සිය අධ්‍යාපන කටයුතු සිදුකරන ඇය නිරූපණ ශිල්පය පිළිබඳ හැදෑරීම් සිදුකරමින් කලා ක්‍ෂේත්‍රයට පැමිණ තිබේ. වෙළෙඳ දැන්වීම් හා රූප රචනා කිහිපයකටම දායකත්වය ලබාදී ඇති ඇය නමින් අලෝරා පෙරේරාය. ඇගේ ඉදිරි කලා කටයුතු සහ අධ්‍යාපන කටයුතු පිළිබඳ ‘සාරවිට’ අප සමගින් මෙලෙස දොඩමළු වූවාය.

ඔබේ නම කිව්වොත්?

මගේ නම අලෝරා පෙරේරා.

ඉගෙන ගන්නවාද? නැත්නම් රැකියාවක් කරනවාද?

ඇත්තටම මම ඉගෙන ගන්න ගමන් නිරූපණ කටයුතු කරනවා.

ඉගෙන ගන්න ගමන් නිරූපණය කරන එකට ගෙදරින් බාධාවක් නැද්ද?

මෙහෙමයි. බාධාවක් වෙන්නේ නැහැ. මොකද මම මේ විෂයන් දෙකම බැලන්ස් කරන නිසා මට ගෙදර අය උදවු කරනවා. එයාලගේ ආශීර්වාදයත් තියෙනවා.

නිරූපණයට එකතු වුණේ කොයි කාලේද?

දැනට අවුරුද්දක් කාලයක් වෙනවා.

නිරූපණයෙන් දායක වුණ වැඩ ගැන කිව්වොත්?

බ්‍රයිඩල් ෂෝ, ඉවෙන්ට්ස්, ටීවී කෝමර්ෂල් සහ මියුසික් වීඩියෝ මේ හැමදෙයකටම දායක වුණා.

වෙළඳ දැන්වීම් සහ මියුසික් වීඩියෝ මොනාද කියලා කිව්වොත්?

වෙළෙඳ දැන්වීම හා මියුසික් වීඩියෝ දැනට ගොඩක් කරලා තියෙනවා. මට මතක ඒවා කියන්නම්, එටිසලාට්, ලංවා කම්බි දැන්වීම් කරලා තියෙනවා. මියුසික් වීඩියෝ නම් මතක නැහැ.

නිරූපණය ගැන මොකද හිතෙන්නේ?

නිරූපණය කියන්නෙත් එක් කලාවක්. මම හිතන්නෙ ඒ කලාව තුළ තේරුම් අරන් වැඩ කළොත් ඉස්සරහට යන්න පුළුවන් කියලා. වැරැද්දක් දකින්නේ නැහැ. හරි විදිහට කරනවානම් නිරූපණය හොඳයි.

නිරූපිකාවක්ට අද පිළිගැනීමක් ලැබෙනවාද?

ඇත්තටම පිළිගැනීමක් නැත්තෙත් නැහැ. සීමිත ප්‍රමාණයකට පමණක් මම හිතන්නෙ ඔය පිළිගැනීම තියෙනවා. අපි සමාජයේ ඉස්සරා කරන දේවල් මිනිස්සුන්ට පේනවා. ඉතිං ඒ අනුව තමයි පිළිගැනීමක් තියෙනවද? නැද්ද යන්න තීරණය වෙන්නේ.

ඉදිරි බලාපොරොත්තු කිව්වොත්?

මම බලාපොරොත්තු ගොඩක් තියෙනවා. මගේ පළවෙනි දේ තමා ඉගෙනීම් කටයුතු. ඊට පස්සේ තමයි නිරූපණය. ඒ වගේම  රංගනයට දායක වෙන්න බලාපොරොත්තුවක් තියෙනවා.

එතකොට රැකියාවක් වශයෙන් තෝරගන්නේ මොකක්ද?

මෙහෙමයි මං තාම ඉගෙන ගන්නවා. මම දැනට හෙද අධ්‍යාපනය හදාරනවා. ඒ අංශයෙන් ඉදිරියට යන්න තමා මගේ අරමුණ.

එතකොට කලාව සමුදෙනවාද?

මෙහෙමයි. වැඩිදුර අධ්‍යාපනය සඳහා මට විදේශ ගත වෙන්න බලාපොරොත්තුවක් තියෙනවා ඒ කාලේ මං අයින් වුණත් කලාවට සමුදෙන්න කිසි බලාපොරොත්තුවක් නැහැ. කොහොම හරි ඉතිං මට කරන්න පුළුවන් දේවල් මම කරනවා.

ඔයාගේ ගමනට උදව්කරපු පිරිසක් ඉන්නවාද මතක් කරන්න?

ගොඩක් අය උදවු කළා. නම් වශයෙන් කියන්න අමාරුයි මොකද ලොකු පිරිසක් මට උදවු කරපු නිසා. නම් වශයෙන් මතක් කරන්න ඕනේ මහේෂ් මධුසංඛ අයියාව සහ ඩිලාන් මධුසංඛ අයියාව. ඒ වගේම මගේ ගෙදර අයගෙන් ලොකු සහයෝගයක් ලැබුණා.

ඒ මට මේ තැනට එන්න උදවු කරපු හැමෝම මේ වෙලාවේ මං මතක් කරනවා. එයාලට ගොඩක් ස්තූති කරනවා. මොකද එයාලා නිසයි මම අද මෙතන ඉන්නේ.

ඩිලාන් ක්‍රිෂාන්ත / ඡායාරූප - පසන් සෙනවිරත්න