(මනෝප්‍රිය ගුණසේකර)

ගල්ඔය සහ රොටවැව ප්‍රදේශයේදී අලි දෙදෙනකු සහ පැටවුන් 4 දෙනකු දුම්රියක ගැටී මරණයට පත්වීමේ සිද්ධිය සම්බන්ධයෙන් පූර්ණ විමර්ශනයක් පැවැත්වීමට වනජීවී අධ්‍යක්ෂ ජනරාල්වරයාට සහ දුම්රිය සාමාන්‍යාධිකාරිවරයාට නියෝගයන් නිකුත් කරන්නැයි ඉල්ලා පාරිසරික යුක්ති කේන්ද්‍රය මූලික අයිතිවාසිකම් පෙත්සමක් ශ්‍රේෂ්ඨාධිකරණයට අද (03) ගොනු කළේය.

වනඅලි දුම්රියේ ගැටී මරණයට පත්විම වැළැක්වීම සඳහා අවශ්‍ය මාර්ග උපදේශන මාලාවක් සකස් කරන ලෙසද පෙත්සම්කරුවන් ශ්‍රේෂ්ඨාධිකරණයෙන් ඉල්ලා සිටී.

පාරිසරික යුක්ති කේන්ද්‍රය ගොනු කොට ඇති පෙත්සමේ වගඋත්තරකරුවන් වශයෙන් දුම්රිය සාමාන්‍යාධිකාරීවරයා සහ වනජීවී අධ්‍යක්‍ෂජනරාල්වරයා ඇතුළු පිරිසන් නම් කර ඇත.

ශ්‍රී ලංකාවේ ජීවත්වන වන අලියා ආසියානු අලියාගේ උප විශේෂයක් බවත් එම අලියා ශ්‍රී ලංකාවට පමණක් ආවේණික සත්වයකු බවත් ලංකාවේ ජීවත්වන වන අලියා වඳවීමේ තර්ජනයට දැඩිව ලක්වී සිටින බවත් සඳහන් කරන පෙත්සම්කරු විවිධ හදිසි අනතුරු හේතූවෙන් අලි ගහනය ක්‍රමක්‍රමයෙන් අඩු වෙමින් පවතින බවද සඳහන් කර ඇත.