අධික උෂ්ණත්වය හේතුවෙන් මනමා නුවර මධ්‍යම වෙළෙඳපොලේ එළවළු සහ පළතුරු වෙළෙඳුන් දැඩි පීඩාවකට ලක්ව සිටින අතර එහි ප්‍රතිඵලයක් ලෙසින් දෛනිකව සැළකිය යුතු අලාභයක් සිදුවන බව ඇතමෙක් පෙන්වා දෙයි.

මේ වසරේ ගිම්හානය ඉතා දැඩි බව පවසන එක් වෙළෙන්දෙක් වෙළෙඳ පොළ හඳුන්වා දෙන්නේ “රත්වූ උදුනක්” ලෙසිනි.

වෙළෙඳපොළේ තහඩු සෙවිලි කළ වහළය, වායුසමීකරණ යන්ත්‍ර ප්‍රමාණවත් නොවීම සහ ප්‍රමාණවත් ගබඩා පහසුකම් නොමැති වීමෙන් පැය කිහිපයක් ඇතුළත එළවළු සහ පළතුරු නරක් වන නිසා සෑම දිනකම එළවළු ටොන් කිහිපයක් වීසි කර දැමීමට සිදුවන බව වෙළෙන්දෝ පවසති.

අනෙක් අතට ගනුදෙනුකරුවන්ගෙන් බහුතරයක් දෙනා සුපිරි වෙළෙඳසැල් වෙත යාමට කැමැත්තක් දක්වන නිසා මේ දිනවල වෙළෙඳාමද පහළ වැටී ඇතැයි ඔවුහු පෙන්වා දෙති. මේ සම්බන්ධයෙන් අදහස් දක්වන ප්‍රාග්ධන භාරකාර මණ්ඩලයේ සභාපති මොහොමඞ් අල් කෝසායි පවසන්නේ මධ්‍යම වෙළෙඳපොළ වායුසමීකරණය කිරීමට අරමුදල් වෙන්කරවා ගැනීමට මණ්ඩලය මේ වන විටත් මුදල් අමාත්‍යාංශය සමග සාකච්ඡා කරමින් සිටින බවයි.
ප්‍රාග්ධන භාරකාර මණ්ඩලයේ යෝජනාවෙන් පසුව මධ්‍යම වෙළෙඳපොළ අලුත්වැඩියා කිරීමේ ව්‍යාපෘතිය සහ එහි නඩත්තු කටයුතු වෙනුවෙන් වැඩ, නගර සභා සහ නාගරික සැළසුම් අමාත්‍යාංශය විසින් බහරේන ඩිනාර් 270,000 ක මුදලක් වෙන්කර ඇත.

“අධික උෂ්ණය නිසා මධ්‍යම වෙළෙඳපොලේ ඇතිවී තිබෙන තත්ත්වය ගැන අපි දන්නවා. විශේෂයෙන්ම මෙවර ගිම්හානයේදී වෙළෙන්දන්ට විශාල වශයෙන් පාඩු සිද්ධ වෙනවා” යැයි අල් කෝසායි ගල්ෆ් ඬේලි නිවුස් පුවත්පතට පවසා ඇත.

“ඊද්වලට කලින් අපි මුදල් ඇමැතිවරයාව මුණ ගැසුණා. ඒ වෙලාවේදී අපි වෙළෙඳපොළ හැකි ඉක්මනින් වායුසමීකරණ යන්ත්‍ර සහිතව අලුත්වැඩියා කරන්න ඕනේ කියලා ඇමැතිවරයාට දැනුම් දුන්නා” 

“අලුත් වැඩියා කටයුතු සඳහා බහරේන ඩිනාර් 270,000 ක මුදලක් වෙන් කරලා තියෙනවා. ඒ මුදල මුදල් අමාත්‍යාංශයෙන් ලබාදෙනකම් තමයි අපි ඉන්නේ”
“දැනට තියෙන තත්ත්වය වෙළෙන්දන්ට හිතකර එකක් නෙමෙයි කියලා අපි දන්නවා. විශේෂයෙන්ම මේ නිසා එළවළු සහ පළතුරු වෙළෙන්දන් දැඩි පීඩාවකට ලක්වෙලා. මේ තත්ත්වයට ඉක්මනින් විසඳුමක් ලබාදෙන්න පුළුවන් වෙයි කියලා අපි විශ්වාස කරනවා”

දොඩම්, ලෙමන් සහ පීච් වැනි පළතුරු පැය හතරක් වැනි කෙටි කාලයකදී නරක් වන බව වෙළෙන්දෝ පෙන්වා දෙති. “මේ වගේ උෂ්ණත්වයකදී අපට ලැබෙන පළතුරු පෙට්ටිවල තියෙන පළතුරුත් අඳුරු පැහැ වෙලා තියෙන්නේ. ඒවා අපි වෙළෙඳපොලේ බෙදා හරින කොට රැළි වැටිලා ඒවායේ අලුත් ගතිය නැතිව යනවා” යනුවෙන් පවසන්නේ වෙළෙන්දෙක් වන සලාම් මම්බතුමෝලා ය.

මධ්‍යම වෙළෙඳපොලේ වෙළෙන්දන් භාණ්ඩ ලබාගන්නේ ජෝර්දානය, ලෙබනනය, සවුදි අරාබිය, ඕමානය, ඩුබායි, ඉන්දියාව සහ පාකිස්ථානය වැනි රටවලිනි.

“වෙළෙඳපොළ පාන්දර 3 ට විවෘත කරනවා. අපි හවස 4 වෙනකම් කඩ ඇරලා තියෙනවා. ඒත් දවල් 2 විතර වෙනකොට නරක් වූ බඩු අපි වීසි කරනවා”
“රතු මිරිස්, කූසා, පිපික්‍ද්ක්‍දා සහ ගෝවා වැනි එළවළු රෂ්ණය නිසා ඉක්මනින්ම නරක් වෙනවා”

“පීච්, චෙරි සහ ඒප්‍රිකට් වැනි පළතුරුවල අලුත් ගතිය පැය 4 කට වඩා තියෙන්නේ නැහැ... තක්කාලි ඊටත් වඩා කලින් නරක් වෙනවා”

“දවල් වෙන කොට අපි මිල අඩු කරනවා. එහෙම කරලත් හවසට මහ ගොඩක් වීසි කරන්න වෙනවා” යනුවෙන් පවසන්නේ අවුරුදු 13 ක් තිස්සේ මධ්‍යම වෙළෙඳපොළේ ව්‍යාපාර කරන වෙළෙන්දෙකි.

“සාමාන්‍යයෙන් මට දිනකට බහරේන ඩිනාර් 12 ක විතර පාඩුවක් වෙනවා” ඔහු වැඩි දුරටත් පවසයි.