පැට්‍රෝලියම් නිෂ්පාදන ජාවාරම්වලට වැට බඳින 2016 අංක 06 දරන නීතිය කටාර්හි එමීර් ෂෙයික් ටාමිම් බින් හමාඞ් අල් තානි මහතා විසින් පසුගියදා නිකුත් කරනු ලැබීය. නව නීතියට අනුව, ඛනිජ තෙල් නිෂ්පාදන ජාවාරමේ යෙදෙන ඕනෑම පුද්ගලයකුට වසර 10 ක් දක්වා වූ සිර දඬුවමක් සහ කටාර් රියාල් මිලියනයක් දක්වා වූ දඩයක් නියම වනු ඇත.

එසේම තම ඛනිජ තෙල් කෝටාව විකුණන හෝ නැවත විකුණන හෝ එය නියමිත කාර්යයෙන් පිට වෙනත් කාර්යයන් සඳහා යොදා ගන්නා ඕනෑම පුද්ගලයකුට වසර 3කට නොවැඩි සිරදඬුවමක් හෝ කටාර් රියාල් 500,000කට නොවැඩි දඩයක් හෝ මේ දෙකම නියම කළ හැකිය.

නව නීතියට අනුව ඛනිජ තෙල් නිෂ්පාදන යනු හයිඩ්‍රෝකාබන් හෝ වෙනත් අදාළ අමුද්‍රව්‍යයක් යොදා ගනිමින් පිරිපහදුවක් තුළදී නිෂ්පාදනය කරන ඕනෑම නිෂ්පාදනයක් වන අතර ඊට ඩීසල්, ගෑස්, තෙල්, එල්පීජී, බෙන්සීන්, පැට්‍රෝල්, භූමිතෙල්, ගුවන් යානා ඉන්ධන, එංජින් සඳහා යොදන තෙල් සහ ලිහිසි තෙල් වෙයි. මෙම නිෂ්පාදන බලපත්‍රයක් නොමැතිව අලෙවි කිරීම හෝ නැවත අලෙවිය, ව්‍යාජ ලියකියවිලි යොදා ගනිමින් එම නිෂ්පාදනවලට සම්බන්ධ ගනුදෙනු සිදුකිරීම මෙන්ම නම් කරන ලද කාර්යයෙන් පරිබාහිරව වෙනත් කාර්යයක් සඳහා එම නිෂ්පාදන යොදා ගැනීම ඉහත නීතියෙන් තහනම් කර තිබේ.

එසේම ඇටෝර්නි ජෙනරාල්වරයාගේ අනුමැතියට යටත්ව කටාර් පැට්‍රෝලියම් ආයතනයේ පරීක්ෂකයන්ට ඉහත නීතියෙන් අධිකරණ බලතල ලබාදී ඇති නිසා ඔවුන්ට නීතිය උල්ලංඝණය කරන්නන්ට විරුද්ධව නීතිමය පියවර ගැනීමට හැකියාවක් ඇත.