(සුජිත් හේවාජුලිගේ  සහ  ලංකාපුර හෙන්රි ලයනල්)

රුපියල් කෝටි ප්‍රකෝටි ගණනින් වැය කරමින් ඉදිකර කිසිදු ප්‍රයෝජනයකට නොගෙන  කැලෑ වැදී ඇති වටිනා ගොඩනැගිලි දහසකට වැඩි සංඛ්‍යාවක් සම්බන්ධයෙන් තොරතුරු ලැබී ඇති හෙයින්  ඒ   සම්බන්ධයෙන් තෝම්බුවක් සකස් කිරීමට කටයුතු කරගෙන යන බව  පරිසරය ස්වභාවික සම්පත් සහ තිරසර සංවර්ධනය පිළිබඳ ආංශික අධීක්ෂණ පාර්ලිමේන්තු කාරක සභාවේ සභාපති  ඉන්ජිනේරු අජිත් මාන්නප්පෙරුම මහතා  පැවසීය.

අනතුරුව එම ගොඩනැගිලි සම්බන්ධයෙන් අදාල පාර්ශ්ව කමිටුව හමුවට කැඳවා ප්‍රශ්න කර ඒවා ප්‍රයෝජනයට ගැනීම සඳහා නිර්දේශ නිකුත් කිරීමට බලාපොරොත්තු වන බව  පැවසූ මන්ත්‍රීවරයා රට පුරා එවැනි ගොඩනැගිලි අදාළ ප්‍රදේශවලට වරින් වර ගොස්   නිරීක්ෂණය කිරීමට පියවර ගන්නා බවද සඳහන් කළේය.

මේ අතර  කිසිදු ප්‍රයෝජනයකට නොගෙන කැලෑ වැදී ඇති  පොළොන්නරුව  නව නගරයේ  මහල් පහකින් සමන්විත කාර්යාල ගොඩනැගිලි සංකීර්ණය නිරීක්ෂණය කිරීමට පරිසර, ස්වභාවික සම්පත් සහතිරසර සංවර්ධනය පිළිබඳ ආංශික අධීක්ෂණ කාරක සභාවේ සභාපති අජිත් මාන්නප්පෙරැම  මහතා ඇතුළු එහි නිලධාරීහු කණ්ඩායමක් පෙරේදා (4) නිරීක්ෂණ චාරිකාවක නිරත වූහ.

මෙම ව්‍යාපෘතියට වැයකර ඇතැයි පැවසෙන මුදල රුපියල් කෝටි 150කි.

අද එම ගොඩනැගිල්ල වවුලන් ලගින ස්ථානයක් බවට පත්ව ඇතැයි පවසන එම කාරක සභාව ගොඩනැගිල්ල වහාම ප්‍රයෝජනයට ගැනීමට වැඩපිළිවෙළක් සකස් කරන ලෙස අදාල රාජ්‍ය නිලධාරීන්ට උපදෙස් දුන්නේය.

උතුරුමැද ආණ්ඩුකාරවරයාගේ පොළොන්නරුව දිස්ත්‍රික් කාර්යාලයීය රැස්වීම් ශාලාවේදී පැවැති මෙම හමුවට පොළොන්නරුව දිස්ත්‍රික් ලේකම් සුජන්ත ඒකනායක මහතාද ප්‍රාදේශීය සෞඛ්‍ය සේවා අධිකාරී  කාර්යාලය  නාගරික සංවර්ධන අධිකාරිය ඇතුළු රාජ්‍ය ආයතන රැසක ප්‍රධානීහුද   සහභාගීවූහ.

මෙම ගොඩනැගිලි සංකීර්ණයේ  ඉතා ඉක්මනින් රාජ්‍ය ආයතන ස්ථාපිත කිරීමට දිස්ත්‍රික් ලේකම්ගේ ප්‍රධානත්වයෙන් කමිටුවක් පිහිටුවා  වහාම ක්‍රියාත්මක වන ලෙසට ආංශික කමිටු සභාපතිවරයා  උපදෙස් දුන්නේය.

මෙම කාර්යාලීය  සංකීර්ණයට අදාළ නිල නිවාස පමණක්  භාවිත කර ඇතත් රාජ්‍ය ආයතන පිහිටුවීමට උනන්දුවී නැතැයි කමිටුව කළ විමර්ශනවලදී හෙළිවී ඇත.