( තිළිණි ද සිල්වා )

රුසියානු සංචාරකයන් දහසකට ආසන්න පිරිසක් මේ මාසයේ සහ ඉදිරි මාසය තුල මෙරටට පැමිණෙනු ඇතැයි සංචාරක අමාත්‍යාංශය කියා සිටී.

මේ මාසය මාසය තුල මොස්කව් සිට කොළඹට පැමිණෙන සියලුම ශ්‍රී ලංකන් සමාගමට අයත්  ගුවන් යානා ආසන වෙන්කර ගැනීම සඳහා රුසියානු සංචාරකයන් කටයුතු කරමින් සිටින බවද  ඒ අනුව ශ්‍රි ලංකන් ගුවන් සමාගම  අද ( 09) , ලබන  16,  23 හා  30 වැනි දිනයන්හී මොස්කව් සිට මෙරටට සිදුකරන ගුවන් ගමන්වාර මගින් මෙරටට පැමිණීම සඳහා දහසකට ආසන්න පිරිසක් ආසන වෙන් කරගෙන ඇතැයි ද එම අමාත්‍යාංශය කියා සිටී.

සංචාරක ඇමති ප්‍රසන්න රණතුංග මහතාගේ උපදෙස් පරිදි ශ්‍රී ලංකා සංචාරක සංවර්ධන අධිකාරිය රුසියාව කේන්ද්‍ර කරගත් විශේෂ සංචාරක ප්‍රවර්ධන වැඩසටහනක් ආරම්භ කිරීමත් ,  ශ්‍රී ලංකන් ගුවන් සමාගම විසින් රුසියානු සංචාරකයන්ට හදුන්වා දුන් සංචාරක  සහන පැකේජයක් හේතුවෙන් එරට සංචාරකයන් වැඩි වශයෙන් ශ්‍රී ලංකාවට ආකර්ෂණය කර ගැනීමට හේතු වී ඇතැයි එම අමාත්‍යාංශය පෙන්වා දේ.

අවසන් වරය රුසියානු සංචාරකයන් වැඩිම පිරිසක් ශ්‍රී  ලංකාවට පැමිණ ඇත්තේ 2019 වසරේදී වන අතර  රුසියානු සංචාරකයන් සංඛ්‍යාව 86,000ක් එම වසරේදී පැමිණියේය. 2020 මාර්තු මාසයේ සිට මෙරට කොවිඩ් වසංගතය හේතුවෙන්  සංචරණ සීමා පැවතිය ද 2020 වසර තුලදී මෙරටට රුසියානු සංචාරකයන් 49,397ක් පැමිණ ඇතැයි සංචාරක සංවර්ධන අධිකාරිය පවසයි.

ඉදිරි මාස 02ක කාලය තුල මෙරටට රුසියානු සංචාරකයන්ගේ  පැමිණීමේ විශේෂ වර්ධනයක් දක්නට ලැබෙනු ඇතැයි අපේක්ෂා කෙරේ. වසර හයකට පසුව ශ්‍රී ලංකාව හා රුසියාව අතර සෘජු ගුවන් ගමන් ආරම්භ වූයේද ඉකුත් ජූලි 31 වැනිදා සිටය.