ප්‍රංශ පුවත් සේවයේ (ඒ.එෆ්.පී) පුවත් වාර්තාවක් ඇසුරිනි

සැකසුම - හර්ෂණ තුෂාර සිල්වා

ශ්‍රී ලංකාවේ හත්වැනි විධායක ජනාධිපතිවරයා තෝරා පත්කරගැනීමේ ඡන්ද විමසීම අද (16) පස්වරු 5.00 ට අවසන් විය. ජනාධිපතිවරණයේ ඡන්ද විමසීම අවසන් වුවත් එහි උණුසුම එන්න එන්නම වැඩිවෙමින් තිබේ. ජනාධිපතිවරණයේ හොඳම සටන පැමිණෙන්නේ මැතිවරණ ප්‍රතිඵල නිකුත් වීම ආරම්භ වීමත් සමඟය.

ජනාධිපතිවරණයේ මැතිවරණ ප්‍රචාරණ කටයුතු ආරම්භ වූ සමයේදී තරමක උදාසීන බවක් තිබුණ ද ඡන්ද ගණන් කිරීම ඇරඹෙද්දී ජනාධිපතිවරණ සටනින් ජයගන්නේ කවුදැයි ජාත්‍යන්තරය විමසිල්ලෙන් පසුවෙයි.

ජාත්‍යන්තර අවධානය හොඳ මෙන්ම නරක අතට ද බලපාන බව පැහැදිලි කාරණාවකි.

යුද්ධයෙන් පසු ගෙවී ගිය වසර දහයක කාලය මුළුල්ලේම ශ්‍රී ලංකාවට මානව හිමිකම් කඩකිරීම් සම්බන්ධයෙන් චෝදනා එල්ල විය. ඊට අමතරව ශ්‍රී ලංකාව තුළ චීනයේ ක්‍රියාකාරකම්, චීනය ශ්‍රී ලංකාවට ලබාදෙන ණය, චීනය ශ්‍රී ලංකාව තුළ කරන සංවර්ධන ව්‍යාපෘති සම්බන්ධයෙන් වැඩි අවධානයක් යොමු විය.

විශේෂයෙන්ම බටහිර රටවල අවධානය ඊට වැඩි වශයෙන් යොමු වුණු අතර ශ්‍රී ලංකාව ණය උගුලක සිර වී ඇතැයි ද එම රටවලින් චෝදනා එල්ල විය. චීනය මැදිහත්වීම සම්බන්ධයෙන් ඉන්දියාව සිටියේද නොසතුටිනි.

දකුණු ආසියාවේ මෙන්ම ඉන්දීය සාගර කලාපයේද භූගෝලීය වශයෙන් මෙන්ම දේශපාලනික වශයෙන්ද ඉතාමත් වැදගත් ස්ථානයක පිහිටා තිබෙන ශ්‍රී ලංකාවට එපිටින් මුහුදේ උපායමාර්ගික වශයෙන් වැදගත් මුහුදු මාර්ග දිවෙයි. මේ නිසාම කලාපීය බලවතුන් මෙන්ම ගෝලීය වශයෙන් ද බලවත් රටවල් පවා ශ්‍රී ලංකාව සම්බන්ධයෙන් අවධානය යොමු කරයි.

ගෝඨාභය රාජපක්ෂ මහතා ජයග්‍රහණය කළහොත් මානව හිමිකම් සම්බන්ධයෙන් විදේශවලින් වැඩි සැලකිල්ලක් මෙන්ම විමසිල්ලක්ද යොමුවනු ඇත. එමෙන්ම උපායමාර්ගික ස්ථානයක පිහිටා තිබෙන ශ්‍රී ලංකාව චීනය දෙසට වන නැඹුරුව වැඩි වනු ඇතැයි ද පැවසේ.

2009 වසරේදී 37 වසරක යුද්ධය අවසන් කිරීම නිසා සිංහල බහුතරයක් වෙසෙන ශ්‍රී ලංකාවේ එම ජනකොටස අතර මහින්ද සහ ගෝඨාභය රාජපක්ෂ යන මහත්වරු ජනප්‍රියත්වයටත් ජනාදරයටත්  පත්වූහ. යුද්ධයේ අවසන් සමයේදී ආරක්ෂක අංශ ගෝඨාභය රාජපක්ෂ මහතා විසින් මෙහෙයවනු ලැබු බව පැවැසෙන අතර එම කාලයේදී දෙමළ සිවිල් වැසියන් 40,000කට ආසන්න පිරිසක් ඝාතනයට ලක්වූයේ යැයි ද විදේශීය රටවලින් චෝදනා එල්ල වේ.

යුද්ධය අවසන් වූ පසුව ගෝඨාභය රාජපක්ෂ මහතාගේ අනුදැනුම යටතේ විවිධ කල්ලි කණ්ඩායම් ක්‍රියාත්මක වූ බවත් ඔවුන් දෙමළ ජාතිකයන් පමණක් නොව දේශපාලන විරුද්ධවාදීන් හා මාධ්‍යවේදීන් පැහැරගත් බවටත් ඝාතනය කළ බවටත් ඔහුට විරුද්ධව චෝදනා එල්ල වී තිබේ. කෙසේ නමුත් ගෝඨාභය රාජපක්ෂ මහතා එම චෝදනා සියල්ල ප්‍රතික්ෂේප කරයි.

මහින්ද රාජපක්ෂ මහතාගේ පාලන සමය “අඳුරු දශකය” බවත් තම රාජකාරිය ඉටු කිරීම නිසා එම සමයේදී ආසන්න වශයෙන් මාධ්‍යවේදීන් 14 දෙනකු ඝාතනයට ලක්වූ බවත් දේශසීමා විරහිත වාර්තාකරුවන්ගේ සංවිධානය වාර්තා කරයි.

යටිතල පහසුකම් සංවර්ධනය කිරීමේ ව්‍යාපෘති සඳහා චීනයෙන් විශාල ලෙස ණය ගනිමින් ශ්‍රී ලංකාවේ ණය ප්‍රමාණය දෙගුණ තෙගුණ කළ බවට ද මහින්ද රාජපක්ෂ මහතාගේ ආණ්ඩුවට චෝදනා එල්ල වී තිබෙන අතර එම සමයේ කෙරුණු බොහෝ සංවර්ධන ව්‍යාපෘතිවලදී අල්ලස් ගැනීම් සහ වංචා හා දූෂණ සිදුව ඇතැයි ද චෝදනා එල්ල වී තිබේ. චීනයේ මාවතක් තීරයක් (බෙල්ට් ඇන්ඞ් රෝඞ්-බී.ආර්.ටී) ව්‍යාපෘතිය සමාන්තරව ඉදි කෙරුණු හම්බන්තොට වරාය ඊට හොඳම උදාහරණය යැයි විවේචකයෝ පෙන්වාදෙති.

එම වරාය ඉදි කිරීම සඳහා චීනයෙන් ගත් ණය ගෙවා ගැනීමට නොහැකි වීම නිසා ශ්‍රී ලංකාව 2017 වසරේදී 99 අවුරුදු බද්දක් යටතේ චීනයට වරාය පැවැරීය.

2014 වසරේදී චීනයට අයත් සබ්මැරීන දෙකක් කොළඹ වරායට පැමිණියේය. ඒ සමඟම ඉන්දියාවේ සහ බටහිර රටවල අවධානය ශ්‍රී ලංකාව දෙස වැඩි වැඩියෙන් යොමුවන්නට විය. කලාපය තුළ චීනයේ මැදිහත් වීම, එහි වැදගත්කම සහ චීනය කලාපයට කරන බලපෑම සම්බන්ධයෙන් ඉන්දියාව සහ බටහිර රටවල් කනස්සල්ලෙන් පසුවිය.

“චීනය ශ්‍රී ලංකාවට රාජ්‍ය තාන්ත්‍රික වශයෙන් ආරක්ෂාව ලබා දුන්නා. ඒ වගේම සංවර්ධනයට අවශ්‍ය මුදල් ද ලබාදුන්නා” යැයි විශ්ලේෂකයකු වන පාක්‍යසෝතී සරවනමුත්තු මහතා ප්‍රංශ පුවත් සේවයට පැවැසීය.

ගෝඨාභය රාජපක්ෂ මහතා ජයග්‍රහණය කළහොත් ආයෝජන ආරක්ෂා කරගැනීම සහ ලබාගැනීම සඳහා “සියලු දෙනා සමඟ වැඩ කරන බව” මහින්ද රාජපක්ෂ මහතාගේ තවත් සහෝදරයකු වන හිටපු අමාත්‍ය බැසිල් රාජපක්ෂ මහතා පැවැසීය.

මානව හිමිකම් සම්බන්ධයෙන් ජාත්‍යන්තරයේ තිබෙන විමසිල්ල හා සැලකිල්ල ගැන විමසූ විට “ඔවුන් අපට සාධාරණ අවස්ථාවක් දිය යුතුයි” යැයි බැසිල් රාජපක්ෂ මහතා පැවැසීය.

“ඔවුන්ට මේ රටේ නිරීක්ෂකයෝ වෙන්න බැහැ. ඔවුන් මේ රටේ පාර්ශවකරුවෝ විය යුතුයි” හෙතෙම මාධ්‍යවේදීන් හමුවේ පැවැසීය.