අධ්‍යයන පොදු සහතික පත්‍ර උසස් පෙළ විභාගය ඊයේ ආරම්භ විය. රට පුරා විභාග මධ්‍යස්ථාන 2,648ක ඇරැඹුණ උසස් පෙළ විභාගය නොවැම්බර් මස 6 වැනිදා දක්වා පැවැත්වෙයි. රටේ අනාගත වගකීම බාර ගැනීමට සිටින ජාතියේ දුවා දරුවන්ට මෙම විභාගයට සාර්ථකව මුහුණ දීමට සමත් දියුණු හා නිරෝගී පරිසරයක් අඛණ්ඩව පවතීවා යන්න අපගේ ප්‍රාර්ථනය වේ.

ලෝක වසංගත කොරෝනා උවදුර හමුවේ අප රට ද දරුණු අභියෝගයකට ලක්ව තිබේ. මෙයට පෙර නොවූ විරූ පරිද්දෙන් කොරෝනා පොකුර රට පුරා ව්‍යාප්තව තිබේ. ඇවිළුණ අකල් ගින්න නොපමාව නිවා දැමීමට සෞඛ්‍ය අංශ, ආරක්‍ෂක අංශ හා රජය කටයුතු කරමින් සිටී. එම මෙහෙයුමට තමන්ගෙන් හිමි විය යුතු දායකත්වය කුමක්දැයි මනාව විමසා දැනගෙන එම දායකත්වය නොමසුරුව ලබාදීම සෑම පුරවැසියකුගේම වගකීමකි. එය එසේ වන්නේ නම් මෙම උවදුර පරාජය කිරීම එතරම් අසීරු නොවනු ඇත.
 
ඇතැමකුට අනුව කොරෝනා වසංගතය හමුවේ ඇති එකම පිළියම රට ‘ලොක්ඩවුන්’ කිරීම හෙවත් හුදෙකලා කිරීමය. ඖෂධයක් එන්නතක් සොයා ගෙන නැති මාරාන්තික උවදුරකට වෙනත් විකල්පයක් නැතැයි යන තර්කයට වලංගු බවක් ද තිබේ. ලෝක සෞඛ්‍ය සංවිධානයේ අනාවැකිවලට අනුව කොරෝනා බලපෑම තව වසර දෙකකට වඩා වැඩි කාලයක් ලොව හමුවේ තිබේ. එය එසේ නම් එතරම් කාලයක් හෝ එයට වඩා වැඩි කාලයක් රට හුදෙකලා කර තැබිය හැකි ද යන ප්‍රශ්නය ද වලංගුය.

අපට අසල්වැසි ඉන්දියාවේ දිනකට හමුවන කොරෝනා ආසාදිතයන්ගේ සංඛ්‍යාව ලක්‍ෂයකට ආසන්නය. එළැඹ ඇත්තේ අවදානමේ ගැඹුර වටහා ගනිමින් සෞඛ්‍යාරක්‍ෂිත පිළිවෙත්වලට මුල් තැන දෙමින් ජීවත්වීමේ අලුත් මගක් තනා ගැනීමය.

අගෝස්තු මාසයේදී පැවැත්වීමට නියමිතව තිබූ පහ වසර ශිෂ්‍යත්වය ඔක්තෝබර් 11 වැනිදා දක්වා කල් ගියේය. උසස් පෙළ විභාගය ද එසේමය. කොරෝනා පොකුරු බිහිවීමට පටන් ගැනුණේ ඒ අතරවාරයේදීය.

මෙම පරිසරය තුළ ඇතැමකුගේ මතය වූයේ මෙම විභාග ද්විත්වයම කල් දැමිය යුතු බවය. පහසු විසඳුම එය වුව ද විය යුතුව තිබුණේ එය නොවේ. දහසක් දුෂ්කරතා මැද වුව ද සෞඛ්‍යාරක්‍ෂිත පිළිවෙත් අනුගමනය කරමින් විභාග පැවැත්විය යුතුය. අවසානයේදී එය ක්‍රියාත්මක විය. පහ වසර ශිෂ්‍යත්ව විභාගය ඉතාම සාර්ථකව පැවැත්වීමට හැකි වූ බව අප පුවත්පත වාර්තා කළේය. දූ දරුවන්ට අමතරව දෙමාපියන්ගේ ප්‍රමාණය ඉක්මවා ගිය ප්‍රසාදය ඒ වෙනුවෙන් හිමි විය. ඒ වෙනුවෙන් කැපවූ සෞඛ්‍ය අංශවලට, ආරක්‍ෂක අංශවලට මෙන්ම ගුරුවර ගුරුවරියන් ඇතුළු අධ්‍යාපන බලධාරින්ට ස්තුතිවන්ත විය යුතුය.

පහ වසර ශිෂ්‍යත්වය මෙන්ම උසස් පෙළ විභාගය ද වඩාත් සාර්ථකව පැවැත්වීමට හැකි වේවි යැයි අපි විශ්වාස කරමු. මෙබඳු ආරක්‍ෂිත ක්‍රමවේද අනුගමනය කරමින් කළමනා කටයුතු සංවිධානය කිරීම හැර පසුබා යෑම අපට තරම් නොවේ. රටකට තරම් නොවේ.

මෙවර කොරෝනා පොකුර නිර්මාණය වූයේ කෙසේදැයි යන්න තවමත් නිශ්චිතව හඳුනාගෙන නැත. තවමත් තිබෙන්නේ යම් යම් අනුමාන පමණි. එක් කාරණාවක් ඉතා පැහැදිලිය. කොතැනක හෝ අපහසුවක් සිදු වී තිබේ. එය ඇතැම් විට අත්වැරැද්දක් විය හැකිය. ඇතැම්විට පවතින තත්ත්වය නිවැරැදිව හඳුනා නොගෙන කටයුතු කිරීම නිසා විය හැකිය. එනම් වගකීම අමතක කිරීම විය හැකිය. කුමක් වුව ද එමගින් රට අනතුරකට වැටුණේය. වගකීම් විරහිත ක්‍රියා කලාපය රටට කළ හානිය කොතෙක් ද යන්න විස්තර කළ යුතු නැත.

අප රටට කොරෝනා ආසාදිතයන් පැමිණිය හැක්කේ ගුවන්තොටුපොළ හරහා පමණි. ඔවුන් නිසි පරීක්‍ෂණවලට ලක්කර නිරෝධායනයට ලක් කරන්නේ නම් අනතුර රටට ඒමට හැකියාවක් නැත. මෙම නිරෝධායන හා සෞඛ්‍ය නීති උල්ලංගනය කරන්නේ නම් හය මාසයක් හිරගෙට යවන අලුත් නීති ගැසට් කරන බව රජය ප්‍රකාශ කර තිබේ. මෙම නීති රීති තරාතිරම් බේදයකින් තොරව පොදුවේ සියලු දෙනා වෙනුවෙන් ක්‍රියාත්මක කළ යුතුය.

පහ වසර ශිෂ්‍යත්ව විභාගයට පෙනී සිටින්නෝ චුටි දූ පුත්තු වෙති. එහෙත් ඒ දූ පුත්තු නොබියව විභාගයට මුහුණ දුන්හ. උසස් පෙළ දූ පුතුන් ද එසේමය. ඔවුහු පසුබා නොගියහ. ඒ වෙනුවට අභියෝගය බාර ගනිමින් විභාගයට මුහුණ දෙමින් සිටිති. මෙම බලගතු ආදර්ශය සෙසු පුරවැසියන් ද එයට හිමි නිසි බරින් හඳුනා ගන්නේ නම් කොරෝනා මාරක වසංගතයට පරාජය වීම වෙනුවට මාරක වසංගතය පරාජය කිරීමට හැකිවනු ඇත.

(***)