චැනල් C රූපවාහිනි නාළිකාවේ නිවේදිකාවක ලෙස කටයුතු කරන නිලු තනාෂා වර්තමානයේ සිටින ජනප්‍රිය නිරූපණ ශිල්පිනියකි. දැනට වෙළෙඳ දැන්වීම් බොහෝ ප්‍රමාණයක දකින්නට ලැබෙන නිලූ පිළිබඳව රසික ඔබ දන්නා දේ අල්පයි. මේ නිසාම මෙවර 'සාරවිට' තරු කතාබහ තුළින් ඇයට ඉඩක් වෙන් කරන්න අපි සුදානම් වුණෙමු.

නිරූපිකාවක් විදිහට වැඩ කරන්න අරගෙන දැන් කොපමණ කල්ද?

අවුරුදු 3ක් විතර වෙනවා. 2014 අවුරුද්දෙ තමයි මම නිරූපිකාවක් විදිහට මේ ක්ෂේත්‍රයට ආවේ. හැබැයි ඊට කලින් මම රොසෑන් ඩයස් මහත්මියගේ 'මොඩ්ලින්' ඇකඩමියට සම්බන්ධ වෙලා ඒ පිළිබඳව හැදෑරීම් කළා. ඊට පස්සෙ තමයි නිරූපිකාවක් විදිහට වැඩ කරන්න පටන් ගත්තේ.

ඇයි නිලු නිරූපිකාවක් වෙන්න ආස කළේ?

මම මේ ක්ෂේත්‍රයට ගොඩක් ආසයි. ඒ වගේම මට නිරූපිකාවක් වෙන්න ලොකු උනන්දුවක් තිබුණා. ඊට අමතරව මම කලාවටත් ගොඩක් ආදරය කරන කෙනෙක්. මට හැකියාවකුත් තිබුණා. ඉතින් ඒ හැකියාවෙන් ප්‍රයෝජනයක් ගන්නත් එක්ක තමයි මම මේ ක්ෂේත්‍රයට සම්බන්ධ වුණේ. දෙවියන් වහන්සේ මට හොඳ රූපයක් දීලා තියෙනවා. ඉතින් මම ආස කළ වගේම මන් අද නිරූපිකාවක් විදිහට වැඩ කරනවා. ඒ ගැන ගොඩක් සතුටුයි.

වෙළෙඳ දැන්වීම්වලත් නිලු ඉන්නවා නේද?

ඔව්, දැනට මම බොහෝ වෙළෙඳ දැන්වීම් ප්‍රමාණයක මම රඟපාලා තියෙනවා. ඒ අතරින් 'ඩයලොග්', 'ග්ලුකොලින්', 'හැටන් නැෂනල් බැංකුව' ගොඩක් ජනප්‍රිය වුණ වෙළෙඳ දැන්වීම්. ඊට අමතරව ගීත රූප රචනා කිහිපයකටත් මම දායක වෙලා ඉන්නවා. දැනට චැනල් සී නාළිකාවේ වැඩසටහන් ඉදිරිපත් කරන්නියක් විදිහටත් මම කටයුතු කරනවා.

ලංකාවේ නිරූපණ ක්ෂේත්‍රය ගැන මොකද හිතෙන්නේ?

ඇත්තම කිව්වොත් ලංකාව කියන්නෙ තවමත් දියුණු වෙමින් පවතින රටක්. ඉස්සර නම් 'ෆැෂන්' කියන දේට ලංකාවේ තැනක් තිබුණේ නැහැ. නමුත්, අද ඒ තත්ත්වය වෙනස් වෙමින් පවතිනවා. දක්ෂ නිරූපිකාවක්, හොඳ විලාසිතා නිර්මාණකරුවන් වගේම කලාවට ගොඩක් ආදරය කරන පිරිස් බිහි වෙලා තියෙනවා. ඒ ගැන හිතුවොත් අද ලංකාවේ තියෙන නිරූපණ ක්ෂේත්‍රය ගැන ගොඩක් සතුටු වෙන්න පුළුවන්.

නිරූපිකාවක් හා වැඩසටහන් ඉදිරිපත් කරන්නියක් විදිහට අද ඔබ ඉන්න තැන ගැන මොකද හිතෙන්නේ?

නිරූපිකාවක් විදිහටත්, වැඩසටහන් ඉදිරිපත් කරන්නියක් විදිහටත් අද මම මේ ක්ෂේත්‍ර තුළ වැඩ කරනවා. මම හැමදාම උත්සාහ කරන්නේ මට පැවරෙන වැඩේදී මගේ උපරිමය යොදන්න. මම හිතනවා ඒ හරහා මට හොඳ නමක් මේ ක්ෂේත්‍රවලදී ලබාගන්න පුළුවන් කියලා. ඒ වගේම මේ ක්ෂේත්‍රවල මම ඉක්මන් ගමනක් අපේක්ෂා කරන්නේ නැහැ. හෙමින් හෙමින් මම මගේ ගමන යන්න තමයි මම සැලසුම් කරලා තියෙන්නේ.

උදව් කළ අය?

මගේ පවුලේ අයගෙන් මට කියලා නිම කරන්න බැරිතරම් සහයෝගයක් ලැබෙනවා. මාව නිරූපණ විදිහට මාව හැඩගස්සලා ගත්ත රොසෑන් ඩයස් මහත්මිය මට ගොඩක් උදව් කළා. ඇය තමයි මගේ නිරූපණ ගුරුවරිය. එතුමියගේ මඟපෙන්වීම නිසා මට මේ ක්ෂේත්‍රය තුළදී නමක් හදාගන්න ලොකු පිටුවහලක් වුණා. චමු ශ්‍රී අයියාවත් මම මේ වෙලාවේදී මතක් කරන්න ඕනා. ඊට අමතර නිරූපණ ක්ෂේත්‍රයේ මගේ යාළුවෝ හැම දෙනාවත් වචනයකින් හරි උදව් කළ නම් කියූ නොකියූ සියලු දෙනාවත් මේ වෙලාවේදී මම මතක් කරනවා.

බුද්ධික සේනාධීර