මුදිතා දයානන්ද සහ බිමල් ශ්‍යාමන් ජයසිංහ

එම්. පී. ජයවර්ධන අත්තනායක යැයි ඇසු පමණින් මෙරට ජනතාවට සිහිපත් වනුයේ හිටපු පාර්ලිමේන්තු මන්ත‍්‍රීවරයෙක් වන අත්තනායක මුදියන්සේලාගේ ජයවර්ධන මහතාය. ඔහු 1970- 77 හා 1994-99 කාල වකවානුවල පාර්ලිමේන්තු මන්ත‍්‍රීවරයෙක් ලෙස කටයුතු කර ඇති අතර රුහුණු කතරගම දේවාලයේ බස්නායක නිලමේ ලෙස දෙවරක්ම  තේරීපත්ව ඇත.

මන්ත්‍රීවරයාගේ නමින් ලිපි ශීර්ෂ යොදා කූට ලේඛන රැසක් තවත් විවිධ නම් වලින් බොහෝ කූට ලේඛන සකස් කරමින් රාජ්‍ය නිලධාරින් නොමග යැවූ හා අන්සතු දේපළ  බලහත්කාරයෙන් අත්පත් කරගන්නා අයෙකු පිළිබඳව ගල්කිස්ස කොට්ඨාස අපරාධ විමර්ශන ඒකකය පරික්ෂණ අරඹා තිබේ.

මෙම පුද්ගලයා එම්. පී. අත්තනායක යන පාර්ලිමේන්තු මන්ත‍්‍රී ජයවර්ධන අත්තනායක නාමය ව්‍යාජ ලෙස යොදා ගත්තේ දැයි පොලිසිය සැක කරනු ලබයි.

මොහුට එරෙහිව මෑතකදී ලද නවතම පැමිණිල්ල වන්නේ දෙහිවල නැදිමාගේ නිවසක් බලහත්කාරයෙන් අත්පත් කරගැනීම සම්බන්ධයෙන් දෙහිවල පොලිසියට ලද පැමිණිල්ලය.

දෙහිවල නැදිමාලේ එකමුතු මාවතේ පිහිටි නිවසකට පසුගිය මාර්තු 101 වැනි දා රාත‍්‍රී දොළහට පමණ සිය මව ඇතුළු පස් දෙනෙකුගෙන් යුත් කණ්ඩායමක් සමඟ කඩා වදින මෙම තැනැත්තා තමන් අපරාධ පරික්ෂණ දෙපාර්තමේන්තුවෙන් යැයි පවසා එම නිවසේ තාවකාලිකව ලැගුම් ගෙන සිටි පිරිස ඉවත් කර මෙම සැකකරු විසින් අත්පත් කරගෙන ඇතැයි දෙහිවල පොලිසියට පැමිණිල්ලක් ලැබී තිබේ.

ඒ පිළිබඳව පරික්ෂණ කරන්නට ගිය පොලිසියට දැනගන්නට ලැබුණේ සැකකරු මහාචාර්යවරයෙක් බවයි. එසේම නිවසේ නියම හිමිකරු විසින් තම නිවසේ භාරකාරත්වය භාරගන්නා ලෙස එවන ලද ලිපියක්ද ඔහු සතුව තිබිණි. එයද ඔහු විසින් සැකසූ කූට ලේඛනයක් බව පසුව හෙළිදරව් වී තිබේ.

කෙසේ වුවත් පැමිණිල්ල විභාග කළ පොලිසිය අත්තනායක යන අය අයුතු ඇතුල් වීමක් සිදුකර ඇතැයි අධිකරණයට වාර්තා කළේය. ඒ අනුව අධිකරණයෙන් ලැබුණු නියෝගය වූයේ විමර්ශන සිදුකර අධිකරණයට වාර්තා කරන ලෙසය.

මෙතෙක් එම නිවසේ පදිංචිව සිට අයටද නිවසේ නියම හිමිකරු නිවස භාරදී තිබුණේ තමන් එනතුරු එය බලාගන්නා ලෙස පවසමිනි. අත්තනායකගේ ආක‍්‍රමණයෙන් පසු යන එන මං නැතිවු ඔහු ඇතුලූ පවුලේ අය මානව හිමිකම් කොමිසමටද පැමිණිල්ලක් ඉදිරිපත් කරනු ලැබිණි. ඔහුට තවමත් සාධාරණ පිළිතුරක් ලැබී නැත.

මේ අතර විදේශ රටක පදිංචිව සිටින නිවසේ නියම හිමිකාරිය ලංකාවට පැමිණියාය. එහෙත් ඇයටද නිවසට ඇතුල් වීමට මහාචාර්ය එම්.පී. අත්තනායක ඉඩ දුන්නේ නැත. ඔහු කියා සිටියේ පොලිසියත් මා අතේ උසාවියත් මා අතේ පුළුවන් දෙයක් කරලා බලනවා යනුවෙනි. මේ අනුව ඇය බස්නාහිර දකුණ නියෝජ්‍ය පොලිස්පති වෙත පැමිණිලි කර සිටියාය. ඒ අනුව මේ පිළිබඳ විමර්ශනයක් සිදුකරන ලෙස ගල්කිස්ස කොට්ඨාසයේ අපරාධ විමර්ශන ඒකකයට පැවරිණි.

ඒ අනුව ඔවුන්  විමර්ශන කටයුතු ඇරඹීය. මේ වන විට ජ්‍යෙෂ්ඨ පොලිස් අධිකාරී රොෂාන් විජේසිංහ, සහකාර පොලිස් අධිකාරී සමන් ජයසේකර මහත්වරුන්ගේ උපදෙස් පරිදි ගල්කිස්සද කොට්ඨාස අපාරධ විමර්ශන ඒකකයේ ස්ථානාධිපති ප‍්‍රධාන පොලිස් පරීක්ෂක අනුර ගුණතිලක, පොලිස් පරීක්ෂක හෙට්ටිආරච්චි මහත්වරුන් ඇතුළු කණ්ඩායමක්ද, ගල්කිස්ස විශේෂ අපරාධ මෙහෙයුම් ඒකකයේ ස්ථානාධිපති උප පොලිස් පරික්ෂක පෙරේරා ඇතුළු කණ්ඩායමක් ද මහාචාර්ය එම්. පී. ජයවර්ධන අත්තනායක හා හිටපු විනිසුරුවරයෙක් නමින්ද හිටපු ආරක්ෂක අමාත්‍යංශ සහකාර ලේකම්වරයෙක්ද ලෙස රගපෑ බව කියන එම්. පී. අත්තනායක පිළිබඳ විමර්ශන අරඹා තිබේ.

විමර්ශන වලදී ලද තොරතුරුවලට අත්තනායක විසින් අත්පත් කරගත් බව කියන දෙහිවල නිවසේ නියම හිමිකාරිය අත්තනායකගේ පුංචි අම්මාගේ දියණියයි. බාප්පාට අයත් දේපළ සියල්ල ඔවුන් සිය දියණියට ලියා දී තිබේ. බාප්පාට අයත් ශබ්දාගාරයක්ද මෙම දෙමහල් නිවසේ පහත මාලයේ පවත්වාගෙන යන අතර ඔහු විදේශගතවද එවැනි කටයුතුවල නිරතවන වත්පොහොසත් කමින් ඉහළ පුද්ගලයෙකි.

ගල්කිස්ස කොට්ඨාස අපරාධ විමර්ශන ඒකකය විසින් ඔහු අත්අඩංගුවට ගෙන අධිකරණයට ඉදිරිපත් කළ අතර සමතයකට පත්වීම දෙපාර්ශවයම එකඟ වීම නිසා ඔහුට ඇප ලැබිණි. නිවස දැන් තිබෙන්නේ ගල්කිස්ස කොට්ඨාස අපරාධ විමර්ශන ඒකකය යටතේය. නිවසේ අයිතිය සෙවීම පිළිබඳ විමර්ශනයේ දී තවත් බොහෝ දේ හෙළිදරව් වී තිබීම අත්තනායක පිළිබඳ විශේෂ අවධානය යොමු වීමට හේතු විය.

මේ කියන තිස්තුන් හැවිරිදි එම්. පී. ජයවර්ධන අත්තනායක සැබවින්ම මහාචාර්යවරයෙක් හෝ නීතිඥයෙක් හෝ විනිසුරුවරයෙක් හෝ නොවේ. ඔහු අධ්‍යයන පොදු සහතික පත‍්‍ර සාමාන්‍ය පෙළ දක්වා වත් අධ්‍යාපනය ලබා නැත. එහෙත් ඔහු සාමවිනිසුරු සංගමයේ හිටපු සභාපති ලෙස හා හිටපු මහාධිකරණ විනිසුරුවරයෙක් ලෙස දෙමළ නාමයකිනුත්, හිටපු පාර්ලිමේන්තු මන්ත‍්‍රීවරයෙක්, ඇමැතිවරයෙක් හා මහාචාර්යවරයෙක් ලෙසත්, හිටපු ජනාධිපතිවරයකුගේ සම්බන්ධිකරණ ලේකම්වරයෙක් ලෙසත්, ඇමැති ලේකම්වරුන් ලෙස විවිධ ඇමැතිවරුන්ගේ නම් පෙරටුකර ගනිමින් එම්. පී. ජයවර්ධන අත්තනායක නමිනුත් පෙනී සිට ඇත. එසේම වාරණ රජමහා විහාරයේ බස්නායක නිලමේ ලෙස මෙන්ම විටෙක රහස් පොලිසියේ ඉහළ තනතුරක් දරන්නෙකු ලෙසද පෙනී සිට ඇත.

ඒ අනුව ඔහු පොලිසියේ ඉහළ නිලධාරීන්ට පවා නම කියා කතා කරන්නට පෙළඹෙන අතර එවැනි නිළධාරීන්ද ඔහුට අදාළ ගරුබුහුමන් සහිතව පිළිගෙන ඇති බවද දැන් දැන් කරුණු වාර්තාවෙමින් පවතී. එසේම ඇතැම් අවස්ථාවල ඔහුට ආරක්ෂක රථ මගින් තම පොලිස් සීමාව ඉක්මා යන තෙක් ආරක්ෂාව ලබාදීමට පවා පොලිස් නිලධාරීන් කටයුතු කර ඇති බවටද වාර්තා වෙමින් පවතී.

මෙසේ විවිධ තනතුරු භාවිතා කරමින් ඔහු පොලිස් නිලධාරින්ට පවා තමන්ට කරගන්න බැරිව සිටි ස්ථාන මාරුවීම් සිදුකර දී තිබේ. එසේම ඇතැමුන්ට රැකියා ලබාගැනිමට සහය වී ඇති අතර තවත් විටෙක රෝගීන්ට අවශ්‍ය ශල්‍යකර්ම හෝ වෙනත් ප්‍රතිකාර සඳහා ආධාර ලබාගැනීමට අවශ්‍ය කටයුතු සිදුකර දී තිබේ.

බොහෝ වෘත්තීන්වල යෙදෙන්නන්ට ස්ථාන මාරුවීම් සකස් කර දී තිබේ. පාසලක් නැති දරුවන්ට පාසලක් සොයා දී තිබේ. ඒ සඳහා ඔහු විවිධ නම් වලින් සැකසු රබර් මුද්‍රාද සකස් කර ඇතැයි පොලිසිය පවසයි.

මේ සියල්ල ඔහු සිදුකරනුයේ දුරකථනයෙන් අදාළ ආයතන වෙත අමතා මම අහවලා යැයි එම අවස්ථාව උචිත තනතුරු නාමයන්ගෙන් යුතුව කතා කිරිමෙනි.

ඔහු හිටපු ජනාධිපතිවරයා සමඟ ලබාගත් ඡායාරූපයක් හා ඔහුගෙන් ලද ලිපි විවිධ දේවල්වලට භාවිත කර ඇති බවද පෙලිසිය පවසයි. එසේ ඔහු ඡායාරූපයක් ලබාගෙන තිබෙන්නේ මනා සැලැස්මක් අනුවය.

එනම් ජාතික සංවර්ධන පෙරමුණ නමින් ලිපි ශීර්ෂයක් යොදා ගනිමින් තම පක්ෂය මැයි දිනයට ඔබේ පක්ෂයත් සමඟ එක්වීමට සුදානම් යැයි පවසමින් මේ කියන හිටපු ජනාධිපතිවරයාට ලිපියක් යොමු කර තිබේ.

එයට කැමැත්ත පළකර ජනාධිපතිවරයාගෙන් පිළිතුරු ලිපියක්ද ලැබී ඇත. ඒ අනුව අදාළ මැයි දිනයට තම පක්ෂයේ නමින් බැනරයක්ද සහිතව තවත් පිරිසක් සමඟ එක්වන මහාචාර්ය අත්තනායක කෙසේ හෝ තම වෘත්තිය ද භාවිතා කරමින් ජනාධිපතිවරයා හමුවට වේදිකාවට ගොඩවන්නේ තමන් ජනාධිපති සමඟ සිටින ඡායාරූපයක් ගන්නා ලෙසට තවත් කෙනෙකු යොදවමිනි. තමන් පෙර කී ජනාධිපතිවරයා සමීපය ඇසුරු කරන්නෙක් බවට පෙන්වීමට ඔහු භාවිතා කරන්නේ එම ඡායාරූපයයි.

ඔහු සිදුකර තිබෙන බොහෝ කටයුතු විශ්ලේෂණය කර බලන විට ඒවා සමාජ සේවයන් නොවේදැයි කෙනෙකුට සිතෙනු ඇත. එක්තරා ආකාරයකට ඔහු සරදියෙල් පන්නයේ මිනිසෙක් සේ මතුපිටින් පෙනේ. එහෙත් ඔහු මේවා සිදුකර තිබෙන්නේ අදාළ පුද්ගලයින්ගෙන් මුදල් ලබාගෙන බවටද යම් යම් තොරතුරු වාර්තා වී තිබේ. එසේම ඔහු බොහෝ රජයේ නිලධාරින්ගේ සේවයට බාධාකර තිබේ.

දෙහිවල නැදිමාලේ ග‍්‍රාමසේවකවරයාට දුෂණ චෝදනාවක් එල්ල කරමින් පෙත්සම් ඉදිරිපත් කර ඔහු මාරු කිරිමටත් ඔහුට එරෙහිව විනය පරික්ෂණ සිදුකරන තත්ත්වයට පත් කිරිමටත් කටයුතු කර ඇත. තවත් විටෙක ප‍්‍රාදේශීය ලේකම්වරුන්ට, පොලිස් නිලධාරින්ට එරෙහිව පෙත්සම් ඉදිරිපත් කර මාරුකිරීම් ද කර ඇත.

එසේම ඔහු මැතිවරණයට ඉදිරිපත්ව ඇති බවට පෝස්ටර් සකස් කර විදේශගතව සිටින ඇතැම් පුද්ගලයන්ට කතා කර මුදල් ගෙන්වා ගෙන ඇති බවටද පොලිසියට යම් යම් තොරතුරු වාර්තා වි තිබේ.

දෙහිවල නිවස අත්පත් කරගන්නා ඔහු එහි තිබූ භාණ්ඩ සියල්ල විකුණා දමා ඇතැයි නිවසේ හිමිකාරිය පවසයි. ඒ අතර ශබ්දාගාරයට අදාළ ලක්ෂ ගණන් වටිනා භාණ්ඩ මෙන්ම විශාල වටිනාකමකින් යුත් විදුලි පහන් වර්ග ද තිබු බව ඇය පොලිසියට පවසා ඇත. එසේම විටෙක මේ වන විට පානදුර ප‍්‍රදේශයේ පුද්ගලයෙක්ද සැකකාර මහචාර්යවරයා තමන්ගේ ඉඩමක් අත්පත් කරගෙන ඇතැයි ගල්කිස්ස කොට්ඨාස අපරාධ විමර්ශන ඒකකයට පැමිණිලි කර ඇත.

එසේම පෙර කී ලෙස ජනාධිපතිවරයකු සමඟ සමීප සබඳතා ඇති බව පෙන්වීමට ජනාධිපති සමඟ ඡායාරූප ලබාගත් හා ජනාධිපති ලේකම් කාර්යාලයෙන් විවිධ ලිපි ගෙන්වා ගැනීමටත් කටයුතු කළ මේ හොර මහාචාර්යවරයා ජනාධිපති සහකාර ලේකම්ගේ අත්සන් යොදා ගනිමින් කූට ලේඛන සකසා මොරවක නාථ දේවාලයේ භාරකාර තනතුර ලබාගැනීමට කටයුතු කර ඇති බවට කොටුව මහේස්ත‍්‍රාත් අධිකරණය හමුවේ 2009 වසරේදී නඩුවක් විභාග වි ඇත.

එසේම එම තනතුරම භාවිතා කරමින් දස වසරකට පමණ පෙර එකනල සිටි අත්තනගල්ල ප‍්‍රාදේශිය ලේකම්වරයකු  නොමග යවා පුරාවිද්‍යා දෙපාර්තමේන්තුවට අයත් අක්කර 37 ක පොල් ඉඩමක් රුපියල් 120,000කට බදුගෙන ඇති බවටද වාර්තා වේ. එසේම එලීනා ජයවර්ධන මහත්මියගේ අත්සන හොරට යොදා ඉඩමකට ඔප්පු සකස් කර විකුණා ඇති බවට ද ඔහුට එරෙහිව මීට පෙර නඩු පැවරී ඇත.

මෙම සැකකරු විවිධ හේතු මත විවිධ පොලිස් ස්ථානවලින් අත්අඩංගුවට ගෙන අදාළ ප‍්‍රදේශයේ අධිකරණ වෙත ද ඉදිරිපත් කර ඇත. ඒ සෑම අවස්ථාවකම කෙටි කලක් රිමාන්ඩ් බාරයට පත්වුවත් යළි ඇප මත මුදාහැරේ. එක්කෝ අදාළ ප‍්‍රශ්න සමඟ මණ්ඩලයට යොමු කෙරේ. එසේ නැත්නම් දඩයක් ගෙවීමට නියම කොට නඩුව අවසන් වේ. එහෙත් ඒ කිසිවකින් එම්.පී. අත්තනායකගේ කෙරුවාවල් නැවතී නැත.

මූල්‍ය වංචාව, රාජ්‍ය නිලධාරින් නොමග යැවීම, රාජ්‍ය දේපල මෙන්ම අන්සතු දේපළ අත්පත් කරගැනීම, කූට ලේඛන සකස් කිරීම, කෙබඳු දඬුවම් ලැබිය යුතු වැරදි දැයි දන්නේ නීතිය දන්නා අයවලූන්ය. වසර දහයකට අධික කාලයක් මෙවැනි වංචාවන් වල නිරතවූ මෙවැනි පුද්ගලයින් අසාදු ලේඛන ගත නොකර තව දුරටත් නිදැල්ලේ සිටිමට ඉඩ දීමෙන්  තව තවත් මුළු මහත් සමාජයට නොමග යැවීමට ඉඩ ලබාදිම සමායේ යහපතට කෙතරම් සුභදායක වනු ඇතිදැයි සිතා බැලිය යුතුව ඇත.