(   සිතුම් චතුරංග)

රුපියල් ලක්ෂ පහක කප්පමක් ලබාගැනීම සඳහා කාන්තාවක් පැහැරගෙන  ගිය සිවිල් ආරක්ෂක භටයකු ඇතුළු පුද්ගලයින් සිව්දෙනකු වවුනියාව ආච්චිපුරම් ප්‍රදේශයේදී අත්අඩංගුවටගත් බව පූවරසන්කුලම පොලිසිය කියයි.

අපරාධ පරීක්ෂණ දෙපාර්තමේන්තු නිලධාරීන් ලෙස පෙනී  සිටිමින් පසුගිය 11 වැනිදා සිවිල් ආරක්ෂක භටයා ඇතුළු පිරිස කාන්තාව පැහැරගෙන ගොස් වවුනියාව ආච්චිපුරම් හි පාළු නිවසක සිරකර ඇයගේ දියණියට දුරකථන ඇමතුම් ලබාදී කප්පම් මුදල් ඉල්ලා ඇති බවද පොලිසිය පැවසීය.          

පැහැරගත් කාන්තාව විදේශරටවල්වල සේවය සඳහා පිරිස් යවන කාන්තාවක් බවත් ඇය සැකකරුවන් සමඟ තිබූ මුදල් ආරවුලක් හේතුවෙන් මෙම පැහැරගැනීම සිදුකොට ඇති බවට විමර්ශනවලදී අනාවරණයවූ බවත් පොලිසිය සඳහන් කළේය.

කොළඹ ප්‍රදේශයේ සිට නැවත නිවසට පැමිණෙමින් සිටියදී කාන්තාව පැහැරගෙන ඇයගේ දියණියට ඇමතුම් ලබාදෙමින් සැකකරුවන් පවසා ඇත්තේ තමන් අපරාධ පරීක්ෂණ දෙපාර්තමේන්තු නිලධාරීන් බවත් විමර්ශනයක් සඳහා මව අත්අඩංගුවටගෙන ඇති බවත්ය.

මුදලින් ලක්ෂ පහක් ගෙවා මව ගෙදර ගෙනියන ලෙසත් මුදල් නොදෙන්නේනම් අම්මාගේ මිනිය නිවසට එවන බවත් පවසා ඇතැයි පැමිණිල්ලේ සදහන් බව පොලීසිය කියයි.

පැහැරගත් කාන්තාවගේ දියණිය දුරකථන ඇමතුම ලැබු සැණින් පූවරසන්කුලම පොලිසිය සිදුකළ පැමිණිල්ලක් අනුව පොලිස් උපාය ධූතයින් යොදවා සැකකරුවන් හට මුදල් ලබාදෙන මුවාවෙන් මෙම වැටලීම සිදුකළ බවත් එහිදී පාලු නිවසක රඳවා සිටි කාන්තාව නිරුපද්‍රිතව බේරාගැනීමට හැකිවූ බවද පොලිසිය පැවසීය.

කාන්තාව පැහැරගැනීම සඳහා යොදාගත් ත්‍රීරෝද රථ දෙකක් එම ස්ථානයෙන් පලාගොස් තිබූ අතර එම ත්‍රීරෝද රථ සහ එහි රියදුරන් දෙදෙනකු සොයා විමර්ශන සිදුකරන බවත් කීය.

සැකකරුවන් වවුනියාව , කිලිනොච්චිය , මුලතිව් ප්‍රදේශයේ පදිංචි 26ත් 49 අතර වයසේ පසුවන්නෝ වෙති.