( තිළිණි ද සිල්වා )

මියන්මාරය සහ නොර්වේ රටවල් සදහා නව ශ්‍රී ලංකා තානාපතිවරුන් පත් කළ බව විදේශ කටයුතු අමාත්‍යාංශය සඳහන් කරයි.

ඒ අනුව මියන්මාරයේ නව ශ්‍රී ලංකා තානාපති ලෙස හිටපු මහ ඇමැතිවරයකු  වන නන්දිමිත්‍ර ඒකනායක මහතා සහ නොර්වේ හි ශ්‍රී ලංකා තානාපති වශයෙන්  මහාචාර්ය අරූෂා කුරේ මහත්මිය රජය විසින් පත් කරනු ලැබ ඇත.

මීට පෙර මියන්මාරයේ ශ්‍රී ලංකා තානාපති ලෙස කටයුතු කළ කේ.ඩබ්ලිව්.එන්.ඩී කරුණාරත්න මහතාගේ සේවා කාලය අවසන් වීමත් සමඟ පුරප්පාඩුව පැවති එම ධූරයට ඒකනායක මහතා පත් කිරීමට ජනාධිපති මෛත්‍රීපාල සිරිසේන මහතා  පියවර ගෙන ඇත.

ඒකනායක මහතා පසුගිය කාලයේදී හිටපු නියෝජ්‍ය ඇමැතිවරයෙක්,මහ ඇමැතිවරයෙක් ලෙස කටයුතු කර ඇති දේශපාලනඥයකුද වේ.

නොර්වේ රටවල් හී ශ්‍රී ලංකා තානාපති ධූරයට පත් කරනු ලැබූ මහාචාර්ය අරූෂා කුරේ මහත්මිය නොටින්හැම් විශ්ව විද්‍යාලයේ ආර්ථික විද්‍යාව පිළිබඳ මහාචාර්යවරියක ලෙස කටයුතු කරන්නීය.

මීට පෙර නොර්වේ හී ශ්‍රී ලංකා තානාපති ලෙස ශ්‍රී ලංකා විදේශ සේවයේ ජ්‍යෙෂ්ඨ නිලධාරියකු වූ ජයන්ත පලිපාන මහතා කටයුතු කළ අතර ඔහුගේ තුන් වසරක සේවා කාලය අවසන් වීමත් සමඟ මෙම මහාචාර්ය අරූෂා කුරේ මහත්මිය පත් කරනු ලැබුවාය.