(මනෝප්‍රිය ගුණසේකර)

ව්‍යවස්ථාවට හෝ ජනතාවට අබමල් රේණුවක තරම්වත් වරදක් නොකරන බවත් ව්‍යවස්ථාව හා ජනතාව තව තවත් ශක්තිමත් කිරීමට කටයුතු කරන බවත් අධිකරණ අමාත්‍ය ජනාධිපති නීතීඥ අලි සබ්රි මහතා සිය ධූරයේ වැඩ බාරගමින් අද (17) පැවසීය.

ජාතිය, ආගම, කුලය ගැන කතා කරමින් වසර 70 ක කාලය නාස්ති කොට ඇතැයි පෙන්වා දුන් අධිකරණ අමාත්‍ය අලි සබ්රි මහතා ජාති, ආගම්, කුල, මල භේද නොමැති සශ්‍රීක රටක් උදා කිරීමට කැප වන්නේ යැයිද වැඩිදුරටත් පැවසීය.

අලි සබ්රි මහතා අධිකරණ අමාත්‍යධූරයේ වැඩ බාරගැනීම නිමිත්තෙන් අළුත්කඩේ උපරිමාධිකරණ සංකීර්ණයේ පිහිටි අධිකරණ අමාත්‍යංශ ශ්‍රවණාගාරයේදී පැවැති උත්සවයකදී ඒ මහතා මෙසේ පැවසීය.

දොඩම්පහළ චන්ද්‍රසිරි අනුනාහිමි, නාරාහේන්පිට අභයාරාමාධිපති මුරුත්තේට්ටුවේ ආනන්ද නාහිමි, ජයවර්ධනපුර විශ්ව විද්‍යාලයේ මහාචාර්ය, සුනේත්‍රාදේවි පරිවේණාධිපති මැදගොඩ අභයතිස්ස, සබරගමු විශ්ව විද්‍යාලයේ කුලපති කුඹුරුගමුවේ වජිර, හින්දු, කතෝලික හා මුස්ලිම් පුජකවරුන්ද, අමාත්‍යවරුන් වන නිමල් සිරිපාල, සුදර්ශනී ප්‍රනාන්දුපුල්ලේ, උදය ගම්මන්පිල, මොහාන් ප්‍රියදර්ශණ, අතිරේක සොලිසිටර් ජනරාල්වරුන් වන සංජය රාජකරුණා, සුමති ධර්මවර්ධන, ජනාධිපති නීතීඥවරුන් වන රොමේෂ් ද සිල්වා, ගාමිණි මාරපන, යු.ආර්. ද සිල්වා, ශ්‍රී ලංකා නීතීඥ සංගමයේ සභාපති කාලිංග ඉන්දතිස්ක සහ එහි ලේකම් රජිව් අමරසුරිය යන මහත්වරු ඇතුළු අමුත්තන් විශාල පිරිසක්ද මෙම අවස්ථාවට සහභාගී වුහ.

ජයවර්ධනපුර විශ්ව විද්‍යාලයේ මහාචාර්ය, සුනේත්‍රාදේවි පරිවේණාධිපති මැදගොඩ අභයතිස්ස හිමියන් උත්සව සභාව අමතා කෙටි අනුශාසනාවක් කරමින් මහින්ද රාජපක්‍ෂ මහතා 2015 වසරේ පැවැති මැතිවරණයේදී පරාජයට පත් කළේ කුමන්ත්‍රණකාරී අන්දමින් බව සියළු දෙනා දන්නා බවත් ඉන් අනතුරුව රාජපක්‍ෂ පාලනයක් ගෙන ඒම සඳහා වියත් මග, වියත් පවුර සහ එළිය සංවිධාන සිදුකළ මෙහෙවර වැනිම මෙහෙවරක් ගෝඨාභය රාජපක්‍ෂ මහතාගේ නිවසේ පැවැති රැස්වීම් වලදී අලි සබ්රි මහතා විශාල මෙහෙවරක් කළ බවත් පැවසුහ.

මැදගොඩ අභයතිස්ස හිමියන් සිය කෙටි අනුශාසනාවේදී මෙසේද පැවසුහ.

පැවැති රජය පෙරළා රට පාලනය කිරීමේ අවස්ථාව රාජපක්‍ෂවරුන්ට බාරදුන්නේ ජනතාව ඔවුන් කෙරෙහි විශාල විශ්වාෂයක් අතුවයි. කැබිනට්ටුවේ ඇති විශාලම ආයතනයක් වන අධිකරණ ඇමතිකම අලි සබ්රි මහතාට බාරදීමේදී ගෝඨාභය රාජපක්‍ෂ මහතාට අභියෝග රැසකට මුහුණ දෙන්න වුණා. එම සියළු අභියෝගයන්ටම මුහුණදී කැබිනට්ටුවේ ඇති විශාලම ආයතනය අලි සබ්රි මහතාට බාරදුන්නේ ඔහු කෙරෙහි විශාල බලාපොරොත්තුවක් තබලයි. මෙතැන් පටන් ඔබ කිසිඳු ජාතියකට, ආගමකට හෝ භාෂාවකට අයිති පුද්ගලයකු නොවෙයි. මෙතැන් පටන් ඔබ මුළු රටටම අයිති චරිතයක්.

19 වැනි ආණ්ඩු ක්‍රම ව්‍යවස්ථාව වෙනස් කළ යුතුයි. ඒත් මිනිසුන් මේ රජයට ඡන්දය දුන්නේ ආණ්ඩු ක්‍රම ව්‍යවස්ථාව වෙනස් කිරීමට නෙමේ අළුත් ආණ්ඩු ක්‍රම ව්‍යවස්ථාවක් ගෙන ඒමටයි. 20 වැනි ආණ්ඩු ක්‍රම ව්‍යවස්ථාව ගෙනා යුත්තේ විනිවිද භාවයකින් යුතුවයි. මීට කළින් ආණ්ඩු ක්‍රම ව්‍යවස්ථා ගෙනා විට කාරක සභා අවස්ථාවලදී විශාල වෙනස්කම් වලට භාජනය කළා වගේ දේවල් කරන්න නෙමේ ජනතාව මේ ආණ්ඩුවට ඡන්දය දුන්නේ.

එකම රටක් තුළ එක එක නීතී තියෙන්න බැහැ. මුළු රටටම තිබිය යුත්තේ එක් නීතීයක් පමණයි. රටේ එක එක ජනවර්ගයන්ට එක එක් නීතී තිබ්බොත් ‘සහරාන්’ලා බිහිවෙන්න පුළුවන්. මුස්ලිම් ජනතාවගේ බෙල්ලේ එල්ලා තියෙන ‘සහරාන්’ බෝඞ් ලැල්ල ගලවා දැමීමේ වගකීම ඇත්තේ ඔබටයි. ඔබට විශාල අභියෝගයක් තියෙනවා. ඔබ එයට මුහුණ දෙන අයුරින් මිනිසුන් ඔබ ගැන තීරණය කරයි.

සබරගමු විශ්ව විද්‍යාලයේ කුලපති කුඹුරුගමුවේ වජිර හිමියන් කෙටි අනුශාසනාවක් පවත්වමින් ජනතාව මේ රජයට තුනෙන් දෙකක බලයක් ලබාදුන්නේ ඇයි? යන්න සිතන්නැයිද ඒ ගැන සිතා කටයුතු නොකොළොත්, ජනතාවගේ බලාපොරොත්තු ඉෂ්ඨ නොකොළොත් අනාගතයේදී පසුතැවීමට සිදුවිය හැකි යැයිද පැවසුහ.

අධිකරණ අමාත්‍ය ජනාධිපති නීතීඥ අලි සබ්රි මහතා උත්සව සභාව අමතමින් මෙසේද පැවසීය.

විශාල අභියෝගයක් එල්ල වී තියෙනවා. ඔයාට මේ ක්‍ෂෙත්‍රයේ විශාල අත්දැකීම් තියෙන නිසා ඔයා අධිකරණ ක්‍ෂෙත්‍රය බාරගෙන ඒක මට කරලා දෙන්න කියලා කීවා. මා කෙරෙහි විශ්වාෂය තැබීම පිළිබඳව ජනාධිපතිතුමාටත් අගමැතිතුමාටත් ස්තූතිය පුද කරනවා.

අපේ රටේ සෑම පැය දෙකකටම වරක් පුංචි ළමයෙක් අපචාරයට ලක් වෙනවා. මත්ද්‍රව්‍ය ඇල්ලීම සඳහා පත් කර තියෙන මත්ද්‍රව්‍ය නාශක කාර්යංශයේ නිලධාරීන්ම කුඩු විකුණනවා. ජාවාරම් කරනවා. කුඩු ජාවාරම්කරුවන් අල්ලා හිරගෙරට යැව්වාම, ඔවුන් පුනරුත්ථාපනය කිරීම වෙනුවට බන්ධනාගාරය තුළ සිට ජාවාරම් මෙහෙයවීමට බන්ධනාගාර නිලධාරීන් සහය දෙනවා. නැත්නම් බන්ධනාගාර නිලධාරීන් කුඩු ජාවාරම් කරනවා. අල්ලා ගන්නේ හෙරොයින්මද? යන්න තහවුරු කරගැනීම සඳහා සිටින රස පරීක්‍ෂක දෙපාර්තමෙන්තුවේ නිලධාරීන් කුඩු ජාවාරම් කරනවා. මේ විධියට බැලුවම රටේ තියෙන තත්වය ඉතාම නරකයි. මේ නරක තත්වය රටින් තුරන් කළ යුතුයි. ඉතාම අපහසුවෙන් වුවත් එය කළ යුතුයි.

අධිකරණ කටයුත්තක් කරගැනීමට පැමිණෙන මිනිසුන් විඳින දුක නීතීඥ ලෙස කටයුතු කළ පසුගිය වසර 25ක කාලයේදී මා දැකලා තියෙනවා. ඒ තත්වය නැති කිරීම මගේ එක් අරමුණක්.

රජය, කැබිනට් මණ්ඩලය ගන්නා සෑම තීරණයක් වෙනුවෙන්ම මා පෙනී සිටිනවා. ජාතිය, ආගම, කුලය ගැන කතා කරමින් වසර 70ක් පුරාම අපේ රටේ මිනිසුන් කාලය නාස්ති කරලා තියෙනවා. ජාති, ආගම්, කුල, මල භේද නොමැති සශ්‍රීක රටක් උදා කිරීමට මා කැපවෙනවා.

අධිකරණ අමාත්‍යංශයේ තත්වය පිළිබඳ ඇගයීමට ලක් කිරීම සඳහා ඉදිරි සති දෙකක කාලය ගැනීමට මා බලාපොරොන්තු වෙනවා. ඉන් අනතුරුව අධිකරණ අමාත්‍යංශයට සම්බන්ධිත ආයතන, නීතීපති දෙපාර්තමෙන්තුව, ශ්‍රී ලංකා නීතීඥ සංගමය, ඇතුළු ආයතන සමඟ සාකච්ඡා කොට ඔවුන්ගේ සහයෝගයද ලබාගෙන අලුත් වැඩපිළිවෙලක් ආරම්භ කිරීමට මා කටයුතු කරනවා.