(එෆ්.අස්ලම්)
 
කඳුරට ජනතා පෙරමුණේ නිර්මාතෘ පෙරියසාමි චන්ද්‍රසේකරන් මහතාගේ දියණිය වන අනූෂා චන්ද්‍රසේකරන් මහත්මිය පක්ෂයේ නියෝජ්‍ය මහලේකම් ධූරයෙන් සහ  සාමාජිකත්වයෙන්  ඉවත් කිරීමට එම පෙරමුණේ ජාතික සභාව විසින් පියවර ගනු ලැබීය.
 
ඇය විසින් දැරූ නියෝජ්‍ය මහ ලේකම් ධූරය සඳහා කදුරට ජනතා පෙරමුණේ මුදල් ලේකම් ධූරය දැරූ මහාචාර්ය  විජයචන්ද්‍රන් මහතා පත් කිරීමට  තීරණය කර තිබෙන  බව එම පෙරමුණේ නායක පාර්ලිමේන්තු මන්ත්‍රී වී.රාධාක්‍රිෂ්ණන් මහතා පැවසීය.
 
හැටන් හි පිහිටි කදුරට ජනතා පෙරමුණේ ප්‍රධාන කාර්යාලයේ පැවති ජාතික සභා රැස්වීමේ දී මෙම තීරණය   ගත් බවද හෙතෙම කීය.
 
කඳුරට ජනතා  පෙරමුණේ නියෝජ්‍ය මහ ලේකම් ධූරය දැරූ   අනූෂා චන්ද්‍රසේකරන් මහත්මිය  පක්ෂ ව්‍යවස්ථාවට පටහැනිව පක්ෂයට විරුද්ධ ක්‍රියාකාරකම්වල නිරතවීම යන චෝදනා මත  ඇයව පක්ෂ සාමාජිකත්වය ඇතුළු සියළු තනතුරු වලින්  ඉවත් කළ බවද  රාධාක්‍රිෂ්ණන් මහතා කීය.
 
කඳුරට ජනතා පෙරමුණ සමගි ජන බලවේගය හා එක්ව මැතිවරණයට තරග කළද  එම පෙරමුණේ නියෝජ්‍ය මහ ලේකම් අනූෂා චන්ද්‍රසේකරන් ඇතුළු කණ්ඩායමක් විසින් එම පෙරමුණ නියෝජනය වන  ස්වාධීන කණ්ඩායමක් වශයෙන් පසුගිය පාර්ලිමේන්තු මහ මැතිවරණයට නුවරඑළිය  දිස්ත්‍රික්කයෙන් තරග කර  ඡන්ද 17,107 ක් හිමිකර ගත්හ.
 
කඳුරට ජනතා පෙරමුණේ මෙම තීරණය සම්බන්ධයෙන් අදහස් දක්වමින් අනූෂා චන්ද්‍රසේකරන් මහත්මිය සදහන් කර සිටියේ ජාතික සභාව නියෝජනය කරන තමන් ඇතුළු තමන් හා එක්ව සිටි නියෝජිතයින් කැඳවීමකින් තොරව මෙම තීරණය ගෙන ඇති බවයි.
 
කඳුරට ජනතා පෙරමුණ වෙනුවෙන් තමන් පෙනී සිටි බවත් තමා යන්නේ තම පියාගේ අඩිපාරේ බවත් එය නුවරඑළිය දිස්ත්‍රික්කයෙන් තමන්ට ඡන්දය ලබාදුන් 17,107ක ජනතාව ඊට සාක්කි බවත් පක්ෂයේ මෙම තීරණය  කිසිවිටක පිළි නොගන්නා බවත් අනූෂා චන්ද්‍රසේකරන් මහත්මිය සදහන් කළාය.
 
මීට අමතරව කදුරට ජනතා පෙරමුණේ ජාතික සභාව විසින් තවත් තීරණ කිහිපයක් ගෙන තිබිණි. ඒ අනුව කඳුරට ජනතා පෙරමුණට  සම්බන්ධ ගුරු පෙරමුණේ  ලේකම්  එස්.රවීන්ද්‍රන් මහතාද එම ධූරයෙන් හා  ඉවත් කිරීමට තීරණය කර තිබේ.
 
එමෙන්ම කඳුරට ජනතා පෙරමුණ  නියෝජනය වන වතුසේවක  සංවිධානයක් පිහිටුවීමටත්, පක්ෂ නියෝජිතයින්  25 දෙනෙකුගෙන් යුත් පරිපාලන සභාවක් අලුතින් පත් කිරීමටද තීරණය කර ඇත.