මම ලොරියෙන් එද්දී සුදුපාට වෑන් රථයකින් ආපු හතරදෙනෙක් පාර හරස්කරලා නැවැත්තුවා. මම හොඳටම බය වුණා කරකියා ගන්න කිසිම දෙයක් තිබුණේ නැහැ. හතර දෙනා මා ගාව තිබුණ රුපියල් අට ලක්ෂ විසිදහසක මුදල කොල්ලකෑවා.

දොම්පේ පොලිසියට පැමිණි රියැදුරෙක් පොලිස් නිලධාරීන් සමඟ කියා සිටියේය.

පොලිස් නිලධාරියෙක් එය පැමිණිල්ලක් වශයෙන් ලියාගත්තේ ඉදිරි පරීක්ෂණ සිදුකිරීමටය.

මේ ලොරියේ මේ තරම් ලොකු මුදලක් අරගෙන එන බව කොල්ලකරුවන් හරියටම දැනගත්තේ කොහොමද කියන එක ගැන ද පොලිසියට ඇතිව තිබුණේ තදබල සැකයකි.

කොල්ලකෑ බව කියන සල්ලිවල අයිතිකාරයා ලොරි රථ රියැදුරා නොවීම ද පොලිසියේ සැකයට තුඩුදුන් තවත් සාධකයක් වී ඇත.

පූගොඩ ප්‍රදේශයේ ඉන්ධන පිරවුම් හලක අයිතිකරුවෙකු ඛණිජ තෙල් නීතිගත සංස්ථාවට මුදල් බැඳීමට අවශ්‍ය වූ විට එම මුදල් සංස්ථාවට ගොස් බැඳීමට කියාදෙන්නේ මේ රියැදුරාටය.

ඉන්ධන පිරවුම් හලේ අයිතිකාරයා මේ වැඬේ කාලයක් තිස්සේ සිටම බාරදී ඇත්තේ මොහුටය. ඒ තරමටම රියදුරාව ඉන්ධන පිරවුම් හලේ අයිතිකරුට විශ්වාසය. රියදුරා ද ඒ වැඬේ මෙතෙක් කාලයක් හරියටම කරගෙන ආවේය.

රියැදුරා මහියංගණය ප්‍රදේශයේ පදිංචි අයෙක් වන අතර ඔහු රස්සාව කළේ නවගමුව රණාල ප්‍රදේශයේය.

ලොරියේ අයිතිකාරයාද මේ රියැදුරු මහත්තයාමය.

මුදල් කොල්ලය සිදුවූ ආකාරය ගැන දිගින් දිගටම ප්‍රශ්න කරද්දී ඔහු කළ ප්‍රකාශයන්වල කිසියම් පරස්පරතාවයක් තිබෙන බව පොලිසියට පෙනී ගොස් තිබේ.
සුදුවෑන් රථයකින් පැමිණි බව කියන කොල්ල කල්ලිය පාර හරස්කර ලොරිය නවත්වා මුදල් කොල්ලකෑ බවට රියදුරු පොලිසියට කියා තිබුණේ දොම්පේ ප්‍රදේශයෙනි.

ලොරි රථ රියැදුරාගේ ජංගම දුරකථන විශ්ලේෂණ වාර්තාවක් පොලිස් නිලධාරීන් ලබාගෙන තිබුණේ අධිකරණයක් ලබාගත් නියෝගයකට අනුවය.
ඒ දුරකථන විශ්ලේෂණ වාර්තාව අනුව පැහැදිලිවම පෙනී ගියේ ඔය කියන මුදල් කොල්ලය සිදුවන දවසේ ලොරි රථ රියැදුරා දොම්පේ ප්‍රදේශයට හෝ ඒ අවට ප්‍රදේශවලට පැමිණ නොමැති බවය.

රුපියල් අට ලක්ෂ විසිදහසක මුදල වංචා සහගත ලෙස ලබාගෙන ඒ මුදල කොල්ලකෑ බවට බොරු පැමිණිල්ලක් කරන්නට ඇතැයි කියා පොලිසිය මුලින්ම සැකකර ඇත.

අනේ නැහැ සර් මම මුදලාලිගේ සල්ලි හොරකම් කළේ නැහැ. මුදලාලිගේ සල්ලි මම තමා ඛනිජ තෙල් සංස්ථාවට බඳින්න ඕනෑ වුණාම අරගෙන යන්නේ.
ලොරි රථයේ රියැදුරා පොලිස් නිලධාරීන් සමඟ කියා ඇත්තේ හතර අතේ දිවුරමින්ය.

ඉන්ධන පිරවුම් හලේ අයිතිකරුද කියා ඇත්තේ මෙච්චර කාලයකට රියැදුරා මේවගේ වැඩක් කර නොමැති බවය. ඒ නිසා එක්වරම ඔහු සැකකිරීමට නොහැකි බවද ඉන්ධන පිරවුම් හලේ අයිතිකාරයා පවසා ඇති බව කියයි.

පොලිසියට මෙය උභතෝකෝටික ප්‍රශ්නයක් විය. 

කෙසේ වෙතත් පොලිසිය ලොරි රථයේ රියැදුරාගෙන් දිගින් දිගටම ප්‍රශ්න කළේ කෙසේ හෝ මේ මුදල් කොල්ලයේ අභිරහස ආවරණය කරගැනීමටය.
පොලිසියෙන් කිසිම බේරීමක් නොමැති බව තේරුම්ගත් රියැදුරා සිද්ධවෙච්ච ඇත්ත කතාව කීමට තිරණය කර ඇත.

මම සමහර දවස්වලට මගේ ලොරියෙන් කොළඹ යන ගමන් මුදලාලිගේ සල්ලි අරගෙන යනවා. ලොරියෙන් කොළඹ යන්නේ නැති දවස්වලට බස් එකේ යනවා. එදා මුදලාලි මට අට ලක්ෂ විසි දාසක මුදලක් දුන්නා පෙට්ට්‍රෝලියම් කෝපරේෂන් එකට බඳින්න කියා. ඒ සල්ලිත් අරගෙන මම එදා ආවේ බස් එකකින්. බස් එකේ හිටිය පොකට්කාරයෙක් සල්ලි උත්සලා. ඒ බව මම දැනගත්තේ සල්ලි බඳින්න ගියාමයි.

ලොරි රථයේ රියැදුරා කියා සිටියේ පොලිස් නිලධාරින් කළ ප්‍රශ්න කිරීම්වලදීය.

ඇයි එහෙනම් තමුන් ඒ බවක් නොකියා සල්ලි කොල්ලකෑවා කියා පොලිසියට ඇවිත් බොරු පැමිණිල්ලක් කළේ යැයි පොලිස් නිලධාරීන් රියැදුරාගෙන් විමසා සිටියේය.

බස් එකේ යද්දී පොකට්කාරයක් සල්ලි ඉස්සුවා කියා ෂෙඞ් එකේ අයිතිකාර මුදලාලි විශ්වාස නොකරයි කියා මම හිතුවා. ඒ නිසා තමා මම මුදල් කොල්ලකෑවා කියා පොලිසියට ඇවිත් කිව්වේ. එහෙම නැතිව මම මුදලාලිගේ සල්ලි ගත්තේ නැහැ. ලොරි රථයේ රියැදුරා කියාගෙන ගියේය.

රියැදුරා කියන්නේ ඇත්තක් බව පොලිසිය කළ පරීක්ෂණවලදී තහවුරුවිය.

බොරු පැමිණිල්ලක් කර පොලිසිය නොමගයෑවීම සම්බන්ධයෙන් ලොරි රථ රියැදුරා සැකපිට අත්අඩංගුවට ගෙන අධිකරණය හමුවට ඉදිරිපත් කිරීමෙන් පසු රිමාන්ඞ්භාරයට පත්කෙරිණි.

බස්නාහිර උතුරු දිසා බාර නියෝජ්‍ය පොලිස්පති කපිල ජයසේකර මහතාගේ අධීක්ෂණය යටතේ ගම්පහ කොට්ඨාශය බාර ජ්‍යෙෂ්ඨ පොලිස් අධිකාරී මුදිත පුස්සැල්ල මහතාගේ උපදෙස් මත ගම්පහ සහකාර පොලිස් අධිකාරී සේනානිද සිල්වා මහතාගේ මෙහෙයවීම යටතේ දොම්පේ පොලිසිය පරීක්ෂණ පැවැත්විය.