ආලවන්ත දෙනෙත් අගින් මහ පොළවට වැටුණු

ලුණු රහ වුණු කඳුළුවලින් - හැදුණද මහ සයුරු

යන වෙනස්ම ආරක පදවැලකින් යුත් ගීතයක් පළමුවරට සාරවිටෙන් එළිදකින වග අපි ඔබට දැනුම් දෙමු. ඒ තුසිත් සිම්ප්සන් ගයන 'ආලවන්ත දෙනෙත් අගින්' නම් වූ ගීතයයි. අපි ඒ ගැන කතාබස් කරනට තුසිත් සිම්ප්සන් සාරවිටට කැඳවා ගතිමු.

"මේ දිනවල මම අලුතෙන්ම නිර්මාණය කළ ගීතය තමයි 'ආලවන්ත දෙනෙත් අගින්' ගීතය. එය වෙනස්ම තේමාවක් ඔස්සේ රචනා කළ ගීතයක්. ජීවිතය සහ ලෝකය පිළිබඳ වෙනම අරුත් ගැන්වීමක් තමයි එම ගීතය තුළ තිබෙන්නෙ. සුසුම් සහ කඳුළු අතර ඇති සම්බන්ධය තමයි සරල පදවැලකට එක්කර ගීතයක් වශයෙන් නිර්මාණය කළේ. මෙහි සංගීත නිර්මාණය කළේ මා විසින්මයි. මෙය ගායනා කරන්නේත් මමමයි. මෙහි පද රචනය ඉඳුනිල් සින්දුගේ."

ඉදිරි වැඩ කටයුතු

විකාශය වීමට නියමිත ටෙලිනාට්‍යයක තේමා ගීතයක් ගායනා කළා. ආදරණීය ආරාධනා නම් ගීතයක් පසුගියදා එළිදැක්වුවා.  එහි පද රචනය සංගීතය හා ගායනය සිදුකළේ මා විසින්මයි. 'සමනලී' නම් වූ එම ගීතයේ පද රචනය උදිත වර්ණකුලසූරියගේ. සංගීතය මාවිසින්මයි සිදුකළේ. වෙනස් ආරක යුග ගීයක් ඉදිරියේදී එළිදැක්වුවා. ශම්මිකා අමානි තමයි යුග ගායනයෙන් දායක වුණේ. එමෙන්ම චිත්‍රපටයක් සඳහා තේමා ගීතයක් ගායනා කළා කථිකාචාර්ය තුෂාරි බොලුකඳුරගේ සමග.  එමෙන්ම 'කාල' නමින් කලාවැව සම්බන්ධ චිත්‍රපටයක් නිර්මාණය වුණා.  එය අධ්‍යක්ෂණය කළේ සුජීව ගුණරත්නයන් විසිනුයි. එහි තේමා ගීතයද මාවිසින් ගායනා කළා. සංගීතය දර්ශන රුවන් දිසානායකයන්ගේයි. 'තානාපතිලාගේ ගෙදර' චිත්‍රපටයේ සංගීත අධ්‍යක්ෂණයත් ඔහුගේයි. සංගීත අධ්‍යක්ෂණය හා ගායනය තමයි මා කරගෙන යන්නෙ. ක්ලැසිකල් ගිටාරය ඉගැන්වීමේ කටයුතු කරගෙන යනවා. මට කතාකරන්න කැමති ඕනෑම රසික රසිකාවියෙකුට මෙන්ම සංගීතය ගැන දැනගැනීමට 0777-784568 අංකයෙන් විමසන්න.