ආර්ථික සහ වාණිජ අමාත්‍යාංශය විසින් කර්මාන්ත පුරවරයේ ගරාජවල තිබී ව්‍යාජ වාහන අමතර කොටස් 1,539 ක් අත්අඩංගුවට ගෙන ඇත. අමාත්‍යාංශය විසින් මෑතකදී සිදුකළ නිරීක්ෂණවලදී මෙම අමතර කොටස් තොගය සොයාගෙන තිබේ.

ව්‍යාජ අමතර කොටස්වලින් වාහනයේ ක්‍රියාකාරීත්වයට අහිතකර බලපෑමක් සිදුවන නිසා එවැනි අමතර කොටස් පරිභෝගිකයන්ගේ ආරක්ෂාවට විශාල තර්ජනයක් බව අමාත්‍යාංශය විසින් නිකුත් කර ඇති නිවේදනයක දැක්වේ.

ව්‍යාජ භාණ්ඩවලට අදාළ උල්ලංඝනය කිරීම් අනාවරණය  කරගැනීම සහ අසාධාරණ ලෙසින් මිල ඉහළ දැමීම වැනි කරුණු වැළැක්වීම සඳහා වෙළෙඳපොළ සහ වෙළෙඳ කටයුතු නිරීක්ෂණය කිරීම සඳහා අමාත්‍යාංශය විසින් ආරම්භ කර ඇති වැඩසටහන් මාලාවේම පියවරක් ලෙසින් ඉහත වැටලීම ක්‍රියාත්මක කළ බවද එම නිවේදනයේ වැඩිදුරටත් දැක්වේ.

ව්‍යාජ භාණ්ඩ සම්බන්ධයෙන් අදාළ වන්නේ 2008 අංක 8 දරණ නීතියේ 7 වැනි වගන්තියයි. යම් භාණ්ඩයක සැපයුම්කරුවා විසින් එම භාණ්ඩයේ සවිස්තරාත්මක තොරතුරු සහ එහි අදාළ වන දෑ ඉතා පැහැදිලිව නිෂ්පාදන ලේබලයේ සටහන් කළ යුතු බවත් ඊට කිසිදු නොමග යවනසුළු හෝ වැරැදි තොරතුරක් ඇතුළත් නොකළ යුතු බවටත් එම නීතියේ සඳහන් වෙයි.

2008 අංක 8 දරණ නීතිය උල්ලංඝන කළහොත් එම වෙළෙඳසැල වසා  දැමීම හෝ කටාර් රියාල් 3000 ක අවම දඩයක  සිට කටාර් රියාල් මිලියනය දක්වා වූ දඩයක් දඬුවම් ලෙසින් නියම කළ හැකිය. 

පාරිභෝගික ආරක්ෂණ නීතිය උල්ලංඝනය කරන වෙළෙඳසැල්  අනාවරණය කරගැනීම සඳහා තවදුරටත් වැටලීම් ක්‍රියාත්මක කරන අතරම නිරන්තරයෙන්ම පාරිභෝගික අයිතිවාසිකම් ආරක්ෂා කිරීමට කටයුතු කරන බවද අමාත්‍යාංශය සිය නිවේදනය හරහා වැඩිදුරටත් අවධාරණය කර තිබේ.

පාරිභෝගික ආරක්ෂණ නීතිය උල්ලංඝනය කිරීම පිළිබඳ තොරතුරු සෘජුවම පාරිභෝගික ආරක්ෂණ සහ වාණිජ වංචා මර්දන දෙපාර්තමේන්තුවට හෝ 16001 අංකයට හෝ [email protected] ඊමේල් ලිපිනයට හෝ MEC_QATAR හරහා අමාත්‍යාංශයේ ට්විටර් ගිණුමට එවන ලෙස ආර්ථික සහ වාණිජ අමාත්‍යාංශය මහජනතාවගෙන් ඉල්ලීමක් කරයි.