින්නට පිදුරු දැමීමකට දෙවැනි නැත.
කොරෝනා මර්දන කටයුතුවලටද මේ වෘත්තීය සමිති ක්රියාමාර්ගය දැඩි බලපෑමක් ඇතිකරන බව සෞඛ්ය සේවා අධ්යක්ෂ ජනරාල් විශේෂඥ වෛද්ය අසේල ගුණවර්ධන මහතා කළ ප්රකාශයකට අනුව පැහැදිලි වෙයි. කොරෝනා මර්දන ක්ෂේත්රවලට අදාළ පිරිසක්ද වර්ජනයට සම්බන්ධව සිටින බවද මේ හේතුවෙන් පී.සී.ආර්. සහ ඇන්ටිජන් පරීක්ෂණ සිදු කිරීම අඩුවන බවද ඔහු පෙන්වා දී තිබිණි.
කොළඹ, ගාල්ල, මාතර, ත්රිකුණාමලේ දිස්ත්රික්ක හතරද ඇතුළුව විවිධ ප්රදේශවලින් භයානක සැර ඩෙල්ටා කොරෝනා ප්රභේදය ආසාදිත 14 දෙනකු සොයාගෙන ඇති පසුබිමක මෙවැනි තත්ත්වයක් උද්ගත වීම බරපතළ හානියකි. ශ්රී ලංකා වෛද්ය සංගමයේ සභාපතිනි විශේෂඥ වෛද්ය පද්මා ගුණරත්න මහත්මියද අනතුරු අඟවා තිබුණේ ඩෙල්ටා ප්රභේදයේ ව්යාප්තියේ තරම තව සති 10කින් බලාගත හැකිවනු ඇති බවටය.
පවතින මේ තත්ත්වය පිළිබඳව සැබෑ අවබෝධයකින් ක්රියා කිරීම වෘත්තීය සමිති නායකයන්ගේ සේම රටේ නායකයන්ගේද වගකීමය. එවැනි අවබෝධයකින් ක්රියා කළා නම් සෞඛ්ය ක්ෂේත්රයේ එක් සංගමයකට අදාළ ගැටලු විසඳීමෙන් සියල්ල පාලනය කරගත හැකිවනු ඇතැයි කිසිම බලධාරියකු නොසිතනු ඇත.
එසේම මැති ඇමැතිවරුන්ද “අපට මුදල් තිබෙනවා. කිසි ප්රශ්නයක් නැහැ” වැනි අභූත ප්රකාශ කිරීමෙන් වැළකී ජනතාවට යථාර්ථය පහදා දීමට කටයුතු කළ හැකි නම් මේ කොරෝනා වසංගතය පාලනය කර ගන්නා තුරු හෝ වෘත්තීය සමිති ක්රියාමාර්ග ගැනීම වළක්වා ගැනීමට හැකිවනු ඇත. එය අතුරු වෛද්ය සේවාවට පමණක් නොව රටේ සෑම වෘත්තීය සමිතියකටම අදාළ කරගත යුතු බවද පෙන්වා දීමට කැමැත්තෙමු.
ලෙබනනයේ ෂියා මුස්ලිම් හිස්බුල්ලා සංවිධානයේ මහ ලේකම්වරයා, එසේත් නැතිනම් නායකයා ෂෙයික් හසන් නසරැල්ලා ඝාතනය කිරීමට ඊශ්රායලය සමත් විය. 64 හැවිරිදි නසරැල
හිටපු අමාත්යවරයකු අභාවප්රාප්ත කුමාර වෙල්ගම මහතාගේ අවසන් කටයුතු අද (30) සවස මතුගම ආදාහනාගාරයේ දී සිදු කෙරේ මේ ලිපිය ඒ නිමිත්තෙනි.
නිදහසට පසු යුගය තුළ ශ්රී ලාංකික දේශපාලන ඉතිහාසයේ පළමු වතාවට සාම්ප්රදායික වම හෝ දකුණ හෝ බලයට එන දේශපාලනය වෙනුවට අලුත් බලවේගයක් නිර්මාණය වී තිබේ. ඉකුත
පසුගිය ජනාධිපතිවරණ සමයේදී ඉදිරිපත් වූ ඉතාමත් ප්රබල තර්කය වූයේ 2019 ජනාධිපතිවරණයේ දී සියට 3.16ක ඡන්ද සංඛ්යාවක් ලැබූ ජාතික ජනබලවේගයේ නායක අනුර කුමාර දිස
අගනුවර පුරෝගාමී කතෝලික පාඨශාලාවක් වන කොළඹ 13, ශාන්ත බෙනදික්ත විද්යාලයේ ‘වාර්ෂික සිංහල සාහිත්ය කලා උළෙල අද (27) පස්වරු 2.30 ට විද්යාලයීය රංග ශාලාවේදී පැවැ
මෙවර කිවිදා දැක්ම ලියන්නේ ජනාධිපතිවරණය නිමාවට පත් වී තිබෙන මොහොතකය. අනුර කුමාර දිසානායක මහතා රටේ ජනාධිපති ධුරයට පත්වීම හරහා ජාතික ජනබලවේගයේ ප්රතිපත
ජනාධිපතිවරණයේ ඡන්ද විමසීම අවසන් වී ඇති මේ මොහොතේ, මුළු රටක් ම බලාපොරොත්තු පෙරදැරිව බලා සිටිනේ ඉදිරි පස් වසර සඳහා සඳහා ශ්රී ලංකාවේ ජනපති වන්නේ කවුරුන්
ශ්රී ලංකාව මේ මොහොතේ සිටින්නේ ඉතාමත් තීරණාත්මක සන්ධිස්ථානයක යි. පවතින ගෝලීය දේශගුණික අභියෝග සහ බලශක්ති සුරක්ෂිතතාව පිළිබඳ කවර ගැටලු පැවතිය ද ෆොසිල
ශ්රී ලංකාවේ ප්රථම වරට, ප්රධාන ජනාධිපති අපේක්ෂකයින් තිදෙනාගේ ප්රතිපත්ති ප්රකාශන පොරොන්දු පහසුවෙන් සංසන්දනය කිරීමට සහ ඇගයීමට, ඉංග්රීසි, සිංහල ස
සෞඛ්ය සේවා ගැටලු අවබෝධයකින් විසඳාගනිමු