(ජේ.කේ.එල්. චාමින්ද)

නුවරඑළියේ පිහිටි  අඹේවෙල  කිරි කර්මාන්ත ශාලාව විසින් නිෂ්පාදනය කොට තිබු රුපියල් මිලියන 475.2ක් වටිනා කිරිපිටි  කිලෝග්‍රැම්  720,000ක  ප්‍රමාණයක් මිනිස්  පාරිභෝජනයට නුසුදුසු බැවින් 2018  වර්ෂයේ සිට 2022 දක්වා අතර කාලය තුලදි  සත්ත්ව ආහාර ලෙස   අලෙවිකොට ඇති බැව් ජාතික විගණන කාර්යාලය  මගින් නිකුත්කොට ඇති විගණන වාර්තාවක සදහන් වේ.

 මිනිස් පරිභෝජනයට නුසුදුසු  කිරිපිටි නිෂ්පාදනයට වගකිවයුතු  නිලධාරින් සම්බන්දයෙන් කිසිදු පරික්ෂණයක් පවත්වා නොතිබු බවද විගණන වාර්තාවේ සදහන් වේ.

 විනය පරික්ෂණයක් පවත්වා  මේ සදහා වගකිවයුතු  පාර්ශවයන්ගෙන් සිදුවි ඇති පාඩුව අයකරගත යුතු බවට විගණනය මගින් නිර්දේශකොට ඇත.

 කර්මාන්තශාලා නවිකරණ ව්‍යාපෘතිය යටතේ  නව යන්ත්‍රාගාරය සවිකිරිමෙන් පසු  2017 වර්ෂයේ දි නිෂ්පාදනය කළ කිරිපිටි කිලෝග්‍රැම් 771,652, ක් දෝෂ රහිත බවට පරික්ෂණ වාර්තා නිකුත්කොට තිබුණි.

මෙකි කිරිපිටි තොගය මිනිස් පාරිභෝජනයට නුසුදුසු බවට  පාරිභෝගික පැමිණිලි හේතුවෙන් නැවත ගබඩාව වෙත  ගෙන්වා ගෙන තිබුණි. සත්ත්ව අහාර සදහා අලෙවිකිරිමෙන්  පසු ඉතිරි කිරිපිටි කිලෝග්‍රැම් 561,264 2022 වර්ෂයේ  දෙසැම්බර් මස 31 දින වනවිට අඹේවෙල ගබඩාවේ ගබඩාකර තිබුණි.

 මේ පිළිබද එම සමාගමේ කළමණාකාරිත්වය විසින් විගණනයට සදහන් කොට ඇත්තේ  මිනිස් පරිභෝජනයට නුසුදුසු ඉතිරි කිරිපිටි  තොගයද විකිණිමට කටයුතු කරණු ලැබු අතර  එම තොග ඉවත්කරගැනිමට කටයුතු කර ඇති බවය.