(ගල්කිරියාගම කුෂාන් ජයවර්ධන)
සංචාරක වෙළදාමේ නිරත වෙමින් රාත්‍රී කාලයේ ගල් ඉබ්බන් මස් කිරීමේ ජාවාරමක නිරතවූ කල්ලියක තිදෙනෙකු ඉබි මස් තොගයක් ද සමඟ ගල්කිරියාගම වනජීවී අඩිවි කාර්යාලයේ නිලධාරීන් විසින් ඊයේ 03 රාත්‍රියේ අත්අඩංගුවට ගෙන තිබිණ.

ගල්කිරියාගම වනජීවී කාර්යාලයට ලද තොරතුරක් අනුව එම කාර්යාලයේ නිලධාරීන් ඊයෙ 03 රාත්‍රීයේ සිදුකළ ක්ෂණික වටලෑමකදී සැකකරුවන් හා නඩුභාණ්ඩ අත්අඩංගුවට ගැනීමට හැකිව තිබේ. අත්අඩංගුවටපත් සැකකරුවන් කලාවැව ජාතික උද්‍යාන මායිමේ පිහිටි හෙට්ටියාව ප්‍රදේශයේදී ගල් ඉබ්බන් මස් කරමින් සිටි බව වනජීවී නිලධාරීහු පවසති. සැකකරුවන් පැමිණී ලොරි රථයක් හා යතුරු පැදියක් ද එහිදී වනජීවී නිලධාරීන් විසින් අත්අඩංගුවට ගෙන තිබිණ.

වටලෑම සිදුකරන අවස්ථාව වනවිට සැකකරුවන් ගල් ඉබ්බන් දෙදෙනෙකු මරා මස් කරමින් සිට ඇත. සැකකරුවන් ඉබ්බන් ඝාතනයට යොදා ගත් පිහියක් ඝාතනය කරන ලද ඉබ්බන් දෙදෙනෙකුගේ කටු මෙන්ම ඉබි මස් තොගයක් ද ඝාතනය කරන ලද ඉබ්බන්ගේ කුසේ තිබූ බිත්තර රැසක්ද වනජීවී නිලධාරීන් සිදුකළ වටලෑමේදී සිය භාරයට ගෙන තිබිණ.

අත්අඩංගුවටපත් සැකකරුවන් පොල්පිතිගම මාඑළීය ප්‍රදේශයේ පදිංචිකරුවන් වෙති. සැකකරුවන් සංචාරක වෙළදාමේ නිරතවන පිරිසක් වන අතර වෙළදාම අතරතුරදී රාත්‍රී කාලයේදී ඔවුන් මෙලෙස ගල් ඉබ්බන් දඩයම් කිරීමේ නිරතව අතැයි සිදුකළ විමර්ශණවලදී වනජීවී අනාවරණය කරගෙන තිබිණ.  2009 අංක 22 දරණ පනතින් සංශෝධීත වනසත්ව හා වෘක්ෂලතා ආරක්ෂක පනතට අනුව ගල් ඉබ්බා යනු දැඩි ආරක්ෂිත සත්වයකු බව වනජීවී නිලධාරීහු අවධාරණය කරති.

ගල්කිරියාගම වනසත්ව අඩවි ආරක්ෂක ඩී.රාමසිංහ මහතාගේ මෙහෙයවීම යටතේ වනසත්ව නියාමකවරුන් වන ධම්මික වනසිංහ සූජීව ප්‍රසන්න හා එම කාර්යාලයට අන්යුක්ත සිවිල් ආරක්ෂක උප නියාමක ශාලිත වික්‍රමසූරිය ටී.ජී.නෙත්තසිංහ හා සිවිල් ආරක්ෂක සෙබලුන් වන ජානක දිසානායක ලලිත් ඒකනායක සම්පත් වීරසූරිය හා ප්‍රදේශවාසී තරුණයකු වන සජිත් සංජය ජයසුන්දර යන අය විසින්  අදාළ වටලෑම සිදුකර තිබිණ.