(මුදිතා දයානන්ද)

සයිටම් ප‍්‍රශ්නයට නිසි විසඳුමක් නොදී කල් ඇරීම නිසා අපේම දරුවන් දොළොස්දාහකගේ අනාගතය එක තැන නැවතිලා යැයි ජාතික හෙළ උරුමයේ ප‍්‍රධාන ලේකම්, මහනගර සහ බස්නාහිර සංවර්ධන අමාත්‍ය පාඨලී චම්පික රණවක මහතා සඳුදා (03) පැවසීය.

ඇමැති රණවක මහතා මේ බව පැවසුවේ බත්තරමුල්ලේ පිහිටි ජාතික හෙළ උරුමයේ ප‍්‍රධාන කාර්යාලයේදී පැවැති මාධ්‍ය සාකච්ඡාවකදීය.

රණවක මහතා මෙසේද කීය.

සයිටම් ප‍්‍රශ්නය සම්බන්ධයෙන් වගේම පෞද්ගලික විශ්වවිද්‍යාල සම්බන්ධයෙන් ද අපේ ස්ථාවරය මීට පෙරත් පවසා තිබෙනවා. අපි පක්ෂයක් ලෙස පෞද්ගලික විශ්වවිද්‍යාල හෝ වෛද්‍ය විද්‍යාල පවත්වාගෙන යාමට එකඟ නැහැ. දැන් ගන්න තිබෙන හොඳම විසඳුම තමයි සයිටම් අහෝසි කිරීම. එහි ගොඩනැගිලිවලට උපකරණවලට මොකක්ද කරන්නේ කියන ප‍්‍රශ්නයක් මතුවෙනවා. දැනටමත් මොරටුව විශ්වවිද්‍යාලය වෛද්‍ය විද්‍යාලයක් ආරම්භ කරන්න යෝජනා කර තිබෙනවා. ඒ නිසා මේ ගොඩනැගිලි එයට අනුබද්ධ කර රජයේ වෛද්‍ය විද්‍යාලයක් බවට පත් කළ හැකියි.

ඒ වගේම සයිටම් ආයතනයේ අවුරුදු අටක් නවයක් තිස්සේ ඉගෙනගත් දරුවන්ටත් සාධාරණයක් ඉටු කළ යුතුයි. වෛද්‍ය අධ්‍යාපනය සඳහා සුදුසුකම් ඇති සිසුන්ට වෛද්‍ය උපාධිය දීම සඳහාත් අනෙක් අයට මුදල් ආපසු දීම හෝ වෙනත් පාඨමාලාවක් සඳහා යොමු කිරීමට කටයුතු කිරීමයි හොඳම විසඳුම.

තවදුරටත් මෙයට කල් මැරීමෙන් පලක් වන්නේ නැහැ. මොකද දැනටමත් මේක ඇතැම් දේශපාලන ව්‍යාපාරවල වුවමනාවන් ඉටුකරගන්න මාර්ගයක් බවට පත්කරගෙන තිබෙනවා. විශේෂයෙන්ම මහින්ද රාජපක්ෂ මහතා මේ විරෝධතාව හා එක්ව ප‍්‍රශ්නය අවුල් කරනවා. අපි එය වැළැක්විය යුතුයි. දැන් ආණ්ඩුව ශ්‍රේෂ්ඨාධිකරණයෙන් තීන්දු ලැබෙන තෙක් බලා ඉන්නවා. එසේ නොසිට මෙයට විසඳුමක් දිය යුතුයි.

රජයේ වෛද්‍ය විද්‍යාලවල සිසුන් හත්දාහක් පමණ මේ වන විට සිය අධ්‍යයන කටයුතුවලිනුත් ඉවත් වී වසරක් ඉක්ම ගිහින් තිබෙනවා. ඒ නිසා ඔවුන්ගේ අධ්‍යයන වර්ෂයක් අහිමි වෙලා. අධ්‍යයන කටයුතු අවසන් කර සායනික පුහුණුව සඳහා සූදානමින් ඉන්නවා 1500ක් විතර. ඒ වගේම තවත් එක්දාස් හයසීයක් සායනික පුහුණුව ලබමින් ඉන්නවා. ඒ අයට වෛද්‍යවරුන් වීමට තවත් කාලයක් බලාඉන්න සිදුවෙලා.

සායනික පුහුණුව නිම කරලා වෛද්‍ය සහතිකය ලබාගන්න තවත් 1800ක් පමණ බලාඉන්නවා. මේ විදිහට පෙර කී වෛද්‍ය සිසුන්ට අමතරව තවත් පන්දාහක් පමණ තරුණ තරුණියන් පිරිසකගේ ජීවිතත් මේ ප‍්‍රශ්නය නිසා නැවතිලා. ඔක්කොම දොළොස්දාහක් පමණ ඉන්නවා. මේ ඔක්කොම අපේ දරුවෝ. සයිටම් එකේ දාහ ගැන කතා කරනවා වගේම ඊටත් වඩා වැඩියෙන් මේ දොළොස්දාහ ගැන අපි කතා කළ යුතුයි.

රජයේ ලියාපදිංචි වූ වෛද්‍යවරුන් විසිපන්දහසක් පමණ ඉන්නවා. එයින් දහඅටදාහක් පමණම රාජ්‍ය සේවයේ සේවය කරනවා. සුළු පිරිසක් පෞද්ගලික රෝහල්වල සේවය කරන අතර ඉතිරි කොටස විශ‍්‍රාම ගිහින්. වෘත්තීය ආයතනයක් හැටියට වැඩිම සාමාජික පිරිසක් ඉන්නේ රජයේ වෛද්‍ය නිලධාරීන්ගේ සංගමයටයි.

ඔවුන්ද සයිටම් එකට විරුද්ධව සිටිනවා. ඒ වගේම වෛද්‍ය පීඨ ආචාර්යවරුනුත් මේ සම්බන්ධයෙන් තමන්ගේ යෝජනා ඉදිරිපත් කර තිබෙනවා. වෛද්‍ය ක්‍ෂෙත‍්‍රය සම්බන්ධයෙන් නියාමන කටයුතු කරන්නේ වෛද්‍ය සභාව. රජයේ වෛද්‍ය නිලධාරීන්ගේ සංගමයත්, විශ්වවිද්‍යාල ආචාර්යවරුනුත් වෛද්‍ය සභාව නියෝජනය කරනවා. මේ ප‍්‍රශ්නය විසඳීමේ අවංක උත්සාහයක් ආණ්ඩුවට තිබේ නම් කළ යුත්තේ වෛද්‍ය සභාවත් සමඟ සාකච්ඡුාකර එකඟතාවකට පැමිණීමයි. ප‍්‍රශ්නය ගැඹුරෙන් තේරුම් ගැනීමයි. එහෙම නැතිව මේ ප‍්‍රශ්නය පාරවල්වලවත් රෝහල්වලවත් විසඳන්න බැහැ.

මේ ප‍්‍රශ්නයේ පියා කවුද? මහින්ද රාජපක්ෂ මහතා තමයි මේ ප‍්‍රශ්නයේ පියා. ඔහු කළේ සයිටම් ගෙනත් මුට්ටිය දාලා බැලීමයි. එයට එන විරෝධතාව ලොකු ගැටලූවක් නොවේ නම් තවත් විශ්වවිද්‍යාල තුනක් ගේන්න නියමිතව තිබුණා. මම සයිටම් ගැන විරෝධය දැක්වුවාම උසස් අධ්‍යාපන ඇමැති එස්.බී. සමඟ කතාකර ගන්න කිව්වා. ඒ කතාවෙදී මට මේ අදහස තවත් තහවුරු වුණා. කිසිම ඇමැතිවරයෙක් එදා මේකට විරුද්ධ වුණේ නැහැ. එහෙම කරපු මහින්ද මහත්තයලා එදා සිට විරුද්ධ වුණ වෛද්‍ය පීඨ ශිෂ්‍යයන්ගේ විරෝධතාවට එක්ව අද සයිටම් එපා කියනවා.

එතුමා කොහොමද මේකට නෙවිල් ප‍්‍රනාන්දුට සහාය වුණේ? නෙවිල් ප‍්‍රනාන්දු මහතාට අයත් වුණ සෙන්ට‍්‍රල් රෝහලට විශාල වන්දියක් ගෙවලා පවරාගෙන එයට යුද හමුදා රෝහල ගෙනාවා. කලින් තිබුණ යුද හමුදා රෝහල දැන් තමයි කඩන්නේ. මහින්ද මහත්තයා හිටියා නම් ඔළු පලලා මේ ප‍්‍රශ්නය කෙළවර කරන්නේ නැහැ. මේ ප‍්‍රශ්නය දැන් මේ ආණ්ඩුවට විසඳන්න සිදුවී තිබෙනවා. එය කළ යුත්තේ මහින්ද මහත්තයා කරන්න හදපු විදිහටම ආප්ප කඩ දානවා වගේ වෛද්‍ය විද්‍යාල හෝ විශ්වවිද්‍යාල ඇති කිරිමෙන් නෙවෙයි.

ශ්‍රේෂ්ඨාධිකරණය කරන්නේ මෙහි නීති ගැටලූ ඔස්සේ විසඳීම පමණයි. නීති ගැටලූ ඔස්සේ විසඳන්න පුළුවන් ප‍්‍රශ්නයක් නෙවෙයි මේක. විශාල සමාජ දේශපාලනමය ගැඹුරු ප‍්‍රශ්නයක්. මෙය තවත් දුර යන්න හැරියහොත් ඛේදවාචකයකින් කෙළවර වියහැකියි. අපි එය අසූනවයේදී අත්දැක්කා. අපේ වෛද්‍ය ප‍්‍රජාවත්, වෛද්‍ය ශිෂ්‍යයනුත්, රටත් එවැනි ඛේදවාචකයකට තල්ලූ නොකර මේ ප‍්‍රශ්නය මෙතනින් කෙළවර කරන ලෙස අපි ආණ්ඩුවෙන් ඉතා  ඕනකමින් ඉල්ලා සිටිනවා.

අවුරුදු අසූගානක් වුණාට මහාචාර්ය කාලෝ ෆොන්සේකා මහතාගේ මොළය හොඳට වැඩ කරනවා. ශ්‍රී ලංකා වෛද්‍ය සභාවේ සභාපති ධුරය මාස හයක් කලින් දීර්ඝ කළා. දැන් ඒ කාලයත් අවසන්. එතුමාගේ කාලය දීර්ඝ නොකර සිටීමෙන් සයිටම් ප‍්‍රශ්නය විසඳන්න හැකිවෙයි කියලා හිතීමෙන් පලක් වන්නේ නැහැ. ඒ නිසා එතුමාගේ කාලය දිර්ඝ කරන ලෙස අපි ඉල්ලා සිටිනවා. එතුමා දේශපාලන වශයෙන් අපි පිළිගන්නා මතයක සිටින්නෙක් නොවුණත් අපි එතුමාට ගරු කරනවා.

උතුරු කොළඹ වෛද්‍ය විද්‍යාලය රජයට පවරාගැනීමේ අරගලයේදීත් අපිට ශක්තියක් වුණේ කාලෝ ෆොන්සේකා මහතායි. ඔහු යුක්ති සහගත ලෙස මේ ප‍්‍රශ්නය විසඳයි කියලා අපි හිතනවා. මේ ප‍්‍රශ්නය විසඳුණාට පස්සේ එතුමා ස්වකැමැත්තෙන් විශ‍්‍රාම ගත්තාට කමක් නැහැ. නමුත් දැන් මේ වෙලාවේ එතුමා විශ‍්‍රාම ගැන්වීම සුදුසු වන්නේ නැහැ. එයින් තවත් ප‍්‍රශ්න ඇති වෙන්න පුළුවන්.

මෙම අවස්ථාවට ජාතික හෙළ උරුමයේ අධ්‍යාපන ලේකම් කථිකාචාර්ය අනුරුද්ධ ප‍්‍රදීප් මහතා ද සහභාගී විය.

මෙහිදී මාධ්‍යවේදීන් නැගූ ප‍්‍රශ්නවලට රණවක මහතා මෙසේ පිළිතුරු දුන්නේය.

ප‍්‍රශ්නය - මේ ප‍්‍රශ්නය සම්බන්ධයෙන් ඔබතුමා කැබිනට් මණ්ඩලයේදී කතා කළාද?

පිළිතුර - මම කැබිනට් මණ්ඩලයේදී කතා කළ දේවල් ගැන මෙතැනදී කතා කරන්න කැමැති නැහැ. අපි අපේ ප‍්‍රතිපත්තිය  ඕනම තැනක කතා කරනවා. මේ සම්බන්ධයෙන් අපි පහුගිය වසරේ ඔක්තෝබර්වල ලිඛිතව ජනාධිපතිතුමාටත් අගමැතිතුමාටත්දී තිබෙනවා. ඒ වගේම මනිපාලන් විශ්වවිද්‍යාලයක් ඇති කිරීම සම්බන්ධයෙන් ද අපි අපේ ස්ථාවරය උසස් අධ්‍යාපනය ඇමැතිවරයාට ඉදිරිපත් කර          තිබෙනවා.

ප‍්‍රශ්නය - නමුත් රාජිත ඇමැතිවරයා කැබිනට් ප‍්‍රකාශන දැනුම් දීමේ සාකච්ඡුාවේදී කිව්වා සයිටම් සම්බන්ධයෙන් කිසිම ඇමැතිවරයෙක් විරුද්ධ වුණේ නැහැ කියලා.

පිළිතුර - නැවතත් කියනවා එහි වූ සාකච්ඡාව ගැන කතා කරන්න මම කැමති නැහැ. අපි මේ සම්බන්ධයෙන් පැහැදිලිව පිරිසිදුව කතා කරලා තිබෙනවා. අපේ විරෝධය නිසා තමයි සයිටම් සම්බන්ධයෙන් ගෙනා යෝජනා මේ තරම් හෝ සංශෝධනය වුණේ.