ඉස්තාන්බුල්හි රාති‍්‍ර සමාජ ශාලාවක නව වසර සමරමින් සිටි පිරිසකට ත‍්‍රස්තවාදී ප‍්‍රහාරයක් එල්ල වූයේය. මෙයින් 39 ක් මිය ගිය අතර 69 දෙනෙක් තුවාල ලැබූහ. මිය ගිය අය අතර ඉන්දියානුවෝ දෙදෙනෙකු ද වූහ. මින් එක් අයෙක් කෞෂි ෂාය. ඇය මෝස්තර නිර්මාණ ශිල්පිනියකි. ඇය අයත් වන්නේ ගුජරාටයටය. අනෙක් තැනැත්තා රිස්වි බිල්ඩර්ස් සමාගමේ ප‍්‍රධාන විධායක නිලධාරියා හා චිත‍්‍රපටි නිෂ්පාදකයෙකු වන අබිස් රිස්විය. ඔහු හිටපු මන්ති‍්‍ර කෙනෙකුගේ පුතෙකි. රෝර් චිත‍්‍රපටිය ඔහුගේ නිෂ්පාදනයකි. මේ චිත‍්‍රපටියේ සහාය තිර රචකයා වූයේ ද ඔහුය. තවත් බොලිවුඞ් චිත‍්‍රපටි කිහිපයක්ම ඔහු නිෂ්පාදනය කර තිබේ. සිය බිරිදත් එකම පුතුත්, දෙමව්පියනුත් සම`ග බන්ද්‍රා ප‍්‍රදේශයේ සුඛෝපභෝගී නිවසක වාසය කළ 49 හැවිරිදි අබිස්, සිය මිතුරන් සම`ග තුර්කියට ගියේ නිවාඩුවක් ගත කරන්නටය. ඉස්තාන්බුල් නගරයේ පිහිටි ජනපි‍්‍රය රාති‍්‍ර සමාජ ශාලාවක සිය මාරයා සැ`ගවී සිටි බව ඔහු සිහිනෙකින්වත් සිතන්නට නැත.

මේ ප‍්‍රහාරය බොලිවුඞ් පුරවරය ඇතුළු මුළු ලොවම කම්පා කරවන්නට සමත් වූයේය. බොලිවුඩයේ ජනපි‍්‍රය යුවළක් වන රාජ් කුන්ද්‍රා සහ ශිල්පා ෂෙට්ටි සිය ශෝකය පළ කරමින් ට්විටර් අඩවියට පණිවිඩ නිකුත් කර තිබිණි.

‘‘මගේ හො`දම යෙහෙළියක වගේම ජනපි‍්‍රය මෝස්තර නිර්මාණ ශිල්පිනියක වුණ කෞෂි ෂා ගේ මරණය ගැන අහන්න ලැබීමෙන් මම ලොකු කම්පාවකට පත් වුණා.. අලූත් අවුරුද්ද පටන් ගත්තෙ මොන තරම් භයානක පුවතකින්ද..? ඇය සමාදානයේ සැතපේවා..’’ රාජ් සටහන් කර තිබුණේ එලෙසය.

‘‘ජීවිතය කියන්නෙ හරිම අවිනිශ්චිත දෙයක්.. මිය ගිය අයගේ පවුල්වල උදවිය වෙනුවෙන් මගේ හිත හඬා වැටෙනවා.. ’’ ශිල්පා සටහන් කර තිබිණි.

‘‘දෙසැම්බර් 31 දා රෑ 10. 45 ට මම අබිස් රිස්විට කතා කළා.. අපි දෙන්නා චිත‍්‍රපටියක එකට වැඩ කරමිනුයි හිටියෙ... අපි කතා කළේ ඒ ගැන.. ඉන් පැය කිපයකට පස්සෙ මේ වගේ දෙයක් දැන ගන්න සිද්ද වෙයි කියලා මම හීනෙකින්වත් හිතුවෙ නෑ.. මේක මගෙ හිත එහෙම පිටින්ම කම්පා කරපු පුවතක්.. ඇත්තටම ඔහු ඉතාම සුන්දර මිනිහෙක්..’’ පුනීත් ඉසාර් එසේ පැවසුවේය.

චිත‍්‍රපටි නිෂ්පාදක මධුර් බන්දේර්කාර් පැවසුවේ ඔහු සහ අබිස් රිස්වි පාසැල් වියේ පටන්ම මිතුරන් බවය. හැම දිවාලි දිනයකම මධුර් සහ ඔවුන්ගේ අනෙක් පොදු මිතුරන් අබිස් ගේ නිවසට එක් වී සාදයක් පැවැත්වීමට පුරුදුව සිටියහ.

‘‘පහු ගිය දිවාලිවලින් පස්සෙ අපි හම්බ වුණේ නෑ.. ඒත් සතියකට ඉස්සර කතා කරලා අපි ළගදීම දවසක හම්බ වෙන්න යොදා ගත්තා.. දැන් ඉතින් ඒ හැම දේම ඉවරයි.. මට මේක දරා ගන්න බැරි තරම් කම්පාවක්.. විදේශ කටයුතු ඇමතිනී සුෂ්මා ස්වරාජ් මේ ශෝකජනක පණිවිඩය ට්විටර් අඩවියට නිකුත් කරලා තිබ්බ මොහොතෙම මම අපේ පොදු මිතුරන් කීප දෙනෙකුට කතා කළා.. ඊට පස්සෙ ඔහුගේ ගෙදරට ගිහින් දෙමව්පියොයි, සහෝදරියයි එක්ක කතා කළා.. හැම දෙනාම කියන්නේ මේක නපුරු හීනයක් කියලා..’’

මධුර් පැවසුවේය.

ඇසුරු කළ හැම දෙනාම පැවසුවේ ඔහු ඉතා විනෝදකාමී, සුන්දර මිනිසෙකු බවය.

‘‘රෝර් චිත‍්‍රපටියේ වැඩ කරන කාලෙදි ඔහු අපිට දැනුණෙ සමීප මිතුරෙක් විදියට මිසක් නිෂ්පාදකයෙක් විදියට නෙමෙයි.. ඔහු නිතරම අපිත් එක්ක කතාබහ කළා.. විහිළු කළා.. චිත‍්‍රපටිය අවසන් වුණාට පස්සෙත් ඒ සම්බන්ධකම් ඈත් වුණේ නෑ.. විශේෂයෙන්ම චිත‍්‍රපටියේ අධ්‍යක්ෂ කමල් සධානා එක්ක ඔහු ගේ තිබුණේ ලොකු සම්බන්ධයක්.. ඔවුන් පුංචි කාලේ ඉදන්ම අදුනන අය.. මේ ළ`ගදී දවසක ඔහු කතා කරලා කිව්වා අපේ කණ්ඩායම කාලෙකින් හම්බ වුණේ නෑ.. ඒ හින්දා අපි වෙනුවෙන් ඔහුගේ ගෙදර සාදයක් සංවිධානය කරනවා කියලා.. ඒත් අන්තිමේ අපිට අහන්න ලැබුණෙ මේ දුක්මුසු පුවත විතරයි.. ඇත්තටම මට හිතට දැනෙන දුක කියන්න වචන නෑ.. කමල් කිව්වෙත් ඔහු එහෙම පිටින්ම කඩා වැටුණා කියලා..’’

රෝර් චිත‍්‍රපටියේ රඟපෑ නිළියක වන අචින්ත් කවුර් එසේ පවසා තිබිණි.