ආණ්ඩුක්‍රම ව්‍යවස්ථාවේ විසිවැනි සංශෝධනයේ ජරමරය තවමත් ඉවරයක් නැත. බොහෝ පිරිසක් අධිකරණ ක්‍රියාමාර්ගවලට යොමු වී සිටිති. මේ අතර ආණ්ඩුව නීතිපතිවරයා හරහා පනත් කෙටුම්පතට ඇතුළත් කරන සංශෝධන ශ්‍රේෂ්ඨාධිකරණයට ඉදිරිපත් කළේය.

ආණ්ඩුක්‍රම ව්‍යවස්ථාවේ විසිවැනි සංශෝධනය පාර්ලිමේන්තුවේ සම්මත කරද්දී කමිටු අවස්ථාව යනුවෙන් අවස්ථාවක් හිමිවේ. එහිදී අවශ්‍ය සංශෝධන පනත් කෙටුම්පතට ඉදිරිපත් කළ හැකිය. එලෙස ඉදිරිපත් කිරීමට යෝජිත සංශෝධන මේ වන විට ශ්‍රේෂ්ඨාධිකරණයට ඉදිරිපත් කර තිබේ. එහි ප්‍රධාන සංශෝධන අතර මැතිවරණ කොමිසම සම්බන්ධයෙන් සශෝධනයක් කර තිබේ. ‘‘ජනාධිපතිවරයා විසින් පත්කරනු ලබන සාමාජිකයන් පස් දෙනෙකුගෙන් මැතිවරණ කොමිසම සමන්විත විය යුතුය. එසේ පත්කරනු ලබන එක් සාමාජිකයකු නියෝජ්‍ය මැතිවරණ කොමසාරිස්වරයකු වශයෙන් හෝ ඊට ඉහළ වූ හෝ ධුරයක් දරනු ලැබූ මැතිවරණ දෙපාර්තමේන්තුවේ හෝ මැතිවරණ කොමිෂන් සභාවේ විශ්‍රාමලත් නිලධාරියකු විය යුතුය’’ යනුවෙන් සංශෝධනවල සඳහන් කර තිබේ. මේ අතර ගණපූර්ණය තුනක් ලෙසද එහි සඳහන් වේ.

‘‘මැතිවරණ කොමිෂන් සභාවේ එක් සාමාජිකයකු පළපුරුදු නිලධාරියකු හෙවත් මැතිවරණ රාජකාරියේ නිරතව සිටි කෙනෙකු විය යුතු යැයි මීට ඉහතදී නීතියේ තිබුණා. 17 වැනි 18 වැනි සහ 19 වැනි සංශෝධන සියල්ලේම ඒක තිබුණා. ඒත් 20 වැනි කෙටුම්පතේ එවැන්නක් සඳහන්ව නැත. බොහෝ පිරිස්වල පෙන්වාදීම නිසා සංශෝධනය ඉදිරිපත් කරන්න ආණ්ඩුව කටයුතු කළා’’ යැයි දේශපාලනඥයෙක් කීවේය. මීට අමතරව ජනපතිවරයාට ලබාදෙන බලතලවලට අමතරව තවත් අලුත් බලතලයක් සංශෝධනයක් ලෙස ඉදිරිපත් වී තිබේ.

‘මැතිවරණ කොමිෂන් සභාවේ ඉල්ලීම පරිදි නිදහස් හා සාධාරණ මැතිවරණ පැවැත්වීම සඳහා උචිත වාතාවරණයක් ඇති කිරීම තහවුරු කිරීම සඳහා බලය ඇත්තේය’ යනු එම සංශෝධනයයි. මීට ඉහත එවැනි වගන්තියක් ආණ්ඩුක්‍රම ව්‍යවස්ථාවේ තිබුණේ නැත.

යෝජිත සංශෝධන අතර අනෙක් කැපී පෙනෙන සංශෝධනය ජනාධිපතිවරයාට එරෙහිව නඩු පැවරිය නොහැකි වීම යන වගන්තියට අලුත් යමක් එකතු වී තිබීමය. විසිවන සංශෝධනය සම්මතවීමට පෙර කිසියම් ජනාධිපතිවරයකුට එරෙහිව නීති කෘත්‍යයක් පවත්වමින් තිබුණේ නම් එය දිගටම සිදුවිය යුතුය යනුවෙන් සංශෝධනයක්ද ඇතුළත්ය. ‘‘ඒ අනුව හිටපු ජනාධිපති මෛත්‍රීපාල සිරිසේනට මුක්තිය හිමිවන්නේ නැත. දැනටමත් හිටපු ජනාධිපතිවරයාට එරෙහිව නඩුවක් දෙකක් විභාග වෙනවා. ඒ නිසා එම නඩු කටයුතු දිගටම සිදුවේවි’’ යැයි දේශපාලන විචාරකයෝ පෙන්වා දෙති. මේ ආකාරයෙන් තවත් සංශෝධන කීපයක්ම පාර්ලිමේන්තුවේ කමිටු අවස්ථාවේදී සම්මත කිරීමට නියමිත අතර අග්‍රාමාත්‍ය ලේකම්වරයා පත්කිරීමේ බලය ද ජනාධිපතිවරයාට පැවරෙන ආකාරයේ වගන්තියක් ඇතුළත් කර තිබේ.

‘‘අග්‍රාමාත්‍යවරයාට, ජනාධිපතිවරයා විසින් පත්කරනු ලැබිය යුතු ලේකම්වරයෙක් වන්නේය. අග්‍රාමාත්‍යවරයාගේ ලේකම්වරයා විසින් අග්‍රාමාත්‍යවරයාගේ කාර්යාලය භාරව කටයුතු කිරීම සහ අග්‍රාමාත්‍යවරයාගේ  විධානයන්ට යටත්ව ස්වකීය ධුරයේ කාර්ය සහ කර්තව්‍ය ඉටු කිරීම සහ කිරීම කළ යුත්තේය’’ යනු එම වගන්තිය වේ.

අග්‍රාමාත්‍ය මහින්ද රාජපක්ෂ  ඉකුත් සඳුදා රත්නපුරය බලා පිටත්ව ගියේය. රත්නපුර ප්‍රදේශයේ  උත්සවයකට සහභාගිවීමට ගිය අගමැතිවරයාගේ හෙලිකොප්ටරය ගොඩබස්සන ලද්දේ රත්නපුර, මුද්දුව ක්‍රීඩාංගණයටය. පාසල් දරුවන් රැසක් ක්‍රීඩාංගණය අසලට රොක්ව සිටියේ අගමැතිවරයා දැකබලා ගැනීමටය. දරුවන්ගේ සුවදුක් විමසමින් ඔවුන්ගේ අඩුපාඩු සොයා බැලීමට අගමැතිවරයා පවිත්‍රා වන්නිආරච්චි සහ ජානක වක්කුඹුර රාජ්‍ය ඇමැතිවරයාට උපදෙස් දුන්නේය.

මේ අතර බෙලිඅත්ත ප්‍රදේශයේ පාසල් දෙකක සිසුන් පිරිසක් ඉකුත් අඟහරුවාදා කොළඹට පැමිණියේ අරලියගහ මන්දිරය නැරඹීමටය. අග්‍රාමාත්‍යවරයා පෞද්ගලිකවම  මැදිහත්ව  අරලියගහ මන්දිරයේ ස්ථාන දරුවන්ට පෙන්වීය. බෙලිඅත්ත පුවක්දණ්ඩාව ප්‍රාථමික විද්‍යාලයේ සහ බෙලිඅත්ත ධම්මපාල බාලිකා විද්‍යාලයේ සිසුහු ටික වේලාවක් අගමැතිවරයා සමග සතුටුසාමීචියේ යෙදුණාහ.

මේ දිනවල පොල් සම්බන්ධයෙන් සමාජ  ජාලා මාධ්‍යවල දැඩි කතාබහක් නිර්මාණය වී තිබේ. පාරිභෝගික කටයුතු අධිකාරිය අතිවිශේෂ ගැසට් නිවේදනයක් හරහා පොල්වලට උපරිම සිල්ලර මිලක් නිම කළේ පොල් ගෙඩියක වට ප්‍රමාණය අනුවය. මුහුණු පොත ඇතුළු සමාජ මාධ්‍යවල උසුළු විසුළු හා දැඩි විවේචන එල්ල වී ඇත්තේ වට ප්‍රමාණය අනුව පොල් මිල නියම කිරීමටය. සමාජ මාධ්‍යවල විවේචන එල්ලවීම ඉවසිය නොහැකි තැන පාරිභෝගික කටයුතු පිළිබඳ අධිකාරිය ඊට ප්‍රතිචාර දක්වමින් කීවේ ‘‘වට ප්‍රමාණය මැනිය යුත්තේ පාරිභෝගිකයා නොව වෙළෙඳුන්’’ බවය. එය හාස්‍යයට ලක් නොකරන ලෙස ද පාරිභෝගික කටයුතු අධිකාරිය ඉල්ලීමක් කළේය.

රාජ්‍ය අමාත්‍ය සරත් වීරසේකර විසිවැනි සංශෝධන පිළිබඳව  අදහසක් පළ කළේ පැපිලියාන සුනේත්‍රාදේවි පරිවෙණාධිපති මහාචාර්ය මැදගොඩ අභයතිස්ස නාහිමියන් සමගය. රාජ්‍ය ඇමැතිවරයා 13 වැනි සංශෝධනයට එරෙහිව අදහස් දක්වන්නෙකි. එහෙත් අභය තිස්ස හිමියන්ගේ අදහස දහතුන්වැනි සංශෝධනය දැනට තිබෙන ආකාරයෙන්ම පවත්වා ගත යුතු බවය. දෙදෙනා අතර යම් ස්ථානක දී කතාබහක් ඇති වින. ‘‘හාමුදුරුවනේ මම රාජ්‍ය විරෝධියෙක් වෙන්න පුළුවන්. හැබැයි දේශද්‍රෝහියෙක් වෙන්නේ නැහැ’’ යැයි සරත් වීරසේකර කීවේය.

සමගි ජනබලවේගය පක්ෂය විස්සට එරෙහිව විරෝධතාවක් දියත් කිරීමට සැලසුම් කර තිබේ. පිටපළාත්වලින් විශාල සෙනඟක් කොළඹට කැඳවා විසිවැනි සංශෝධනයට එරෙහිව උද්ඝෝෂණයක් කිරීම එම පක්ෂයේ අරමුණ ය. දැනටමත් ඒ සඳහා ක්‍රියාකාරී කමිටුවක් පත්කර තිබෙන අතර අවශ්‍ය වැඩපිළිවෙළ සකස්කර ඇතැයි ද සමගි ජනබලවේගය පක්ෂය සඳහන් කරයි.

ඇමති ප්‍රසන්න රණතුංග පහුගිය සෙනසුරාදා පොලොන්නරුවට ගියේය. ඒ රාජ්‍ය ඇමති රොෂාන් රණසිංහගේ පියාගේ දේහයට අවසන් ගෞරව දැක්වීම සඳහාය. ප්‍රසන්න රොෂාන්ගේ නිවසට යනවිට දේහය නිවසින් එළියට ගැනීමට ඔන්න මෙන්න කියා තිබිණි. දේහයට අවසන් ගෞරව දැක්වීමෙන් අනතුරුව ප්‍රසන්න විශේෂ අමුත්තන් වෙනුවෙන් වෙන්කර තිබූ කාමරයකට රැගෙන ගියේ හිටපු ජනාධිපති මෛත්‍රීගේ මල්ලී වන ඩඩ්ලිය. ඒ ‘‘යමු යමු... යාළුවෙකුත් ඉන්නවා’’ යැයි කියමිනි. කාමරයේ හිටපු ජනපති මෛත්‍රී ඇතුළු කීප දෙනෙක්ම රැඳී සිටියහ. මෛත්‍රී ප්‍රසන්න පැමිණෙනු දුටුවත් නොදැක්කා සේ සිටියේය. මෛත්‍රී අසලට ගිය ඩඩ්ලි “මේ ප්‍රසන්න ඇමතිතුමා ඇවිල්ලා’’ යැයි කීවේය.“හ්ම්.... දැන්ද ආවේ’’ මෛත්‍රී ඕනෑවට එපාවට මෙන් ඇසුවේය..“ඔව්....’’ ප්‍රසන්න දුන්නේද කෙටි උත්තරයකි.

ප්‍රසන්න කාමරයේ ඉඩ ඇති තැනක අසුන් ගන්නවාත් සමඟම නැඟී සිටි මෛත්‍රී වහා ඉන් පිටව ගියේය. මෙය දුටු අසල සිටියෙකු කීවේ “සාමාන්‍යයෙන් වෙන්නේ ජනාධිපති කෙනෙක් එනකොට එයාට ඉඩදීලා ඇමතිවරු අයින් වෙන එක. මෙතන වුණේ ඒකේ අනිත් පැත්තනේ. ප්‍රසන්න ඇමතිතුමා එනකොට මෛත්‍රී ජනාධිපතිතුමා ඉඩදීලා ගියා..’’ කියාය.

මෙවර ලෝක සංචාරක දින උත්සවය තිබුණේ මහනුවරය. ඉරිදා  තිබූ එම උත්සවයේ ප්‍රධාන ආරාධිතයා වුණේ සංචාරක ඇමති ප්‍රසන්න රණතුංගයි. උත්සවය අවසානයේ මධ්‍යම ආණ්ඩුකාර ලලිත් ප්‍රසන්නට තවත් ආරාධනාවක් කළේය. ඒ චිත්‍ර හා මූර්ති ප්‍රදර්ශනයක් බලන්න යන්නටය. එය තිබුණේ බෝගම්බර සිර කඳවුර ඉදිරිපසය. ප්‍රසන්න, දිලු‍ම් අමුණුගම රාජ්‍ය ඇමතිවරයා සහ ආණ්ඩුකාරවරයා සමග එහි ගියේය.

ගෝඨාභය රාජපක්ෂ ජනාධිපති ධුරයට පත්වීමෙන් පසු මහනුවර නගරයේ ගොඩනැගිලි හා බිත්ති චිත්‍රවලින් සැරසූ තරුණ පිරිසක් එක්ව මෙම ප්‍රදර්ශනය සංවිධානය කර තිබීම විශේෂත්වයකි. එතනට ගිය ඇමතිවරයාගෙන් ඔවුන් ඉල්ලු‍වේ සංචාරක කර්මාන්තය යළි ඇරඹුණු විට මෙවැනි චිත්‍ර හා මූර්ති නිර්මාණකරුවන්ගේ නිර්මාණ අලෙවි කිරීමට නිශ්චිත ස්ථානයක් සකසන ලෙසය. ඔහු කීවේ ඒ සඳහා රජය දැනටමත් අවධානය යොමුකර ඇති බවයි.

වත්මන් ආණ්ඩුව බලයට පත්ව මේ වනවිට ගතව ඇත්තේ මාස දෙකකට ආසන්න කාලයකි. ශ්‍රී ලංකාවේ සිටින විදේශ තානාපතිවරු හා කොමසාරිස්වරු මේ දිනවල නව රජයේ ඇමතිවරුන් මුණගැසෙන්නේ දෙපාර්ශවය අතර ද්විපාර්ශික සබඳතා පුළුල් කර ගැනීම සඳහාය.
කැනඩාවේ මහ කොමසාරිස් ඩේවිඩ් මැකිනොන් ඇමති ප්‍රසන්න හමුවන්නේද ඒ අනුවය. හමුව සිදුවූයේ සංචාරක අමාත්‍යංශයේදී පහුගිය අඟහරුවාදාය. කැනඩාව ඇතුළු ඇතැම් බටහිර රටවල් පහුගිය රජය සමයේ ගෙන ආ 19 ආණ්ඩුක්‍රම ව්‍යවස්ථාව සංශෝධනය සම්බන්ධයෙන් දැඩිලෙස පෙනී සිටි බවට දැඩි චෝදනාවක් තිබේ. 19ට එරෙහි ආණ්ඩුවේ ස්ථාවරයේ ප්‍රබලයෙකු වන ප්‍රසන්න සහ කැනඩා මහ කොමසාරිස්වරයා දෙදෙනා අතර සාකච්ඡාවේදී 19 වැනි ආණ්ඩුක්‍රම ව්‍යවස්ථා සංශෝධනය ගැනද ඇදී ආවේය.
“19 ආණ්ඩුක්‍රම ව්‍යවස්ථාව ගෙනාවේ රටට ආදරයට නෙමෙයි. රාජපක්ෂලාට විරුද්ධව. රාජපක්ෂ රෙජීමය පන්නා දැමීමේ රාජ්‍ය නොවන සංවිධානවලයි සමහර බටහිර රටවලයි උවමනාවට තමයි 19 හරහා සිදුවූයේ’’ ප්‍රසන්න කැනඩා මහ කොමසාරිස්ගේ මූණටම කීවේය.

මහජන දිනය සඳුදාට යොදාගත යුතු යැයි ජනාධිපතිවරයා කීවේ මහජනතාවට පහසුවෙන් සිය අවශ්‍යතා ඉටුකර ගැනීම සඳහාය. ඒ අනුව ජනාධිපතිරයාගේ නියමයෙන් මහජන දිනය බදාදායින් සඳුදාට මාරු වූයේය. ජනාධිපතිවරයා කීවේ මැති ඇමැතිවරුන් අනිවාර්ය අමාත්‍යාශයේ මහජන දිනය දා සිටිය යුතු බවකි. එහෙත් එක්තරා ඇමැතිවරයෙක් මහජන දිනයට සහභාගි වන්නේම නැතැයි චෝදනාවක් තිබේ. ඔහු රාජ්‍ය ඇමැතිවරුන්ට මහජන දිනයේ වගකීම පවරා ඇතැයි ද පැවසේ. මේ අතර තවත් ඇමැතිවරියක් ඉකුත් සඳුදා මහජන දිනයට පැමිණියේ නැත. ඇමැතිවරිය එදින විවාහ මංගල උත්සවයකට සහභාගිවීමට ගොස් සිටියාය. විවාහයකට අත්සන්කර කාබී සතුටු සාමීචියේ යෙදී සිටි ඇමැතිවරියට මහජන දිනය අමතක වී තිබිණි. අමාත්‍යාංශයට වැඩකර ගැනීමට පැමිණි බොහෝ පිරිසක් අපහසුතාවයට පත් වූහ.

(***කස්තුරි)