ශ්‍රී ලංකා වරලත් ගණකාධිකාරීවරුන්ගේ ආයතනය (CA Sri Lanka) ස්වකීය ව්‍යාපාරික දිවිමගේ තවත් ඓතිහාසික සන්ධිස්ථානයක් සනිටුහන් කරමින් එහි 65 වැනි සංවත්සරය සැමරීම වෙනුවෙන් විශේෂ නිල ලාංඡනයක් පසුගියදා එළි දැක්වූයේය. ඒ ’’65 වැනි සංවත්සරික ලාංඡනය’’ ලෙස හදුන්වයි.

නව ලාංඡනයෙන් ආයතනික ඉතිහාසයෙහි සශ්‍රීක උරුමය සහ වෘත්තීය විශිෂ්ටත්වය සදහා වූ  අප්‍රමාණ කැපවීම සංකේතවත් කරයි. තවද නව ලාංඡනය ශ්‍රී ලංකා වරලත් ගණකාධිකාරීවරුන්ගේ ආයතනයේ සහයෝගීතාව, විශිෂ්ටත්වය, අඛණ්ඩ වර්ධනය යන මූලික වටිනාකම් නියෝජනය කරන අතරම, පසුගිය වසර 65 තුළ එහි ජයග්‍රහණ සහ අනාගතය සඳහා වූ  අපේක්ෂා ද ඉස්මතු කරයි.

ශ්‍රී ලංකා වරලත් ගණකාධිකාරීවරුන්ගේ ආයතනය 1959 සිට, 65 වසරක් ශ්‍රී ලංකාවේ ගණකාධිකාරී වෘත්තීය ක්ෂේත්‍රය ආලෝකමත් කරමින්, ප්‍රගතිශීලී පරිවර්තනයක් කරමින්, නවීකරණය කරමින්, වෘත්තිය ප්‍රබෝධයක් ඇති කරමින් ක්ෂේත්‍රයේ පොදු අභිවෘද්ධිය වෙනුවෙන් පුරෝගාමී මෙහෙවරක් ඉටු කළේය. පසුගියදා නව ලාංඡනයක් හදුන්වාදෙමින් සැමරුවේ එකී ඓතිහාසික යුග මෙහෙවරයි. 

ශ්‍රී ලංකා වරලත් ගණකාධිකාරීවරුන්ගේ ආයතනයේ සභාපති හේෂණ කුරුප්පු මහතාගේ ප්‍රධානත්වයෙන් පැවැති මාධ්‍ය හමුවකදී නව ලාංඡනය එළිදැක්වූ අතර එම අවස්ථාවට උප සභාපති ටිෂාන් සුබසිංහ කවුන්සිලයේ සාමාජිකයෝ හිටපු සභාපතිවරු සාමාජිකයෝ සහ අනෙකුත් පාර්ශවකරුවෝ සහභාගි වූහ.

ශ්‍රී ලංකා වරලත් ගණකාධිකාරීවරුන්ගේ ආයතනයේ සභාපති හේෂණ කුරුප්පු මහතා කුරුප්පු මහතා මෙසේ පැවසීය. “ආයතනයේ සශ්‍රීක ඉතිහාසය සහ විශිෂ්ටත්වය සඳහා වූ අපේ නොසැලෙන කැපවීමත්, නව්‍යකරණ ආත්මයත් සංකේතවත් කරන අපගේ ‘65 වැනි සංවත්සරික නව ලාංඡනය’’  අපි එළිදැක් වූවා. “ආයතනය ගොඩ නැගීමට, එයට ජාතික සහ ජාත්‍යන්තර ප්‍රමිතියක් සහ පිළිගැනීමක් ලබාදීමට ඇප-කැප වූ අපගේ ආරම්භක පියවරුන්ට, හිටපු සභාපතිවරුන්ට, සමාජිකයන්ට, කොටස්කරුවන්ට ගෞරව - ආදර ස්තුතිය පිරි නමනවා. 65 වසරක් ජාතික සහ අන්තර්ජාතික තලයේ අඛණ්ඩ ජයග්‍රාහි විශිෂ්ට ගමනක් අපට යා හැකි වූයේ අප සියලු‍ දෙනා වෘත්තීය ආචාරධර්ම ස්වකීය දෑස් මෙන් සුරකිමින්, සියලු‍ දෙනා එකම යදමක පුරුක් මෙන් නොසැලෙන අධිෂ්ඨානයෙන් අසීමත කැපවීමෙන් ක්‍රියා කළ නිසයි. දැන් ශ්‍රී ලංකාව ගිණුම්කරණ ලෝකයේ ඉහළින්ම සිටී. එය අපි සමූහයක් ලෙස ලැබූ ජයග්‍රහණයයි.”

-595