(අජිත්ලාල් ශාන්ත උදය සහ  ආරියරත්න මාමුහේවා)

නිවිතිගල, දෑල, ඇල්ලෙදොළ මාර්ගය ආසන්නයේ අඩි හතළිහක් පමණ ගැඹුරැති මැණික් පතලක වතුර මෝටරයේ  සුද්ද කිරීම් කටයුතු කරමින් සිටි එක්දරු පියෙක් විෂ වායුවක් ආඝ‍්‍රාණය වීමෙන්  මියගොස් ඇතැයි නිවිතිගල පොලිසිය පවසයි.

මෙලෙස මියගොස් ඇත්තේ දෑල, එරබද්ද පාරේ පදිංචිව සිටි පී.ඒ.ඉෂාන් (27)යන අයයි.

මියගිය තැනැත්තා රැකියාවට කරන්නෙ මැණික් පතල් කැණීමේ කටයුතුය. ඔහු වැඩකළ මැණික් පතලේ ඉල්ලම් සේදීම පතලේ සෙසු සාමාජිකයන් හා එකතුව සිදුකර ඇති බව පොලිසිය කියයි.

ඉල්ලම් සෝදා ඇත්තේ ඒ සඳහා සැකසූ ගැරුම් වළකය. සවස්වන විට ගැරුම් වළේ වතුර අඩුවීම නිසා වතුර මෝටරයක් යොදාගෙන අසල වූ ගැඹුර පතලෙන් ගැරුම් වළට වතුර පුරවා තිබේ.

වතුර මෝටරයේ ෆුට් වෑල්වයේ දෝෂයක් නිසා වතුර ඇදීම නවතී තිබේ. ෆුට් වෑලය පරීක්‍ෂා කිරිමට වළට බැස ඇත්තේ මියගිය තැනැත්තාය. එසේ වළට බසිද්දී ඔහු වළට ඇදවැටී ඇති බව පොලීසිය මෙතෙක් කළ පරීක්‍ෂණ වලදී අනාවරණය වී ඇති බව පොලීසිය කියයි.

ඒ අවස්ථාවේ උඩසිටි අය වහාම වළට වැටුණු තැනැත්තා ගොඩට ගෙන නිවිතිගල වතුපිටිය රෝහලට ගෙනයාමෙන් අනතුරුව රත්නපුර මහ රෝහලට මාරුකර යවා ඇතත් එහිදී ඔහු මියගිය බව නිවිතිගල පොලීසිය කියයි.