ට්‍රම්ප්ගේ වෙෙළඳ කම්පනය ගෝලීය පිළිවෙලට දැවැන්ත පහරකි. එය නියෝජනය කරන්නේ 1970 ගණන්වලදී බ්‍රෙට්න්වුඩ්ස් ක්‍රමය අවසන් වීමෙන් පසු ඇති වූ විශාලතම බිඳවැටීමයි. ඇත්ත වශයෙන්ම, ඊට ගෝලීය ආර්ථික බිඳවැටීමට සහ භූ දේශපාලනික ගැටුමකට පවා ආරාධනා කරමින් විශාල ප්‍රතිවිපාක ඇති කළ හැකිය. එසේනම් අප වැනි කුඩා රටක් මෙම අර්බුදයට ප්‍රතිචාර දක්වන්නේ කෙසේද, සහ අප අනුගමනය කළ යුතු ප්‍රතිපත්ති මොනවාද?

වත්මන් කැළැඹීම හදිසියේ පැමිණි අනපේක්ෂිත දෙයක් නොවේ. 2008 වසරේදී ගෝලීය මූල්‍ය අර්බුදයේ ප්‍රතිඵලයක් ලෙස බ්‍රෙක්සිට් සිදුවීම සහ 2016 දී ඩොනල්ඞ් ට්‍රම්ප් තේරී පත්වීම, බිඳ වැටෙමින් තිබූ ගෝලීය පිළිවෙළක පැහැදිලි සලකුණු විය. එහෙත් ශ්‍රී ලංකාව සහ ගෝලීය දකුණේ අනෙකුත් රටවල් සඳහා, ස්වයංපෝෂිත ප්‍රතිපත්ති හරහා එවැනි සිදුවීමකට සූදානම් වීමේ විකල්පය ප්‍රතික්ෂේප කරනු ලැබුවේ ජාත්‍යන්තර මූල්‍ය අරමුදලේ සහ එහි වැඩසටහන්වල සුපරීක්ෂාකාරී ඇස නිසාය. ඊට අමතරව, දේශීය ප්‍රතිපත්ති සම්පාදකයන් නිදහස් වෙළඳපොළවල දෘෂ්ටිවාදයට යටත් වීමක්ද සිදුවිය.

අපි දැන් එහි මිල ගෙවමින් සිටිමු. කෙසේ වෙතත්, බිඳුණු ගෝලීය පිළිවෙළ නැවත එකට එකතු කළ හැකි බවට හෝ යම් බාහිර බලයක් අපව මෙම අර්බුදයෙන් ගොඩ ගනු ඇතැයි යන මායාව සමහර ප්‍රභූ කොටස් තුළ දිගින් දිගටම පවතී. ඒ රජුගේ සියලු අශ්වයන් සහ මිනිසුන් නැවත එකට එකතු කිරීමට හම්ප්ටි ඩම්ප්ටි ට හැකි යැයි ඔවුන් බලාපොරොත්තු වනවාක් මෙනි. ඒ වෙනුවට, අවශ්‍ය වන්නේ මෙම මහා ගෝලීය බිඳවැටීමට මුහුණ දීම සඳහා අපගේ ආර්ථික ප්‍රතිපත්ති පිළිබඳ රැඩිකල් සිතා බැලීමකි.

බ්‍රෙටන්වුඩ්ස් බිඳවැටීම

ගෝලීය අනුපිළිවෙළෙහි බිඳවැටීම පැහැදිලි කිරීම සඳහා, වර්තමාන දුෂ්කරතාව පිටුපස ඇති සාධක විශ්ලේෂණය කළ යුතුය. දෙවැනි ලෝක යුද්ධය අවසන් වීමට ආසන්නව තිබියදී, එක්සත් ජනපදය ප්‍රමුඛ බටහිර බලවතුන් එක්ව බ්‍රෙටන්වුඩ්ස් පද්ධතිය නිර්මාණය කළ අතර, එම නම ලැබුණේ නව එංගලන්තයේ සමුළුව පැවැති ස්ථානය අනුවය. ජාත්‍යන්තර මූල්‍ය අරමුදල නිර්මාණය කිරීම සහ ලෝක බැංකුවේ පූර්වගාමියා ඇතුළත් මෙම පද්ධතිය, පූර්ණ රැකියා නියුක්තිය වැනි තමන්ගේම දේශීය ප්‍රතිපත්ති අනුගමනය කිරීමට අවකාශය ඇති ප්‍රධාන රටවල් මත රඳා පැවතුණි.

මෙහි ඉලක්කය වූයේ වෙෙළඳ යුද්ධවල තර්ජන සහ 1930 ගණන්වල හටගත් මහා අවපාතයට සෘජුවම දායක වූ මූල්‍ය බාධාවන් ජය ගැනීමය. කෙසේ වෙතත්, දෙවැනි ලෝක යුද්ධයෙන් පසු මෙම ක්‍රමය යම් කාලයක් ක්‍රියාත්මක වුවද, අවසානයේ ධනවාදයේ භූ දේශපාලනික ගතිකත්වය හේතුවෙන් එය පීඩනයට ලක් විය. ඒවා ජාත්‍යන්තර මූල්‍ය පද්ධතියේ බිඳවැටීමට හේතු විය.

උද්ධමනකාරී පීඩනයට ප්‍රතිචාරයක් ලෙස, එක්සත් ජනපදය රන් මිලෙන් ඩොලරය ඉවත් කළ අතර, ස්ථාවර විනිමය අනුපාත ක්‍රමය ඵලදායී ලෙස අවසන් කළේය. 1970 ගණන්වල ජාත්‍යන්තර මූල්‍ය පද්ධතියට ඇති වූ පළමු ප්‍රධාන කම්පනය මෙම බිඳවැටීමයි. ඩොලරය රන් සම්මතයෙන් ඉවත් කිරීමට බලපෑ ප්‍රධාන හේතු අතර වියට්නාමයේ යුද්ධය හේතුවෙන් වර්ධනය වන එක්සත් ජනපද මූල්‍ය හිඟය ද ඇතුළත් විය. ඊට අමතරව, දෙවැනි ලෝක යුද්ධයෙන් යථා තත්වයට පත් වූ ජර්මනිය සහ ජපානයෙන් බාහිර නිෂ්පාදන තරගයක්ද ඉහළ ගියේය.

දේශපාලන ආර්ථික විද්‍යාඥ ෆ්‍රෙඩ් බ්ලොක් The Origins of International Economic Disorder' A Study of United States’ International Monetary Policy from World War to the Present’ හි ලියා ඇති පරිදි: “ජාත්‍යන්තර මූල්‍ය කටයුතුවලදී ක්‍රියාකාරී වීමේ නිදහස වැඩි කර ගැනීම සඳහා එක්සත් ජනපදය දැරූ අරගලය විසින් පැරණි බ්‍රෙටන් වුඩ්ස් ක්‍රමය විනාශ කළේය. එක්සත් ජනපදය පියවරෙන් පියවර පැරැණි පිළිවෙළේ නීති කඩ කළේය, නැතහොත් ඒවා කඩ කිරීමට අනෙකුත් රටවලට බල කළේය. ජාත්‍යන්තර මූල්‍ය පද්ධතිය ඊටත් වඩා විශාල අර්බුදයකින් බේරා ගැනීම සඳහා සෑම පියවරකදීම නීති කඩ කිරීම අවශ්‍ය යැයි සලකනු ලැබීය” (පිටුව 203).

කෙසේ වෙතත්, ස්ථාවර විනිමය අනුපාතයක සිට පාවෙන විනිමය අනුපාතයකට මාරුවීම, 1970 ගණන්වල “එකතැන පල්වීම” හෝ ඉහළ යන උද්ධමනය සමඟ අඩු ආර්ථික වර්ධනයේ සංයෝජනය අවසන් කළේ නැත. ඒ වෙනුවට, එය ගෝලීය ආර්ථිකයේ මූල්‍යකරණයේ ප්‍රධාන කාර්යභාරයක් ඉටු කළේය. පෙට්‍රෝඩොලර් ප්‍රතිචක්‍රීකරණයෙන් එක්සත් ජනපදයට ප්‍රතිලාභ ලැබිය හැකිය. ඔපෙක් තෙල් කම්පනයෙන් තෙල් අපනයනකරුවන් එක්සත් ජනපද භාණ්ඩාගාර සුරැකුම්පත් මිලදී ගත් අතර, එමඟින් ලෝක සංචිත මුදල් ඒකකය ලෙස ඩොලරයේ භූමිකාව ශක්තිමත් විය. බැංකු ණය දීම විවිධාංගීකරණය වූ අතර, ප්‍රාග්ධන වෙළඳපොළවල් තවදුරටත් වර්ධනය වීමෙන්, අවසානයේ ජාත්‍යන්තර ද්‍රවශීලතාවේ ප්‍රධාන මූලාශ්‍රයක් බවට පත්විය.

කෙසේ වෙතත්, ඩොලරයේ පාවීම ගෝලීය ධනවාදයේ වඩාත් පුළුල් ප්‍රතිසංවිධානයක එක් පැතිකඩක් පමණි. 1970 ගණන්වල උද්ධමන ප්‍රවණතාව නියෝජනය කරන්නේ ප්‍රාග්ධනය සහ ශ්‍රමය අතර බෙදා හැරීමේ අරගලයේ තීරණාත්මක අවස්ථාවකි. ආයෝජනයට අදාළ අත්‍යවශ්‍ය තීරණ සම්බන්ධයෙන් එය ගැටුමක් අපේක්ෂා කළේය. ප්‍රජාතන්ත්‍රවාදී සමාජවාදය දෙසට ඒකාබද්ධ දේශපාලන තල්ලුවක් නොමැති විට, ධනේශ්වර ආර්ථිකය තුළ උද්ධමනය පෙර නොවූ විරූ පීඩනයක් ඇති කළේය.

සාම්ප්‍රදායික සාර්ව ආර්ථික මෙවලම් භාවිතයෙන් උද්ධමනය සමඟ කටයුතු කිරීම සඳහා මුදල් ප්‍රතිපත්ති දැඩි කිරීම, විනිමය අනුපාත වෙනස්කම් හෝ පියවර එකතුවක් හරහා ගැලපීම් කිරීම අවශ්‍ය වේ. 1970 ගණන්වල අගභාගයේ වෝකර් කම්පනයත් සමඟ ඇමරිකා එක්සත් ජනපදය පොලී අනුපාත සම්බන්ධයෙන් ආක්‍රමණශීලී ස්ථාවරයක් අනුගමනය කළේය. මෙය එවකට ෆෙඩරල් සංචිතයේ සභාපති පෝල් වෝකර්ගේ නමින් නම් කරන ලද අතර, ඉන් ඇමරිකා එක්සත් ජනපදයේ විරැකියාව වැඩි කළේය.

අවසානයේ, සිල්ලර හා සේවා අංශයේ දැවැන්ත ව්‍යාප්තිය සහ විදේශයන්ගෙන් ආනයනය කරන ලද ලාබ භාණ්ඩ ගලා ඒම හරහා විරැකියාව අඩු කිරීමට ඇමරිකා එක්සත් ජනපදයට හැකි විය. එක්සත් ජනපද නිෂ්පාදන රැකියා හැකිළී ගියද, ඒවා අඩු වැටුප් සහිත රැකියා මගින් ප්‍රතිස්ථාපනය විය. ණය මත පදනම් වූ පරිභෝජනයෙන් එය ඌණපූර්ණය විය. මේ අතර, නිවාසවල සිට සෞඛ්‍ය සේවා දක්වා වූ ආර්ථිකයේ මූලික කුළුණුවල මිලෙහි අඛණ්ඩ වැඩිවීමක් අත්විඳීමට පටන් ගත් අතර, ඵලදායිතාවයේ අඛණ්ඩ වර්ධනයක් තිබියදීත්, කම්කරුවන්ගේ සැබෑ වැටුප් එකතැන පල් විය.

ගෝලීය අපනයන සඳහා ඵලදායී ඉල්ලුම පවත්වා ගනිමින්, ඇමරිකා එක්සත් ජනපදය ලෝකයේ “අවසාන විකල්පයේ පාරිභෝගිකයා” බවට පත්විය. ඒ සමඟම, එහි ගෙවුම් ශේෂ හිඟය වැඩි වූ අතර, එය දැවැන්ත ප්‍රාග්ධන ගලා ඒම් ද භුක්ති වින්ඳේය. ලෝක ආර්ථිකය සඳහා ගැලපුම් පිරිවැය කළමනාකරණය කිරීමට ඇමරිකා එක්සත් ජනපදය සමත් වූ බවක් පෙනෙන්නට තිබුණු අතර, එහි මූල්‍ය පන්තීන් ප්‍රතිලාභ ලැබීය.

ජාත්‍යන්තර මූල්‍ය පද්ධතියේ ගැටලුවලට ලබාදුන් මෙම තාවකාලික විසඳුම නිසා නැගෙනහිර ආසියාවට ලෝකයේ ශිල්පශාලිකාව ලෙස නැගී සිටීමට පහසුකම් සැලසීය. කලාපයේ සමහර රටවල් සීතල යුද්ධයේදී ඇමරිකා එක්සත් ජනපදයේ භූ දේශපාලනික සහයෝගයෙන් ප්‍රතිලාභ ලබා ගත්හ. අවසානයේ චීනය නැගෙනහිර ආසියානු කලාපයේ වැඩි ආයෝජන ආකර්ෂණය අත් කර ගත් අතර, ඔවුන් ඇමරිකා එක්සත් ජනපදය සමඟ සම තරගකරුවකු ලෙස නැගී සිටියේය.

ඇමරිකා එක්සත් ජනපදයේ ද අසමානතාව වැඩි විය. ආර්ථිකයේ තවත් අංශ සමපේක්ෂණ ආයෝජන සඳහා විවෘත කරන ලද මූල්‍යකරණ ක්‍රියාවලිය විසින් වත්කම් කළමනාකරණ ආර්ථිකය තල්ලු කළේය. අවසානයේ සිලිකන් නිම්නය විසින් ඌණපූරණය කරන ලද වෝල් වීදිය, දැවැන්ත පාලනයක් ක්‍රියාත්මක කළේය. නව ලිබරල්වාදයේ ඇමරිකානු නියාමන උපකරණයට එල්ල කළ ප්‍රහාරයෙන් මූල්‍ය ප්‍රාග්ධනය ධෛර්යවත් විය. ප්‍රධාන ප්‍රතිඵලය වූයේ 2008 ගෝලීය මූල්‍ය අර්බුදයට තුඩු දුන් සබ්ප්‍රයිම් උකස් (දුර්වල ණය ඉතිහාසයක් හෝ අඩු ණය ලකුණු ඇති ණය ගැතියන්ට පිරිනමන නිවාස ණය) අර්බුදයයි.

එක්සත් ජනපද නිවාස ණය හිමියන්ට අවසානයේ තම ණය ගෙවීමට නොහැකි විය. මෙම සංකීර්ණ ප්‍රතිඵල බොල් ණය නැවත ඇසුරුම් කිරීමට සහ පද්ධතිමය අවදානම සැඟවීමට නිර්මාණය කර ඇති බැවින් ඔවුන්ගේ බංකොලොත්භාවය මූල්‍ය පද්ධතිය අත්පත් කර ගැනීමට දායක විය. සාමාන්‍ය එක්සත් ජනපද කුටුම්භයක් සැබෑ වැටුප්වල එකතැන පල්වීම, නැතහොත් පහත වැටීම අත්විඳින අතරතුර, එක්සත් ජනපද රජය බැංකුවලට ඇප ලබා දුන්නේය. 2016 වසරේදී ට්‍රම්ප්ගේ කම්පන සහගත මැතිවරණය ඇතුළු දේශපාලන ප්‍රතික්‍රියාවකට ප්‍රධාන සාධකයක් වූයේ මෙම ඇප දීම මගින් ඇති කරන ලද අමනාපකම් සහ කලකිරීම් ය.

ගෝලීය අර්බුදයේ අවසාන අදියර

මෙම සන්දර්භය තුළ, 1970 ගණන්වල අර්බුදයේ බලපෑම්, එහි නව ලිබරල් විසඳුම සහ ජියෝවානි අරිගි විසින් න්‍යායාත්මක කරන ලද පරිදි “අවසාන අදියර”, ගෝලීය අනුපිළිවෙළ හෙළිදරව් කිරීමේදී අපට ඇගයීමට ලක් කළ හැකිය. දැන්, ට්‍රම්ප්ගේ කම්පනය නිසා ගෝලීය වෙළඳ පිළිවෙළට මුදා හරින ලද දැවැන්ත වෙනස්කම් සමඟ තවදුරටත් බිඳවැටීමේ විභව රේඛා අපි අපේක්ෂා කළ යුතුය. 1970 ගණන්වල බ්‍රෙටන් වුඩ්ස් පද්ධතිය සමඟ එක්සත් ජනපදය බිඳී යාම මෙන් නොව, මෙවර ට්‍රම්ප්ගේ ප්‍රතිපත්ති හරහා අස්ථායී ජාත්‍යන්තර මූල්‍ය පද්ධතිය යටතේ පවා ගැලපීම් සඳහා පහසුකම් සපයන මූලික සම්බන්ධතා ඉහළ නැංවීමට තර්ජනය කරයි.

1970 ගණන්වල සිට, ජාත්‍යන්තර මූල්‍ය ගනුදෙනු මූල්‍ය සමපේක්ෂණ බලවේග විසින් ආධිපත්‍යය දරනු ලැබේ. ට්‍රම්ප්ගේ තීරුබදු සලකා බලන විට, ගෝලීය පිළිවෙළ පුළුල් ලෙස බිඳවැටීම නිසා ඇති වන අස්ථාවරත්වය මධ්‍යයේ ආයෝජන පුරෝකථනය කිරීම බෙහෙවින් දුෂ්කර වනු ඇතැයි බැංකුකරුවන් සහ ඔවුන්ගේ උපදේශක සමාගම් අනතුරු අඟවයි. එසේ නම් ට්‍රම්ප් පසුබසිනු ඇත්ද? ඔහුගේ ලෝක දැක්ම බලය සහ ආධිපත්‍යය මත රඳා පවතින අතර, එය ඔහුගේ ප්‍රතිගාමී පදනමේ නොසැළෙන බව මගින් ශක්තිමත් වේ. ඔහුගේ ක්‍රියා “ඇමරිකාව පළමුව” න්‍යාය පත්‍රයේ ආයෝජනය කිරීමට කැමති ප්‍රාග්ධනයේ කොටස් වලට සංඥාවක් සපයයිද? එය අවසානයේ ආර්ථික අන්තර් රඳා පැවැත්ම බිඳ වැටීමකට තුඩු දිය හැකි අතර, මහා බලවතුන් අතර සෘජු මිලිටරි ගැටුමකට කොන්දේසි නිර්මාණය කළ හැකිය.

මේවා අසාමාන්‍ය ලෙස දුෂ්කර බාහිර පරිසරයක සැරිසැරීමේදී ශ්‍රී ලංකාවේම ගණනය කිරීම් හරහා මඟ පෙන්විය යුතු දිගුකාලීන ප්‍රශ්න කිහිපයකි. ඒවා පදනම් විය යුත්තේ පවතින ගෝලීය පිළිවෙළේ මිනී පෙට්ටියට අවසාන ඇණ ගසමින් සිටින බව පැහැදිලිව හඳුනා ගැනීම මතය. දැන් ශ්‍රී ලංකාව කවරදාටත් වඩා ප්‍රමුඛත්වය දිය යුත්තේ ස්වයංපෝෂිතභාවයටය, නැතහොත් එය භූ දේශපාලනික ක්‍රීඩා විලාසයකට ඇද වැටෙනු ඇති අතර, අවසානයේ එය වැඩි ආතතියක් සහ යුද්ධයක් පවා ඇති විය හැකිය.

ගෝලීය සංවර්ධන න්‍යාය පත්‍රයේ කුළුණු වන ආධාර සහ වෙළඳාම යන දෙකම ට්‍රම්ප් පාලනය විසින් බිඳ දමා ඇත. එහි ප්‍රතිඵලයක් ලෙස, ගෝලීය ධනේශ්වර ක්‍රමයේ අර්බුදයට විසඳුමක් ලෙස විනාශය අත්විඳීමට ලෝකයට සිදුවනු ඇත. සමස්ත දේශපාලන, ආර්ථික සහ මිලිටරි ආරක්ෂාව සහතික කළ හැකි ආධිපත්‍යයක් පද්ධතිය තුළ නොමැති විට විශාල රටවල් නැවත සන්නද්ධ කිරීම කෙරෙහි අවධානය යොමු කරනු ඇත.

මෙම නිරීක්ෂණයෙන් අදහස් කරන්නේ මනරම් අතීතයක් ඇඟවීමට නොවේ. වර්තමාන දුෂ්කර තත්වයට අපව ඇද දැමූවේ, නව ලිබරල් ක්‍රමය මගින් ඇති කරන ලද රටවල් තුළ සහ රටවල් අතර ඇති වූ නාටකාකාර අසමානතා බව අප හඳුනාගත යුතුය. ඇත්ත වශයෙන්ම, නැගෙනහිර ආසියානු රටවල් වැනි සමහර රටවල් අපනයන ප්‍රමුඛ ආකෘතියෙන් ප්‍රතිලාභ ලබා ඇති බව පෙනේ. එහෙත් දෙවැනි ලෝක යුද්ධයෙන් පසු ගෝලීය ආර්ථිකය යථා තත්වයට පත් කිරීමට, මුලින් පහසුකම් සැලසූ ආකාරයේ නිහතමානී නැවත බෙදාහැරීමකට වඩා මූල්‍ය සමපේක්ෂණයට වරප්‍රසාද ලබා දුන් පද්ධතියක් තුළ ගැලපුම් සඳහා ඇති අධික පිරිවැය කළමනාකරණය කරනු ලැබීය.

අද පවතින තත්වය යටතේ 1950 සහ 1960 ගණන්වල උදාහරණ මත පමණක් විශ්වාසය තැබීමට ශ්‍රී ලංකාවට නොහැකිය. නොබැඳි ව්‍යාපාරයක් නැවත ක්‍රියාත්මක වීමට කාලය ගතවනු ඇත. ගෝලීය දකුණේ බොහෝ රටවල් හරහා අරගල සම්බන්ධ කිරීමේ දීර්ඝ හා දුෂ්කර කාර්යය එයින් තවදුරටත් ගම්‍ය වේ. මේ අතර, 1930 ගණන්වල මහා අවපාතයේ දී මෙන්, ශ්‍රී ලංකාව තවමත් සිටින්නේ බාහිර අංශය මත යැපෙන රටක තත්වයෙනි.

කෙසේ වෙතත්, තමන්ගේම සංකීර්ණ අභිප්‍රේරණ සහ දේශපාලන බලපෑම් නිසා ආහාර සලාකයක් වැනි ආධාර ක්‍රියාත්මක කිරීමට කැමති එක්සත් රාජධානිය වැනි අධිරාජ්‍ය අනුග්‍රාහකයකු පවා මෙවර ශ්‍රී ලංකාවට නොමැත. ඒ වෙනුවට, වත්මන් ජාත්‍යන්තර මූල්‍ය අරමුදල් මාර්ගයෙන් පිටවීමේදී පවතින සියලු විකල්ප වහාම සලකා බැලීමෙන් ශ්‍රී ලංකාව තත්වයේ බරපතළකම හඳුනාගත යුතුය. අවශ්‍ය මෙවලම්වල සම්පූර්ණ පරාසය ඇගයීමට ලක් කළ යුතුය. ට්‍රම්ප්ගේ

තීරුබදුවල සම්පූර්ණ බලපෑම් සමඟ කටයුතු කිරීමට නම්, ශක්තිමත් සැලසුම් උපාය මාර්ගයක් සමඟ ආනයන ප්‍රමුඛතාවේ සිට මුදල් අවප්‍රමාණය වැනි සාර්ව ආර්ථික ප්‍රතිපත්ති දක්වා තමන්ගේම හැකියාව සීමා නොකළ යුතුය.

1970 ගණන්වල සිට සම්බන්ධීකරණය කරන ලද ජාත්‍යන්තර මූල්‍ය පද්ධතියක් නොමැත. මේ දක්වා පැවති දේ රඳා පවතින්නේ ජාත්‍යන්තර මූල්‍ය අරමුදල වැනි බලවත් අධිජාතික ආයතනවල සහාය ඇතිව සමපේක්ෂණ ආයෝජනවල දේශසීමා හරහා ගලායාම මත ය. ඔවුන් අවසානයේදී කළේ බටහිර බලවතුන්ගේ භූ දේශපාලනික හා ආර්ථික අරමුණු සහ ඔවුන්ගේ අදාළ මූල්‍ය හා ආයතනික අවශ්‍යතා බලාත්මක කිරීමයි. අද වන විට, නව ජාත්‍යන්තර මූල්‍ය ගෘහ නිර්මාණ ශිල්පයක් ස්ථාපිත කිරීම සඳහා අවශ්‍ය වන ආකාරයේ සහයෝගීතාවක් ප්‍රායෝගිකව බැහැර කර ඇත.

අපි පිවිසෙමින් සිටින්නේ සෘජු මිලිටරි ගැටුමක් ඇති විය හැකි භයානක කාල පරිච්ඡේදයකටය. මෙම තත්වය යටතේ, ශ්‍රී ලංකාව කුඩා රටක් ලෙස, එක් භූ දේශපාලනික කණ්ඩායමකට හෝ වෙනත් කණ්ඩායමකට තම ගමන ඈඳා තැබීමට උත්සාහ නොකර, තමන්ගේම දේශීය සබඳතා සහ නැවත බෙදා හැරීම කෙරෙහි අවධානය යොමු කළ යුතුය. හොඳම දෙය නම්, ශ්‍රී ලංකාව මෙම අසමාන හා අස්ථායී ගෝලීය පිළිවෙළෙන් වෙන් වීමේ දිගුකාලීන අදහස සමඟ ක්‍රියා කිරීමය. අන්‍යෝන්‍ය වශයෙන් වාසිදායක වෙ​ෙළඳාම සහ ආයෝජන සඳහා පහසුකම් සැලසීම සඳහා ප්‍රගතිශීලී ආණ්ඩු විසින් නායකත්වය දෙන ගෝලීය දකුණේ රටවල් සමග සන්ධානගත වීමේ විෂය පථය සලකා බැලිය හැකිය.

මේ අතර, උපායමාර්ගික ආර්ථික අංශවලට ආයෝජන යොමු කළ හැකි සැබෑ කාර්මික ප්‍රතිපත්තියක් ක්‍රියාත්මක කිරීමට අවශ්‍ය පරිපාලන යන්ත්‍රෝපකරණ ගොඩනැගීම සඳහා ශ්‍රී ලංකාව කඩිනම් ක්‍රියාමාර්ගයක් ගත යුතුය. ඒ සමඟම, ට්‍රම්ප් තීරුබදු නිසා ඇති වන ක්ෂණික කම්පන සමඟ කටයුතු කළ යුතුය. මෙම ප්‍රවේශයට වඩා අඩු ඕනෑම දෙයක් මෝඩකමක් වනු ඇත. එය පදනම් වී ඇත්තේ ප්‍රාර්ථනා කරන චින්තනය සහ විදේශයකින් කිසිදා නොලැබෙන ඇපකරයක් සඳහා වන බොළඳ ග්‍රහණය මත ය.

(***)

“ඩේලි එෆ්ටී” පුවත්පතේ පළවූ ලිපිය සිංහලට පරිවර්තනය කළේ- - අනිල් කරුණාරත්න