ඉතාලියේ ඇති පීසා කුලූන ලෝ ප‍්‍රකට වූවකි. දිගු ඉතිහාසයකට හිමිකම් කියන මෙම පීසා කුලූන ලෝ ප‍්‍රකට වී ඇත්තේ, එය එක් අන්තයකට ඇලවී ඇති නිසාය. ලෝකයේ ඇති උසින් වැඩි කුලූනු අද දක්නට ලැබුණද ඉපැරැණි පීසා කුලූන ප‍්‍රකටව ඇත්තේ මේ ආනතිය නිසාමය. ඔන්න වැටේවි, මෙන්න වැටේවි යැයි කියා බොහෝ දෙනා විශ්වාස කළද, පීසා කුලූන නම්, තවමත් එලෙසින්මය. එය එරට ජාතික වශයෙන් වැදගත් ස්ථානයක් බවට පත්ව තිබේ.
පීසා කුලූන නැරඹීම සඳහා ඉතාලියට පැමිණෙන සංචාරකයෝ ඉතාලියේ ඇති රසවත් පීසා ආහාරයට ගැනීමටද අමතක නොකරති. මෙකී සියල්ල ගැන සිතා එක්තරා සමාගමකට අපූරු අදහසක් පහළ විණි. එනම් පීසා කුලූන සහ පීසා අවන්හලක් එක් ස්ථානයක තැනීමය. එය නම් කරනු ලැබුවේ ෆ‍්‍රැන්කි ටොමෑටෝ නමිනි.  අප මේ පැවසීමට සූදානම් වන්නේ එම අපූරු අවන්හල ගැන විස්තරය.

ඉතාලියේ පීසා කුලූනෙහි ආකෘතිය රැුගත් මෙම අවන්හල තනා ඇත්තේ කැනඩාවේ ඔන්ටාරියෝ පළාතේය. කැනඩාවේ අප කළ සංචාරයේදී සුදේශ් මුතු සහ රංජිත් වික‍්‍රමසිංහ මේ අපූරු අවන්හල වෙත අප රැගෙන යාමට අමතක නොකළේය. පුද්ගලිකව මා හට මෙම අවන්හල වෙත දෙවතාවක්ම යාමට ඉඩ ලැබුණේ ප‍්‍රකට ලේඛක චන්ද්‍රරත්න බණ්ඩාර නිසාය. වරක් නොව කීප වතාවක්ම වුවද, මෙතැනට යාමට සිත් ඇතිවේ.

ෆ‍්‍රැන්කි ටොමෑටෝ නම් වූ මෙම අවන්හල වෙත පැමිණෙන  ඕනෑම අයෙකු මොහොතකට එහි ඉදිරිපස නතරව සිට මෙය තනා ඇති විදිය ගැන විපරම් කර බලන්නේ පීසා කුලූන මෙතැනට ආවේ කෙසේදැයි යන සිතිවිල්ලෙනි.

එය සැබෑම පීසා කුලූන මෙන් නිර්මාණය කිරීමට සිදුවූ නිසා ඒ වෙනුවෙන් විශාල මහන්සියක් මෙන්ම විශාල වියදමක් දැරීමට ද මෙම අවන්හල් ජාලයේ හිමිකරුවන්ට සිදුවිය. නමුත් අද ඔවුන්ගේ ආයෝජනයේ සහ මහන්සියේ තරමටත් වඩා ප‍්‍රතිඵල ලැබෙන බව නම් කිව හැකිය.

ඒ ෆ‍්‍රැන්කි ටොමෑටෝ රසවතුන් අතර එතරම්ම ජනප‍්‍රියව තිබීම නිසාය. එලෙසින් ජනප‍්‍රිය වීමට හේතු බොහෝය. මෙහි ආකෘතියේ මෙන්ම ගොඩනැගිල්ලේ සැළසුම එක් හේතුවකි. එහි ඇතුළත සැකැස්ම මෙහි සේවය කරන පිරිසද ඇතුළත් වේ. ඔවුහු සියලූ දෙනාම ඉතාලි ජාතිකයෝ වෙති. ඔවුන් ඇඳ පැළඳ සිටින්නේද ඉතාලි ක‍්‍රමයටය. ඇතුළත අලංකරණ සියල්ලද කර ඇත්තේ ඉතාලි පරිසරයට අනුවය. ඇතුළත කෝට්යාඞ් වැනි ස්ථානවල තක්කාලි ගස් - වැල් වවා තිබේ. ඒවායෙහි පීදී ඇති රතු තක්කාලි ගෙඩි දක්නට ලැබෙන්නේ සැරසිළි සඳහා යොදා ගන්නා විදුලි බල්බ ලෙසිනි. තක්කාලි යනු ඉතාලි ආහාර වේලක විශේෂිත වූ දෙයකි. රතු තක්කාලිවලට අමතරව තවත් රතු වර්ණයෙන් යුතු දෙයක් දැක ගත හැකිය. ඒ ඉතාලියේ නිපදවූ රතු වයින් සහ ඉතාලියට ආවේනික වූ වයින් වර්ගය. ඒ සඳහා වෙනම ස්ථානයක් මෙහි වෙන්කර ඇත. ඉතාලි වයින් රසය තොලගා බැලීමට වඩා බොහෝ දෙනා මෙතැනට එන්නේ කදිම ඉතාලි අහරක රස විඳ ගනු රිසියෙනි.

බුෆේ ක‍්‍රමයට රිසිසේ ආහාරපාන රස විඳගත හැකිය. මුලින්ම සලාද  වර්ගයක හෝ ඉතාලි තක්කාලි යොදා පිළියෙල කරන ලද සුප් වර්ගය හෝ අනෙකුත් සුප් රස තොලගා බැලිය හැකිය. එළවළු වර්ගවලට අයත් සලාදවලට අමතරව, මාංශවලට අයත් කෙටි සලාද වර්ගද රස බලන බොහෝ දෙනා මෙහි ඇති බෙල්ලන්ගෙ වට්ටෝරුවට වඩා කැමතිය. සමහර සංචාරකයින් මෙතැනට පැමිණෙන්නේ බෙල්ලන්ගේ ආහාරය පමණක් රස විඳීමටය. තවත් සමහරු මෙතැනට එන්නේ කදිම ඉතාලි පීසාවක රස විඳ ගැනීමේ රිසියෙනි. ඉතාලියේ ප‍්‍රකට පැස්ටා සහ ස්පැගටි යොදා පිළියෙල කරන ලද ආහාරද ඉතාලියේ විවිධ ක‍්‍රමයන්ට අනුව පිළියෙල කරන ලද තවත් ආහාර වර්ග මේ බුෆේ වට්ටෝරුවට ඇතුළත්ය. අපට පුරුදු ”බත්” පවා ඊට ඇතුළත්ය. නමුත් ඒ බත පිළියෙළ කරන්නේ තරමක බෙරි වූ තලපයක් මෙනි. මෙකී සියලූ ආහාර පිළියෙල කිරීම් සඳහා යොදා ගන්නේ ඉතාලියට ආවේනික කුළුබඩු සහ කළමනා වර්ගය. විශේෂයෙන්ම යොදා ගන්නා ඔලිව් ගෙඩි සහ කොළ මෙන්ම තෙල් ගැනද සඳහන් කළ යුතුමය.

ප‍්‍රධාන ආහාර වේල හොඳහැටි සප්පායම් වීමෙන් අනතුරුව මෙහි ඇති අතුරුපස කුටිය වෙත ගොස්  ඕනෑ තරමට පැණි රසයෙන් යුතු නේක විධ අතුරුපස මෙන්ම මිදි, ඇපල් රසයෙන් කුස පුරවා ගත හැකිය. නමුත් බොහෝ දෙනාගේ වැඩි මනාපය ඇත්තේ අයිස්ක‍්‍රීම් වර්ග දහයක් පමණ ඇති තැනට ගොස් තමුනට කැමති වර්ගය තමුන් විසින්ම ඇති පදමට බෙදාගෙන විත් අයිස්ක‍්‍රීම් ඉමිහිරි රස විඳ ගැනීමටය. මෙකී සියල්ලෙහි පහස රිසිසේ විඳ ගැනීමට මෙහි ඇති අවකාශය සැබැවින්ම නිදහසක් ගෙන දෙන්නකි. මෙනිසා බොහෝ දෙනා උපන්දින සාද පැවැත්වීම සඳහා මෙතැන තෝරා ගනිති.

මෙහි සත්කාරක සේවක මඩුල්ල ගැනද යමක් කිව යුතුමය. ඔවුනගේ ආගන්තුක සත්කාරය ඉතා මිත‍්‍රශීලී යැයි කිව හැකිය. ෆ‍්‍රැන්කි ටොමෑටෝ අවන්හල කැනඩා දේශයේ ජනප‍්‍රියවීමට එයද ප‍්‍රධාන හේතුවක් ලෙස සඳහන් කළ හැකිය.

සුන්දර නයගරාව...

රන් හිරු එළියෙන් නැහැවෙන නයගරා තුරු උයන

නයගරාවේ සුවඳ පිරුණු මලින් පිපුණු මල් ඔරලෝසුව

සී.එන්. කුළුණට පේන කැනඩාවේ ලස්සන...

කැනඩාවේ ප්‍රෞඪත්වය.. මොන්ටි‍්‍රයල්

මොන්ටි‍්‍රයල් නුවර පුණ්‍ය භූමිය