සිරාජ් හසීම්

උතුරු පළාත් කෘෂිකර්ම අමාත්‍ය ධුරය හා අධ්‍යාපන අමාත්‍යධූරය සදහා නවක අමාත්‍යවරුන් දෙදෙනෙකු තෝරාපත් කර ගැනීම සදහා හෙට(23) අවසන් වීමට පෙර තමන් වෙත අයදුම්පත් ඉදිරිපත් කරන්නැයි උතුරු පළාත් ප්‍රධාන අමාත්‍ය සී.වී.විග්නේෂ්වරන් මහතා එම පළාත් සභාවේ ආණ්ඩු පක්ෂ නියෝජිතයින් වෙත දැනුම් දී තිබේ.

මේ අනුව පළාත් සභාවේ ආණ්ඩු බලය හිමි දෙමළ ජාතික සන්ධාන නියෝජිතයින් දෙදෙනකු මෙම අමාත්‍යධූර සදහා පත් කරගැනීමට නියමිත අතර එම පත්කිරීම පළාතේ දිස්ත්‍රීක් මට්ටම හා දෙමළ ජාතික සන්ධානය  නියෝජනය කරන දේශපාලන පක්ෂවල එකඟතාව මත සිදුකිරීමට නියමිත බව දෙමළ ජාතික සන්ධාන උතුරු පළාත් සභා මන්ත්‍රී එම්.කේ සිවාජිලිංගම් මහතා ලංකාදීපයට පැවසීය
උතුරු පළාත් සභාවේ හිටපු කෘෂිකර්ම අමාත්‍ය පී.අයිංගරනේසන් සහ  අධ්‍යාපන අමාත්‍ය ටී.ගුරුකුලරාජා යන මහත්වරුන්ගේ ඉල්ලා අස්වීමෙන් ඇතිවූ පුරප්පාඩුව පිරවීම සදහා මහ ඇමතිවරයා මෙලෙස අයදුම්පත් කැදවා ඇති අතර මෙකී අමාත්‍යධූර සදහා පත්කරන අමාත්‍යවරුන් කවුරුන්ද යන්න තීරණය කිරීම සදහා දෙමළ ජාතික සන්ධානයේ පක්ෂ නායකයින් සමගද සාකච්ඡා කිරීමට නියමිතය.
 
උතුරේ ආරංචිමාර්ග පවසන අන්දමට මෙම අමාත්‍යධූර සඳහා එම ධුරවල හිටපු අමාත්‍යවරුන් නියෝජනය කළ මුලතිව් හා යාපනය දිස්ත්‍රීක්ක දෙකෙන් පත් කිරීමට සැලසුම් කර තිබේ.