(රවින්ද්‍ර විරාජ් අබයසිරි, එම්.ඩබ්ලිව්.සෝමරත්න සහ ප්‍රසාද් ජයකොඩි)

මාතලේ මහවෙල මිල්ලවාන ප්‍රදේශයේ ඇතිවූ ඉඩම් ආරවුලක් දුරදිග යාමෙන් ඇති වූ ගැටුමකින් නාවික හමුදා සෙබළකු මරණයට පත්ව ඇති බව මහවෙල පොලිසිය පවසයි.

ගැටුමේදී මරණයට පත්ව ඇත්තේ මිල්ලවාන පහළ ගම ප්‍රදේශයේ පදිංචි ඉන්දික ප්‍රසාද් බණ්ඩාර නැමති වයස අවුරුදු 46 ක තිදරු පියකු වන ශ්‍රී ලංකා නාවික හමුදාවේ පලවි කඳවුරේ සේවයේ නියුතුව සිටි සෙබළකු වන අතර එම සිද්ධියට අදාළ සැකකරු මහවෙල පොලිසිය වෙත පැමිණ බාර වී ඇති බව පොලිසිය කියයි.

අදාළ සිද්ධියෙන් මරණයට පත්ව ඇති නාවික හමුදා සෙබළා තම නිවෙසට අයත් ඉඩමේ වැට සකස් කිරීම සිදුකරමින් සිටින අවස්ථාවේදී එම ඉඩමට යාබද ඉඩමෙහි අයිතිකරු සමග ඇතිවූ බහින් බස්වීමක් දුරදිගයාමෙන් ඇතිව ඇති ගැටුමේදී නාවික හමුදා සෙබළාගේ නිවෙසට යාබද නිවෙසේ පුද්ගලයා විසින් කැත්තකින් මුහුණ සහ බෙල්ල ප්‍රදේශයට සිදුකරන ලද පහරදීමකින් මෙම මරණය සිදුවන්නට ඇති බවට පොලිසිය සැක කරයි.