(*** ඉන්දිකා රාමනායක)

පාස්කු  ඉරිදා බෝම්බ ප්‍රහාරය සම්බන්ධයෙන්  පරීක්ෂණ පවත්වන අපරාධ පරීක්ෂණ දෙපාර්තමේන්තුව  හිටපු  අමාත්‍ය රිෂාඩ් බදියුදීන් මහතාගෙන් ඊයේ (9) පැය 10 කට අධික කාලයක්  ප්‍රශ්න කර ප්‍රකාශ සටහන් කරගත් බව අපරාධ පරීක්ෂණ දෙපාර්තමේන්තුව  පවසයි.

පාස්කු ප්‍රහාර සම්බන්ධයෙන් සිදුකරන විමර්ශනවලට අදාළව   හිටපු අමාත්‍ය රිෂාඩ් බදියුදීන් මහතාගෙන් අපරාධ පරීක්ෂණ දෙපාර්තමේන්තුව  ප්‍රකාශ ලබාගත් ප්‍රථම අවස්ථාව මෙය බව පොලිස් මාධ්‍ය ප්‍රකාශක  ජ්‍යෙෂ්ඨ පොලිස් අධිකාරි ජාලිය සේනාරත්න මහතා පැවසීය.

අපරාධ පරීක්ෂණ දෙපාර්තමේන්තුව කළ දැනුම් දීමකට අනුව   රිෂාඩ් බදියුදීන් මහතා  ඊයේ  පෙරවරු  10.30 ට පමණ   එහි පෙනී සිටි අතර මෙම ප්‍රශ්න කිරීම පස්වරු 8.00  වනවිටත් අවසන් වී නොතිබුණි.

පාස්කු ඉරිදා ප්‍රහාරය සම්බන්ධයෙන් විමර්ශනය කරන අපරාධ පරීක්ෂණ දෙපාර්තම්න්තුව දැනට  සැකකරුවන් 300කට අධික පිරිසක් අත්අඩංගුවට ගෙන ඇති අතර  එම පිරිස අතර රිෂාඩ් බදියුදීන් මහතාගේ  සොහොයුරා වන  මොහොමඩ් රියාජ්  බදියුදීන්  නීතිඥ  හිෂාඩ්  හිස්බුල්ලා යන මහත්වරුන් ද සිටින බව පවසයි.

පාස්කු ඉරිදා ප්‍රහාරය සම්බන්ධයෙන් අත්අඩංගුවට ගැනීමේ සූදානමක් පවතින බැවින් එය වළක්වන අතුරු නියෝගයක් නිකුත් කරන ලෙස ඉල්ලා රිෂාඩ් බදියුදීන් මහතා මූලික අයිතිවාසිකම් පෙත්සමක් ද ශ්‍රේෂ්ධිකරණයට ඉදිරිපත් කර ඇත.