(ජයන්ත සමරකෝන්)

මාතර මහධිකරණය අසලදී සැකකටයුතු යතුරු පැදියක් පරීක්ෂා කිරීමේදී මත්කුඩු ග්‍රෑම් 57 ක් සමඟ සැකකරුවෙකු අද (09) අත්අඩංගුවට ගත්බව මාතර පොලිසිය පැවසීය.

එම යතුරු පැදිය මාතර බන්ධනාගාරයේ සේවය කරන කාන්තා සැරයන්වරියකගේ බවට තොරතුරු ලැබී ඇතැයි එම බන්ධනාගාර ආරංචි මාර්ග සඳහන් කරයි.

මෙම යතුරු පැදිය කොළඹ පොලිස් ස්ථානයක සේවය කරන සිය සැමියාගේ නමින් ලියාපදිංචි කර ඇති බවත් ඊයේ (08) එම යතුරු පැදිය සේවා කටයුතු සඳහා සිය සැමියාට භාරදී ඇති බවත් එම සැරයන්වරිය බන්ධනාගාර නිලධාරීන් හමුවේ පවසා ඇතැයි ද දැනගන්නට තිබේ.

මේ පිළිබඳව මාතර පොලිසියෙන් විමසුවවිට පවසා සිටියේ සැකකටයුතු යතුරු පැදිය බන්ධනාගාර සැරයන්වරියට අයත් බවට තොරතුරු ලැබී නැති බවය.

සිද්ධිය සම්බන්ධයෙන් පොලිසිය වැඩිදුර පරීක්ෂණ සිදුකරනු ලබයි.