(විමුක්ති එස් රුද්‍රිගු)

සිංහල සහ හින්දු අලුත් අවුරුද්ද සඳහා කැවිලි මේසයක් පිළියෙළ කිරීමට යන වියදම පසුගිය වසරට සාපේක්ෂව මෙම වසරේදී සියයට 7 කින් වැඩිවී ඇතැයි වෙරිටේ රිසර්ච් ආයතනය  ප්‍රකාශ කළේය.

පසුගිය වසරේදී අලුත් අවුරුදු කැවිලි මේසය සඳහා පවුලක් රුපියල් 5069 ක් වියදම් කර තිබූ බවත් එය මෙම වසරේදී රුපියල් 5,414 දක්වා වැඩිවී ඇති බවත් වෙරිටේ රිසර්ච් ආයතනය පැවැසුවේය.

කෙසේ නමුත් කොවිඩ් වසංගතයට පෙර 2019 වසර සමග සංසන්දනය කිරීමේදී මෙම වසරේදී අලුත් අවුරුදු කැවිලි මේසයක් පිළියෙළ කිරීමට යන මිල 2.4 ගුණයකින් ඉහළ ගොස් ඇතැයි වෙරිටේ රිසර්ච් ආයතනය ප්‍රකාශ කළේය.

පෙර වසරට සාපේක්ෂව මෙම වසරේදී අලුත් අවුරුදු කැවිලි මේසයක් පිළියෙළ කිරීමට යන මිල සියයට 7 කින් ඉහළ යාමට ප්‍රධාන වශයෙන් පොල් මිල ඉහළ යෑම බලපෑ ඇතැයි වෙරිටේ රිසර්ච් ආයතනය පැවැසුවේය. පසුගිය වසරට සාපේක්ෂව මෙම වසරේදී පොල් මිල සියයට 80 කින් ඉහළ ගොස් ඇති බවත් එහි ප්‍රතිඵලයක් ලෙස පොල්තෙල් මිල සියයට 40 කින් ඉහළ ගොස් ඇති බවත් වෙරිටේ රිසර්ච් ආයතනය ප්‍රකාශ කළේය.

ඒ හැර අනෙකුත් අමුද්‍රව්‍ය මිල අඩුවී හෝ නොවෙනස් පවතී ඇතැයි වෙරිටේ රිසර්ච් ආයතනය පැවැසුවේය.

කොවිඩ් වසංගතයට පෙර 2019 වසරට සාපේක්ෂව පසුගිය වසරේදී කැවිලි සැදීම සඳහා භාවිත කරන අමුද්‍රව්‍යවල මිල 2.2 ගුණයකින් වැඩි ඇති බවත් එය මෙම වසරේදී 2.4 දක්වා වර්ධනය වී ඇති බවත් වෙරිටේ රිසර්ච් ආයතනය ප්‍රකාශ කළේය.

මෙම මිල සඳහන් වන්නේ සාමාජිකයන් 4 ත් 5 ත් අතර සංඛ්‍යාවක් සිටින පවුලක් සඳහා බවත් ගණනය කිරීම සඳහා විදුලිය, කුළුබඩු සහ ගෑස් සඳහා වන පිරිවැය ඇතුළත් කර නොමැති බවත් වෙරිටේ රිසර්ච් ආයතනය පැවැසුවේය.

ඒ අනුව පෙරට වසරට සාපේක්ෂව මෙම වසරේදී මුං කැවුම් කෑලි 15 ක් සඳහා වැයවන මුදල රුපියල් 529 සිට 531 දක්වා සියයට 0.4 කින් වැඩිවී ඇති බවත් කොකිස් කෑලි 20 සඳහා වැයවන මුදල රුපියල් 457 සිට 618 දක්වා සියයට 35කින් වැඩිවී ඇති බවත් වෙරිටේ රිසර්ච් ආයතනය ප්‍රකාශ කළේය. කැවුම් කෑලි 20 ක් සඳහා වැයවන වියදම රුපියල් 1569 සිට 1668 දක්වා සියයට 6.3 කින් ඉහළ ගොස් ඇති බවත් දොදොල් කිලෝ ග්‍රෑමයක මිල රුපියල් 1001 සිට 1137දක්වා සියයට 14 කින් ඉහළ ගොස් ඇති බවත් වෙරිටේ රිසර්ච් ආයතනය පැවැසුවේය. එපමනක් නොව කිරිබත් කෑලි 10 සඳහා යන වියදමද රුපියල් 165 සිට 258 දක්වා සියයට 57 කින් ඉහළ ගොස් ඇති බවද වෙරිටේ රිසර්ච් ආයතනය ප්‍රකාශ කළේය.

කෙසේ නමුත් පෙර වසරට සාපේක්ෂව මෙම වසරේදී කෙසෙල් කිලෝ ග්‍රෑමයක් සඳහා වැයවන මුදල රුපියල් 212 සිට 198 දක්වා සියයට 6.3 කින් පහළ ගොස් ඇති බවත් කේක් කිලෝ ග්‍රෑමයක් සඳහා වැයවන මුදල රුපියල් 842 සිට 754 දක්වා සියයට 10 කින් පහළ ගොස් ඇති බවත් වෙරිටේ රිසර්ච් ආයතනය පැවැසුවේය.

එසේම අලුවා කෑලි 15 ක් සඳහා වැයවන මුදලද රුපියල් 295 සිට 249 දක්වා ඉහළ ගොස් ඇති බවද වෙරිටේ රිසර්ච් ආයතනය ප්‍රකාශ කළේය.