( තිළිණි ද සිල්වා )

ජාත්‍යන්තර ගුවන් සමගම් 07 ක් මේ වසර අවසන් වීමට පෙර ශ්‍රී ලංකාව හා සෘජු ගුවන් සේවා ඇරඹීමට නියමිත බව සංචාරක අමාත්‍ය ප්‍රසන්න රණතුංග මහතා ඊයේ පැවසීය.

මේ අතුරින් ගුවන් සමාගම් 05 ක් දැනටමත් කටුනායක ගුවන් තොටුපළට සිය මෙහෙයුම් සිදු කිරිමට එකගත්වය පළ කර ඇති අතර ඒ අනුව රුසියානු ගුවන් සමාගමක් වන අසූර් එයාර් ගුවන් සමාගම ලබන 11 වන දා සිට ද, ඉතාලියේ නියෝස්  , බංග්ලාදේශයේ බංග්ලා එයාර්ලයින්ස් හා  ප්‍රංශයේ එයාර් ෆ්‍රාන්ස් යන ගුවන් සමාගම නොවැම්බර් 01 වැනිදා සිටිද ,   රුසියාවේ තවත් ඒරෝෆෝල්ට් ගුවන් සමාගම නොවැම්බර් 04 වන දා සිටත් , කටුනායක ගුවන්තොටුපළ වෙත   සෘජු ගුවන් ගමන් ආරම්භ කිරීමට සැලසුම් කර ඇතැයි ද සංචාරක අමාත්‍යවරයා කීය.

මීට අමතරව ඊශ්‍රාලයේ අර්කියා  ගුවන් සමාගමත්, ස්විස්ටර්ලන්තයේ ස්විස් එයාර ගුවන් සමාගමත් ශ්‍රී ලංකාව සමග සෘජු ගුවන් ගමන් ආරම්භ කිරිම කෙරෙහි කැමැත්තෙන් පසු වන බවත් පෙන්වා දුන් අමාත්‍ය ප්‍රසන්න රණතුංග මහතා ඉදිරියේ දි ඒ සම්බන්ධයෙන් ඉදිරි ක්‍රියාමාර්ග ගනු ලබනු බවද කියා සිටියේය.

මේ වන විට කටුනායක ගුවන් තොටුපළට ගුවන් සමාගම් 16 ක් ගුවන් මගී මෙහෙයුම් සිදු කරන අතර එම  ගුවන් තොටුපළට භාණ්ඩ මෙහෙයුම් සිදු කරන ගුවන් සමාගම් ගණන 08 ක් හා තවත් ගුවන් සමාගම් 04 ක් කටුනායක ගුවන් තොටුපළට මගීන් රැගත් විශේෂ ගුවන් ගමන් සිදු කරනු ලබන බවද හෙතෙම කීවේය.

මේ අතර මත්තල ගුවන්තොටුපල සදහා ද ජාත්‍යන්තර ගුවන් ආයතන 04ක් නව මෙහෙයුම් ආරම්භ කිරීම පිළිබදව අවධානය යොමුව තිබේ. මේ පිළිබදව සාකච්ඡා කරමින් තිබෙන බවත්, ඇමතිවරයා පෙන්වා දුන්නේය.

සෞඛ්‍ය මාර්ගෝපදේශ ලිහිල් කිරීමත් සමග සංචාරකයන් වැඩි වශයෙන් මෙරටට පැමිණෙනු ඇතැයි රජය අපේක්ෂා කරන අතර දැනටමත් සංචාරක සංවර්ධන අධිකාරිය යුරෝපා රටවල් ආශ්‍රිතව විශේෂ සංචාරක ප්‍රවර්ධන වැඩසටහන් කීපයක් ක්‍රියාත්මක කරන බවද සංචාරක අමාත්‍ය ප්‍රසන්න රණතුංග මහතා කියා සිටියේය.

එළඹෙන සීත සෘතුවේ දි යුරෝපා සංචාරකයන් වැඩි වශයෙන් මෙරටට ගෙන්වා ගැනීමේ අරමුණෙන් එම රටවල් ආශ්‍රිතව සිදු කෙරෙන සංචාරක ප්‍රදර්ශන, ක්‍රියාකාරකම් මෙන්ම එම රටවල මාධ්‍ය හා සමාජ මාධ්‍ය වැඩසටහන් මගින් ශ්‍රී ලංකාව පිළිබද පුළුල් ප්‍රචාරයක් මේ දිනවල සිදු කෙරෙන බවද අමාත්‍යවරයා වැඩිදුරටත් කියා සිටියේය.