ආරක්ෂක අමාත්‍යංශයේ පෞද්ගලික අංශයට අයත් රක්නා ආරක්ෂක ලංකා සමාගම සතු අවි සම්බන්ධයෙන් කළ විගණනයකින් සංවිධානාවත්මව හා නීති විරෝධීව අවි ගනුදෙනුවල එම සමාගම යෙදී තිබෙන බවට තොරතුරු අනාවරණයව තිබේ.

බරපතලම කරුණ වන්නේ එසේ හමුවී තිබෙන ස්වයංක්‍රීය රයිෆල් 320 ක හඳුනාගැනීමේ අංක මකාදමා ඒවායේ නියම හිමිකරුවන් සොයාගැනීමට ඇති හැකියාව ව්‍යර්ථ කිරීමට ගෙන ඇති උත්සාහයයි.මෙවන් නීති විරෝධී අවි කිහිපයක්ම දැනට අත්අඩංගුවේ තිබෙන ඇවන්ගාඩ් නෞකාවේ අවි ගබඩාවේද තිබී හමුවිය.

හිටපු ආරක්ෂක ලේකම් ගෝඨාභය රාජපක්ෂ මහතාගේ අනුදැනුම යටතේ පිහිටවූ රක්නා ආරක්ෂක ලංකා සමාගමේ අවි ගබඩාවේ මෙම අවි ගබඩාකර තිබිණ.මේ අවි ගබඩාව දැනට තිබෙන්නේ ගාල්ල නාවික හමුදා කඳවුරු අත්අඩංගුවේය.

ඇවන්ගාඩ් නෞකාව සම්බන්ධයෙන් පරීක්ෂණ පවත්වන පොලිසියට පවසන ආකාරයට එය රතු මුහුද කලාපයේ සිට ශ්‍රීලංකාව බලා පැමිණ තිබෙන්නේ නෞකාවේ ප්‍රවාහනය කෙරෙන්නේ අවි හා උණ්ඩ බව නොදන්වාය.එසේ සිදුකිරීම නීතිවිරෝධී බව කියති.

ඇවන්ගාඩ් සමාගමේ නීතිඥවරයා වන තිලක් මාරපන පසුගිය සතියේ පාර්ලිමෙන්තුවේ අදහස් දක්වමින් කියා සිටියේ සමාගම කිසිදු නීති විරෝධී කටයුත්තක නිරතව නොමැති බවයි.ඇවන්ගාඩ් සමාගම ගනුදෙනු කළේ ආරක්ෂක අමාත්‍යංශයේ සම්පූර්ණ හිමිකාරීත්වය යටතේ පවතින රක්නා ආරක්ෂක ලංකා සමාගම සමග පමණක් බවද ඔහු පැවසීය.

අංක මකාදමන ලද හා අංක වෙනස් කරන ලද අවි වලින් රජයකට ඇති ප්‍රයෝජනය කුමක් වන්නට ඇතිදැයි පොලිසිය විමසයි.අංක වෙනස් කර තිබීම නිසාම මෙම අවි වල හිමිකරුවන්ගේ අනන්‍යතාවය අනාවරණය කරගැනීමට හැකියාවක් නොමැත.මෙම අවි සාමය වෙනුවෙන් මිස ශ්‍රීලංකාවේ හෝ විදේශයක අපරාධ කටයුතු වලට යොදාගෙන නැතැයි පැහැදිලිව කීමේ හැකියාවක් මේ නිසාම නොමැත.

ඇවන්ගාඩ් නමින්ම පාවෙන අවි ගබඩාවක්ද සතු ඇවන්ගාඩ් මැරිටයිම් සර්විසස් සමාගම අවි ලබාගෙන ඇත්තේ අය හා එවක ආරක්ෂක ලේකම් ගෝඨාභය රාජපක්ෂ ඇතිකළ රක්නා ආරක්ෂක ලංකා සමාගම අතර පැවති එකඟතාවක් මත බව පැවසේ.

නවතම විගණන වාර්තාවෙන් අනාවරණයව තිබෙන පරිදි ඇවන්ගාඩ් නෞකාවේ තිබී හමුවූ අවි 816 අතර රක්නා ආරක්ෂක ලංකා සමාගම නිකුත් කර තිබෙන අවි සංඛ්‍යාව 203 කි.ඉතිරි අවි 613 කවුරුන්ගෙන් ලබගෙන ඇත්දැයි සඳහනක් නොමැත.

තමන් සතුව ඇති අවි මුහුදේ ඇති පාවෙන අවි ගබඩා වල ගබඩා කර තැබීමට මාර්ෂල්වරුන්ට හැකියාව ඇත.නමුත් මෙවන් පාවෙන අවි ගබඩාවලට නිදහසේ රැඳී සිටීමට අවසර ඇත්තේ අන්තර්ජාතික මුහුදු සීමාවේ පමණි.ඕනෑම රටක මුහුදු කලාපයකට මෙවන් පාවෙන අවි ගබඩාවක් ඇතුළු වන්නේ නම් ඊට අවසර ලබාගත යුතුය.ඇවන්ගාඩ් නෞකාවේ තිබෙන්නේ මෙසේ මාර්ෂල්වරුන් තබාගිය අවි නොවන බවට සහතිකයක් දීමේ හැකියාවක් දැනට නොමැති වුවත් එසේ යැයි කියා නිසි අවසරයකින් තොරව ශ්‍රීලංකා මුහුදු සීමාවට මෙම නෞකාව ඇතුළුවීම සාධාරණීකරණය කළ නොහැකි බව පොලිසිය  කියයි.

පොලිසිය හා නාවික හමුදාව පවසන අයුරින් ශ්‍රීලංකා මුහුදු කලාපයට ඇතුළුවීමට ඇවන්ගාඩ් නෞකාවට අවසර තිබී නොමැත.නෞකාව පරීක්ෂා කිරීමට නාවික හමුදා භට කණ්ඩායමක් ඊට ගොඩවුණු ඔක්තෝබර් මස 5 වැනිදාම ආරක්ෂක අමාත්‍යංශය විශේෂ ලිපියක් මගින් දැනුම්දී තිබෙන්නේ නෞකාවට ගාලු වරායට ඇතුළුවීමට අවසරය ලබාදුන් බවය.

මෙම අවසරය ලබාදුන් අතිරේක ලේකම්වරයෙකු බව කියන පුද්ගලයා සම්බන්ධයෙන් විශේෂ විමර්ෂණයක් පැවැත්වීමට අදාළ අංශ වෙත මේ වන විට උපදෙස් ලබාදී තිබේ.පසුගිය රෙජීමය යටතේ පවත්වාගෙන ගිය මෙවන් පෞද්ගලික ආරක්ෂක සේවා කටයුතු වලට අදටත් සහය දක්වන පිරිසක් වත්මන් රජයේම සිටී.

වත්මන් රජයේම අමාත්‍යවරුන් තිදෙනෙකු රක්නා ආරක්ෂක ලංකා හා ඇවන්ගාඩ් සමාගම් ආරම්භ කිරීම සම්පූර්ණයෙන්ම නීත්‍යානුකූලව සිදුව ඇතැයි පවසා සිටියද පසුගිය රජය සමයේ ආරක්ෂක අමාත්‍යංශයේ නියෝජ්‍ය ලේකම්වරිය පවසන්නේ ඊට හාත්පසින්ම වෙනස් දෙයකි.

ආරක්ෂක අමාත්‍යංශයේ හිටපු නියෝජ්‍ය ලේකම්වරිය වන දමයන්ති ජයරත්න මහත්මිය මහා පරිමාන දූෂණ හා වංචා පිළිඹඳ ජනපති කොමිසම ඉදිරියේ පවසා සිටියේ රක්නා ලංකා සමාගමට අවි ලබාදුනේනේ සම්පූර්ණයෙන්ම නීතියට පටහැනි ක්‍රියාමාර්ගයක් යටතේ බවයි.

‘‘පවතින නීතියට පටහැනිව අවි ලබාදුන්නේ බලපත්‍ර  නැතිව.රක්නා ආරක්ෂක ලංකා සමාගමට අවි 3473 ක් ලබාදුන්නා.ඒවායින් 89 ක් පමණයි නියම විදිහට බලපත්‍ර ඇතිව ලබාදුන්නේ.ඉතිරි ඒවා ඔක්කොම දීලා තියෙන්නේ නීති විරෝධී විදිහට.‘‘

ජනපති කොමිසම ඉදිරියේ අනාවරණය වූ කරුණුත් සමග මෙම විගණනයෙන් අනාවණයව තිබෙන කරුණු ගිනි ගෙන දැවෙන ඇවන්ගාඩ් ගිනිමැළයට පෙට්‍රල් කිරීමක් වැනි බව කියති.

රක්නා ලංකා සමාගමට නිකුත් කර තිබෙන අවි ප්‍රමාණයත් ගාල්ලේ පිහිටි එම සමාගම සතු අවි ගබඩාවේ තිබෙන අවි ප්‍රමාණයත් අතර පැහැදිලි වෙනසක් ඇති බවද විගණනයෙන් අනාවරණයව තිබේ.

ආරක්ෂක අංශ ආරංචි මාර්ග වලට අනුව රක්නා ලංකා හා ඇවන්ගාඩ් සමාගම් වලට හමුදා භට ඛණ්ඩයක (සටන් පුහුණුව ලත් 10000 ක පමණ) තරමේ පිරිසක් අනුයුක්තව සිටි ඇත.නමුත් ඔවුන්ට අණදෙන නිළධාරියෙක් සිට නොමැත.

ජාතික ආරක්ෂාව සැළකූ විට මෙවන් පෞද්ගලික හමුදාවක් සිටීම රජයේ ස්ථාවරභාවය ඉදිරියේ ඇති බරපතල තර්ජනයකි.

ස්ථීරසාර සංවර්ධන අමාත්‍ය ගාමණී ජයවික්‍රම පෙරේරා මහතා පාර්ලිමෙන්තුවේදී පවසා සිටියේ ඇවන්ගාඩ් සමාගමේ සේවකයින් තම ඡන්ද කොට්ඨාශයේ භීෂණයක් පතුරවමින් සිටින බවයි.ඒ බව මැතිවරණ කොමසාරිස්වරයාට දන්වන තෙක්ම සිටි පොලිසිය තමන් කළ පැමිණිලි සම්බන්ධයෙන් කිසිදු පියවරක් නොගත් බවත් ඔහු කීවේය.

අවි සම්බන්ධ විගණනයේදී රක්නා ආරක්ෂක ලංකා සමාගම වෙත ලබාදී තිබූ ස්වයංක්‍රීය ගිනි අවි 203 ක් ඒවා තිබූ සමාගමේ ගාල්ල අවි ගබඩාවෙන් අතුරුදන්ව තිබෙන බව සොයාගැනීමට හැකිව තිබේ.මෙම අවි සොයාගැනීමට වහාම පරීක්ෂණයක් ක්‍රියාත්මක කළ යුතුව ඇතැයි යෝජනාවක්ද එම විගණන වාර්තාවෙන් ඉදිරිපත් කර ඇත.