හිටපු රගර් ක්‍රීඩක වසීම් තාජුඩීන්ගේ මෘත ශරීරයේ කොටස් අස්ථානගත වූයේ යැයි කියන සිද්ධියක් සම්බන්ධයෙන් තමා අත්අඩංගුවට ගැනීම   වළක්වන අතුරු තහනම් නියෝගයක් නිකුත් කරන ලෙස ඉල්ලා කොළඹ හිටපු ප්‍රධාන අධිකරණ වෛද්‍ය නිලධාරීවරයා වූ ද   මාලබේ පෞද්ගලික වෛද්‍ය විද්‍යාලයේ උප කුලපතිවරයාද වන විශේෂඥ වෛද්‍ය ආනන්ද සමරසේකර මහතා ගොනු කළ මූලික අයිතිවාසිකම් පෙත්සම ලබන 09 වැනිදා සලකා බැලීමට ශ්‍රේෂ්ඨාධිකරණය අද  (31) තීන්දු කළේය.

ප්‍රියසාත් ඩෙප් සහ ප්‍රසන්න ජයවර්ධන යන ශ්‍රේස්ඨාධිකරණ විනිසුරුවරුන් හමුවේ පෙත්සම කැඳැවිණි.

පෙත්සමේ වගඋත්තරකරුවන් වෙත යැවූ නොතීසී ඔවුන්ට ලැබී නොමැති හෙයින් එම නොතීසි යළි දන්වා යවන ලෙස ද ශ්‍රේෂ්ඨාධිකරණය  පෙත්සම්කරුගේ නීතීඥවරයාට දැනුම් දුන්නේය.

පෙත්සමේ වගඋත්තරකරුවන් ලෙස සෞඛ්‍ය අමාත්‍යාංශ ලේකම් අනුර ජයවික්‍රම, සෞඛ්‍ය සේවා ආරක්ෂක ජනරාල් වෛද්‍ය පාලිත මහීපාල, මූලික විමර්ශන කමිටුවේ සභාපති වෛද්‍ය ලක්ෂ්මි සී. සෝමතුංග, පොලිස්පති පූජිත් ජයසුන්දර, අපරාධ පරීක්ෂණ දෙපාර්තමේන්තුවේ අධ්‍යක්ෂක   ජ්‍යෙෂ්ඨ පොලිස් අධිකාරි බී.ආර්.එස්.ආර් නාගහමුල්ල, අතිරේක අධිකරණ වෛද්‍ය නිලධාරී ඒ. හේවගේ, නීතිපතිවරයා ඇතුළු 13 දෙනෙක් නම් කරනු ලැබ සිටිති.