ගායන ක්ෂේත්‍රයට නවකයෙකු වන අයේෂ් මධුෂංකගේ කුලුඳුල් ගීතය හා එහි රූප රචනාව පසුගියදා එළිදක්වනු ලැබීය. "මා සමුගෙන නැහැ" ලෙස නම්කර ඇති මෙම ගීතයට මේ වනවිට ඉහළ රසික ප්‍රතිචාර ලැබෙමින් පවතී. සිය පළමු ගීතය පිළිබඳව අයේෂ් "තරුණයාට" මෙසේ පැවසීය. "මේ ගීතය ලිව්වෙ හා සංගීතය මුසු කළේ මධු රොක්ස්. ඔහුගේම "මධු ඩ්‍රිම්ස්" ප්‍රඩක්ෂන් ආයතනය හරහා තමයි මේ ගීතයේ රූප රචනාව නිර්මාණය කළේ. මධු එක්ක මෙහි ජනප්‍රිය නිරූපිකාවක වන දිනේෂා දිසානායක රංගනයෙන් දායක වෙනවා. මේ ගීතය ආදරය හා විරහව සම්බන්ධව ලියැවුණ ගීතයක්."

පාසල් අවදියේ සිට ගායනයට කැමැත්තක් දැක්වූ අයේෂ් ගායකයෙකු වීමේ හීනය සපල කර ගෙන ඇත්තේ මෑතකදීය. "මා සමුගෙන නැහැ" ගීතයෙන් පසුව මේ දිනවල තවත් ගී නිර්මාණ කිහිපයකටම යොමුව සිටින අයේෂ් එළැඹෙන ජනවාරි මාසයේදී තවත් රූප රචනාවක් සහිත ගීතයක් ඉදිරිපත් කිරීමට සූදානමින් සිටියි.

"පළමු ගීතයට හා රූප රචනාවට මේ දිනවල ඉහළ රසික ප්‍රතිචාර ලැබෙනවා. දැනට මේ ගීතය වෙබ් අඩවිවලට පමණයි නිකුත් කරලා තියෙන්නේ. ඉදිරියේදී එෆ්.එම්.නාළිකාවලට වගේම රූපවාහිනි නාළිකාවලට ලබාදෙන්න කටයුතු කරලා තියෙනවා. ඒ වගේම පළමු ගීතයට ලැබුණ රසික ප්‍රතිචාර මත මට හිතුණා මගේ දෙවැනි ගීතයත් ඉතා ඉක්මනින් මගේ ආදරණීය රසික, රසිකාවියන්ට ලබාදෙන්න ඕන කියලා. ඒ නිසා මේ දවස්වල අලුත් නිර්මාණයේ වැඩ කටයුතු සිදු කරමින් යනවා."

ගායකයෙකු ලෙස ආ මේ ගමන් මගේදී අයේෂ්ට නිතැතින්ම උදව් උපකාර කර ඇත්තේ ඔහුගේ මව විසින් බව අයේෂ් පැවසීය. එමෙන්ම ක්ෂේත්‍රය තුළදී ඔහුව ගායකයෙකු ලෙස ඉදිරියට ගෙන නිර්මාණ කරදී ඇත්තේ මධු රොක්ස් බවත් පවසන ඔහු ඒ සියලු දෙනාට මේ මොහොතේදී සිය කතෘවේදිත්වය පිරිනමනු ලැබීය.